الهندسه و البيئه و الابحاث العلميه .. بحر واسع من العلم حنحاول سوا نفهمه
درجة الحرارة هي كمية إحصائية Statistical Quantity .. بمعني .. لو حبيت أقيس درجة حرارة شوية مياه موجودين في كوباية .. حضرتك حتجيب ترمومتر زئبقي وتحطه في الكوباية .. درجة الحرارة اللي بتطلعك هي متوسط درجة حرارة جزئيات المياه لإن مينفعش تقولي إنك ناوي تحسب درجة حرارة جزيء معين من جزيئات المياه اللي موجودين في الكوباية .. مينفعش تقولي أنا حقيس درجة حرارة أليكترون معين بيدور حول ذرة .. لو لقيت حد بيقولك كده فهو بيهري وبيفتي.
تكنولوجيا Direct Air Capture بتتحط تحت عيلة كبيرة شوية اسمها تكنولوجيات الإنبعاثات السالبة Negative Emissions Technologies و دي بتتقال علي أي تكنولوجيا بتشتغل علي مص أو سحب الملوثات من الهواء الجوي .. النوع ده من التكنولوجيا مش حينفع متستخدموش لو إنتي كحكومة بتحترمي نفسك وناوية تحترمي إتفاقية باريس Paris Agreement ودي الإتفاقية اللي مضت عليها 196 دولة سنة 2015 ومن ضمنهم مصر عشان كل الدول تشتغل مع بعضها بحيث إرتفاع درجة حرارة سطح الأرض ميزيدش عن إتنين درجة سليزيوس سنوياً.
فيه ناس مش بتعمل دايت ومش ماشية علي نظام غذائي وبتعك في أكلها وتلاقيه لما يروح يتغدي يطلب سندوتشين شاورمة وباكت بطاطس ويحلي بطبق كنافة بس أهم حاجة إن الحاجة الساقعة اللي بيبلع بيها تبقي بيبسي دايت .. الناس دي لو دخلتها كمتطوعين في أي دراسة علمية ممكن تبوظلك الدنيا وتديك نتائج غلط وإنت مش عارف.
اللي عملته شركة Mazda إنها جابت فكرة موتور الديزل أو الCompression Ignition Engines اللي انت بتلاقيه في عربيات النص نقل و فكرة موتور البنزين أو الSpark Ignition Engines اللي بتشوفه في أي عربية ملاكي و ضربوهم في الخلاط مع بعض و طلع في الأخر المحرك SkyActive-X.
بداية من 2014 لما إتعمل المؤتمر السنوي للقياسات والأوزان الكمية العامة .. عارف إنه عنوان ميتفهمش و تلاقيك بتسأل مين الدحيحة اللي بيحضروا مؤتمر زي ده بس مش مهم دلوقتي .. المهم إنهم قالوا طب إيه رأيكوا نغير تعريف الكيلوجرام بحيث يبقي له علاقة بحاجة إسمها ثابت بلانك و ده إتسمي علي إسم عالم فيزياء الكم (ماكس بلانك).
متنساش إن كل حاجة معلبة بتاكلها فيها ملح .. كيس الشيبسي فيه ملح .. الكاتشاب فيه ملح .. علبه التونة فيها ملح .. عشان كده 75% من الملح اللي بيدخل جسمك يومياً مش بيجي من الملح اللي إنت بتحطه علي الأكل.