يمكن عشان إحنا في مصر علاقتنا بالرياضة بشكل أو بأخر محصورة في كرة القدم فإحنا معندناش خلفية عن حجم بعزقة الفلوس اللي السعودية عملتها خلال الكام شهر اللي فاتوا .. اه صحيح إن أندية الدوري السعودي لكرة القدم صرفت تاني أكبر مبلغ علي شراء اللاعبين علي مستوي العالم في الميركاتو الصيفي بعد الدوري الإنجليزي و حنتكلم عن ده بالتفصيل كمان شوية بس عايزك تعرف إن السعودية مثلاً خدت حق استضافة بطولة LIV Golf/PGA للجولف .. اشترت الحصة الأكبر في أسهم رياضة الدفاع عن النفس Mixed Martial Arts أو MMA إختصاراً بس أرجع و أقولك كل الصرف ده مخادش ربع حتي الإهتمام الإعلامي بتاع اللي عملته الأندية السعودية في الميركاتو لدرجة إن فيه ناس كتير من ضمنهم رؤساء أندية أوروبية بتلعب في دوري أبطال أوروبا بقوا شايفين إن خلال الخمس سنين الجاية إحتمال نصحي الصبح علي حقيقة إن الدوري السعودي بقي بيتصنف إنه من أقوي خمس دوريات كرة قدم علي مستوي العالم و ده توقع مش حقول أكيد يحصل بس مش حستغرب إنه يبقي واقع بالنظر إنك بتتكلم عن دوري أنديته صرفت 950 مليون دولار في ميركاتو واحد و ده اللي إحنا عايزين نتكلم عنه النهاردة .. هل فيه رؤية واضحة ماشية فيها كرة القدم السعودية ولا هي أقرب ما تكون لفكرة إرمي فلوس في وش المشكلة وإن شاء الله حتتحل؟
الحقيقة إن قبل ما نتكلم عن هل فيه رؤية وهل الصرف ده حيجيب همه ولا حيخلي السعوديين يلبسوا في الحيط لازم الأول تبقي مستوعب حجم الصرف و حجم الفلوس اللي إتدفعت لإن ده حيكون بداية إنك تفهم هو ليه ده حصل و يا تري الهدف إيه .. خليني أرصلك شوية حقايق ورا بعضها و منها تقدر تستوعب اللي بيحصل:
- صحيح الدوري السعودي صارف 950 مليون دولار وده علي فكرة Net Spend يعني صافي الفلوس اللي إتدفعت بعد ما طرحنا منها فلوس بيع اللاعيبه اللي مشيت من الدوري السعودي بس المبلغ ده رغم ضخامته ميجيش حاجة جنب 1.38 مليار دولار اللي صرفتها الأندية الإنجليزية في نفس الميركاتو.
- الصورة حتبدأ توضح لما تعرف إن أندية الدوريات الإسبانية و الإيطالية و الألمانية لما تيجي تشوف هي باعت بكام و إشترت بكام تلاقيهم باعوا أكتر ما أشتروا يعني الناس دي صافي مصاريفها بالسالب.
- جزء مهم ومش صغير من الصفقات اللي عملتها الأندية السعودية في الميركاتو ده هي للاعيبة عقودها خلصت مع أنديتها و إنتقالهم للسعودية مكلفش أنديتهم غير يدوبك مرتباتهم و إن كانت مرتبات خزعبلية زي (كريم بنزيمة) و (روبيرتو فيرمينيو Roberto Firmino) و (أنجولو كانتي N’Golo Kante).
بس يمكن النقطة اللي غايبه عن ناس كتير هي إن مش كل أندية الدوري السعودية دايرة في أوروبا تخطف لاعيبتها من أنديتها لإنك فعلياً يعني بتتكلم عن 4 أندية بس هي اللي واكله الجو باسم الدوري السعودي و الأربع أندية دول هم النصر و الإتحاد و الأهلي و الهلال و المديرين بتوع الأربع أندية دول مصحيوش الصبح لقوا مفتاح مغارة علي بابا قدام باب بيتهم .. الأربع أندية دول بالذات بقي عندهم قلب يدفعوا المبالغ الخزعبلية اللي إنت بتشوفها دي لإنهم مملوكين لحاجة اسمها صندوق الاستثمارات العام أو Public Investment Fund و إختصاراً بيتقال عليه PIF و في حالة إنك بتسأل يطلع إيه صندوق الإستثمارات العام ده فحضرتك يبقي واحد من صناديق الثروة السيادية السعودية اللي تحت سيطرة ولي العهد السعودي (محمد بن سلمان) شخصياً و جدير بالذكر إن الصندوق ده هو هو اللي مستحوذ علي أغلب أسهم نادي نيوكاسل الإنجليزي .. ده صندوق من 2021 و هو صارفله 6.3 مليار دولار علي استثمارات رياضية من ضمنها شراء نادي نيوكاسل و إقامة بطولة LIV Golf .. بس يمكن عشان عشان أبقي أمين بالكامل في نقل المعلومة فصندوق الاستثمارات العام بيملك 75% بس من الأربع أندية السعودية اللي واكلين الجو و الكلام في الدنيا كلها .. من 950 مليون دولار اللي إتصرفوا علي شراء اللاعيبه الي راحت تلعب في الدوري السعودي فالأربع أندية دول لوحدهم صارفين 93% من الفلوس دي و عشان الدوري السعودي فيه 16 فرقة فإنت كده قصاد 4 فرق بيطلعوا نار من بقهم فيفضل معاك 12 فرقة .. من ال12 فرقة دول فيه منهم 10 أندية الNet Spend بتاعهم يعني لما تطرح اللي صرفوه من اللي جالهم من بيع اللاعيبة اللي مشوها تلاقيك بتتكلم عن أندية صارفه 8 مليون يورو .. مش بس كده .. فيه أربع فرق من العشرة مصرفوش غير يدوبك 2 مليون يورو بس و فيه 4 فرق مصرفتش ولا مليم و دي الحقيقة المهمة جداً إنك تبقي مستوعبها .. الدوري السعودي مش رايح في سكة إنه يبقي دوري فشيخ .. هو رايح في سكة إنه يبقي دورة رمضانية.
فكك من الأربع أندية الكبار اللي الناس كلها بتتكلم عنهم .. إنسي خالص الهلال و الإتحاد و النصر و الأهلي .. يجي وراهم في طابور الأندية السعودية اللي صرفتلها فلوس نادي اسمه الإتفاق و ده النادي اللي جاب (ستيفن جيرارد Steven Gerrard) عشان يدربه و جاب معاه (جوردان هينديرسون Jordan Henderson) و (جيورجينو فينالدوم Georginio Wijnaldoum) و (موسي ديمبيلي) .. ده نادي لما تيجي تمسك مصاريفه و الفلوس اللي دخلت ليه تلاقي نفسك قصاد نادي Net Spend بتاعه 38.5 مليون دولار اللي هم تقريباً نفس اللي صرفهم نادي كريستال بالاس الإنجليزي في الميركاتو .. بلاش الإتفاق خد اللي وراه الشباب .. نادي الشباب بعد ما جاب (حبيب ديالو) و جاب (يانيك كاراسكو Yannick Carrasco) حتلاقي نفسك قصاد نادي Net Spend بتاعه 16 مليون دولار اللي هم تقريباً تلتين اللي صرفهم نادي لوتن تاون الإنجليزي برده اللي صاعد دوري ممتاز من دوري المظاليم .. بعد كده إنت محتاج تبقي دحيح و عايش حياتك كلها كرة قدم عشان تبقي عارف مين راح الأندية السعودية اللي ترتيبها في المصاريف أقل من نادي الشباب .. مش مصدقني صح؟ .. تعالي أثبتلك هو يعني أنا ورايا إيه .. فيه عندك نادي اسمه الأخدود يوم ما بعزق أوي يعني جاب لاعيب اسمه (أليكس كولادو Alex Collado) كان ناشيء في نادي برشلونة وراح إعارة لنادي إيلتشي هبط بيهم دوري المظاليم فراح السعودية .. عندك نادي أبها اللي حب يتمنظر قدام الناس إنه جاب لاعيب من أوروبا فجاب حارس مرمي اسمه (كيبريان تاتاروسانو Ciprian Tatarusanu) كان بيلعب في ميلان و بعد كده راح ليون قعد دكة فقرر يأمن مستقبله فراح السعودية .. نادي زي التعاون اللي مكنش معاه فلوس يدفعها غير إنه يجيب المهاجم الجامبي (موسي بارو Musa Barrow) من نادي بولونيا الإيطالي .. أو يمكن نادي الرائد اللي جاب المهاجم النرويجي (ماتياس نورمان Matthias Normann) اللي أساساً يعني إتشطب من الإتحاد النرويجي لكرة القدم لما قرر يروح يلعب في نادي دينامو موسكو و بسبب الغزو الروسي لأوكرانيا شاف إن مصلحته أحسن يروح السعودية.
ده معناه إنك قصاد دوري فيه أربع فرق فيها لاعيبة نجوم صحيح مش في قمة تألقهم بس محدش ينكر إنهم نجوم كل واحد فيهم كان شايل فرقة في أوروبا قصاد 12 فرقة تانية علي الله حكايتهم .. كان زمان الدوري السعودي كل أنديته معاها فلوس تخليها تجيب أحسن لاعيبة متاحة في أسيا بس طبعا مش بيلعبوا في أوروبا فكان مستوي الفرق السعودية مش حقول متقارب بس علي الأقل مفيش الفروق بين السما و الأرض زي الدوري المصري فكان الدوري السعودي متصنف علي إنه الدوري الأقوي في أسيا بلا منازع .. يعني مثلاً موسم 2022-2023 الصفقة اللي كسرت الميركاتو السعودي كانت صفقة شراء المهاجم الجابوني (أرون بوبينديزا Aaron Boupendza) اللي إشتراه نادي الشباب من نادي العربي القطري مقابل 7.8 مليون يورو و دلوقتي اللاعيب بيلعب في نادي سينسيناتي في الدوري الأميريكي .. دلوقتي باللي بيحصل ده الوضع مش حيبقي كده .. حيبقي فيه عندك أربع أندية بتطير قصاد باقي أندية الدوري اللي بتبص للي بيحصل نفس بصة الناس اللي عايشة في ويستروس وقت أحداث مسلسل House of the Dragons و هي شايفة التنانين طايرة فوقيهم وهم لا حول ليهم ولا قوة و هنا يهمني إنك تبقي فاهم ليه ده حصل؟ .. ليه باقي الأندية السعودية اللي بره فلوس PIF قاعدة ساكتة مستنية قضاء الله و قدره؟ .. و الحقيقة فيه تفسيرين محدش عارف مين فيهم صح:
- يا إما رؤية الناس بتاعة صندوق الاستثمارات العام هو إننا مش عايزين دوري فشيخ قد ما إحنا عايزين يبقي عندنا أربع أندية جاحدة تخلي للدوري بتاعنا فيه شوية لطايف و قطايف و حلويات.
- أو إن صندوق الاستثمارات العام كان باني أمل إنهم لما يضخوا المبالغ دي في الأربع أندية دول ففيه جهات تانية زي مثلاً كام أمير كده يختارولهم كام نادي تانيين يضخوا فيهم كام مليون بحيث يبقي فيه تنافس بينهم علي أنهي أمير النادي بتاعه يعلم علي نادي أمير تاني بس ده محصلش.
ده غير أصلاً إن فيه خناقة تانية خالص علي تفسير هو إيه اللي خلي صندوق الاستثمارات العام يقرر يحط فلوسه في كرة القدم أصلاً؟ .. ما بين ناس بتقول إن دي سياسة بص العصفورة أو ما يسمي Sportswashing اللي هو نخلي الناس تتلهي في حاجة مسلية بدل ما كل شوية يتكلموا عن أداء حقوق الإنسان في المملكة .. قصاد إن ناس تانية بتقول إن السعودية شافت اللي عملته قطر بكاس العالم و إزاي بشوية قوة ناعمة أو Soft Power اسم قطر و مبادئها بقت علي كل لسان و السعودية قالت لنفسها هو أنا يعني ناقصني إيد ولا رجل .. قصاد ناس تالتة شايفة إن الموضوع بيزنس بحت و إن كل ده جزء من استراتيجية رؤية 2030 عشان (محمد بن سلمان) يخلي الإقتصاد السعودي يبطل يعتمد نهائياً علي عائدات النفط بتكلفة فوق 7 ترليون دولار و علي فكرة أنا عارف عشان إحنا في مصر منعرفش عن الرياضة غير كرة القدم بس صدقني السعوديين حاطين فلوس في رياضات كتير من أول كرة القدم للجولف و البوكس و سباقات الفورميلا وان Formula-1 .. قصاد رأي رابع أنا ميال ليه الحقيقة وهو إن اللي بيحصل ده تقدر تسميه تحول مجتمعي Domestic Transformation لإنك لما تيجي تستهدي بالله كده و تبص للمجتمع السعودي يعني تبص للبني أدمين بقي اللي عايشين في البلد حتلاقيهم مش بس بني أدمين عايشين علي عائدات النفط إنما دول شعب 70% منهم شغال في القطاع العام .. دي مش بس محاولة من PIF إنهم يبقي عندهم دوري تنافسي و إن كنت عند رأيي إن اللي عملوه ده حيقلب الدوري بتاعهم لدورة رمضانية بس دي محاولة منهم إنهم يفتحوا بيزنس قطاع خاص جديد في مجال كرة القدم عشان يشغل ناس و يخلق فرص عمل بعيد عن القطاع العام ..جميييل .. ده معناه إن الفلوس اللي حطها PIF في الأربع أندية دي هي في الأخر استثمار .. بيزنس يعني .. السؤال بقي .. هل البيزنس ده عنده فرصة إنه يجيب فلوس تخلي الاستثمار ده مش حقول يحقق ربح إنما حتي يجيب همه؟
بص علي الدوري الإنجليزي اللي هو المفروض الدوري الأغني و الأمتع و الأقوي علي مستوي العالم .. لو جيت تبص علي مصاريف الأندية الإنجليزية فإنت حتلاقي نفسك قصاد 4-5 أندية بيصرفوا بغباء .. بيجي وراهم ناديين كمان مصاريفهم أقل شوية بس بتخليهم يدوبك ينافسوا علي مركز أوروبي .. و بعد كده باقي الأندية اللي علي الله حكايتها .. ده الطبيعي في أي دوري في العالم .. الطبيعي إن يبقي عندك 3-4 أندية عندهم فرصة للمنافسة علي الدوري و ناديين كمان واقفين متحفزين يمكن يخشوا وسط الحسبة و باقي الأندية بتلعب في المنطقة الدافئة بعيداً عن خطر الهبوط .. بس الفكرة إن السيستيم ده عشان يتعمل خد سنين .. الدوري الإنجليزي في صورته دي معانا من التسعينات فخد وقته في النمو لحد ما بقي الوحش بتاع دلوقتي .. اللي صندوق الاستثمارات السعودي عمله هو إنه عايز يحول الدوري السعودي لنسخة من الدوري الإنجليزي بس في سنة واحدة عن طريق إنه يصرفله 950 مليون دولار .. هل ده كافي؟ .. و الله علي حسب .. السعودية هي الإقتصاد ال17 علي مستوي العالم قبليها أندونيسيا و بعديها هولندا .. فتقديري الشخصي إن حرفياً عشان تحقق التارجيت بتاعك إن الدوري السعودي بقدرة قادر يبقي التقليد بتاع البريميير لييج فإنت محتاج تصرف قد ال950 مليون دولار دول عشان بس تعوض فرق السنين اللي الدوري الإنجليزي خدها عشان يكبر قصاد إنك عايز الدوري بتاعك يكبر في يوم و ليلة .. الدوري السعودي لحد قبل اللي بيحصل دلوقتي ده كان دوري معدل الحضور الجماهيري فيه بيلعب حولين 10,000 متفرج في الماتش اللي هو تقريباً نفس المعدل بتاع بلد زي بولندا .. هل إنت متخيل إنك تقدر في يوم و ليلة تخلي الحضور الجماهيري لماتشات الدوري السعودي زيه زي الدوري الإنجليزي أو حتي الألماني؟
خليني أختم بإني أقولك إن كل واحد دماغه مريحاه .. يعني أنا شخصياً مش مواطن سعودي و مش معايا باسبور سعودي بس في نفس الوقت أنا بستغرب منظمات زي Human Right Watch و منظمة العفو الدولية سابت الرقابة المفروضة علي تويتر في المملكة و سابت حق حرية إبداء الرأي و مسكت في حقوق الشواذ و إن إزاي لاعيبة أوروبية كانت زمان شايله شارة الكبتنة عليها شعار قوس قزح بتاع البسكلتات .. زي (جوردان هيندرسون) .. و دلوقتي بيلعبوا في السعودية .. علي الناحية الثانية إتحاد كرة القدم السعودي عشان زي ما يكون قلبه حاسس إن البعزقة دي مش حتخلي مستوي اللعبة يعلي فناويين يحطوا في اللايحة بند بيجبر الأندية إن لازم 10 لاعيبة من ال25 اللي متسجلين في القايمة يكونوا تحت 21 سنة كنوع من أنواع إجبار الأندية إنها تهتم شوية بقطاع الناشئين أو لو يا سيدي ناويين تجيبوا لاعيبة من بره يبقي كتر خيركوا لو كان لسه عيل صغير .. ناس تالتة بتلعب في حتة تانية خالص إن المسئولين عن الدوري السعودي تعاقدوا مع شركة علاقات عامة اسمها IMG عشان تشتغل علي إزاي ماتشات الدوري السعودي تتذاع في حتت مختلفة من العالم و لحد دلوقتي هم فعلا ماضيين عقود بث ماتشات الدوري في 130 منطقة في العالم من ضمنهم بريطانيا .. اللي أنا عايز أقوله إن فيه شغل بيتعمل و ده شيء يحترم .. تقديري الشخصي و قد أكون غلطان إن عشان صندوق الاستثمارات العام حصر فلوسه علي 4 أندية فده مش حيخليك قصاد دوري يمتعك من التنافسية اللي فيه .. تقديري الشخصي برده إن لو نسبة الفرجة علي الماتشات في الاستادات مزادتش للمعدلات اللي بنشوفها في أوروبا فالعائد المادي للاستثمارات دي كلها مش حيكون كافي إن الاستثمار ده يستمر أكتر من 5 سنين و عارف إنه توقع ممكن ناس كتير ترفضه بس أرجع تاني و أقولك قد أكون غلطان.
المصادر:
- مقالة بعنوان Are we looking at Saudi Pro League spending, stars all wrong? نشرت علي موقع قناة ESPN وده لينك المقالة الأصلية:
https://www.espn.com/soccer/story/_/id/38377404/saudi-pro-league-transfer-spending-summer-pif-gamble - مقالة بعنوان Saudi Arabia’s Pro League is taking advantage of football’s greed and inequality نشرت في موقع The Conversation و ده لينك المقالة الأصلية:
https://theconversation.com/saudi-arabias-pro-league-is-taking-advantage-of-footballs-greed-and-inequality-211259 - مقالة بعنوان Saudi Pro League has the big stars-now it has to hope the fervor follows نشرت في جريدة The Guardian و ده لينك المقالة الأصلية:
https://www.theguardian.com/football/2023/aug/10/saudi-pro-league-new-season-big-stars-fervour
