موضوعنا النهاردة اللي حنتكلم عنه هو الصين .. البلد اللي أثبتت إن تعليم كرة القدم للناس أصعب من إنك تعلمهم برمجة .. سبب إننا حنتكلم عن الصين هو الخبر اللي إلي حد ما بقي قديم شوية و هو إن البرلمان الصيني قرر إنهم يشيلوا سقف المدد الرئاسية عشان يفتحوا الباب للرئيس الصيني (جي جينبينج Xi JinPing) إنه يحكم مدي الحياة لو هو حب .. يمكن عشان الدولة الصينية فارضة رقابة صارمة أوي علي كل حاجة بتتقال في الإعلام فإحنا حسينا إن الصينيين كأنهم ولا فارق معاهم بس ده مش حقيقي .. حصل جدل كبير أوي جوه الحزب الشيوعي الصيني الحاكم بس الجدل ده محدش حس به ولا حد عارف عنه حاجة .. ناس كتير من جوه و بره الصين إعتبرت ده قال يعني الصين رايحة في إتجاه الديكتاتورية و كأن الصين كانت جنة الديموقراطية علي الأرض .. اللي إنت محتاج تفهمه إن (جي جينبينج) مكنش محتاج إن البرلمان يشيله سقف المدد الرئاسية و إنه كان ممكن يكمل في الحكم لو هو حب عادي جداً .. القرار اللي إنت خدته علي صدرك أوي و إتصدمت منه في الحقيقة هو عامل بالضبط زي ما حيحصل في مصر لما البرلمان يشيل سقف المدد الرئاسية عشان يسمحوا للرئيس (عبدالفتاح السيسي) إنه يكمل في منصبه اللي هو السر اللي عارفه مية مليون بني أدم .. إحنا كمصريين فاهمين ده و يمكن بره حياخدوا الموضوع كأنه صدمة بس إحنا فاهمينه و متوقعينه و مش مستغربين .. ده بالضبط إحساس الصينيين بالقرار.
عشان تفهم ليه الصينيين إتضايقوا من القرار بس محدش استغرب منه إنت محتاج تاخد كورس سريع بس في تاريخ الصين الحديث .. في الثمانينات حكم الصين رجل كباره اسمه (دينج جياوبينج Deng Xiaoping) .. سنة 1981 الرجل ده قال إن مفيش أي داعي لحاجتين: أول حاجة إن مفيش داعي إن اللي بيحكم الصين يحكم لحد ما يموت و ثاني حاجة إن مفيش داعي برده لفكره الحكم المركزي أوي ده و إن لازم كل صغيرة و كبيرة في الحكم تتاخد من العاصمة و لازم ندي شوية حرية في إتخاذ القرار لحكام الولايات .. السنة اللي وراها الدستور الصيني إتعدل بحيث بقي اللي يحكم الصين سقفه مدتين رئاسيتين كل مدة فيهم 5 سنين .. مش كده و بس .. رئيس الصين بقي في إيده فعلياً سُلطات أقل من سلطات رئيس الحزب الشيوعي و وزير الدفاع و المنصبين أساساً ملهمش سقف مدة للبقاء في السلطة .. و إن كان فيه إتفاق أو إجماع جوه القوات المسلحة الصينية إن وزير الدفاع مينفعش يكمل أكتر من 10 سنين في منصبه و إن وزير الدفاع لازم يطلع معاش بمجرد ما يوصل 68 سنة .. اللي إنت محتاج تفهمه إن (دينج جياوبينج) كان كداب كدب الإبل علي رأي (بوحه الصباح).
الإصلاحات الوهمية اللي عملها الرجل ده كان هدفها إن يبان قدام العالم إن الصين بتتجه إنها تبقي دولة شبه ديموقراطية علي الأقل أو دولة مش ديكتاتورية أوي .. عشان أثبتلك كلامي .. (دينج جياوبينج) شخصياً ملتزمش بالقاعدة اللي هو حطها و فضل يحكم لحد سنة 1997 مع إنه كان المفروض يسيب منصبه قبلها بعلي الأقل 10 سنين .. أزيدك من الشعر بيت .. خلال ال70 سنة اللي فاتوا حكم الصين 8 رؤساء ولا واحد فيهم إلتزم بسقف المدد الرئاسية باستثناء الرجل المحترم (هو جينتاو Hu Jintao) اللي حكم الصين قبل (جي جينبينج) اللي بيحكم الصين دلوقتي .. باقي ال7 حكام كملوا أكثر من 10 سنين بس طلعوا بره الحكم سواء بإن الحزب الشيوعي إنقلب عليهم و أجبرهم علي الاستقالة و ده سببه إنهم مقدروش يفرضوا نفوذهم علي الحزب عشان يكملوا.
عشان كده الصينيين مش مستغربين .. (جي جينبينج) الفرق بينه و بين اللي قبله إنه رجل واضح جداً و مبيحبش يزوق الكلام .. اه أنا ديكتاتور و حفضل أحكم لحد ما أموت و كله بالقانون .. المشكلة مش إنه عايز يحكم لحد ما يموت .. المشكلة إنه مصدق نفسه .. (جي جينبينج) لو جيت تتكلم معاه حتلاقيه بيبيع فكرة إن الحزب الشيوعي الصيني جه عشان ينفذ وعده للصينيين بإنه يحررهم من ديكتاتورية حكم القوميين .. القوميين لو إتكلمت معاهم حيقولولك إنهم جم عشان ينفذوا وعدهم للصينيين بإنهم يحرروهم من ديكتاتورية حكم أباطرة الصين .. المشكلة إن سواء القوميين أو الشيوعيين من بعدهم يا عيني صدقوا نفسهم و مع الوقت تحولوا لنفس الشيطان اللي هم جم عشان يحاربوه .. الغريب مش إن بس هو مصدق نفسه ده الحزب الشيوعي الصيني كله حط كذبة و هم عارفين إنها كذبة بس هم صدقوها و مقتنعين بيها جداً.
لو إتكلمت مع أي حد من الحزب الشيوعي الصيني و سألته هو ليه حضراتكوا لغيتوا سقف المدد الرئاسية حيقولك و الله إحنا عملنا استطلاعات رأي و لقينا إن الشعب كله طاير من الفرحة من أداء زعيم الأمة (جي جينبينج) و عايزينه يكمل في الحكم .. تحس إن الحزب الشيوعي الصيني كله بقي نسخة من (أحمد موسي) .. بس لو طلبت منهم تشوف استطلاعات الرأي دي حيقولولك لا سوري و الله ده سر قومي .. لو طلبت منهم إنك إنت تعمل استفتاء مستقل حتقلايهم رافضين و لو أصريت حتلاقي نفسك قدام تهمة التأمر لقلب نظام الحكم .. اه الحق لازم يتقال إن كتير من الصينيين مبسوطين من (جي جينبينج) خصوصاً بسبب حربه ضد الفساد و بسبب سياساته الخارجية اللي رجعت الصين لمكانتها كقوة عظمي .. و الحق لازم يتقال برده إن اللجنة المركزية للحزب الشيوعي بتقول إن مش معني إن الحزب لغي سقف المدد الرئاسية إنه فعلاً الرئيس حيحكم لحد ما يموت لإن لو مثلاً خلال المدة الثالثة بتاعته أداءه بقي وحش و مشاكله كترت فالحزب حيقلشه و يجيب حد تاني غيره .. هل ده حيحصل؟ الله أعلم و أبقي كداب لو قلتلك إني عارف الإجابة.
مهم برده تكون مستوعب حاجة و هي إن فلسفة الحكم في الصين مبنية علي فكرة اسمها Trinity of Leadership أو إن اللي بيدور الليلة دي كلها 3 أعمدة للحكم للي هم رئيس الدولة و رئيس الحزب و وزير الدفاع .. قبل القرار ده ما يتحط كان رئيس الحزب و وزير الدفاع قانوناً ملهمش سقف مدد .. لما رئيس الدولة كمان بقي ملوش سقف مدد رئاسية فده نظرياً علي الأقل بيخلق توازن أكتر بين التلاتة إن كلنا بقينا زي بعض .. إنت ممكن تبص للمنطق ده و تشوفه منطق أهبل مش مفهوم .. بس أيا كان رأيك إيه فاللي كلنا متفقين عليه هو إن أي حد يقولك إن القرار بتاع إنهم يشيلوا سقف المدد الرئاسية قرار كويس أو يقولك إنه قرار وحش إعرف إنه بينجم و بيشم علي ظهر إيده .. عايزك تجيب فشارك و إزازة البيبسي بتاعتك و نفضل نتفرج علي إيه اللي ممكن يحصل خلال السنين الجايه .. هل (جي جينبينج) رئيس كويس؟ الإجابة اه و أي حد يقول غير كده يبقي بيضحك علي نفسه .. هل هو خلي الصين فلة شمعة منورة؟ لا الصين زيها زي أي بلد تانية عندها مشاكل و من أهم مشاكلهم التلوث البيئي اللي مخلي الصينيين مش عارفين يتنفسوا هوا نظيف .. هل من مصلحة الصين إن الرجل ده يكمل مدي الحياة؟ المنطق بيقول لا بس الله أعلم و اللي أنا متؤكد منه إن حيجي ناس هنا تقولك إشمعني الصين اللي عملت كده ما إحنا كمان عندنا زعيم الأمة اللي عايزينه يحكم مدي الحياة .. الحقيقة اللي إنت محتاج تفهمها إن اللي عندنا ميجيش ظفر (جي جينبينج) .. بدأت تفهم المصيبة فين؟
المصدر:
مقالة بعنوان Why Abolishing China’s Presidential Term Limits Is Such A Big Deal نشرت في Website بتاع محطة إذاعة NPR و ده لينك المقالة الأصلية:
https://www.npr.org/sections/parallels/2018/03/14/593155818/why-abolishing-chinas-presidential-term-limits-is-such-a-big-deal
