موضوعنا النهاردة اللي حنتكلم عنه هو قطر .. النسخة السياسية من الزبيب في الرز .. فيه ناس شايفه إن الزبيب في الرز أحلي إختراع حصل للرز وفيه ناس شايفه (وأنا منهم) إن أي حد بيفكر يحط زبيب في الرز يستاهل ضرب الشباشب .. قطر كده برده .. فيه ناس شايفينها إنها منارة الحرية وأكثر دولة محترمة في الدول العربية كلها .. وفيه ناس وصلت كراهيتها لقطر إنهم بيعتبروها أخطر علي أمنهم القومي من إسرائيل شخصياً .. سواء إنت بتسب وتعلن في قطر أو بتدوب في التراب اللي (تميم بن حمد) بيمشي عليه .. سواء إنت بتتفرج علي (أحمد موسي) أو (معز مطر) .. فأنتوا الإتنين عارفين كويس أوي إن اللقمة اللي في بق قطر وكل عدوينها عايزين ياخدوها منها هي تنظيم كأس العالم 2022 .. ده حقيقي .. وصل الأمر إن مسئول إماراتي صرح قبل كده إن عشان الدول الخليجية ومعاها مصر اللي فارضين حصار علي قطر يشيلوا الحصار ده لازم قطر تتنازل عن حقها في تنظيم كأس العالم 2022.
ده بيحطنا قدام سؤال مهم: هل فعلاً قطر ممكن يتسحب منها تنظيم كأس العالم 2022؟
الحقيقة إن الناس اللي عايزين قطر يتسحب منها التنظيم كتير ومش بس مجرد السعودية والإمارات ومصر .. فيه جهات كتير عايزة تنظيم كأس العالم 2022 يتسحب منها ولإسباب مختلفة ملهاش علاقة ببعض:
- بتوع حقوق الإنسان بيقولوا والله قطر نظام الكفالة بتاعها ده بيخلي العمالة الأسيوية سواء من الهند أو باكستان أو بنجلاديش أو الفلبين زيهم زي العبيد وعلي أساسه بيتم إنتهاك حقوقهم الإنسانية .. صحيح القطريين قرروا إلغاء النظام ده في أكتوبر 2019 بس حتي لو ده صحيح وبتحصل إنتهاكات لحقوق العمال الأجانب في قطر بإسم نظام الكفيل طب ما دول الخليج كلها شغالة بنظام الكفيل.
- السعودية والإمارات والبحرين اللي هم دول مجلس التعاون الخليجي اللي فارضين حصارهم علي قطر رأيهم إن لازم التنظيم يتسحب بسبب دعم قطر لتنظيمات إرهابية.
- ناس تانيين شايفين إن بسبب إتهامات الرشاوي والفساد اللي بتحيط بإختيار قطر فلازم التنظيم يتسحب ده غير الإبتلاء اللي طلعلنا اليومين دول عن حقوق الشواذ.
- إتجاه رابع بيقول والله طول عمرنا من ساعة ما عملنا كأس عالم وهو بيتلعب في الصيف .. ولما قطر فازت بحق التنظيم قلتوا عشان خاطر عيون قطر التنظيم حيبقي في الشتاء ودي أول مرة حاجة زي دي تتعمل وبسببها مواعيد الماتشات والبطولات كلها حتتشقلب في العالم كله .. رغم إن مهم تكون عارف إن موضوع كأس العالم يتلعب في الشتاء ده متعملش عليه إستفتاء جوه الإتحاد الدولي لكرة القدم FIFA .. يعني إتحادات كرة القدم في العالم صحيوا في يوم لقوا قطر حتنظم كأس عالم وحيتلعب في الشتاء.
الحقيقة اللي إنت محتاج تعرفها سواء كنت زي ما قلت بتكره قطر أو بتحبها إن كأس العالم 2022 حيتعمل في قطر عادي جداً والسبب إن كرة القدم دي شغل أو Business ولإنه شغل فتنظيم كأس العالم مستحيل يتسحب من قطر مش لسبب واحد أو اتنين .. إنما ل 12 مليار و 605 مليون و 970 ألف سبب .. وده الرقم اللي دولة قطر دفعته كإستثمارات ليها في كرة القدم .. لو حبيت الرقم تشوفه قدامك Digital فهو 12,605,970,000 يورو وده يعادل 14,933,655,200 دولار .. اه نسيت أقولك الرقم ده مش محسوب فيه الفلوس اللي قطر دفعتها في بناء إستادات كأس العالم والبنية التحتية اللي حتأهلها للتنظيم .. المبلغ الضخم ده مجرد الفلوس اللي قطر حطتها كإستثمارات بره قطر.
اللي عملته قطر إنها حطت لنفسها برنامج إستثمارات بحيث إنهم حطوا فلوس في كل الدوريات الكبيرة لكرة القدم وأغلب كبار أندية العالم وأهم لاعبي العالم وكمان حطوا فلوس في إتحادات كرة قدم .. طبعاً ده غير الفلوس اللي حطوها كإستثمارات ليهم في FIFA وحتي في اللجنة الأوليمبية الدولية .. نفوذ قطر أو بلاش نقول نفوذ خلينا نقول فلوسها وإسمها بقي منتشر في كل حتة متعلقة بكرة القدم .. من الدوري الممتاز الأندونيسي لنادي ليستر سيتي الإنجليزي لنادي وولفرهامبتون الإنجليزي برده من أيام ما كان بيلعب في دوري الدرجة الثانية لأكاديمية نادي يوفينتوس الإيطالي للمنتخب التونسي ل(ليونيل ميسي Lionel Messi) .. بإختصار شديد قطر إشترت كرة القدم .. سواء إنت شايف إن دي شطارة أو شايفها سرقة .. صدقني مش حتقرق وصدقني لو قلتلك إن أخر حاجة القطريين بيفكروا فيها هو رأيك.
مفيش جهة فيكي يا كرة القدم معملتش شغل مع القطريين .. مفيش .. لو عايز نتكلم عن نوادي فأندية زي بايرن ميونيخ وريال مدريد ومانشستر يونايتد وبرشلونة وموناكو وفالنسيا كلهم بشكل أو بأخر عملوا شغل مع القطريين سواء كانت شركات زي Ooredoo أو Qatar Airways أو بنوك زي QNB أو مؤسسات حكومية زي مطار حمد الدولي وطبعاً مننساش الكلام عن شركة beIN Sports .. ناس كتير متخيلة إن قناة الجزيرة هي الذراع الإعلامي لقطر .. إسمحلي أقولك إنك مش فاهم حاجة .. لو فعلاً عايز تعرف إيه هو الذراع الإعلامي لقطر فإنت لازم تركز شوية مع اللي بتعمله beIN Sports لإن كل اللي بتعمله قناة الجزيرة ميجيش حاجة من اللي بتعمله القناة دي.
إنت لو جيت سألت أي شاب في مصر بيتابع كرة قدم تعرف إيه عن beIN Sports حيقولك إن دي الشركة اللي بتملك حق البث الحصري لماتشات الدوري الإنجليزي Premier League والإسباني La Liga وبطولة دوري أبطال أوروبا Champions League وبطولة الدوري الأوروبي Europa League .. دي البطولات الأوروبية .. في غيرهم بطولة كأس العالم وتصفيات بطولة كأس العالم وبطولة أمم أوروبا وتصفيات بطولة أمم أوروبا ده غير طبعاً بطولة أمم أفريقيا للمنتخبات والأندية وبطولة أمم أميركا الجنوبية المعروفة بإسم كوبا أميركا Copa America .. حضرتك لما قناة ON Sports إشترت حق بث ماتشات الدوري المصري إشترته بملايين فمابالك بشركة بتملك حق بث الهيلمان ده كله .. الحقيقة إن شركة beIN Sports بتشتغل بحوالي 8 مليار دولار في السنة .. دي بس الفلوس اللي بتروح وتيجي سنوياً في مجال بث الماتشات في دوريات كرة قدم لدول حول العالم زي إنجلترا وألمانيا وفرنسا وإسبانيا وإيطاليا وروسيا وتركيا وأميركا والأرجنتين.
صحيح شركة beIN Sports ممكن متكونش من حقها إذاعة ماتشات الPremier League في إنجلترا بس ليها الحق الحصري لإذاعة الماتشات لدول الشرق الأوسط وشمال أفريقيا وتايلاند ونيوزيلاندا وأندونيسيا .. شركة beIN Sports بتملك الحق الحصري لإذاعة ماتشات الدوري الفرنسي الممتاز Ligue 1 في أميركا وإذاعة ماتشات الدوري الألماني Bundesliga في أستراليا وإذاعة ماتشات الدوري الإيطالي Serie A في هونج كونج والدوري الإسباني La Liga في الشرق الأوسط ودول أسيا كلها.
لسه مقتنع بإن قناة الجزيرة هي المتحدث الرسمي بإسم قطر؟ .. طب إيه رأيك بقي إن شركة beIN Sports ليهم حق إذاعة ماتشات كأس العالم بداية من كأس العالم 2010 اللي إتلعب في جنوب أفريقيا لحد كأس العالم 2022 اللي حيتلعب إن شاء الله في قطر .. ده غير حق إذاعة بطولة أميركا الشمالية كونكاكاف CONCACAF وبطولة أمم أسيا وتصفياتها وكمان إذاعة مباريات بطولة أمم أوروبا .. ليهم إتفاق مع الإتحاد الأفريقي لكرة القدم CAF علي إنهم يذيعوا ماتشات بطولة أمم أفريقيا لحد سنة 2028 ده غير إن ليهم إتفاق شبهه مع الإتحاد الأسيوي لكرة القدم .. بإختصار شركة beIN Sports تقدر تقدم علي طلب البث الحصري لمباريات دوري الجن الأزرق وحتفوز به لو حبت .. الناس دي بتدفع مبالغ إنت ممكن متصدقهاش .. إتفاقهم مع الإتحاد الأفريقي لكرة القدم CAF اللي بفكرك بيخليهم يذيعوا مباريات بطولة أمم أفريقيا لحد سنة 2028 دافعين فيه مليار دولار .. الإتفاق اللي شبهه مع الإتحاد الأسيوي لكرة القدم دافعين فيه 100 مليون دولار.
بدأت تفهم إن مهما حصل مفيش حد حيقدر يسحب تنظيم كأس العالم من قطر؟
حتي لو إتحادات كرة القدم القارية لعبت بديلها مع قطر فالقطريين ليهم إتفاقات شراكة ودعاية ورعاية مع FIFA ومع اللجنة الأوليمبية الدولية IOC قيمتها بتوصل 2.5 مليار دولار .. ده لوحده يخلي أي دولة في العالم متقدرش تفتح بقها في وش قطر .. مهما منظمة العفو الدولية قالت إن نظام الكفيل يعتبر زيه زي العبودية الحديثة .. مهما إتقال إن القطريين دافعين رشاوي .. كل الكلام ده لو إنت محروق دمك أوي من قطر وشايفها فعلاً أخطر علي أمنك القومي أكثر من إسرائيل فبله وإشرب ميته لإنه مش حيفرق في حاجة.
يا عيني عشان إحنا في مصر محدش بيدينا معلومات غير الإعلام المصري اللي هو أساساً مش مهني ومش فاهم يعني إيه صحافة فكل اللي إنت بتقراه في الجرايد مجرد إتهامات من غير معلومات تمسكها في إيدك .. تلاقي جرنان طالع يقولك نادي باريس سانجيرمان الفرنسي المملوك لقطر صارف 200 مليون دولار عشان يشتري (نايمار Neymar) من نادي برشلونة .. وفي الأخر يقولك شايفين الفلوس القطري بتعمل إيه مع فاصل من الشتيمة في قطر .. الحقيقة إنك لازم تقرأ الخبر ده وتطبطب علي اللي كتبه وتقوله معلش أنا مقدر إنك متعلمتش صحافة كويس.
صحيح نادي باريس سانجيرمان مملوك لقطر .. وصحيح برده إن النادي ده صارف في سوق الإنتقالات دي بس فوق المليار دولار .. وصحيح برده إن النادي بيصرف أضعاف اللي أي نادي أوروبي كبير تاني بيصرفه .. كل ده أنا أقولك عليه أمين .. بس تبقي غلطان لو إختذلت كل الإستثمارات الكروية القطرية المنتشرة في كل حتة في العالم في اللي بيعمله نادي باريس سانجيرمان .. اللي بيصرفه النادي الفرنسي ميجيش عشر (بضم العين) اللي بيصرفه المشروع القطري ككل .. عشان بس أحطك في الصورة خليني أديلك مثال:
دلوقتي زي ما قلتلك نادي باريس سانجيرمان دافع فلوس علي شراء اللاعبين وصلت مليار دولار .. تمام .. قطر لوحدها دافعه 461 مليون جنيه إسترليني كإستثمارات في تطوير بنية تحتية رياضية حول العالم .. أهو ال461 مليون جنيه إسترليني دول اللي أنا شايفهم قطر دفعتهم في حاجة شبه الأعمال الخيرية واللي تقدر تشتري بيهم الأندية المصرية اللي بتلعب في الدوري الممتاز كلهم ميجوش نص المبلغ اللي شركة beIN Sports دفعته عشان تشتري حق بث مباريات الدوري الفرنسي الممتاز للولايات المتحدة اللي هم أساساً كرة القدم تعتبر اللعبة الشعبية الرابعة بالنسبة ليهم .. دول حتي مش بيسموها Football دول بيسموها Soccer.
لو كل الإستثمارات القطرية في كرة القدم إنحصرت في شراءهم لنادي باريس سانجيرمان زي ما كتير مننا متخيل لكان وجود قطر في عالم كرة القدم مهم بس مش مؤثر .. لو قعدت تقرأ وتدور ورا الفلوس اللي هم بيدفعوها حتلاقي إن الناس دي فهمت اللعبة صح .. هم فهموا إن عالم كرة القدم مينفعش تملكه إلا بحاجة واحدة هي الفلوس واللي لازم تتصرف صح .. لو عملت كده فإنت ملكت كرة القدم .. عشان كده تنظيم كأس العالم 2022 حيفضل بتاعهم .. سميه شطارة .. سميه سرقة .. إشتمهم .. مجد فيهم .. براحتك خالص .. أنا مش دوري هنا أقولك تفكر إزاي .. انا دوري أديلك المعلومة كاملة و إنت قرر اللي إنت عايز تقرره براحتك خالص.
المصدر:
مقالة بعنوان Qatar will host the 2022 World Cup and there are 12 billion reasons why نشرت في جريدة The Daily Mail البريطانية وده لينك المقالة الأصلية:
http://www.dailymail.co.uk/sport/football/article-4998326/12-billion-reasons-Qatar-host-2022-World-Cup.html
