فعلياً و الله و دي شهادة لله يعني نادر أوي تلاقي بلد تقف جنب بلد في وقت زنقتها زي ما السعودية وقفت جنب باكستان في السبعينات .. المفروض يعني باكستان تشيل الهلال و النجمة في علمها و تحط مكانهم صورة الملك (فيصل) الله يرحمه .. المشكلة إن زي ما السعوديين بقي ليهم تصور تاني خالص عن علاقتهم مع باكستان فبرده الباكستانيين بقي ليهم تصور تاني خالص عن مستقبلهم كدولة .. فعلياً و مش ببالغ لو قلتلك إن باكستان إترمت في حضن الصين.
حالياً تقارير عسكرية كتير بتقول إن باكستان تحت إيدها ما بين 150-180 رأس نووي فيه منهم اللي بيكون رؤوس نوويه إستراتيجية و فيه منهم اللي حيكون رؤوس نووية تكتيكية.
الميزانية العسكرية الهندية لسنة 2018 و لسنة 2019 كانت 45 مليار دولار .. قارن ده بالميزانية العسكرية الصينية اللي هي 175 مليار دولار تلاقي إن الهند بتصرف ملاليم مقارنة بالصين .. المشكلة مش بس إن الهند بتصرف أقل من الصين .. المشكلة إن أغلب فلوس الميزانية العسكرية الهندية بتروح لدفع مرتبات 1.2 مليون جندي نظامي في الخدمة و ده رقم جاحد ده غير فلوس المعاشات .. المرتبات لوحدها بتبلع الميزانية العسكرية لدرجة إن مبيفضلش غير 14 مليار دولار بس هم اللي بيتصرفوا علي تسليح القوات المسلحة الهندية.
معلومة رقم واحد: باكستان لما إتكونت هي إتكونت عشان دي حتة من شبه القارة الهندية اللي صادف إن أغلب اللي عايشين فيها مسلمين يعني سبب إنفصال باكستان عن الهند هو إن باكستان عايش فيها مسلمين كتير و الهند عايش فيها هندوس كتير و الإتنين وصلوا لمرحلة إنهم مش طايقين العيشة مع بعض .. معلومة رقم إتنين و هي إن أغلب اللي عايشين في كشمير مسلمين .. ده معناه إن باكستان شايفة إن كشمير دي بتاعتها و بتاعتها لإنها بلد مسلمة عايش فيها مسلمين.
من أول يوم إستقلت فيه سنغافورة عن ماليزيا سنة 1965 و هم في راسهم هسهس إنهم عايزين يبنوا قوات مسلحة قوية خصوصاً إن بمجرد ما إستقلت سنغافورة عانت الأمرين من جيرانها ماليزيا و أندونيسيا اللي كانوا شايفينها دولة لسه عيلة صغيرة كل واحد فيهم عايز يتمنظر عليها و يفرض نفسه.