إسأل أي مهندس تعرفه إيه اصعب مشروع إنت اشتغلت عليه وحتلاقي معظم الناس رايحة في سكة إنك تلعب في مشروع قائم بالفعل وتبقي عايز تجدده .. إنك تشتغل علي مشروع متحطش فيه قلم حتي لو تصميمه رخم ده حمادة وإن يبقي عندك مبني شغال وقائم وتبقي عايز تجدده بإنك تكبر قدرته الاستيعابية وتعدل في شكله وتخليه سيكسي أكتر ده حمادة تاني خالص ودي المشاريع اللي بتوريك المهندس البصمجي من المهندس اللي فاهم هو بيعمل إيه .. مشاريع Renovation هي اللي بتعلم بجد لإن مشكلة المشاريع من النوع ده إن بيتحطلك كذا خط أحمر بيتقالك متلعبش فيهم وده اللي بيصعب المشروع ومفيش مشروع زي كده إتعمل في الفترة اللي فاتت يستحق إننا نتكلم عنه شوية قد مشروع تطوير استاد سانتياجو بيرنابيو اللي في حالة إنك ملكش في كرة القدم يبقي الملعب بتاع نادي ريال مدريد كبير العاصمة الإسبانية .. الفكرة اللي مخلياني عايز أتكلم عن المشروع ده بالذات إن استاد سانتياجو بيرنابيو القديم مكنش وحش .. بالعكس ده كان واحد من أحلي الاستادات مش بس في أوروبا إنما في العالم كله بس اللي رئيس النادي (فلورنتينو بيريز Florentino Perez) كان عايز يحققه هو يبقي عنده استاد يعمل حاجتين: أولا يجيب فلوس كتير .. ثانياً يخلي أي حد يشوفه يحط إيده علي بقه من الإنبهار.
السانتياجو بيرنابيو يبقي الاستاد بتاع ريال مدريد من سنة 1947 ومع كل بطولة ياخدها ريال مدريد فمكانة الاستاد في قلب سكان العاصمة بتزيد .. استاد قدرته الاستيعابية زادت من 6,000 لحد ما بقت 41,000 في أول كام سنة من عمره .. سنة 1982 مع حصول إسبانيا علي شرف تنظيم كأس العالم ولإن استاد السانتياجو بيرنابيو أختير عشان تتلعب عليه ماتشات في البطولة فإتركب ليه سقف .. سنة 1992 إتعمل أكبر تطوير للاستاد لما إتركبله 4 أبراج في الأربع أركان بتوعه وتحول الاستاد لاستاد كله كراسي بحيث مبقاش فيه مشجع يخش يتفرج علي أي ماتش ويفضل واقف علي رجله .. بس سنة 2011 الجمعية العمومية للنادي وافقت علي المشروع الجديد لتطوير الاستاد بحيث إتعمل إجتماع حضره (فلورينتينو بيريز) مع مجموعة من شركات التصميمات المعمارية التقيلة علي مستوي العالم اللي شغاله في حتة الاستادات دي بحيث كل شركة تقدم المقترح بتاعها بناء علي الطلبات اللي حطها الكلاينت اللي هو (بيريز) واللي الحقيقة كانت طلبات لما تسمع كل واحدة لوحدها تقول لنفسك ماشي هي صعبة بس تتعمل لكن لما تحط كل الطلبات دي جنب بعضها حتهرش في شعرك لإن الطلبات دي علي بعضا كده لما تكون عايز تطبقها في مشروع فده اللي فعلاً بيتقال عليه هذا ما لم نسمع به من قبل .. فيه حاجة بس مهم تبقي عارفها إن فيه خط مترو أنفاق بيعدي تحت الاستاد علي طول بجملة المشاكل اللي فيها المشروع يعني.
فيه 3 حاجات أساسية إتعملت في الاستاد محتاجين نتكلم عنها:
- الواجهة أو Facade بتاعة الاستاد واللي أقرب تشبيه ليها إنها عاملة زي الورقة اللي إنت بتغلف بيها التورتة بحيث تلف داير ما يدور حولين الاستاد .. الفكرة إن الواجهة دي مطلوب تغير شكلها وتكون عازلة وبتحمي للجماهير جوه الاستاد من الظروف الجوية اللي بره.
- إزاي يبقي عندك سقف متحرك تقدر تفتحه وتقفله علي حسب حالة الجو.
- تكنولوجيا تحريك أرضية الملعب بالكامل من مكانها عشان أرضية الاستاد مش بس يتلعب عليها ماتشات كرة قدم إنما ينفع يتلعب عليها ماتشات كرة سلة أو يتعمل عليها حفلات موسيقية اللي هو بإختصار أي حاجة تجيب فلوس .. الفكرة نفسها بتاعة إنك تعمل استاد أرضية النجيلة بتاعته بتتحرك من مكانها مش جديدة وإتطبقت في استاد توتنهام هوتسبر اللي عملته شركة بوبيولوس Populous للاستشارات الهندسية عشان أرضية استاد توتنهام يتلعب عليها ماتشات كرة القدم بتاعتنا وكمان ماتشات كرة القدم الأميريكية.
سنة 2014 التصميم بتاع تحالف من 3 شركات هم GMP و L35 و Ribas & Ribas أختير عشان يبقي التصميم اللي ريال مدريد حينفذه .. التصميم بتاعهم قال إن الواجهة حتبقي عبارة عن شرايط من الصلب عددهم بيوصل 7,500 شريحة متركب عليها شاشات عرض بحيث اللي ماشي بره الاستاد يقدر يتفرج علي أي حاجة إنت عايز تعرضها أو تروج ليها بحيث فيه نقطة برده إن الواجهة حيكون جزء من تصميمها إنها تخلي صوت الجماهير جوه الاستاد ميطلعش بره للشارع عشان التلوث الضوضائي بقي عشان دول أجانب عايزين يراعوا أدمية الناس وكده .. كمان حتتركب شاشة 360 درجة دايرة داير ما يدور في السقف بتاع الاستاد يتعرض عليها إحصائيات وإعادة الجوان للجماهير جوه الاستاد .. ده غير زوربيح من المحلات والمطاعم والكافيهات اللي طبعاً حتتأجر بالشيء الفلاني وأخيراً وليس أخراً حيتعمل جراح تحت الأرض خمس أدوار .. السقف حيتفتح ويتقفل في أقل من 15 دقيقة .. سنة 2017 كل الورق والموافقات والتراخيص خلصت واللي بناء عليه النادي خد قرض بحوالي 600 مليون دولار عشان يبدأوا يشتغلوا وسنة 2019 بعد 8 سنين من إعلان الفكرة نفسها بتاعة تجديد الاستاد بدأ الشغل وده يوريك إزاي المشاريع زي دي بتحتاج وقت طويل فشخ عشان تدرسها .. مش بس تدرس إزاي بتتعمل إنما تدرس حتجيب فلوسها منين .. المشروع تكلفته وصلت فوق المليار دولار بعد ما كان في الأول محطوطله ميزانية يدوبك 600 مليون دولار .. إنت متخيل الرقم؟ .. ده أكنك إشتريت 10 لاعيبة زي (جود بيلينجهام Jude Bellingham) .. وده بيحطنا قدام السؤال المهم .. عملتوها إزاي دي يا كفرة؟
- أول خطوة إنهم شالوا السقف القديم اللي كان متركب وقت كأس العالم 1982 .. لما شالوا السقف ده لاحظوا حاجة إن فيه أماكن في المقصورة الشرقية من الاستاد فاضية محدش مستغلها فقالك حلو إحنا نحط فيها كراسي فهوبا قدرة الاستاد الاستيعابية نطت من 81,000 متفرج بقت 85,000 متفرج.
- نيجي بقي للخطوة المستفزة وهي إنك تبني السقف الجديد .. مبدأياً إنت محتاج ونشين كبار كل واحد فيهم حمولة 800 طن عشان يشيلوا أجزاء السقف يركبوها .. السقف ده عشان يركب فإنت محتاج جمالونين بطول الاستاد يتركبوا جنب بعض .. الجمالون الواحد طوله 176 متر .. السقف عبارة عن جمالونين بالطول و 4 جمالونات بالعرض بإجمالي 33,000 طن من الصلب اللي هم تقريباً نفس كمية الصلب اللي إنت محتاجها عشان تعملك 120 طيارة مدنية طراز Airbus A380.
- ثالث خطوة إنهم عشان الاستاد بيطل علي الشارع بتاع البنوك في قلب العاصمة مدريد فإنت مينفعش وإنت بتبني الاستاد تقولهم معلش حقفل الشارع .. مش شارع أبوك هو .. عشان كده إتعمل نفق بطول الاستاد تحت الأرض عشان العمال والبضاعة تمشي فيه بدل ما تضطر تمشي فوق الأرض وتعطل المرور.
- رابع خطوة ودي اللي بتخلي استاد السانتياجو بيرنابيو في حتة تانية إن أرضية النجيلة كلها بتتشال من مكانها أو زي ما بيسموها Fully Retractable Pitch .. أرضية النجيلة متقسمة 12 شريحة بالطول بحيث كل شريكة محطوطة علي عجل وقضبان شبه قضبان القطر أو المترو بحيث الفواصل بين الشرايح دي إنت لا بتشوفها ولا اللاعيبة في الملعب بتحس بيها .. لما الماتش يخلص وتبقي عايز تعمل حفلة لأي مغني مثلاً تاني يوم فالشرايح ال12 بتتسحب علي جنب وبتنزل زي الأطباق اللي بتترصص في الرف بتاع المطبخ فوق بعضها تحت الأرض في حتة بيسموها هايبو-جيوم Hypogeum علي عمق 35 متر تحت الأرض .. في استاد توتنهام هوتسبر النجيلة كانت بتتسحب وتتحط في الباركينج بس الحل ده مكنش ينفع في استاد السانتياجو بيرنابيو مش لسبب غير إن استاد توتنهام كان بيتعمل من أول وجديد علي أرض فاضية فإنت كان عندك مساحة تكبر الجراج بحيث يستحمل أرضية النجيلة بس في السانتياجو مفيش الكلام ده .. المشروع قائم ومينفعش تقول للمحليات أو لجهاز مدينة مدريد والنبي هدولنا كام بيت عشان نكبر مساحة المشروع .. متنساش إن في المعتاد الاستادات بتتبني في أخر بلاد المسلمين بحيث بيكون حوليها طرق سريعة توصلك للمدينة بس السانتياجو بيرنابيو يمكن هو الاستثناء للقاعدة دي لإن الاستاد مبني في قلب العاصمة مدريد .. يارجل ده فيه خط مترو أنفاق ماشي تحت الاستاد.
دي فكرة هايبو-جيوم Hypogeum إن أرضية النجيلة بتترص فوق بعضها في حتة عميقة شوية بعمق 35 متر .. الفكرة إن بتتعامل مع الحفرة دي كأنها صوبة زراعية يعني تقدر تحطلها كل مصادر رعاية النجيلة اللي إنت عايزها من إضاءة وري.
مشروع تطوير السانتياجو بيرنابيو بدأ سنة 2019 وكان المفروض إنه يخلص في 2022 بس ربك أراد إن جائحة فيروس كورونا Covid-19 تحصل فالتسليم بتاع المشروع إتأخر فوق السنة .. معاك إن بناء الاستادات بيفشخ ميزانية أي نادي بيقرر يعمل الخطوة دي بس لو المشروع إتعمل صح فهو بيجيب همه بسرعة يعني إنت لو صدقت الناس بتوع الحسابات جوه ريال مدريد فالاستاد لما يشتغل إن شاء الله يعني متوقع يدخلهم 217 مليون دولار أرباح في السنة جايين من تذاكر الجماهير وتأجير الاستاد وفلوس الجراج اللي علي فكرة بيجيب فلوس حلوة فشخ.
المصادر:
- فيديو بعنوان Inside Real Madrid’s $1BN Stadium Upgrade نشر علي قناة The B1M علي YouTube وده لينك الفيديو:
https://www.youtube.com/watch?v=k6m6h2ukSU0 - فيديو بعنوان The $3BN Stadium El Classico (Bernabeu vs. Camp Nou) نشر علي قناة Top Luxury علي YouTube وده لينك الفيديو:
https://www.youtube.com/watch?v=7ZQeK4Pnicc - مقالة بعنوان L35 Architects on the Remodeling of Santiago Bernabeu Stadium in Madrid, Just Months Away from Completion نشرت في موقع Arch Daily وده لينك المقالة الأصلية:
https://www.archdaily.com/1008246/l35-architects-on-the-remodeling-of-santiago-bernabeu-stadium-in-madrid-just-months-away-from-completion
