بالنسبة لينا كرجاله فكرة القدم هي المهرب الأخير لينا بعيد عن زن الستات .. أي ست متجوزة عارفه كويس القاعدة الأزلية لأي جوازة .. إبعدي عن دماغ جوزك يوم الماتش .. في دماغنا فكرة القدم هي لعبة بيلعبها رجاله عشان خاطر يتفرج عليها رجاله و ياريت تطلعوا منها أي وجود للستات .. يا مؤمن ده إحنا مش عاجبنا الموضة اللي طالعة جديد إن الستات تحكم ماتشات كرة قدم و صدقيني لو إنتي بنت إن دي مش عنصرية ضد المرأة قد ما هي إقتناع بفكرة كل واحد يمشي في حارته .. أنا عمري ما حقدر أقولك تحطي أنهي ماركة مكياج أو أقولك إن البلوزة دي مش ماشية مع الكارديجان اللي إنتي لابساه .. أنا مش من الرجاله الشواذ اللي بيشتغلوا في برنامج Project Runway .. في نفس الوقت ياريت حضرتك تحترمي الحارة بتاعتي .. كرة القدم للرجاله .. طول عمرها للرجاله و حتفضل للرجاله زي ما الجومباز الإيقاعي للبنات و حتفضل طول عمرها للبنات .. المقدمة الطويلة العريضة دي هدفها إن لك أن تتخيل عدد مرات يالهوااااااي اللي طلعت مني لما عرفت إن اللاعيبه اللي حقولك أساميها دلوقتي دول اللي هم (بول بوجبا Paul Pogba) خط وسط نادي يوفينتوس .. (ماتياس دي ليخت Matthijs de Ligt) قلب دفاع نادي بايرن ميونيخ .. (ماركو فيراتي Marco Veratti) خط وسط نادي باريس سانجيرمان و كمان (إيرلينج هالاند Erling Haaland) مهاجم نادي مانشستر سيتي .. كل اللاعيبه دي المسئول عنهم و وكيلهم تبقي واحدة ست اسمها (رافايلا بيمينتا Rafaela Pimenta).
خلينا نتكلم جد شوية .. كوني مهندس لا و كمان مهندس ميكانيكا معناه إني أخترت أو النصيب خلاني أشتغل في مجال الغالبية العظمي من اللي شغالين فيه رجاله .. ده معناه إن لو أنا عرفت إن الشركة عينت بنت معايا فبشكل تلقائي و غير مبرر يمكن أحياناً بيبقي عندي إقتناع إن البنت دي مش فاهمة حاجة في الشغل إلي أن يثبت العكس .. إسأل أي مهندس خصوصاً لو ميكانيكا أو كهرباء أو حتي مدني وهي الأقسام في الكلية اللي عدد البنات فيها يعتبر أقلية تحسسك إن جنس البنات ده بقي من ضمن الكائنات الحية المعرضة للإنقراض لو حضر إجتماع ولقي إن فيه بنت فحاجة جواه بتخليه يقول لنفسه الإجتماع ده شكله مش حيخلص علي خير النهاردة .. إحنا كرجاله بنعرف نتعامل مع بعض .. ممكن نتخانق و نشد و نهزر و نخزوق بس في الأخر بنعرف عند مرحلة ما نقول لنفسنا الشغل شغل و خلينا نطلع مشاعرنا بره دلوقتي .. إحنا مقتنعين إن الرجاله بس اللي بتعرف تعمل ده و البنات مبتعرفش تفصل بين مشاعرها و بين شغلها وده اللي بيخلينا أول ما نعرف إننا حنتعامل مع بنت في الشغل نبدأ نقلق .. يا تري هي ضمن الغالبية العظمي بتوع البنات اللي لو بصيتلها بصة وحشة تشتكيك ولا هي بنت عاقلة و راسية و عارفه كويس إن الشخصية اللي إحنا كرجاله بنتعامل بيها في الشغل و قرفه ملهاش علاقة بالشخصية الحقيقية بتاعتنا بره الشغل .. البنت اللي بتعرف تفصل كويس بين الإتنين بتقدر توصل بسهولة لأي منصب قيادي حتي لو في بيزنس مسيطر عليه الرجاله .. ليه؟ .. لإن بقي زيها زي أي رجل ويمكن هي كمان عندها نقطة تفوق علينا اللي هي قدرتها علي التعامل بمشاعرها .. عارف إن ده نفس العيب اللي بيخلي أغلب البنات تفشل إنها تعمل كاريير لنفسها في بيزنس مسيطر عليه رجاله و عشان كده (رافايلا بيمينتا) حالة خاصة تستحق إننا نقف قدامها شوية.
فجأة بقينا نسمع اسم (رافايلا بيمينتا) .. هي كانت فين قبل كده؟
بداية إن الإعلام الرياضي يهتم باسم (رافايلا بيمينتا) كان في إبريل 2022 لما توفي وكيل اللاعبين المشهور جداً (مينو رايولا Mino Raiola) .. بسبب طبيعة شغل (مينو رايولا) و بسبب شخصيته و قلة أدبه أحياناً فكان فيه شبه إجماع علي إن الرجل ده ممشي الشركة بتاعته لوحده .. أصل مين يقدر يشتغل مع حد لسانه زفر زي كده .. إذ نفاجيء إن من سنة 2000 لحد 2022 يعني لأكتر من 22 سنة و (مينو رايولا) مشارك واحدة ست محامية برازيلية من مدينة ساو باولو اسمها (رافايلا بيمينتا) بحيث زي ما تقول كده هي المخ و هو العضلات .. تعالي مثلاً يعني لصفقة إنتقال (إيرلينج هالاند) من نادي بروسيا دورتموند لمانشستر سيتي مقابل 60 مليون يورو .. إنت كمشاهد و كمشجع كرة قدم كل اللي يفرق معاك هو الفلوس .. هو يا تري السيتي دفعوا كام؟ .. ده كان دور (مينو رايولا) .. هو كانت شغلته إن زي ما بنقول كده يحلب النادي اللي عايز يشتري عشان ياخد أكبر عمولة ليه وفي نفس الوقت اللاعيب بتاعه يتقدر مادياً .. بس علي الناحية الثانية فيه جانب تاني و ليلة كبيرة أوي (مينو رايولا) مبيتدخلش فيها لإنها مش شغلته إنما بتبقي شغلة شريكته .. (رافايلا بيمينتا) هي اللي بتكتب العقد وهي اللي بتتفاوض مع النادي علي مرتب اللاعيب يعني مثلاً هي اللي ضغطت علي إدارة السيتي عشان (هالاند) مرتبه في السنة يبقي 24 مليون يورو .. هي اللي بتقول الفلوس تتوزع إزاي .. هي اللي بتنقي البيت اللي أسرة اللاعيب حتعيش فيه .. هي اللي بتختارله العربية و بتنقله العفش و بتحضرله جواز السفر و التأشيرة .. إذا حب يطلع أجازة هي اللي بتحجزله الفندق و الطيارة .. صحيح مقر الشركة في مدينة موناكو الفرنساوية و ليها مكتب تاني في العاصمة الإيطالية روما بس هي علي طول مسافرة عشان في شغلتها هي المسئولة مسئولية كاملة عن اللاعيبة بتوعها و عائلاتهم كمان.
بداية دخولها بيزنس كرة القدم كان سنة 1998 لما في السنة دي كانت هي المحامية بتاعة إتنين من أساطير كرة القدم البرازيلية (ريفالدو Rivaldo) و (سيزار سامبايو Cesar Sampaio) في صفقة شراءهم لنادي جوارتينييتا Guartingueta في مدينة ساو باولو البرازيلية .. علي الناحية الثانية (مينو رايولا) بدأ يعمل لنفسه اسم بعد بطولة الأمم الأوروبية 1996 لما كان هو مدير أعمال الجناح التشيكي الأسطوري (بافل نيدفيد Pavel Nedved) و هو اللي وداه نادي لاتسيو الإيطالي من سبارتا براغا التشيكي مقابل 4.65 مليون يورو و ده كان رقم خزعبلي وقتها .. بعدها بخمس سنين (مينو رايولا) هو اللي خلي (نيدفيد) يروح يوفينتوس بس حرك العلامة العشرية يمين من الرقم اللي إتدفع فيه عشان يروح لاتسيو .. لما (مينو رايولا) حب يبدأ شركة النصيب وداه لحد (رافايلا بيمينتا) عشان يتولد الكيان اللي اسمه One Sport Business Strategy .. وقتها كانت هي بتدرس قانون دولي في جامعة ساو باولو و بتحضر الدكتوراه بس اللي عرضه عليها (مينو رايولا) كان إنها ترمي كل طموحها في الزبالة و تنسي رسالة الدكتوراه بتاعتها دي و تسيب ساو باولو أساساً و تروح تعيش في موناكو في فرنسا .. الشراكة بينهم كانت مبنية علي فكرة كل واحد يمشي في حارته .. (مينو رايولا) بشخصيته و قلة أدبه أحياناً حيبقي هو الواجهة و هو اللي كاميرات الصحفيين حتبقي مركزة عليه في حين إن (رافايلا بيمينتا) حتبقي هي اللي بتخلص الإجراءات القانونية .. هي المخ و هو العضلات .. شوية و طاقة القدر إتفتحت ليهم و بقي لستة الكلاينتس بتوعهم بتشمل لاعيبة من كل شكل و لون .. من أول الأساطير زي (زلاتان إبراهيموفيتش Zlatan Ibrahimovic) لللاعيبة اللي ملهاش مكان غير قسم الفضايح في الجرايد زي (ماريو بالوتيلي Mari Balotelli) للاعيبه مينفعش غير إنك تتحسر علي موهبتها اللي راحت هدر زي (روبينيو Robinho) و (بول بوجبا) .. و فيه اللاعيبة اللي بتكافح زي الأرميني (هينريك ماختريان Henrikh Mkhitaryan) .. و فيه اللاعيبه اللي شايله فرقهم زي (ماركو فيراتي).
طبيعة العلاقة بين (مينو رايولا) و (رافايلا بيمينتا) كانت مريحة ليها لإن دايماً هو اللي كان في وش المدفع .. من أجمل ما قيل في وصف (مينو رايولا) هو اللي قاله المدير التنفيذي لنادي بروسيا دورتموند (هانز يواكيم واتسيكيه Hans Joachim Watzke) لما قال عنه إنه بني أدم جلف بعد ما لوي دراع النادي عشان يبيعوا (هينريك ماختريان) لنادي مانشستر يونايتد .. من أحلي ما قيل في وصف (مينو رايولا) بقي اللي قاله السير (أليكس فيرجسون Alex Ferguson) بسبب برده إنه لوي دراع مانشستر يونايتد عشان يخلوا (بول بوجبا) يروح يوفينتوس إنه قال عليه إنه بني أدم زبالة
نيجي بقي للنقطة اللي بتخلي (رافايلا بيمينتا) في حتة تانية .. المشاعر:
عشان بس أوريك إن (رافايلا بيمينتا) مش زي أي ست إنت تعرفها في حياتك فالست دي لما (مينو رايولا) مات و علي فكرة خبر وفاته إتعرف بعدها و تفاصيل جنازته كانت سرية و محدش كان عارف هي الجنازة إمتي و فين .. المهم بعد الجنازة ما خلصت لقت تليفونها بيرن و حد من إدارة نادي ويستهام الإنجليزي بيتكلم معاها عشان عايزين يعملوا إجتماع يناقشوا فيها تفاصيل تجديد عقد حارس المرمي بتاعهم (ألفونسو أريولا Alphonso Areola) .. بمنتهي الهدوء قالتلهم إدوني ساعة و حبقي في مكتبي .. الست مشت من الجنازة و راحت مكتبها و عملت إجتماع علي زوم و كانت هادية جداً ولا كأنها من ساعة بس كانت بتدفن أستاذها و شريكها لأكتر من 20 سنة .. دي ست بتعرف تفصل كويس أوي ما بين البيزنس و المشاعر.
لو إنت مدير و بمجرد ما تفهم إنك بتتعامل مع بني أدمين مش مكن فإنت حتبدأ تبص للبيزنس بشكل مختلف .. مش كل الرجاله بيعرفوا يتكلموا عن مشاعرهم و عن إيه اللي هم شايفينه مهم في حياتهم و عشان كده كون (رافايلا بيمينتا) واحدة ست فهي بتقدر تتكلم بشكل أسهل مع اللاعيبه بتوعها و يمكن وجودها طول السنين دي كلها كشريكة ل(مينو رايولا) خلاه يبقي هو وكيل اللاعبين الأشهر في العالم مع إن اللي كان بيشتغل بجد و بيطلع عين أهله في الشغل يبقي هي في حين إن (مينو رايولا) كان مجرد الفاترينة .. هي شايفة إن اللاعيبة دول بني أدمين ليهم مشاعر و طموحات و إلتزامات عائلية و أحياناً كتير الإلتزامات دي بتتعارض مع مصلحة النادي اللي اللاعيب بيلعب فيه .. (رافايلا بيمينتا) قريبة جداً نفسياً من اللاعيبية بتوعها لدرجة إنها صحيح بتدير بيزنس بمليارات بس كل لاعيب منهم معاه نمرتها الشخصية و ممكن في أي لحظة لاعيب فيهم مثلاً يكون لسه صغير في السن عشرين سنة يكلمها يقولها أجيب إيه للجيرل فريند بتاعتي في عيد ميلادها أو يسألها يا تري أحسن عربية أجيبها إيه .. علي الناحية الثانية في لاعيبه هي مسئولة عنهم عدوا الثلاثين سنة و عندهم عائلات كاملة فاللاعيب ده بتبقي أولوياته أكبر بكتير من مجرد يجيب أنهي عربية أو يشتري هدية إيه للبنت بتاعته.
علي الناحية الثانية اللي كان برده بينقل شغل (مينو رايولا) في حتة تانية إن شريكته كانت هي اللي ممكن تصالح اللاعيب علي المدير الفني بتاعه .. أرجع تاني لحتة المشاعر .. فيه لاعيبة مش بتيجي بالزعيق .. فيه لاعيبه مش بتيجي بإن المدير الفني يطلع في المؤتمر الصحفي يتشكيهم قدام الناس .. فيه لاعيبه ممكن تاخد عنيها لو بس قلتلها كلمة حلوة .. في نفس الوقت مش كل المديرين الفنيين بيبقوا شاطرين في فهم نفسية اللاعيبة و أحياناً كتير بتحصل مشاكل بسبب إن المدير الفني استخدم طريقة تعامل مش عاجبه اللاعيب .. ساعتها بتلاقي (رافايلا بيمينتا) خدت شنطتها و سافرت و راحت قعدت مع المدير الفني ولا أكنها (خالتي فرنسا) في فيلم اللمبي عشان تتكلم مع المدير الفني إنه المفروض يتعامل بشكل أحسن من كده مع اللاعيب بتاعها.
(رافايلا بيمينتا) مسئولة عن 36 لاعيب لو حسبت قيمة كل لاعيب منهم لو حبيت تبيعه بكره الصبح فإنت بتتكلم عن ست تحت إيدها بيزنس بمئات الملايين من الدولارات لكن يظل أهم لاعيب عندها هو (هالاند) .. بتتكلم عن لاعيب سنة 2019 لما كان بيلعب في فرقة أر بي سالزبورج السويسرية كان سعره في السوق 5 مليون يورو و دلوقتي لو حبيت تبيعه حيجب فوق 170 مليون يورو مستريح .. ده بيحطها قدام أهم حقيقة في البيزنس ده .. هي كوكيلة أعمال و إنت كلاعيب هي تقدر تبقي صاحبتك و تقدر تنصحك و تقدر تدافع عنك بس أهم حاجة هي بتقدمهالك إن شغلها هو اللي بيحدد مرتبك و صدقني لو قلتلك إن شغلها معتمد علي أداءك في الملعب .. هي لما تفاوضت مع إدارة السيتي علي عقد (هالاند) و وصلته يبقي تاني أعلي عقد للاعيب في الدوري الإنجليزي الممتاز هي عملت ده بسبب اللي يقدر (هالاند) يقدمه في الملعب .. صحيح إنها هي اللي إتفاوضت مع إدارة بايرن ميونيخ علي مرتب (ماتياس دي ليخت) بعد ما النادي إشتراه من يوفينتوس مقابل 67 مليون يورو في ميركاتو صيف 2022 بس لما الموسم الأول ليه في النادي البافاري كان كارثي هي اللي قعدت معاه و عشان سلاح المشاعر اللي في إيدها عرفت تخلي (ماتياس) يقف علي رجله تاني و بقي يمكن هو أهم لاعيب في الفرقة الموسم اللي فات .. هي شايفه دورها مش إنها تجيبلك عقد بمرتب حلو و خلاص .. هي شايفه دورها إنها تفضل وراك عشان تصحي كل يوم تتدرب أكنه أخر يوم ليك كلاعيب كرة قدم و تفضل متواضع و كأن الماتش الجاي هو أخر ماتش ليك كلاعيب كرة قدم .. دورها ده اللي خلي (بول بوجبا) يوصفها بإنها أمه الثانية.
(رافايلا بيمينتا) شايفه نفسها مش عايز أقول أم بس هي بتعتبر نفسها مسئولة عن كل لاعيب هي بتمثله عشان كده صعب تلاقيها بتحضر ماتشات كرة قدم بنفسها لإنها زي ما هي بتقول دول ولادي و صعب أبان إني بشجع ولد من ولادي علي أخوه .. يعني مثلاً .. هي بتمثل (ماتياس دي ليخت) و (نصير مزراوي) في نادي بايرن ميونيخ و كمان بتمثل جناح بروسيا دورتموند (دونييل مالين Donyell Malen) فمش حتلاقيها مثلاً بتحضر ماتش دير كلاسيكير بين البايرن و بروسيا بس أيا كان دور الأم اللي هي عايشاه خلينا نتفق علي إن كرة القدم ده عالم رجالي .. أنا معتقدتش إن عدي عليا في كرة القدم من أول ما بدأت أتابعها إن فيه ست في منصب قيادي غير (مارينا جرانوفيسكايا Marina Granovskaia) اللي كانت ماسكة نادي تشيلسي و قلشوها مع (رومان إبراموفيتش) و مفاضلش غير (رافايلا بيمينتا) دلوقتي بس هي يمكن بتقدم الإجابة علي سؤال إزاي بنت تقدر تتفوق و تظهر في بيزنس بيسيطر عليه الرجاله .. إفصلي كويس بين مشاعرك و شغلك.
المصادر:
- فيديو بعنوان How Rafaela Pimenta became football’s most powerful woman نشر علي YouTube و ده لينك الفيديو:
https://www.youtube.com/watch?v=F20NqkqhOk4 - مقالة بعنوان Football’s first female super-agent Rafaela Pimenta on dealmaking and discrimination نشرت في مجلة Financial Times و ده لينك المقالة الأصلية:
https://www.ft.com/content/a618be1a-486c-4f57-9b03-97550be34527
مع كامل احترامي ليك يا فؤش والمقالات اللي بتقدمها بشكل كويس بس حاول تفصل مابين أفكارك ومابين المحتوي اللي بتقدمه، يعني إنت كاتب مقدمة طول بعرض ماشاء الله بتعرض فيها قناعات شخصيّة قابلة للنقاش أوي، وده بيشتت موضوع المقالة الرئيسي بشكل واضح. أتمني تاخد بالك من حاجة زي دي عشان فيه ناس بتحب المدوّنة وعايزة تشوفها أحسن حاجة.