إحنا كبشر دلوقتي عندنا إحساس مسيطر علينا إن عدد البني أدمين علي الأرض بيزيد بشكل لا يمكن التحكم فيه .. إحنا في مصر هنا الأسطوانة المشروخة اللي في بق الحكومة من أيام الرئيس (محمد حسني مبارك) الله يرحمه إننا كترنا و إن الحكومة مش حتعرف توفر لا أكل ولا شرب ولا علاج للناس دي كلها .. الحقيقة إن من التسعينات و التريند اللي ماشي في الدنيا إن عدد البشر بيزيد .. فيه دول زي الصين و الهند كسرت حاجز المليار بني أدم بس يمكن الموجة الجديدة من الزيادة السكانية حتكون في أفريقيا .. في بلد زي النيجر مثلاً الست هناك ولا كأنها أرنبة في المتوسط بتخلف 6 أطفال بسم الله ما شاء الله .. بس علي الناحية الثانية فيه الوش الثاني من الشريط اللي محدش بيتكلم عنه كتير و هي إن فيه دول كتير بتفضي مننا .. فيه دول لو سكتت علي حالها الناس اللي فيها حتلعب لعبة The Last of Us بحق و حقيقي.
تعالي بص علي أكثر عشرين دولة متوقع إن عدد سكانها يقل خلال الفترة من سنة 2020 لحد 2050 وفق أرقام الأمم المتحدة و قولي إنت شايف إيه .. إنت بتتكلم عن 20 بلد علي مستوي العالم متوقع إن عدد الناس اللي عايشين فيهم يقلوا منهم 14 بلد يعني الغالبية العظمي هي دول في شرق أووربا و دول كانت زمان جزء من الإتحاد السوفيتي اللي هم بلغاريا و ليتوانيا و لاتفيا و أوكرانيا و صربيا و البوسنة و كرواتيا و مولدوفا و ألبانيا و رومانيا و أستونيا و جيورجيا و بولندا و المجر .. فيه عندك 4 دول بس من وسط و غرب أوروبا اللي هم اليونان و مقدونيا الشمالية و البرتغال و إيطاليا .. عندك بلد يتيمة في أسيا اللي هي اليابان و بلد يتيمة في الأميريكيتين اللي هي كوبا .. ده معناه إن فعلياً إنت عندك 3 حالات محتاجين نتكلم عنهم و نفهمهم كويس:
الحالة الأولي .. ليه دول شرق أوروبا بطلت تخلف؟
المشكلة الحقيقية هي معدلات الخلفة أو Birth Rates و اللي بناء علي أرقام معهد إحصاء اسمه معهد بيتيرسون للإقتصاد العالمي Peterson Institute for International Economics أو PIIE إختصاراً إن سنة 1988 في المتوسط الست اللي كانت عايشة في الإتحاد السوفيتي كانت بتخلف 2.1 طفل في حياتها و ده يدوبك معدل خلفة يخلي التعداد السكاني لا يزيد ولا يقل و حيفضل ثابت .. سنة 1998 بعد إنهيار الإتحاد السوفيتي معدل الخلفة في شرق أوروبا عموماً وقع و بقي في المتوسط 1.2 .. المشكلة فين .. المشكلة إن اللي بيحكم دول شرق أوروبا دلوقتي هم شلة بلطجية متطرفين محسوبين علي التيار اليميني شايفين إن بلدانهم مش محتاجة تفتح أبوابها للهجرة علي أساس إن ده حيدمر التوازن المجتمعي للدول دي .. المبرر ده هو الطريقة الشيك اللي بتتقال في التليفيزيون عشان الناس متركبناش الغلط .. الطريقة الدوغري هي إن دي ناس عنصرية مش عايزة حد لون بشرته أسمر يعيش عندهم .. تيجي تشوف الأرقام بتاعة الزيادة السكانية المتوقع تكتشف إن دولة زي المجر مثلاً ماسكها واحد لسانه زفر زي (فيكتور أوربان Vector Urban) معدل الخلفة لستاتها مش مكفي إنه يعوض معدل الوفيات و معدل الهجرة للمجريين اللي بيسيبوا بلدهم و بيمشوا .. الناس بتاعة PIIE بتقول إن سنة 2016 فيه 6.3 مليون بني أدم أساساً من شرق أوروبا سابوا بلادهم و هاجروا لدول تانية سواء في غرب أوروبا أو أميركا .. الحكام الديكتاتوريين اللي متبتين في الكراسي في الدول دي فضلوا يخوفوا الناس لحد ما في الأخر مش حيبقي فيه ناس عايشين في البلد عشان يحكموهم.
الحالة الثانية .. اليابان خلاص دخلت في سكة اللي بيروح مبيرجعش:
الوضع في كوكب اليابان الشقيق فعلاً كارثي .. هم من سنة 1970 و هم حاسين إن معدل الخلفة عندهم عمال يقل .. سنة 2010 الأرقام أثبتت فعلاً إن تعداد سكان اليابان بدأ يروح في داهية .. سنة 2021 إتولد 811,604 طفل جديد في اليابان قصاد وفاة 1.44 مليون شخص .. سنة 2023 اليابان فيها أعلي نسبة بني أدمين عندهم 49 سنة علي مستوي العالم .. الإتهام اللي غالباً حتسمعه بيتوجه للشباب الياباني سواء من الحكومة أو من أهالي الشباب دول إن عيال اليومين دول مبقوش عايزين يتجوزا و إن البنات بقي كل همها إنها تمشي ورا الكاريير بتاعها و تبقي سترونج إيندبيندت وممان .. بس المشكلة اللي محدش بيجيب سيرتها معرفش ليه الحقيقة هو إن المجتمع الياباني يشبه بشكل كبير المجتمعات العربية في حتة إن الرجل في المجتمعين هو اللي مُتوقع منه إنه ينزل يشتغل و يصرف علي البيت أو اللي إحنا في مجتمعنا العربي بنسميه قوامة الرجل .. المشكلة إن الاقتصاد الياباني مش بيوفر شغلانات مرتباتها عالية بالمعدل اللي إنت متخيله و مع ارتفاع مستوي المعيشة و كل بنت بقت عايزة لما تتجوز بشكل ما تعيش في نفس المستوي الاجتماعي اللي باباها و مامتها عيشوها فيه بعد فوق الثلاثين سنة شغل تكتشف إن كتير من الرجاله اليابانيين زي ما يكون شالوا فكرة الجواز من دماغهم لإنهم بقوا شايفين إن بمنتهي البساطة مفيش فايدة.
اليابان اللي بتتصنف علي إنها من أقوي إقتصاديات العالم و اللي علي الورق نسبة البطالة فيها أقل من 3% و دي أرقام من حق الحكومة هناك إنها تحطها في وش أي حد ينتقد أداءها الاقتصادي بس في نفس الوقت الأرقام دي مش بتقول الحقيقة كاملة .. فوق 40% من القوي العاملة في اليابان مش موظفين متثبتين في شركات موفرالهم تأمين صحي و مرتبات بزيادة سنوية .. الحكومة هناك سابت القطاع الخاص يعمل اللي هو عايزه لدرجة إن كتير من الشركات بقت بتعتمد إنها تعين ناس Part-time من غير تأمينات أو بدلات .. ده معناه إيه .. معناه إنك لو شاب ياباني إنت مش ضامن إنك بكره الصبح يتقالك مع السلامة مش محتاجينك .. صحيح أرقام الاقتصاد حتلاقيها فلة شمعة منورة بس لو نزلت شوية جوه المجتمع حتلاقي شباب كتير مش ضامن قوت يومه و بالتالي زي ما بنقول خايف يفتح بيت .. صحيح أنا النهاردة معايا فلوس بس يا عالم بكره حلاقيهم في جيبي ولا لا .. ده في الوقت اللي مستوي المعيشة هناك مخلي أي بنت عايزه تعيش في Life Style يناسب فقط إنها تكون متجوزة ثري خليجي .. وده حيخليني مؤمن بإن مشكلة اليابان إنها حتصحي الصبح ممكن متلاقيش فيها ناس عايشة هناك مينفعش بأي حال من الأحوال تتعلق علي شماعة إن الشباب الياباني مش عايز يتجوز .. الموضوع أعقد سيكا من كده.
الحالة الثالثة .. في كوبا محدش عايز يشيل هم الخلفة:
فيه دول كتير في الأمريكتين فعلياً بينهم و بين الكارثة شعرة .. دولة زي المكسيك معدل الخلفة عندهم 2.2 .. بلد زي باراجواي معدل الخلفة عندهم 2.5 .. بلد زي جواتيمالا معدل الخلفة عندهم 3.0 .. ده معناه إن دول كتير سواء في أميركا الشمالية أو الجنوبية يدوبك معدل الخلفة بتاعهم مخلي تعداد السكان ثابت لا بيزيد ولا بيقل بس لو دولة فيه وقعت تحت شعرة التوازن دي حيبقي صعب جداً إنها تلحق نفسها و اللي بدأت تروح في السكة دي هي كوبا .. في كوبا معدل الخلفة بقي 1.7 طفل لكل مرأة و للأسف إقتصاد كوبا مش مؤهل و مش حيقدر إن الحكومة بكره الصبح تقرر تصرف شوية حوافز للمتجوزين عشان يخلفوا زي ما الحكومة اليابانية بتحاول .. المتوقع إن لحد سنة 2050 دولة زي كوبا ممكن تخسر فوق 10% من تعداد سكانها.
كل ده يعلمك حاجة مهمة أوي وهي إنك متقدرش تلعب في ميزان الكون .. خد بلد زي الصين مثلاً .. الصين صرفت اللي وراها و اللي قدامها عشان تجبر شعبها لما يجي يخلف يخلف طفل واحد بس و كانوا فرحانين بنفسهم أوي و هم شايفين تعداد سكانهم بيقل فعلاً بس معملوش حسابهم إن أي إتنين متجوزين في الصين بقوا عايزين لما يخلفوا و بما إن الخلفة حتيجي مرة واحدة يبقي الأحسن نخلف ولد .. جري الشريط خمسين سنة و حتلاقي إن المجتمع الصيني فيه حاجة غلط عشان نسبة الولاد أضعاف نسبة البنات .. الشباب الصيني بقي مش عارف يتجوز لإنه مش لاقي بنت يتجوزها .. يمكن لو الصين كانت صرفت اللي صرفته ده علي توفير وسائل منع حمل أمنة و بأسعار معقولة للمواطن الغلبان كانوا حققوا نفس اللي هم عايزينه من غير ما يلعبوا في ميزان ربنا.
المصادر:
- مقالة بعنوان Ranked: The 20 Countries with the Fastest Declining Populations نشرت في موقع Visual Capitalist و ده لينك المقالة الأصلية:
https://www.visualcapitalist.com/ranked-the-20-countries-with-the-fastest-declining-populations/
