لينك التسجيل الصوتي علي ساوند كلاود:
https://on.soundcloud.com/2GnM8
لنفترض جدلاً إنك بكره الصبح صحيت علي خبر إن طيارة مقاتلة F-16 Fighting Falcon مصرية تم اسقاطها بصاروخ مضاد للطيارات إتضرب من شبه جزيرة سيناء و طلع تنظيم داعش يقول أيوه أنا اللي وقعت الطيارة .. لو حاجة زي دي حصلت ففيه كذا طرف حيبص للموضوع بوجهات نظر مختلفة .. فيه ناس حتقول يا لهوي إحنا لازم نقف ورا جيشنا .. ناس حتقول جيش إيه اللي نقف وراه دول مش عارفين يدافعوا عن نفسهم .. بس فيه ناس حتقول يا نهار أسود هو إحنا مديينكوا طيارة مقاتلة ثمنها في السوق 50 مليون دولار و أنتوا واخدينها في الSale بتاع المعونة العسكرية الأميريكية بنص ثمنها عشان تقع بصاروخ مش متكلف ألف دولار ضاربه واحد من داعش مبيعرفش حتي يقرأ الكتالوج بتاع الصاروخ .. زي ما إنت غالباً استنتجت فالناس الأخيرة دول يبقوا الأمريكان .. وجهة نظر الأمريكان حتكون إننا يا مصريين مديينكوا سلاح عشان تشوفوا شغلكوا و تحاربوا الإرهاب اللي إحنا خلقناه بس مكسلين و مش عايزين نحاربه بنفسنا و باعتينلكوا الشغلانة من الباطن تعملوها أنتوا .. أهو المنطق ده هو اللي مخلي الأمريكان بيشدوا في شعرهم من اللي بيحصل بين الهند و باكستان.
في حالة إنك قاعد في كهف مش داري بالدنيا فخليني أفهمك .. باكستان و الهند ضربوا بعض .. عشان الناس اللي لسه مش مستوعبة أوي خليني أحطهالك بصورة تفهمها (شاه-روه-خان) و (عامر-خان) و أي ممثل هندي أخره خان دخلوا في خناقة مع جيرانهم و خدوا علقة موت .. الموضوع بدأ بهجوم إرهابي يوم 14 فبراير 2019 كان السبب في مقتل 40 عسكري هندي في الجزء التابع للهند من كشمير .. المشكلة إن التنظيم اللي أعلن مسئوليته عن الهجوم ده كانت جماعة اسمها جيش محمد و ده تنظيم إرهابي قاعد في باكستان .. الطبيعي في وضع زي ده إن الهند بتقدم طلب يا للإنتربول يا إما لباكستان إن والله أنا عايزاكي تسلميلي الناس بتوع جيش محمد دول لإنهم إرتكبوا جريمة علي أرضي .. بس طبعاً الخناقة بين الهند و باكستان مش بتمشي بالطريقة الطبيعية بين أي دولتين طبيعيتين .. الرد بتاع الهند كان إن بعد الهجوم ده ب12 يوم القوات الجوية الهندية نفذت غارات جوية جوه الأراضي الباكستانية استهدفت معسكرات تدريب بتاعة تنظيم جيش محمد .. الهنود قالوا إن الغارات دي قتلت عناصر من التنظيم و دمرتلهم شوية من البنية التحتية بتاعتهم لا و كمان من غير ما تؤدي لوفاة أي مدنيين .. شايفين إحنا شاطرين إزاي .. بس الأهم إن الهنود قالوا إن الغارات دي مش إنتقامية قد ما هي استباقية .. هم قالوا إن المخابرات الهندية جاتلها معلومات إن جيش محمد كان بيخطط إنه ينفذ عمليات إرهابية تانية جوه الهند .. طبعاً باكستان رد فعلها كان إن عليا الطلاق كذب .. مش كده و بس .. الباكستانيين قالوا إن الهنود مضربوش حاجة إلا شوية شجر في حتة مقطوعة مفيش حد قاعد فيها .. مش كده و بس .. باكستان قدمت شكوي ضد الهند في الأمم المتحدة إن الغارة دي تعتبر حاجة اسمها إرهاب بيئي Eco-Terrorism اللي في رأيي الشخصي كلمة مينفعش تتقال إلا لحد قاعد في الشغل و كان واكل شطة كتير في العشا بليل و عمال يضرب في قنابل غازية وسط زمايله.
باكستان مسكتتش .. هم ردوا بغارة جوية جوه الجزء التابع للهند من كشمير بحيث إن الباكستانيين قالوا إننا و الله استهدفنا منشأت مش تابعة للمؤسسة العسكرية الهندية .. اللي هو إنت عايز تسألهم طب هو أنتوا ضربتوا إيه بالضبط عشان مش فاهم؟ خرابة محدش قاعد فيها مثلاً ؟ .. المهم إن بعدها بكام يوم حصل إشتباك جوي بين 4 طيارات .. إتنين هنود و إتنين باكستانيين .. واحدة من الطيارتين الهنود وقعوا و الطيار إتأسر .. بعدها بكام يوم باكستان أفرجت عن الطيار و رجعته الهند علي أمل إن الخطوة دي تخفف شوية من حدة الأزمة بين البلدين بس أنا محتاج أرجع للمعركة الجوية دي لإن المعركة دي ورتنا حاجات كتير أوي عن الحالة اللي وصلت ليها القوات المسلحة سواء الهندية أو الباكتسانية:
- معلومة رقم واحد .. الإتنين طيارات الهنود اللي دخلوا الإشتباك ده كانوا طيارت من طراز MiG-21 Bison و دي طيارات قديمة حبتين تصنيع سوفيتي دخلوا الخدمة لأول مرة سنة 1956 يعني دي طيارات من أيام العدوان الثلاثي علي مصر و زي ما قلتلك منهم طيارة وقعت و الطيارة علي حسب الصور اللي نزلت علي Social Media فهي وقعت بصاروخ جو-جو AIM-120 أمريكاني.
- معلومة رقم إتنين .. إحنا متؤكدين إن حصل إشتباك جوي أو Dogfight زي ما بيتسمي و دي حاجة نادرة أوي في تاريخ الخناقة بين الهند و باكتسان بس إحنا مش عارفين بالضبط إيه اللي حصل .. الهنود بيقولوا إن الطيارة الMiG-21 اللي وقعت قبل ما تقع قدرت توقع طيارة F-16 باكستانية بس الطيارة التانية هي اللي وقعتها .. الباكتسانيين من ناحيتهم بيقولوا عليا الطلاق كذب إحنا مطلعناش طيارات F-16 أصلاً و الطيارة الهندي اللي وقعتها كانت طيارة JF-17 صينية .. بس الأدلة علي الأرض إن حطام الطيارة MiG-21 الهندي كان معاه بقايا صاروخ AIM-120 و ده لوحده بيقول إن الباكتسانيين فعلاً كانوا مطلعين طيارتين F-16 .. سبب علي فكرة إن الباكستانيين مش عايزين يتقال إنهم وقعوا الطيارة الهندي بطيارة F-16 أمريكاني لإن ده يعتبر خرق لإتفاق بيع الطيارة .. الأمريكان حرجوا علي الباكتسانيين لما اشتروها إنهم ميستخدموهاش في أي مواجهة مسلحة ضد الهند علي أساس إن الهند هي كمان حليفة أميركا.
- معلومة رقم ثلاثة .. سلاح الجو بتاع البلدين سواء الهند أو باكتسان عبارة عن ميكس ملوش أي معني من الطيارات .. الهند عندها طيارات Mirage 2000 و دي طيارة فرنساوي من تصنيع الثمانينات .. حلو .. و عندهم طيارات روسي أحدث شوية Su-30 MKI من إنتاج الألفينات .. الباكستانيين برده عندهم طيارات F-16 أمريكاني و Mirage III فرنساوي و JF-17 صيني.
معني الكلام إن لو الهند فعلاً قررت تعمل إحلال و تجديد لسلاح الجو بتاعها اللي هو تخلص من حمامك القديم علي رأي الإعلان بتاع زمان فإنت بتتكلم علي إن الهند محتاجة بالميت 100 طيارة مقاتلة جديدة و دي سبوبة زي الفل لشركات أمريكاني زي بوينج Boeing و لوكهيد مارتن Lockheed Martin .. مهم تكون فاهم إنك لو مكان شركة تصنيع طيارات مقاتلة زي F/A-18 Super Hornet اللي بتصنعها شركة Boeing فدي طيارة بتتكلف حتي لو في عز الSale حوالي 80 مليون دولار زود عليها بنزينها و تسليحها و صيانتها فالطيارة الواحدة واقفة عليك ب100 مليون دولار و ده رقم خزعبلي و لازم عشان بلد تدفعه بنفس راضية إنها تكون محتاجة إنها تحس بالأمان .. الهند محتاجة تحس بالأمان خصوصاً بعد ما سلاح الجو بتاعها إتعلم عليه .. تبقي المشكلة الأزلية هي الروتين .. الهند بلد كبيرة و حكومتها عشان تفهم هي عامله زي إيه فهي شبه حيوان الكسلان اللي كان في فيلم الكرتون زوتوبيا Zootupia .. الهنود بقالهم أكتر من 20 سنة بيحاولوا يخلصوا صفقة شراء 100 طيارة مقاتلة و بعد سنين و سنين من شغل عم (أيوب) في مسرحية الجوكر من لا مش عايز دي لا أنا عايز دي و أوعوا بقي يا جماحة استقر رأي المؤسسة العسكرية الهندية إنهم يا حيشتروا طيارات مقاتلة بمحرك واحد و كانت إما F-16 من تصنيع Lockheed Martin الأميريكية أو طيارات Gripen-E من تصنيع شركة ساب Saab السويدية عشان فجأة يغيروا رأيهم و يقولك لا إحنا غيرنا رأينا و عايزين طيارات بمحركين و ده خلي شركة Boeing تدخل السباق بطيارتها F/A-18 Super Hornet لحد ما أخيراً قرروا يشتروا طيارات رافال Rafale الفرنساوي.
إنت ممكن متكونش فعلاً متخيل إزاي المؤسسة العسكرية الهندية ماسكها شوية عيال عماله تغير في رأيها كل شوية .. بعد الإشتباك الجوي مع باكستان طلع رئيس الوزراء الهندي (ناريندرا مودي Narendra Modi) إعترف إن اللي حصل ده فضيحة و إهانة في حق القوات الجوية الهندية و رغم إنهم عارفين إن الطيارات MiG-21 دي مكانها المتحف مش الجو يطلعلك ناس جوه القوات الجوية الهندية يقولك ما هي شغالة هي و زي الفل بس هي محتاجة شوية صيانة زيادة مش أكتر .. أميركا اللي تعتبر حليف استراتيجي للهند بيطلع ميتينها لما بتعمل مناورة عسكرية مع الهند بسبب الروتين المبالغ فيه أحياناً و بسبب إن الأفرع الرئيسية للقوات المسلحة الهندية بيتعاملوا مع بعض معاملة شلة البنات المنفسنة من بعض مش عساكر دورهم إنهم يشتغلوا مع بعض عشان يدافعوا عن بلدهم.
اللي فعلاً حيجيله الضغط و السكر من اللي حصل بين الهند و باكتسان هم الأمريكان .. الأمريكان يا عيني متخيلين إن القوة اللي في أسيا اللي تقدر تقف قصاد الصين هي الهند .. و هنا إنت محتاج تفهم ليه .. إن شاء الله من غير مقاطعة علي سنة 2024 الهند حتكون أكتر بلد في العالم عايش فيها بني أدمين و حتعدي الصين .. الصين ليها حدود برية و بحرية طويلة مع الهند .. ده غير إن الصين و الهند مبيطيقوش بعض و بينهم حروب و الصين واخدة من الهند كشمير الشرقية زي ما حكيت قبل كده .. الأمريكان عارفين إن القوات المسلحة الهندية عندها مشاكل بس إن لما القوات الجوية بتاعتهم تخش في إشتباك جوي مع باكستان اللي هي تعداد قواتها المسلحة حوالي نص إجمالي عدد القوات المسلحة الهندية و بيتصرف عليها ربع اللي بيتصرف علي القوات المسلحة الهندية تقوم الهند تخسر المعركة بالشكل المهين ده .. أومال لو الهند لا قدر الله لو دخلت في مواجهة مع الصين حيحصل إيه؟ .. اللي فعلاً بيخلي الأمريكان يعملوا زي (ماجد الكدواني) في فيلم لا تراجع ولا استسلام اللي هو قلبي حد يجيبلي الدوا من فوق الجمل هو إن لما الحكومة الهندية طلعت قالت بكل بجاحة إن لو حصل بكره الصبح حرب فالقوات المسلحة الهندية مش حتقدر توفر لعساكرها إلا ذخيرة تكفيهم 10 أيام بس .. بعد كده العساكر حيضطروا يحاربوا بالدعاء علي العدو بقي ولا يكلف الله نفسا إلا وسعها .. تقارير تانية قالت إن 68% من تسليح القوات المسلحة الهندية قديم مينفعش يتحارب به حرب حديثة .. لو جيت تفهم هي مشكلة القوات المسلحة الهندية إيه حتلاقيها بمنتهي البساطة هي الفلوس.
الميزانية العسكرية الهندية لسنة 2018 و لسنة 2019 كانت 45 مليار دولار .. قارن ده بالميزانية العسكرية الصينية اللي هي 175 مليار دولار تلاقي إن الهند بتصرف ملاليم مقارنة بالصين .. المشكلة مش بس إن الهند بتصرف أقل من الصين .. المشكلة إن أغلب فلوس الميزانية العسكرية الهندية بتروح لدفع مرتبات 1.2 مليون جندي نظامي في الخدمة و ده رقم جاحد ده غير فلوس المعاشات .. المرتبات لوحدها بتبلع الميزانية العسكرية لدرجة إن مبيفضلش غير 14 مليار دولار بس هم اللي بيتصرفوا علي تسليح القوات المسلحة الهندية .. حيجي حد بمنتهي البراءة يسأل طب ما يقللوا عدد قواتهم المسلحة شوية أصل 1.2 مليون جندي نظامي ده رقم مبالغ فيه أوي الصراحة .. المشكلة سيدي الفاضل إن الصين مثلاً دولة مش ديموقراطية .. الرئيس الصيني (جي جينبينج Xi Jinping) لو بكره الصبح حب إنه يطلع قانون يمنع فيه الصينيين إنهم ياكلوا رز عشان يخسوا محدش حيقوله إنت يا جدع إنت إيه اللي إنت بتقوله ده .. الهند علي الناحية التانية بلد ديموقراطية .. هي مش ديموقراطية أوي يعني بس فيها أحزاب سياسية بتدخل إنتخابات فإنت عشان حزب يقول في بلد أساساً بتعاني من البطالة إن والله إحنا حنقلل من عدد العساكر بتوعنا فده اسمه إنتحار سياسي.
(مودي) اللي بفكرك إنه رئيس وزراء الهند دلوقتي كسب إنتخابات 2014 بوعد إنه بقدرة قادر حيخلق مليون وظيفة جديدة في الشهر عشان يخلي الإقتصاد الهندي يستوعب العمالة الجديدة اللي بتطلع و الحقيقة إن في رأيي الTarget ده مش محتاج حد بيفهم في الإقتصاد قد ما هو محتاج حد متخرج من مدرسة هوجوارتس للسحر و يستحسن إنه يكون زميل تختة ل(هاري بوتر Harry Potter) .. اللي الحكومة الهندية كانت ناوية تعمله إنها تقلد الصين .. بمعني .. الصين عشان تبقي قوة عسكرية محترمة بتصنع سلاحها بنفسها دلوقتي بدأت بإنها إشتغلت كتير أوي عشان تصلح إقتصادها و بمجرد ما بقي عندك شركات صينية شغالة في مجال التكنولوجيا فإنت بسهولة أوي تبدأ تخش في مرحلة إنك تصنع سلاحك بنفسك .. المشكلة إن الصين سبقت الهند في الخطوة دي من 30 سنة .. إزاي بلد زي الهند لحد دلوقتي عندها مشاكل كبيرة في إرتفاع معدلات البطالة و سوء البنية التحتية لدرجة إن فيه مدن مفيهاش شبكة صرف صحي و عايزها تبقي قوة عسكرية قادرة إنها وقت الجد تقف قصاد الصين؟
إنت عشان تستوعب قد إيه الأمريكان معتمدين علي الهند عشان لو الفاس وقعت في الراس و حصلت مواجهة مفتوحة مع الصين إن السنة اللي فاتت وزير الدفاع الأميريكي وقتها (جيمس ماتيس James Mattis) غير اسم قيادة المحيط الهاديء العسكرية الأميريكية اللي هي أكبر قيادة عسكرية وسط كل قيادات القوات المسلحة الأميريكية و خلاها قيادة الهند و المحيط الهاديء أو Indo-Pacific Command .. ده بالضبط لما يجي مصر رئيس إسكندراني فيقرر إنه يغير اسم قياده المنطقة الشمالية العسكرية يخليها قيادة منطقة الإسكندرية العسكرية .. الأمريكان بعد ما كانوا بقالهم 20 سنة معتبرين باكستان هي أهم حليف استراتيجي ليهم في أسيا دلوقتي بقت باكستان هي الإيكس .. أميركا دلوقتي في Relationship with الهند .. خلال 10 سنين بس مبيعات السلاح الأميريكي للهند نطت من صفر ل15 مليار دولار .. بالورقة و القلم الهند تعتبر صاحبة خامس أكبر ميزانية عسكرية في العالم بس نسبة قليلة أوي بتتصرف علي تطوير تسليح جيشها و حتي لما بيقرروا يشتروا سلاح تلاقي المعارضة في الهند تقوم تقف و تزعق فساااااااااااااااااد .. يعني رغم إن زي ما قلتلك القوات الجوية الهندية محتاجة علي الأقل 100 طيارة مقاتلة فلما حكومة (مودي) تفاوضت مع فرنسا عشان تشتري 36 طيارة Rafale بقيمة 8.9 مليار دولار المعارضة الهندية مبقاش وراها لا شغلة ولا مشغلة غير إنها تعمل استجوابات في البرلمان حول شبهة الفساد اللي طالت الصفقة.
المصادر:
- مقالة بعنوان India’s Dogfight Loss Could Be a Win for U.S. Weapons Makers .. نشرت في مجلة Foreign Policy و ده لينك المقالة الأصلية:
https://foreignpolicy.com/2019/03/05/indias-dogfight-loss-could-be-a-win-for-u-s-weapons-makers-lockheed-boeing-pakistan/ - مقالة بعنوان After India Losses Dogfight to Pakistan, Question Arise About Its ‘Vintage’ Military .. نشرت في جريدة The New York Times و ده لينك المقالة الأصلية:
ps://www.nytimes.com/2019/03/03/world/asia/india-military-united-states-china.html
