الستة الكبار .. برامج التسليح اللي حتضمن هيمنة القوات المسلحة الأميريكية.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/vb30emyhkjw0?utm_source=clipboard&utm_medium=text&utm_campaign=social_sharing

فيه مصطلح ناس كتير بتسمعه و مش فاهماه أوي اللي هو العقيدة القتالية Military Doctrine .. عشان فيها كلمة عقيدة فدماغنا بشكل أوتوماتيكي بتروح ناحية الدين إن العقيدة القتالية للجيش المصري هي إنه جيش دولة مسلمة و بالتالي العدو بتاعه هو إسرائيل بإعتبارها دولة يهودية .. هو الحقيقة مش ده معني الكلمة أوي .. العقيدة القتالية بمنتهي البساطة إنك تسأل نفسك 3 أسئلة .. مين هو الطرف اللي أنا شايف إنه عدوي؟ .. هو عدوي ده معاه سلاح شكله إيه؟ .. و إيه هو السلاح اللي أقدر أستخدمه عشان أهزم عدوي؟ .. إجابة ال3 أسئلة دول هم اللي بيرسموا ملامح العقيدة القتالية لأي قوات مسلحة و بناء عليه بيحددوا هو الزي الرسمي للقوات المسلحة دي شكله إيه؟ .. إيه هي البندقية الألية الأساسية اللي بيمسكها كل عسكري؟ .. يا تري القوات الجوية حيبقي فيها طيارات شكلها إيه؟ .. تدريب قواتنا المسلحة حيركز علي إيه؟ .. فعلياً كل حاجة متعلقة بشكل و تسليح و تدريب القوات المسلحة لأي دولة في الدنيا هو محاولة إنها تلاقي إجابة ال3 أسئلة اللي بيشكلوا العقيدة القتالية بتاعتها.

أهمية إن البلد و شعبها و حكومتها يفهموا و يستوعبوا العقيدة القتالية بتاعتهم بتبدأ تكبر أوي كل ما الدولة نفسها كبرت .. معلش يعني دولة زي موزمبيق علي عيني و علي راسي و ليها إحترامها بس العقيدة القتالية للقوات المسلحة الموزمبيقية مش بنفس أهمية العقيدة القتالية لدولة عظمي زي الولايات المتحدة الأميريكية .. خلال فترة الحرب علي الإرهاب من 2001 لحد 2019 العقيدة القتالية الأميركية و اللي بشكل تلقائي إنتقلت لكتير من القوات المسلحة حول العالم هي إننا بنحارب عدو خفي مش شايفينيه .. عدو مش لابس زي عسكري .. عدو بيستخبي وسط المدنيين .. بناء عليه العقيدة القتالية بقت بتعتمد بشكل مبالغ فيه أحيانا علي القوات الخاصة و المراقبة و الطيارات بدون طيار  .. بسبب العقيدة القتالية الجديدة إتولدت قيادة جديدة من ضمن قيادات الأفرع الرئيسية للقوات المسلحة الأميريكية اللي هي JSOC .. بس دلوقتي الوضع بدأ يختلف .. العقيدة القتالية الأميريكية بدأت تخش الكوافير عشان يتغير شكلها و ده اللي إحنا محتاجين نتكلم عنه النهاردة.

اللي حصل إن الأمريكان قعدوا مع نفسهم و سألوا ال3 أسئلة اللي أنا قلتهم في المقدمة .. مين عدوهم؟ .. خلاص داعش إنتهت .. الحرب علي الإرهاب مبقتش سيكسي زي الأول .. بس بلد زي أميركا مينفعش تعيش من غير أعداء .. أومال حنبرر إزاي كل سنة نصرف مليارات الدولارات علي الإنفاق العسكري؟ .. لازم نلاقي عدو جديد يكون مرعب و يخلي المواطن الأميريكي البسيط خايف و يدينا الفرصة إننا نصرف فلوس علي السلاح براحتنا .. العدو الجديد اللي الأمريكان لقوه هو التحالف الروسي الصيني .. حلو نيجي للسؤال الثاني .. هي العدو ده معاه سلاح إيه؟ .. والله الروس عندهم قوات برية جاحدة تقدر تهدد بيها منطقة البلقان و تهدد بيها ألمانيا و زود علي كده ترسانة روسيا من الأسلحة النووية و أنظمة الدفاع الجوي بتاعتهم حلوة برده .. طب و الصين؟ .. الصين عندها قوات بحرية حلوة و خناقة السيطرة علي جزر المحيط الهاديء زي ما تكون هي هي جبهة المحيط الهاديء بتتفتح من جديد بين الأمريكان و اليابانيين في الحرب العالمية الثانية .. نيجي بقي للسؤال الثالث .. إحنا حنحارب العدو ده بسلاح شكله إيه؟

بداية من 2017 إتعمل برنامج سري للقوات البرية الأميريكية إسمه U.S. Army’s Asymmetric Warfare Group و البرنامج ده فكرته بسيطة .. إحنا حنجيب 8 فرق قتالية كل فرقة ماسكها لواء أركان حرب يقعدوا مع بعض يتكلموا و يطلعولنا بإيه هي الأسلحة اللي ممكن يكونوا محتاجينها في حرب جديدة مع روسيا و الصين؟ .. الأفكار اللي طلعت من البرنامج ده إتكتبوا في تقرير من 61 ورقة و فيه 6 برامج أسلحة جديدة إتسمت الستة الكبار Big Six و دول اللي إحنا اللي حنركز كلامنا عنهم النهاردة.

برنامج رقم واحد .. إحنا عايزين مدفع بس يكون جاحد:

علاقة الأمريكان بالمدفعية شبه علاقة البنات بالفستاتين .. كانت حلوة زمان و بعد كده لسنين معبروش بعض لكن لسبب ما رجعوا تاني حبايب .. زمان سواء بتتكلم عن الحرب العالمية الثانية أو حرب فيتنام كان كل ما عسكري يقع في حفرة و يتضرب عليه نار تلاقيه عمال يعيط في اللاسلكي زي الطفل الصغير عشان يطلب ضربة مدفعية علي الحتة اللي بتضرب عليه نار .. شوية و قالك مدفعية إيه بقي إحنا عندنا أقوي سلاح جو في العالم و بقي كل ما عسكري يتكعبل في طوبة يطلب غارة جوية علي الشارع اللي هو إتكعبل فيه .. بس خلي بالك .. ده كان في دول زي العراق أو سوريا أو أفغانستان .. يعني دول فقيرة معندهاش منظومة دفاع جوي .. دلوقتي إنت قلت إن روسيا هي العدو الإستراتيجي الجديد يعني زي ما أميركا هي البلد اللي إخترعت الهامبرجر فروسيا هي البلد اللي إخترعت بطاريات صواريخ سام المضادة للطيارات .. من هنا رجع شهر العسل بين الأمريكان و المدفعية.

شغل الأمريكان مع سلاح المدفعية ماشي الحقيقة في 3 سكك:

• العمود الفقري لسلاح المدفعية الأمريكاني هو مدفع لو شفته حتقول عليه دبابة بس هو مدفع إسمه M109 Paladin .. المدفع ده إتعمل في الستينات يعني من أيام الرئيس (جمال عبدالناصر) الله يرحمه و دلوقتي الأمريكان عايزين يشيلوا الماسورة بتاعة المدفع ده يغيروها بماسورة تانية تقدر تضرب دانات بيوصل مداها 70 كيلومتر و تقدر كمان تضرب صواريخ مداها 128 كيلومتر.
• تاني حاجة سلاح المدفعية الأميريكية بيعتمد عليها هو سلاح إسمه M270 بيتحط تحت بند MRLS و دي إختصار Multiple Rocket Launch System و دي عبارة عن علبة بس كبيرة شوية بتتركب علي مدرعة أو ترلة و العلبة دي بتشيل صواريخ بتتضرب كلها ورا بعض خلال وقت صغير جداً و عشان كده السلاح ده يعتبر فعال أوي ضد التحصينات الدفاعية .. في حرب أكتوبر 1973 إحنا إعتمدنا عليه جداً في ضرب خط بارليف .. زيه زي العمرة اللي حتحصل لمدفع M109 Paladin خلال الفترة اللي جايه الأمريكان حيزودا مدي الصواريخ اللي بتتضرب من MRLS عشان توصل 150 كيلومتر .. مش بس كده .. فيه مدافع من دول حيتركب عليها صواريخ مضادة للسفن جاحدة مداها بيوصل 500 كيلومتر.
• كنا إتكلمنا قبل كده عن سعي الأمريكان إنهم يلغوا إتفاقية INF اللي مضوها مع الروس و اللي بناء عليه هم بقي ليهم الحق يطوروا الصواريخ متوسطة المدي بتاعتهم زي ما هم عايزين .. عشان كده المرحلة الجاية حتتضمن إن سلاح المدفعية يبقي تحت إيده صاروخ سوبرسونيك Supersonic يعني بيطير بسرعة أسرع من سرعة الصوت و مداه بيوصل 2400 كيلومتر.

برنامج رقم إتنين .. عايزين مدرعة ميأثرش فيها حاجة:

لسنين و سنين كانت ناقلة العساكر المدرعة M2 Bradley هي العمود الفقري لسلاح المدرعات الأميريكي .. خلينا نبقي متفقين إن المدرعة برادلي Bradley شكلها سيكسي بس كإمكانيات هي مش أحسن حاجة في الدنيا .. في 2018 الأمريكان حاولوا يحلوا المشاكل دي بإنهم قالوا طب ما نغير الموتور بتاع المدرعة .. شوية و قالوا طب ما نغير البرج بتاع المدرعة .. دلوقتي قالك إحنا خلاص مش عايزين البرادلي دي خالص و حندخل مكانها حاجة خزعبلية إسمها OMFV و دي إختصار Optionally Manned Fighting Vehicle .. السؤال دلوقتي: تطلع إيه البتاعة دي؟

هي لسه فكرة أو Concept بس اللي إحنا عارفينه إنها حتقدر تشيل عدد عساكر أكبر من اللي تقدر تشيله المدرعة برادلي .. حيبقي فيها مدفع رشاش بيتحكم فيه روبوت عيار ما بين 30-50 مليمتر و علي فكرة المدرعة برادلي كان فيها مدفع رشاش عادي عيار 25 مليمتر .. الأهم إن المدرعة حيتركب عليها نظام حماية ضد الصواريخ المحمولة علي الكتف RPG إسمه Active Protection System زي اللي بيتركب في دبابات الميركافا الإسرائيلي و الأرماتا الروسي .. لحد دلوقتي قيادة سلاح المدرعات قدامهم 3 موديلات تجريبية Prototypes المفروض يختاروا منهم واحدة:

• الموديل الأول إسمه Lynx و دي عاملها تحالف من شركتي رايثيون Raytheon الأميريكية و راينميتال Reinmetall الألمانية.
• الموديل الثاني إسمه Griffon III من تصنيع شركة جينيرال دايناميكس General Dynamics و دي نفس الشركة اللي بتصنع دبابات الإبرامز Abrams.
• الموديل الثالث إسمه CV-90 Mark IV من تصنيع شركة BAE Systems البريطانية.

برنامج رقم ثلاثة .. الطيارة الهليوكوبتر الإثنين في واحد:

الطيارات الهليوكوبتر علي راسي من فوق و خدامك أنا و العربية إنها مهمة أوي و إن لا غني عنها .. لكن .. و علي رأي واحد صاحبي مشكلة كلمة لكن إنها بتخلي أي حاجة إتقالت قبلها تترمي في الزبالة لازم تبقي عارف إن الطيارات الهليوكوبتر فيها عيوب قاتلة .. أولاً هي مش سريعة لإن مدي سرعة الطيارات الهليكوبتر اللي في السوق بيتراوح ما بين 240-320 كيلومتر في الساعة .. كونها مش سريعة فهي بتتلقط بالرادار بسهولة .. كونها بتتلقط بسهولة فأي حاجة تقدر توقعها.

عشان كده متلاقيش طيارة هليكوبتر بيتقال عليها متعددة المهام Multi-Role .. فيه طيارة شغلتها هي نقل عساكر زي البلاك هوك أو فيه طيارة هجومية زي الأباتشي .. إنما طيارة تعمل الإتنين مع بعض فمفيش من ده في السوق .. ده اللي الأمريكان بيحاولوا يحلوه في مشروع Future Vertical Lift  أو FVL .. الفكرة بمنتهي البساطة هي محاولة الإجابة عن سؤال هو يا تري حيحصل حاجة لو شلنا البلاك هوك و الأباتشي من الخدمة و بدلناهم بطيارة واحدة بتعمل الوظيفتين؟ .. للإجابة علي هذا السؤال فيه إتنين Prototypes بيتنافسوا مع بعض دلوقتي:

• طيارة إسمها V-280 Valor من تصنيع شركة بيل Bell و دي طيارة بتتصنف علي إنها Tilt-Rotor يعني المروحتين بتوعها بيتركبوا علي موتورين بيقدروا يلفوا 90 درجة بحيث يا المروحتين يبقوا رأسيتين زي أي مروحة طيارة هليكوبتر عادية أو يبقي أفقيتين زي أي طيارة ركاب بمروحتين .. واضح من الوصف اللي أنا قلته ده إن دي طيارة معقدة و تصميمها مجعلص و حاجة في منتهي النكد في الصيانة .. بس في المقابل هي بتديك سرعة طيران بتوصل 512 كيلومتر في الساعة.
• طيارة إسمها SB-1 Defiant من تصنيع شركة سيكورسكي Sikorsky و دي طيارة لما تشوفها متحسهاش معقدة أوي يعني .. هي فيها مروحتين رأسيتين فوق بعض بس بيلفوا عكس بعض في الإتجاه .. هي طيارة سهلة في تصميمها .. سهلة في صيانتها .. بس في المقابل هي مش سريعة زي V-280 Valor.

برنامج رقم أربعة .. شبكة الإتصالات العسكرية اللي متخرش المياه:

القوات المسلحة الأميريكية يمكن من كتر ما بتتفرج علي أفلام بقي عندها هسهس إسمه الهاكرز .. هم مرعوبين إن الروس مثلاً يبقي معاهم شوية هاكرز و يخترقوا شبكة الإتصالات العسكرية زي ما الروس عملوا في الأوكرانيين سنة 2014 .. الفكرة بمنتهي البساطة إنت عايز تبني شبكة إتصالات متكونش معقدة و في نفس الوقت تقدر تكبرها براحتك و تكون متأمنة كويس ضد الهاكرز سواء الروس أو الصينيين .. علي فكرة البرنامج ده مش جديد يعني مثلاً بدايته كانت حاجة إسمها WIN-T و بعد ما الأمريكان صرفوا عليه 6 مليار دولار إترمي في الزبالة .. البرنامج الجديد إسمه C3I و دي إختصار Command, Control, Communication and Intelligence يعني القيادة و التحكم و الإتصالات و المخابرات و لسه مفيش ملامح له لحد دلوقتي.

برنامج رقم خمسة .. منظومة الدفاع الجوي:

لأكتر من خمسين سنة و الأمريكان مش في دماغهم أصلاً يطوروا أو يشتغلوا علي منظومة دفاع جوي عليها القيمة .. ليه؟ .. إيه اللي يخليك تصرف و تطور في منظومة دفاع جوي و إنت عندك أقوي سلاح جو في العالم؟ .. طياراتك تقدر توقع أي طيارة معادية يبقي ليه أعمل صواريخ مضادة للطيارات أرض- جو؟ .. لحد ما طلع الكابوس الجديد .. صواريخ كروز و الطيارات بدون طيار.

الناس اللي إتفرجت علي فيلم Angel has Fallen شافوا إزاي سرب طيارات بدون طيار يقدر يخرب الدنيا في أي حتة .. الناس اللي إتفرجت علي فيلم Hunter Killer شافوا إزاي الصواريخ بعيدة المدي تقدر تضرب أي هدف في الدنيا من غير ما تبقي مضطر تبعت أي طيارات ولا تخاطر بحياة طيارين .. سبحان الله الفيلمين كانوا من بطولة (جيرارد باتلر Gerard Butler) بس مش دي القضية .. القضية إن الأمريكان إكتشفوا إنهم محتاجين يبقي عندهم منظومة دفاع جوي .. حلو .. بتتعمل إزاي بقي البتاعة دي؟

منظومة الدفاع الجوي لو فكرت فيها شوية حتلاقيها نفس فكرة الناموسية بتاعة الأطفال .. إنت بترسم قبة بإرتفاع معين فوق سطح الأرض بحيث أي طيارة تخترق القبة دي حتتلقط و حتتضرب .. الفرق إن منظومة الدفاع الجوي بتبقي كذا طبقة مش مجرد طبقة واحدة زي ناموسية الأطفال .. كل طبقة علي إرتفاع ما من سطح الأرض .. في المعتاد يعني إنت بيبقي عندك 3 طبقات من أي منظومة دفاع جوي:

• الطبقة الأولي و دي بتحميك من الطيارات بدون طيار و الصواريخ اللي بتطير علي إرتفاعات واطية أوي من سطح الأرض .. الطبقة دي حيتولي حمايتها مدفع ليزر بيطلع شعاع ليزر 100 كيلووات بس بس دول كافيين جداً إنهم لو إتركزوا علي جسم طيارة بدون طيار يحرقوها و هي طايرة .. كمان مع المدفع ده الأمريكان طلبوا يشتروا من الإسرائيليين شوية بطاريات من منظومة الدفاع الجوي القبة الحديدية Iron Dome.
• الطبقة الثانية هي اللي بتحميك من الطيارات اللي بتطير علي إرتفاعات متوسطة .. لو الروس عندهم منظومة الدفاع الجوي S-300 فالأمريكان لجأوا لحل بلدي شوية .. هم حيجيبوا ترلات 8X8 إسمها سترايكرز Strykers و الترلات دي حيتركب عليها صواريخ ستينجر Stinger و صواريخ هيل فاير Hell Fire و أجهزة تشويش علي الطيارت بدون طيار .. ليه بقول عليه حل بلدي؟ .. صواريخ ستينجر دي صواريخ أساساً يعني إتعملت عشان تتشال علي الكتف زيها زي RPG بس هم حياخدوا الصاروخ نفسه يركبوه علي منصة إطلاق معدلة .. صواريخ هيل فاير دي هي هي الصواريخ اللي بتتركب علي الطيارات بدون طيار بس برده حيلاقوا حل بلدي إنها تتضرب من علي منصة إطلاق صواريخ.
• الطبقة الثالثة هي المفروض يعني تحميك من الطيارات اللي بتطير علي إرتفاعات عالية و هنا الأمريكان بدل ما يعملوا منظومة دفاع جوي جديدة فهم قالوا حيمسكوا منظومتي الدفاع الجوي باتريوت PATRIOT و ثاد THAAD بتاعتهم يشوفوا مشاكلها إيه و إن شاء الله يعني تتحل.

برنامج رقم ستة .. البندقية الألية الجديدة بعيار طلقتها الجديد:

من الإحصائيات الغريبة اللي لما تبصلها تلاقي نفسك بتهرش في شعرك بتحاول تستوعبها إن عدد أفراد قوات المشاة الأمريكان يدوبك 4% بس من إجمالي تعداد أفراد القوات المسلحة كلهم و رغم كده هم لوحدهم شايلين نصيب الأسد من الخساير في الأرواح اللي بتتعرض ليها القوات المسلحة الأميريكية من 2001 لحد دلوقتي بنسبة 90% .. ده معناه كذا حاجة .. معناه إن فيه إحتمال إن عساكر المشاة و القوات الخاصة الأمريكان بيتمرنوا غلط أو فيه حاجة غلط هم بيعملوها في برامج التدريب بتاعتهم .. معناه إن فيه إحتمال إن دروع العسكري و زيه محتاج يتبصلهم تاني يمكن يتعمل عليه تعديلات تحافظ علي حياته .. معناه كمان إن فيه إحتمال إن البندقية الألية اللي في إيد العسكري يا مش أحسن حاجة في الدنيا في النشان يا إما الطلقة اللي هو بيستخدمها ضعيفة.

عشان كده فيه فريقين إتعملوا جوه قيادة القوات البرية .. الفريق الأول شغلته إنه يراجع علي برامج تدريب العساكر و يشوف هل هي صح؟ هل فيه حاجة محتاجه تتعدل؟ .. الفريق الثاني شغلته إنه يصمم البندقية الألية الجديدة للمشاة و اللي غالباً يعني حتبقي بندقية بتستخدم طلقات جديدة لانج عيار 6.5 مليتمر إسمها كريدمور Creedmore .. و فوق ده كله فيه كلام علي إن الزي الرسمي للعساكر حيبقي معاه شاشة عرض بتتركب في الخوذة قدام عين العسكري عشان تعرض له المعلومات المهمة اللي هو محتاج يعرفها.

فيه ناس منكوا بيقروا الكلام .. ده إذا فيه حد قراه كله يعني .. و بيقولوا لنفسهم ده خيال علمي .. اللي إنت بتقوله ده مش حيحصل .. لو ده رأيك فعايزك تعرف إن وزارة الدفاع الأميريكية خلاص حطت ميزانية 33 مليار دولار عشان البرامج الستة دي تبدأ تشتغل و تطلع قماش و حاطين لنفسهم معاد تسليم أو Deadline هو سنة 2024 .. مش بس كده .. لما لقوا نفسهم الفلوس حتعجز معاهم لغوا طلبات شراء 186 قطعة سلاح مختلفة و أنا هنا بتكلم عن قطع سلاح غالية جداً زي طيارات نقل عساكر CH-47F و عربيات نقل جنود JLYV Humm-Vee .. و رغم كل ده أنا معاك إن مش بالضرورة إنهم ينجحوا .. وزارة الدفاع الأميريكية مشهورة جداً بإنها بتحط خطط زي الفل بس وقت التنفيذ متفهمش إيه اللي بيحصل و المشاريع بتطول زيادة عن اللزوم و بيتأخروا عن مواعيد التسليم و الميزانية بتضرب منهم و حاجة نكد يعني .. بس في نفس الوقت أنا بيعجبني فيهم رغبتهم المستمرة إن الزمن ميسرقهمش .. دايماً حاسين إن فيه أحسن و بيشتغلوا علي نفسهم .. دي عقلية مهم أوي تبقي عندنا لإن بيها حننط لقدام بشكل إنت لا تتخيله.

المصدر:

• 
  مقالة بعنوان Are Russia and China Any Match for the U.S. Army’s Big Six? نشرت في مجلة The National Interest و ده لينك المقالة الأصلية:
  https://nationalinterest.org/blog/reboot/are-russia-and-china-any-match-us-armys-big-six-187575
• مقالة بعنوان The Russian New Warfare Doctrine Has the Army Worried Enough to Make a Manual About it نشرت في مجلة The National Interest و ده لينك المقالة الأصلية:
  https://nationalinterest.org/blog/the-buzz/the-russian-militarys-new-warfare-doctrine-has-the-army-24439