البترول الروسي .. لفي بينا يا دنيا.

عارف لما تكون العيلة عندكوا متجمعة في العيد أو في رمضان و يجي جدك ربنا يديله الصحة مزاجه يجيبه إنه يقعد يحكيلكوا مغامراته و هو صغير و طول ما هو بيتكلم يقولك علي أيامي لما كنت في سنكوا .. جزء مش قليل من الحكاوي اللي بيحكيها دي إنت بعقلك و بحكم تجاربك في الدنيا بتكون شايفها أحياناً قصص لا تمت للواقع بصلة و يمكن كمان تكون من وحي خيال المؤلف بس إنت بتسمع و إنت ساكت .. الموقف العائلي ده هو هو تقريباً بيحصل في وزارة البترول الروسية لما في البريك أو في خروجة موظفين يجي حد من المديرين القدام يحكي للمتعينيين جديد إزاي إن زمان تصدير البترول الروسي كان أسهل من إنك تشتري سندوتش فول بالسلطة من أي عربية فول .. الحقيقة إن الغزو الروسي لأوكرانيا اللي الحقيقة يعني بدأ من سنة 2014 لما الروس خدوا شبه جزيرة القرم أو Crimean Peninsula وضع يد من الأوكرانيين و شوية بشوية باب سوق تصدير البترول الروسي عمال يتقفل شوية بشوية لحد ما جم الأوروبيين قفلوه بالضبة و المفتاح بعد الغزو البري لأوكرانيا في فبراير 2022 .. الهدف من كلامنا النهاردة إننا نرسم ليه صورتين مختلفتين خالص .. صورتين لإزاي زمان كانت الدنيا سهلة و حلوة مقارنة بدلوقتي و إزاي تصدير البترول الروسي بقي عامل زي تهريب المخدرات .. خليني الأول أبدأ معاك بأيام ما كانت الدنيا حلوة.

في مرحلة ما قبل 2014 الروس عملوا فلوس زي الفل من بيع بترولهم للي عايز يشتري و كان الحقيقة الأوروبيين بيسفوا البترول الروسي زي الهروين كده .. كل اللي كان الروس بيعملوه إنهم يعبوا البترول في سفن بتطلع من الموانيء اللي في غرب روسيا و السفن دي تعدي بحر البلطيق Baltic Sea اللي بيفصل بين روسيا و بين الدول الإسكندنافية و بتعدي قصاد سواحل السويد و النرويج لحد ما السفن دي بتروح لميناء روتردام في هولندا و بس خلاص .. رحلة مبتاخدش أكتر من أسبوع .. الدنيا كانت سهلة .. الزباين كانوا كتير .. الفلوس كانت حلوة .. جري الشريط لفبراير 2022 و بعد ما الغزو الروسي بدأ و الأوروبيين قالوا للروس يفتح الله مش عايزين بترول منكوا .. الدول السبع الصناعية الكبري أو G7 في ديسمبر 2022 طلعت قرار بمنع استيراد البترول الروسي و فرضت عقوبات إقتصادية علي أي حد يفكر يشتري بترول من روسيا .. ده خلي إن فعلياً يعني بعد ما كانت شركات البترول الروسي مش ملاحقة علي الزباين مبقاش قدامهم غير بلدين بس هم اللي مستعدين يشتروا بترول من روسيا .. الهند و الصين.

خط سير سفن تصدير البترول الروسي لحد فبراير 2022 بحيث السفن بتطلع من الموانيء في غرب روسيا و تعدي بحر البلطيق قصاد سواحل السويد و النرويج و الدانمرك لحد ما توصل لميناء روتردام في هولندا.

خط سير سفن نقل البترول الروسي بعد ما إتفرض علي روسيا حظر تصدير بترول و غاز طبيعي للدول الصناعية السبع الكبري في ديسمبر 2022 عشان يبيعوا بترول للبلدين اللي لسه موافقين يشتروا بترول من روسيا .. الصين و الهند.

الرحلة من روسيا للهند و الصين أطول من الليلة السودا .. سفن البترول بتمشي مسافة ما يعلم بيها إلا ربنا بعرض روسيا كلها في المحيط القطبي الشمالي لحد ما توصل للصين في رحلة ممكن توصل شهر كامل و بعد كده عشان السفن دي تكمل للهند فإنت بتتكلم عن رحلة ممكن توصل شهر و نص .. لحد دلوقتي مفهوم .. إنت مبقاش قدامك غير زبونين بس اللي شغلك كله قايم عليهم فمش حتفرق التضحيات اللي بتتقدم لإن لازم الشغل يخلص .. المشكلة إن زيادة رحلة سفن البترول الروسية للضعف خلاك قدام واقع نكدي أكتر من واحدة ست متجوزة جوزها نسي يجيبلها هدية في عيد جوازهم اللي صادف يعني إنه في نفس يوم عيد ميلادها .. الوضع اللي زي الزفت ده خلق وضع جديد مليان مشاكل متصلب بستر ربنا بس ممكن يفرقع في وشنا كلنا:

مبدأياً أسطول سفن تصدير البترول الروسي مش أحسن حاجة في الدنيا .. دي سفن قديمة أغلبها بقاله في الخدمة فوق العشرين سنة و كان المفروض يطلعوا معاش و يتباعوا خردة بس ده محصلش لإن أرجع و أفكرك إن زمان السفن دي مكانتش بتمشي كتير عشان توصل البترول الروسي لأوروبا .. المسافة من روسيا لحد ميناء روتردام عامله زي ما يكون بيتك و شغلك في أكتوبر فحتي لو معاك عربية علي الله حكايتها فإنت مش بتمشي بيها مسافات طويلة أوي يعني .. دلوقتي المسافة إتضاعفت و السفن دي ممكن تبوظ منك في أي لحظة و أحب أفكرك السفن دي شايله إيه .. يحكي أن في نوفمبر سنة 2002 فيه سفينة روسية اسمها برستيج The Prestige حرفياً و من غير أي مبالغة إتقسمت نصين قصاد سواحل إسبانيا و كانت كارثة بيئية ما يعلم بيها إلا ربنا.
عشان الروس يحلوا المشكلة فهم وصلوا لحل إنهم يتعاملوا مع نقل البترول بنفس طريقة نقل عفش بيت صاحبكوا اللي حيتجوز .. لنفترض إن صاحبك ساكن في الدور الخامس فبدل ما كل واحد فيكوا يشيل علبة طقم السفرة علي كتفه و يطلع بيها خمس أدوار إحنا حنوزع صاحبه علي الأدوار بحيث كل واحد ياخد دور و الصحاب يسلموا بعض .. نفس الفكرة بدل ما كانت سفينة واحدة بتضرب المشوار كله لوحدها فالمشوار حيتقسم علي كذا سفينة غالباً بيكونوا 3 .. جميل حل كويس و حيوفر كتير في بنزين السفن و في صيانتها .. هي المشكلة في تسليم و تسلم البضاعة .. إن إنت و صاحبك تدوا لبعض طقم كاسات النيش ده حمادة و إن سفينتين ينقلوا لبعض حمولة نفط ده حمادة تاني خالص و اللي بيتسمي Ship-to-Ship Transfer .. ده عشان يتم لازم السفينتين يكونوا قصاد ساحل بلد و يكون التيار هادي بحيث لو حصل حاجة غلط فالدولة اللي عملية النقل دي بتحصل قدامها تقدر تتدخل بسرعة .. المشكلة إن دول كتير قالت إن ده مينفعش و اللي بتعمله روسيا ده إنتهاك لسيادتنا فالروس ملقوش حل غير إن عملية Ship-to-Ship Transfer دي تتم جوه المياه الدولية قصاد مثلاً رأس الرجاء الصالح في جنوب أفريقيا بس حتي ده عمل مشكلة إنك مش ضامن إن تيار المياه يبقي هادي و لو حصلت مصيبة مش حتعرف تلحق نفسك.

التسريب البترولي اللي حصل بسبب غرق سفينة نقل البترول الروسي برستيج The Prestige قصاد سواحل إسبانيا سنة 2002.

غرق سفينة نقل البترول الروسية برستيج The Prestige قصاد سواحل إسبانيا في نوفمبر 2002.

خد مثلاً السفينة توربا Turba و دي تبقي واحدة من أسطول السفن الروسي اللي بينقل البترول للهند و الصين من ميناء سانت بطرسبرج .. دي سفينة إتبنت سنة 1997 وعندها حاليا 26 سنة و لو صدقت الكلام بتاع المنظمات المتخصصة في حماية البيئة فالسفينة دي متعملهاش عمرة كاملة من سنة 2017 .. طب فين المشكلة ما فيه كتير مننا عنده عربيات بقالها فوق العشرين سنة ماشية .. الفكرة إن العرف في النقل البحري إن الشركات بتفكر تشوف هي حتعمل إيه في السفينة لو عمرها وصل 15 سنة بس لو حصل و سفينة وصلت 20 سنة فهي ملهاش غير مصير واحد و هو إنها تتباع خردة .. مش لوحدها Turba اللي فيها مشاكل لإن تاني لو صدقت الكلام بتاع مؤسسة زي إيكواسيس Equasis و دي مؤسسة متخصصة في متابعة الورق بتاع سفن الشحن فخلال الفترة من فبراير 2022 لحد ديسمبر 2022 فيه 40 سفينة نقلت بترول روسي متعملهاش أي صيانات دورية تحت إيد مؤسسات دولية و فيه 3 سفن من ضمنهم توربا إتقال صراحة كده إنهم مينفعش ينزلوا المياه .. عايزك تعرف إن سفينة توربا دلوقتي عندها 26 سنة و ده نفس عمر السفينة برستيج لما غرقت قصاد سواحل إسبانيا .. التاريخ مش بيعيد نفسه .. إحنا اللي بهايم.

دول ثلاثة من أكبر شركات الشحن في العالم و رسم بياني لأعمار سفن نقل البترول Tankers اللي تحت إيدهم خلال الفترة من فبراير 2022 لحد فبراير 2023 حتلاقي إن مفيش شركة بتسمح لسفينة تفضل شغالة لحد ما توصل 20 سنة.

شركات تصنيع السفن قضت سنين و صرفت ملايين عشان تضمن سلامة تصميمات السفن خصوصاً اللي بتنقل بترول .. بداية من سنة 2000 و مش بس عدد إنما كمان كمية البترول اللي بيتسرب للمياه بتقل.

رسم بياني تاني بيوريك المتوسط بتاع أعمال سفن نقل البترول اللي زي ما إنت شايف في المتوسط مبتوصلش أساساً ل16 سنة لإن بعد كده تكلفة الصيانة نفسها بتبقي خزعبلية فبيبقي أرخصلك كشركة شحن إنك تشتري سفينة جديدة.

المشكلة إن الروس المنطق بتاعهم إن و الله إحنا ملناش حلول تانية .. روسيا بلد مش بتنتج غير بترول و غاز طبيعي و مينفعش عجلة الإنتاج و التصدير تقف تحت أي ظرف و عشان كده هم بيعملوا اللي يقدروا عليه عشان عملية البيع دي تفضل شغاله و تاني أنا متفهم ده كويس .. الفكرة إنك لو حتحسبها حسبة فلوس فطريقتك دي غلط .. الحل مش إنك تدوس علي السفن بتاعتك .. السفن مش زي العربيات .. أنا فاهم إن تبقي معاك عربية فيات 128 و تبقي مش عايز تبيعها عشان سوق العربيات دلوقتي بقي زي ما يكون لابسه جن من بتوه مسلسل المداح .. تاني .. السفن مش كده .. أي سفينة نقل بترول أو Tanker بيتعملها عملية تفتيش أو صيانة بتتسمي Special Surveys كل خمس سنين بتكلف ما بين 3-4 مليون دولار .. كل سنتين و نص بتتعمل صيانة تانية أخف شوية .. إنت لو معاك عربية حتقدر تفهم ده .. لما السفينة يتعملها 4 صيانات كبيرة فبلاقي إن تكلفة الصيانة بتضرب معاك في السما لدرجة إن بيبقي مش منطقي إن السفينة تفضل في الخدمة .. تكاليف قطع الغيار لوحدها بتخلي إنك تشتري سفينة جديدة أرخصلك .. بس تاني .. حنرجع نلف نلف لنفس النقطة .. حتي لو الروس حبوا يشتروا سفن جديدة مين حيرضي يبيعلهم؟

المصادر: