المعلومة اللي جاية دي ممكن تصدمك بس صدق أو لا تصدق إن (دونالد ترامب Donald Trump) و(بنيامين نتنياهو Benjamin Netanyahu) إترشحوا لجايزة نوبل للسلام بسبب دورهم إن الإتفاقية دي تتمضي .. عشان الإتفاقية مقالتش أي حاجة عن وقف الإستيطان في الضفة الغربية في المطلق فعايز أقولك إن في نفس اليوم اللي إتمضت فيه الإتفاقية الحكومة الإسرائيلية مضت علي قرار إنشاء 3,000 بيت جديد في المستوطنات الإسرائيلية في الضفة الغربية.
أظن أنا محتاج أختم بإني أسأل هل سياسة الإغتيالات بتاعة العلماء الإيرانيين دي جابت نتيجة؟ الحقيقة هي اه جابت .. كتير من العلماء الإيرانيين بقوا مرعوبين إنهم يشتغلوا في المشروع النووي بتاع بلدهم و يمكن ده اللي أجبر الحرس الثوري الإيراني إنه يصرف مبالغ ضخمة أوي عشان يبدأ يشوف إزاي يأمن حياة العلماء اللي شغالين معاه.
صحيح إن القوات البرية العراقية حققت تقدم محترم في الأيام الأولي للحرب لحد ما وصلوا لمدينة خوزستان الإيرانية بس مع الوقت تقدمهم بقي بيتقاس بالسنتيمتر مش بالكيلومتر لحد ما التقدم ده وقف خالص مع صلابة المقاومة الإيرانية .. شوية و الحرب قلبت علي حاجة شبه حروب الخنادق بتاعة الحرب العالمية الأولي اللي هو جيشين حافرين خندقين قصاد بعض و راصينهم عساكر و مدافع رشاشة و لا ده عارف يتقدم ولا ده عارف ياخد من التاني لا حق ولا باطل.
سنة 2012 الإسرائيليين و الألمان إتفقوا علي إن إسرائيل حتستلم 3 غواصات كمان و الألمان كانوا عارفين إن الإسرائيليين حيستخدموا الغواصات دي عشان يحطوا عليها صواريخ بتشيل رؤوس نووية بس يمكن اللي خلي المستشارة الألمانية (أنجيلا ميركل Angela Merkel) توافق علي الصفقة هو إنها خدت وعد من رئيس الوزراء الإسرائيلي (بنيامين نتنياهو Benjamin Netanyahu) بإنه حيسعي بجد عشان يمضي إتفاق سلام مع الفلسطينيين.
اللي حصل مع (محمد بن سلمان) هو هو بنفس تفاصيلة اللي حصل بين (أوباما Obama) والإيرانيين .. زي ما الإيرانيين خدوا الفلوس اللي جاتلهم لما العقوبات الإقتصادية إتشالت وإستخدموها عشان يفتروا علي خلق الله .. (محمد بن سلمان) هو كمان إفتري علي خلق الله .. دخل في حرب ملهاش أي ستين لازمة مع اليمن .. إتعارك مع قطر متفهمش بسبب إيه .. يا راجل ده خطف (سعد الحريري) رئيس وزراء لبنان لما راح زيارة للرياض وفي الأخر زعلان إن (تميم) مرضاش يروح يحضر القمة العربية.
إنت محتاج تفهم إن سبب إن حكومة الإمارات تتعب نفسها و تسرب نص الرسايل بين السفير و وزير الخارجية ملوش علاقة لا بالمفاوضات ولا بأي نيلة .. الإماراتيين سابوا كل ده و مسكوا في نقطة إن طيارة مدنية تابعة للخطوط الجوية القطرية Qatar Airways شالت فلوس و نزلت بيها مطار بغداد و عدت فوق المجال الجوي الإماراتي عشان تدي الفلوس دي لمنظمة إرهابية.
الإتفاق النووي الإيراني مكنش بين أميركا و إيران بس لإن فيه 6 كيانات تانية اللي هم بريطانيا و ألمانيا و فرنسا و الإتحاد الأوروبي و روسيا و الصين و كلهم مش ناويين ينسحبوا من الإتفاق ولا يغيروا أي كلمة فيه .. المنطق بتاعهم لو انت مضايق من بنود الIran Deal هات حاجة تانية تحل محلها بس مينفعش تقول انا مش عاجاباني الIran Deal وانت معندكش بديل.
ده بيحطك قدام حقيقة إن لبنان محدش حينقذها ومحدش في دماغه إنه ينقذها .. انت بتتكلم عن بلد بتحتل المركز 143 من أصل 180 دولة علي مقياس الشفافية الدولية ضد الفساد .. بلد بقالها أكثر من 12 سنة البرلمان مش عارف يوافق علي ميزانية لحد ما ربنا أخيراً كرمهم سنة 2016 و وصلوا لإتفاق.
القصة دي بدأت في نوفمبر 2011 أيام ثورات الربيع العربي لو تفتكر .. بعد ثورات و مليونيات و مصادمات و إعتصامات وخناقات قرر الديكتاتور اليمني (علي عبدالله صالح) الله يرحمه إنه يسيب الحكم خالص و يتنحي و اللي يمسك مكانه هو النائب بتاعه (عبدربه منصور هادي) .. حركة كده زي حركة تنحي الرئيس (محمد حسني مبارك) الله يرحمه بس بدل ما (مبارك) إتحاكم في مصر ف(علي عبدالله صالح) قعد في السعودية مأنتخ و مفخد و ساب (عبدربه منصور هادي) يشيل الليلة.
السعودية معندهاش مصانع سلاح .. السعودية معندهاش مصانع بنادق ألية AK-47 و معندهاش مصانع مسدسات و قنابل .. اللي بيحصل زي ما فعلاً حصل في الفترة من 2012 لحد 2015 إن المخابرات السعوديه إشترت عشرات الالاف من البنادق الألية و المدافع الرشاشة و قاذفات الصواريخ و أكثر من 350 مليون طلقة ذخيرة من دول شرق أوروبا زي ألبانيا و البوسنة و الهارسك و صربيا و الجبل الأسود .. السلاح ده كله بيتنقل بطيارات عسكرية سعودية لقواعد جوية أردنية و سعودية و إماراتية و بعد كده المخابرات السعودية بتوزع السلاح ده علي العناصر المسلحة الموالية للسعودية سواء في سوريا أو اليمن.
بمجرد ما الثورة السورية قامت و اللي تحولت لحرب أهلية سياسة الرقص علي السلالم إترمت في الزبالة و حل محلها سياسة تانية هي إننا خدامين الإيرانيين .. و الحقيقة إن أيا كان موقفك الشخصي من (بشار الأسد) بس انت متقدرش تلومه .. السبب الأساسي إن الرجل ده لحد دلوقتي هو لسه في السلطة هو تحالفه مع إيران و مع حزب الله اللي هو كمان مدعوم بقوة من إيران.
مهم تكون فاهم إن (أية الله علي خامنئي) عنده 78 سنة يعني صحته بقت علي قده وتلاميذه و المقربين منه عارفين كده كويس .. هم عارفين إن في أي لحظة انت ممكن تسمع في الأخبار خبر وفاة المرشد الأعلي للثورة الإسلامية عشان كده هم كانوا عايزين يخلقوا نفس الظروف اللي كانت موجوده لما (روح الله خوميني) مات.