أظن لو أنا جيت قلتلك إن إحنا بقينا مجتمع استهلاكي فدي مش حتبقي معلومة جديدة عليك .. إنزل أي سوبرماركت كبير وبعينك كده بص علي اللي الناس شارياه حتلاقي بنسبة كبيرة منتجات ملهاش أي ستين لازمة .. بس الحقيقة اللي كتير من اللي حولينا مش قادرين يفهموها إن كتير من المنتجات اللي حولينا اللي إحنا بنبعزق فلوسنا عليها ممكن نعيش من غيرها عادي خالص .. أنا شخصياً من جيل الثمانينات اللي قضي من عمره سنين قبل الإختراع المهبب اللي اسمه موبايل .. عشت مدة أكتر قبل ما يبقي عندي كومبيوتر .. عدي علي مصر فترة مكنش فيها حاجة اسمها سوشيال ميديا ولا جوجل أو يوتيوب .. بس يبقي البشر فعليا ميقدروش يعيشوا من غير 4 مواد حضارتنا كبني أدمين مينفعش تعيش من غيرهم وصدقني لو قلتلك إن علي الأقل إتنين من الأربعة حيخلوك مستغرب .. الأسمنت .. حديد التسليح .. البلاستيك .. الأمونيا.
الأرقام لوحدها مرعبة .. البشر سنوياً بينتجوا 4.5 مليار طن أسمنت .. بننتج في السنة 1.8 مليار طن حديد تسليح .. بسم الله ما شاء الله علينا بننتج في السنة 400 مليار طن بلاستيك و 180 مليار طن أمونيا .. بس زي ما قلت في المقدمة تبقي الأمونيا هي أهم مادة من الأربعة ويمكن أكتر مادة فيهم مش حتكون جت في ماغك وحعذرك الحقيقة لو تخيلت إنها اقل مادة فيهم ليها لازمة .. من غير أمونيا مش حيبقي فيه أسمدة زراعية ومش حنلاقي ناكل .. إحنا كبشر كترنا لإننا داخلين إن مكناش وصلنا فعلياً ل8 مليار نسمة فمستحيل نلاقي أكل يكفي الناس دي كلها من غير سماد اليوريا مثلاً اللي أهم مادة داخلة فيه هي الأمونيا .. في الصين مثلاً من غير الأمونيا فإتنين من كل خمس بني أدمين عايشين هناك حيموتوا من الجوع .. ده معناه إن الأمونيا هي المادة الأهم وسط الأربع عمدان بتوع الحضارة الإنسانية .. طب وباقي الأعمدة وضعهم إيه؟
لو إنت وإنت بتقرأ اللي أنا كاتبه ده قاعد علي لاب توب فأنا عايزك تعرف إن اللابتوب بتاعك ده مكنش حيتصنع أصلاً لولا مادة اسمها أكريلونتريل بوتايين ستايرين Acrylonitrile Butadiene Styrene .. إنت لابس تيشيرت مصنوع من البولييستر .. بتشرب نسكافية من ماج مصنوع من البلاستيك .. بإختصار حياتك كلها بلاستيك .. بس لو عايز تعرف فعلاً إزاي حياتنا كلها بقت بلاستيك روح مستشفي .. من أول حضانة الأطفال لحد أوض العناية المركزة حتلاقي نفسك في مكان كله معمول من الPVC اللي هي المادة اللي بتتعمل منها مواسير الصرف بتاعة بيتكوا.
طول ما إنت ماشي في الشارع إنت شايف حديد تسليح وأخواتها من الصلب والستانليس ستيل .. بيوت .. كباري .. عمارات .. عربيات .. عشان بس تستوعب قد إيه الصلب بقي حاجة إحنا منقدرش نعيش من غيرها بص علي أي عربية ماشية في الشارع .. أي عربية جديدة في المتوسط يعني عشان تتعمل بتحتاج تحط فيها 900 كيلوجرام من الصلب .. حلو .. لحد سنة 2020 وقبل ما العالم يقعد في البيت بسبب الحظر اللي إتفرض بسبب فيروس كورونا فالعالم كان بينتج 100 مليون عربية في السنة .. تخيلت قد إيه صلب كان بيروح في صناعة السيارات بس؟
متهيألي إن إحنا في مصر من كتر ما بنينا كباري في الكام سنة اللي فاتوا فحياتنا بقت عبارة عن خلاطة أسمنت كبيرة .. عشان تبني أي حاجة إنت محتاج خرسانة وعشان تعمل خرسانة لازم يبقي عندك أسمنت وزلط ورملة ومياه .. بس عايزك تعرف معلومة .. شايف استهلاك مصر من الخرسانة ده قد إيه .. أهو ده ميجيش حاجة جنب اللي بتعمله الصين .. الصين بتسف الأسمنت ولا كأنه هروين .. يمكن أكتر من نص الإنتاج العالمي من الأسمنت جاي من الصين .. من عشر سنين اللي فاتوا نقيلك أي سنتين .. أي سنتين يعجبوك .. نقول مثلاً 2016 و 2017 .. خلال السنتين دول الصين أنتجت أسمنت أكتر من اللي أنتجتهم أميركا في القرن العشرين كله .. ومش بس الصين اللي بتسف الأسمنت .. العالم دلوقتي في سنة واحدة بيستهلك كمية أسمنت قد اللي كان العالم كله بيستهلكها من الفترة من 1900 لحد سنة 1950 .. يعني السنة الواحدة دلوقتي بخمسين سنة زمان.
في الأخر عايزك تعرف 3 حاجات .. المواد الأربعة دول ملهمش بدايل .. البشر حيفضلوا يستهلكوا فيهم بكميات حتفضل تزيد مع الوقت .. المواد الأربعة عشان تنتجهم إنت بتحرق كمية بنزين إنت ممكن متبقاش قادر تتخيلها .. إنت عشان تنتج أمونيا فالمادة الخام ليها هو الميثان يعني الغاز الطبيعي وبتحتاج درجة حرارة وضغط مش بيوفرها غير الغاز الطبيعي .. البلاستيك ده الاسم اللي محدش بيتضايق منه عكس اسمه الحقيقي وهو صناعة البتروكيماويات لدرجة إن 85% من البلاستيك اللي موجود في السوق إتصنع من البترول .. عشان تصنع صلب فإنت محتاج فرن وعشان تولع الفرن ده فإنت يا بتحرق فحم يا غاز طبيعي .. نفس الكلام مع الأسمنت اللي بيحتاج فرن كبير شوية .. عشان كده 17% من إجمالي الطاقة اللي بيحرقها العالم كل سنة بتروح عشان ننتج المواد الأربعة دول .. حوالي 25% من إجمالي غاز ثاني أكسيد الكربون اللي في الجو السبب فيه هو إنتاج الأربع مواد دول.
المصادر:
- مقالة بعنوان The Modern World Can’t Exist Without These Four Ingredients. They All Require Fossil Fuels نشرت في مجلة TIME وده لينك المقالة الأصلية:
https://time.com/6175734/reliance-on-fossil-fuels/
