لو أنا جيت قلتلك إن الشخص الفلاني يبقي رئيس نادي فأيا كان النادي ده مين فعايزك تعرف إن البني أدم ده هو واحد من 3 حاجات .. يا إما واحد معاه فلوس بس هو شايف إن رئاسة النادي ده بيزنس زيه زي رئاسة الشركة كده فتلاقي جاي يعمل مصلحة و مش حتلاقي شاغل باله أوي بهي الجماهير أو المشجعين عايزين إيه لإنه مش جاي عشانهم هو جاي عشان يعمل قرشين .. يا إما هو رجل معاه فلوس بس من جواه هو مشجع كورة قبل أي حاجة فتلاقيه أحياناً كتير بيخش في خناقات ملهاش معني مع الجماهير مش لسبب غير إنه عايز يثبتلهم إن قلبه علي النادي بس بما إن هو اللي معاه الفلوس فكلمته حتمشي علي الناس كلها .. يا إما ده رجل معاه فلوس برده بس هو واخد رئاسة النادي دي منظرة لإنه بس عايز يتقال رئيس النادي راح رئيس النادي جه .. دول الثلاث فئات بتوع أي رئيس نادي في الدنيا بما فيهم ليفربول اللي يا عيني المشجعين بتوعه صحيوا الصبح علي خبر غريب جداً إن الشلة اللي ماسكه النادي قررت تبيعه و ده اللي إحنا عايزين نتكلم عنه النهاردة .. الموضوع ده لإن كتير من الكلام حوليه مبني علي تكهنات و تخمينات اللي هي الكلمة المؤدبة اللي بتشرح معني كلمة هبد فخلينا يبقي كلامنا قائم أولاً و أخيراً علي المعلومات اللي في إيدينا .. الهبد حنقولك إنه هبد و إننا في الحتة دي بنشم علي ظهر إيدنا.
خلينا نبدأ بالأساسيات .. إذا كان رئيس نادي ريال مدريد هو (فلورنتينو بيريز Florentino Perez) و رئيس النادي الأهلي هو كابتن (محمود الخطيب) فنادي ليفربول مختلف شوية لإنه ملوش رئيس نادي في هيئة شخص واحد .. اللي ماسك النادي هم شلة من رجال الأعمال مسميين نفسهم فينواي سبورتس جروب Fenway Sports Group و إختصاراً بيتقال عليهم FSG .. دي أول معلومة .. تاني معلومة و دي مهمة جداً إن مش معني إن حضرتك عايز تبيع حاجة إن بالضرورة ده معناه إنك حتبيعها فعلاً .. إنت لما بتبيع حاجة بتبقي مستني فيها سعر معين و لو ملقتهوش فإنت مش حتبيع .. صحيح إن الكلام الرسمي اللي علي الورق إن FSG وكلوا مكتبين محاماة علي أعلي مستوي اللي هم جولدمان ساكس Goldman Sachs و مورجان ستانلي Morgan Stanley فأرجع و أقولك إن ده مش معناه إن النادي فعلاً حيتباع .. نيجي بقي لأهم نقطة .. هو يا تري FSG إشتروا ليفربول ليه من الأساس عشان يقرروا يبيعوه دلوقتي؟
عشان تفهم النقطة دي تخيل إن إنت و معاك شوية صحابك كل واحد فيكوا معاه قرشين قررتوا إنكوا تتشاركوا سوا و تشتروا حتة أرض .. كلنا عارفين إن سعر العقار في مصر زيه زي سعر الطماطم ملوش أي منطق يحكمه .. لو حتة الأرض دي بقرش فممكن بكره الصبح تلاقيها بقرشين من غير أي مبرر يفهمه مخ البني أدمين .. شراء العقار في مصر هو بيزنس حلو جداً عشان تستثمر فلوسك .. لو فهمت الحتة دي حتفهم ليه FSG إشتروا ليفربول .. بالنسبة ليهم النادي كان حتة الأرض اللي هم حطوا فيها فلوسهم .. سنة 2010 الناس دي دفعت كاش 300 مليون جنيه إسترليني عشان يشتروا النادي و في رأيي علي الأقل ده كان مبلغ حلو جداً تدفعه عشان تشتري تاني أعرق نادي فيكي يا إنجلترا .. جري الشريط 12 سنة و تلاقي في شهر مايو 2022 مجلة فوربس Forbes الأميريكية قيمت قيمة نادي ليفربول ب3.6 مليار جنيه إسترليني .. إنت متخيل الرقم؟ .. ده كإن حتة الأرض اللي إنت إشترتها إنت و صحابك دفعتوا فيها 300,000 جنيه و بعد 12 سنة سعرها وصل 3 مليون جنيه .. و مع كل نجاح و مع كل بطولة و مع كل مرة ليفربول بيحط نفسه كواحد من أحسن الفرق مش بس في إنجلترا إنما في العالم كله كانت الزباين بتتلم حول FSG عشان تجس نبضهم .. هو أنتوا بتفكروا تبيعوا؟
- سنة 2015 فيه وفد من FSG راح الصين يدور علي شركة عايزة تدفع فلوس عشان تاخد حق تسمية مدرج الدرجة الثالثة في إستاد الانفيلد بتاع الفرقة بس السفرية طلعت فنكوش و ملقوش شركة مناسبة مستعدة تحط المبلغ اللي FSG كانت عايزاه.
- سنة 2016 فيه شركة إسمه ساينوفورتون Sinofortone و دي تبقي شركة مقاولات صينية عملاقة كلمت (جون دبلو هنري John W. Henry) أكتر واحد حاطط فلوس في شراء ليفربول من ضمن الشلة بتاعة FSG عشان يشتروا منه النادي بس تقدر تقول إن (جون هنري) حس إنهم هجاصين فطنشهم و البيعة متمتش.
- سنة 2018 تاني أكتر واحد حط فلوس في شراء النادي من ضمن شلة FSG و يبقي إسمه (توم فيرنر Tom Werner) بدأ بشكل جدي يتكلم مع الشيخ (خالد بن زايد أل ناهيان) اللي كان عايز يشتري النادي ب2 مليار دولار .. في حالة إنك بتشبه علي إسم الشيخ (خالد) ده فإحب أقولك إنه يبقي الإبن الكبير للشيخ (محمد بن زايد أل ناهيان) رئيس دولة الإمارات العربية المتحدة .. الصفقة باظت لما غالباً الناس بتوع جولدمان ساكس و مورجان ستانلي تقدر تقول عملوا فيش و تشبيه للحسابات البنكية بتاعة الشيخ (خالد) لقوه معهوش السيولة إنه يدفع المبلغ ده.
مهم تبقي فاهم إن من أول يوم و الإتفاق إن لما يتقدم السعر المناسب فالنادي حيتباع .. ده معناه إيه؟ .. معناه إن طول السنين اللي فاتت ولا واحد من الشلة بتاعة FSG فكر أو إتجرأ إنه يحط دولار واحد من ميزانية النادي في جيبه .. معناه إن FSG متتردوش يصرفوا 80 مليون جنيه إسترليني علي تطوير إستاد الأنفيلد عشان يقدر يستوعب 61,000 متفرج .. معناه إنهم يبعزقوا 50 مليون جنيه إسترليني علي تطوير مجمع التدريبات بتاع النادي .. ليه؟ .. إحنا صحيح بنصرف بس لما يجي اليوم و النادي يتباع فكل الفلوس دي حترجع تاني أضعاف.
بس خليني أبقي صريح معاك .. لو فعلاً أنا إكتفيت في تبريري للسبب ورا قرار FSG إنهم يبيعوا النادي دلوقتي لمجرد إنه لو إتباع حيجيب فلوس حلوة فانا كده ساذج الصراحة .. أه منكرش إن العائد المادي له عامل بس أكيد فيه أسباب تانية .. الناس اللي معاها فلوس زي (جون هنري) و (توم فيرنر) وصلوا للي وصلوا ليه ده بإنهم كانوا بيمصوا دم الحاجة اللي بتجيبلهم فلوس .. يا تري إيه اللي خلاهم يبصوا لبعض و يقولوا لنفسهم قضيت كده؟
- أول سبب يمكن هو فشل فكرة السوبر لييج European Super League .. أنا مش الناس اللي بتحب (فلورينتينو بيريز) خليني أبقي صريح مع نفسي و أقول إنه أرجل رئيس نادي فيكي يا أوروبا و يمكن لو رؤساء الأندية الكبار اللي كانوا في الأول في ظهره أول ما قال فكرة السوبرلييج كانوا فعلاً رجاله مكنش ده بقي حالهم دلوقتي .. ليفربول حيتباع .. يوفينتوس في مصيبة و لسه حنشوف أندية بتشرب المر بشاليموه في السنين الجايه.
- تاني سبب و يمكن هو سبب مهم جداً إن لوايح اللعب النظيف Financial Fair Play أو FFP ثبت أنها بتتنفذ علي الأندية اللي علي الله حكايتها لكن المعلمين التقال اللي معاهم فلوس محدش بيقولهم تلت التلاتة كام .. أندية زي ميلان تتعاقب بس الباشاوات بتوع مانشستر سيتي و باريس سانجيرمان يبعزقوا براحتهم .. يا مؤمن ده حتي لما طلع قرار بطرد السيتي بره بطولة Champions League سنة 2020 القرار إتلغي في الإستئناف .. حاول تفهم إن صحيح خلال العشر سنين اللي فاتوا ليفربول و ليستر سيتي كل واحد فيهم خد الدوري مرة بس في نفس الوقت خلال العشر سنين دول ليفربول دايماً بينافس و في مرتين خسر الدوري بفرق نقطة .. إنك تفضل تقاوم و تقف و تنافس ناس ضلالية زي اللي ماسكين السيتي فده بيحرق فلوس .. لو الكيان اللي المفروض يحميك مش شايف شغله فسهل إنك تبص لنفسك في المراية و تقول مفيش فايدة يا (صفية).
- بس يمكن أهم سبب هو البداية اللي زي الزفت للفرقة الموسم ده .. فيه إحتمال مش ضعيف إن ليفربول ميتأهلش السنة الجاية لدوري أبطال أوروبا و لو ده حصل فحنفية الفلوس اللي بتخش للنادي حتتقفل و لو ده حصل فمش بعيد FSG يقرروا يبيعوا النادي و بسرعة .. إسأل أي حد بيتفرج علي كورة تفتكر الفرقة محتاجة إيه حتلاقيه بيقولك عايزين مهاجم بدل المعاق (داروين نونييز Darwin Nunez) و عايزين إتنين لاعيبة خط وسط و فيه كلام كتير علي (جود بيلينجهام Jude Bellingham) و (إينزو فيرنانديز Enzo Fernandez) و عايزين قلب دفاع .. ده اللي الفرقة محتاجاه و بسرعة .. أربع لاعيبه مش بعيد يتكلفوا شاكب راكب فوق المتين مليون جنيه إسترليني.
تقديري الشخصي قرار بيع النادي من عدمه حيتأجل لأخر الموسم .. دلوقتي إنت عندك إحتمالين .. لو ليفربول عرف بقدرة قادر إنه يتأهل لدوري الأبطال فساعتها ممكن FSG عشان يمولوا عملية إعادة تأهيل الفرقة و خصوصاً خط النص يبيعوا جزء أو حصة من أسهم النادي زي ما السيتي عملوا لما باعوا حصة من أسهم City Sports Group للمستثمرين صينيين .. المشكلة لو الفرقة فعلاً فشلت إنها تبقي ضمن التوب فور .. ساعتها فعلياً مش حستبعد إن تاني يوم علي طول تسمع خبر إن النادي إتباع.
المصدر:
- مقالة بعنوان Liverpool for sale: Why are FSG doing it, who could buy and what now for Klopp? نشرت في مجلة The Athletic و ده لينك المقالة الأصلية:
https://theathletic.com/3772352/2022/11/08/liverpool-fsg-takeover-jurgen-klopp/
