سنة 2017 قيادة القوات البرية الأميريكية شكلت 8 فرق قتالية مشتركة كل فرقة تحت قيادة لواء أركان حرب عشان يقعدوا مع بعض و يلاقوا تصور لإيه هي الأسلحة اللي تبقي رخيصة و في نفس الوقت تضمن تفوق القوات المسلحة الأميريكية في أي حرب مستقبلية .. الأفكار اللي هم طلعوا بيها إتسمت “الستة الكبار Big Six”.
جت حرب أكتوبر خدتنا كف علي وشنا عشان تقولنا أصحوا .. طول ما فيه حروب و طول ما فيه علم و طول ما فيه ناس بتفكر ياما حنشوف إبتكارات و مفاجأت .. محدش كان متخيل إن حتحصل معارك دبابات تاني زي اللي حصلت في الحرب العالمية الثانية بس سيناء شافت أضخم معركة دبابات في التاريخ لحد وقت الحرب .. محدش كان متخيل إن حيجي اليوم و نلاقي عسكري ماسك Joystick زي بتاعة الأتاري و PlayStation و بيتحكم في صاروخ بكابل عشان يطيره لحد ما يدمر به دبابة.
فيه ناس كتير بتتخيل سيناريوهات إن لو حصلت حرب بين مصر و إسرائيل إيه اللي ممكن يحصل؟ .. تخيل معايا إن حرب أكتوبر 1973 قامت دلوقتي بحيث حصلت نفس معركة الدبابات الرهيبة اللي دارت في سيناء تاني يوم الحرب.
واحد من أخطر التهديدات اللي بتواجه أي دبابة هو المدفع الرئيس للدبابات المعادية لإن في معارك الدبابات لو دبابة إبرامز أطلقت قذيفة مباشرة علي برج الدبابة الأرماتا فكل سنة و إنت طيب عليها مهما كان درع الدبابة الروسي عامل إزاي .. النقطة دي إنت كمهندس عشان تتغلب عليها مفيش قدامك غير إنك تحسن من القدرات الهجومية للدبابة عشان تدمر العدو قبل ما يدمرك.