عمرك سألت نفسك إنت بتهبب إيه في عيشتك علي السوشيال ميديا؟ .. أنا بسألك رجل لرجل دلوقتي .. إنت عامل أكونت علي فيسبوك و أنستاجرام و لينكيد إين و ممكن تيك توك كمان .. ليه كل ده؟ .. ممكن يكون ردك عشان تتسلي .. ممكن يكون ردك إنك عايز تبقي عارف الدنيا بيحصل فيها إيه .. بس صدقني لو قلتلك إن السبب ورا إنك قاعد علي كل برامج السوشيال ميديا دي هي إنك عايز حاجة من إتنين .. يا عايز تشقط بنات .. يا عايز تلاقي شغل .. من الأخر الغالبية العظمي من البني أدمين سبب أساسي من قعدتهم علي السوشيال ميديا هو إنهم عايزين حاجة .. إنت بتبقي عايز حاجة فبتروح تطلبها .. قليلين أوي اللي بيتعاملوا علي سوشيال ميديا بمعناها السامي اللي هو عشان نتطمن علي بعض .. أنا مش بكلمك عشان عايز منك حاجة .. أنا بكلمك عشان أبلغك إنك واحشني .. أهنيك علي حاجة حلوة حصلت في حياتك .. أتطمن علي أخبارك .. يبقي ربنا بيحبك لو إنت كنت من القلة دي و لقيت حد زيك .. تبقوا إتنين من جواكوا طيب لإن الجانب الإستهلاكي من السوشيال ميديا مش محوق فيكوا .. أنتوا إتنين علاقتكوا بدأت صحيح علي البكابورت الطافح اللي إسمه فيسبوك بس لحسن الحظ الفيسبوك موسخش الطيبة اللي جواكوا .. ليه المقدمة الرومانسية دي؟ .. لإن دي حضرتك بداية الصداقة اللي تحولت لشراكة و يمكن في يوم الأيام الشراكة دي تلاقيها بترفع كاس الدوري الإنجليزي الممتاز أو حتي دوري أبطال أوروبا .. دي بداية حلم نادي ريكسام لكرة القدم Wrexham AFC.
(ريان رينولدز Ryan Reynolds) من الشخصيات اللي ربنا كرمها متأخر بس عشان يبقي عنده النضج الكافي إنه يقدر النعمة اللي هو فيها .. ده الممثل اللي إنت ممكن تكون عارفه من تجسيدة لشخصية (وايد ويلسون Wade Wilson) في سلسلة Deadpool .. هو واحد من أشهر نجوم الشباك في هوليوود .. مجرد إن إسمه يتحط علي أفيش فيلم كافي إن الفيلم يكسر الدنيا .. بس زي ما قلتلك هو مبقاش كده من يوم و ليلة .. كم القرارات الغلط و المصايب اللي هو عملها خلته بقي عنده النضج إنه لما يشوف حد عمل حاجة حلوة يقوم ماسك موبايله باعتله علي الواتس الله ينور يا ريس علي شغلك حاجة فخيمة و الله .. ده مش حتلاقيه في ناس كتير خلي بالك .. قولي أخر مرة في شغلك إنت طلعت تسليمة صعبة زي الفل و جالك زميلك قالك تسلم الأيادي .. مش حيحصل .. و لو حصل إمسك في زميلك ده بإيديك و سنانك لإنه من الشخصيات النظيفة القليلة في الدنيا .. في يوم (ريان) كان بيتفرج علي التليفيزيون و بالصدفة شاف حلقة من مسلسل كوميدي إسمه Its Always Sunny in Philadelphia اللي بيكتبه و بينتجه و بيخرجه و بيمثل فيه واحد إسمه (روب ماكليني Rob McElhenney) .. تقدر تقول (روب) ده يبقي (تامر حسني) لو كان (تامر حسني) بيفهم .. المهم .. الحلقة كانت في الموسم ال13 و إتعرضت سنة 2018 عجبت (ريان) جداً اللي قرر يمسك موبايله و يبعت ل(روب) يقوله الله ينور .. الحلقة كان فيها رقصة مدتها 5 دقايق بس إحتاجت عشان تتصور تحضير و شغل إستمر 7 شهور كاملة .. و من ساعتها و الإتنين بقوا صحاب .. صحاب مش عايزين من بعض مصلحة فمش كل يوم يتكلموا .. صحاب لما حد فيهم بيعمل حاجة حلوة التاني يبعتله الله ينور.
جري الشريط لليوم اللي الصحوبية النظيفة دي بتقلب علي شراكة ولإن الشراكة دي بين إتنين متربيين فالشراكة دي كبرت و متوقع ليها إنها تفضل تكبر .. في يوم (روب) بعت إيميل ل(ريان) بيقوله فيها أنا بفكر أشتري نادي كرة قدم .. الفكرة مش في كده .. الإيميل كان باين فيه إن (روب) مذاكر كويس .. هو محدد النادي اللي حيشتريه و بكام .. النادي كان ريكسام الرياضي لكرة القدم و ده نادي ويلزي بيلعب في دوري الدرجة الخامسة بقالهم 15 سنة مش عارفين يتأهلوا لدوري الدرجة الرابعة و مطلوب فيه 2 مليون جنيه إسترليني كاش .. يعني ده نادي بيلعب مش في دوري المظاليم ده دوري الأندية اللي الدنيا دايسة عليهم جامد .. السكة كانت واضحة زي الشمس ل(روب) .. كل سيزون نحارب عشان نتأهل للدوري الأعلي لحد ما نوصل لدوري المظاليم في إنجلترا اللي بيسموه Championship و لو ربنا كرمهم من وسع يتأهلوا للدوري الإنجليزي الممتاز Premier League و ساعتها طاقة القدر حتكون إتفتحت ليهم .. بس زي ما النجاح بيجيب فلوس حلوة فالفشل بيفشخ الدنيا .. سنة 2010 فيه نادي إسمه بلاكبول Blackpool FC قصته كانت شبه القصة اللي عايز (روب) يعملها مع ريكسام إن بلاكبول إتأهل للدوري الممتاز .. جري الشريط 3 سنين كان النادي أعلن إفلاسه بعد ما هبط لدوري المظاليم .. جري الشريط 6 سنين و كان النادي بيلعب في دوري الدرجة الرابعة .. المهم .. في نوفمبر 2020 (روب) و (ريان) أسسوا شركة إسمها RR McReynolds Company LLC و دي اللي رسمياً و علي الورق بتملك نادي ريكسام الرياضي.
مهم تبقي فاهم الإختيارين اللي عملهم (روب) جم منين .. ليه ريكسام؟ .. و إشمعني (ريان رينولدز)؟ .. ريكسام ده نادي قديم .. نادي معتق .. الإستاد بتاعهم هو ثاني أقدم إستاد كرة قدم في تاريخ البني أدمين .. ريكسام نفسها بلد صغيرة يدوبك فردة كعب من مدينة ليفربول و ده بيحطها تقريباً علي الحدود بين إنجلترا و ويلز .. و ده حيحطك قصاد الإختيار الثاني .. ليه (ريان)؟ .. (ريان رينولدز) غير إنه نجم شباك زي ما قلنا إلا إنه أثبت نفسه كبينزس مان ناجح جداً .. ناس كتير متعرفش إن عنده شركة موبايلات إسمها Mint Mobile و عنده شركة خمور إسمها Aviation Gin .. قصة شراء (روب ماكيليني) و (ريان رينولدز) لنادي ريكسام أنا شايفها تستحق إنك تعرفها لسبب و هو إن الموضة دلوقتي إنك تلاقي ناس معاها فلوس رايحة تشتري أندية كرة قدم .. دلوقتي فيه دول معاها فلوس بتروح تشتري أندية كرة قدم .. قطر شارية باريس سانجيرمان .. أبوظبي شارية مانشستر سيتي .. السعودية شارية نيوكاسل يونايتد .. بس يمكن تقديري الشخصي لو قصة ريكسام دي نجحت فإحنا كمشجعين كورة حنقف كتير قدامها .. خلي بالك إنت كمشجع مش حتسمع إسم ريكسام ده دلوقتي خالص لإنهم بيلعبوا في دوري الدرجة الخامسة يعني لو الدنيا مشيت معاهم زي السكينة في الجاتوه مش قبل خمس سنين عشان تسمع إسمهم ضمن جدول ترتيب الدوري الإنجليزي الممتاز.
المصادر:
- مقالة بعنوان Ryan Reynolds reveals how watching a Rob McElhenney dance sequence and an out-of-the blue email about building a ‘global football force’ led to the duo buying non-league Wrexham نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-11120767/Ryan-Reynolds-reveals-bought-Wrexham-Rob-McElhenney.html - مقالة بعنوان How did Ryan Reynolds wind up co-owning a professional soccer team? He embraced the first rule of networking نشرت في مجلة Inc Magazine و ده لينك المقالة الأصلية:
https://www.inc.com/jeff-haden/how-did-ryan-reynolds-wind-up-co-owning-a-professional-soccer-team-he-embraced-first-rule-of-networking.html
