لينك التسجيل الصوتي للمقالة علي Sound Cloud:
https://soundcloud.com/user-112011687-312727988/tos-m4a
موضوعنا النهاردة الللي حنتكلم عنه هو سلاح يعتبر أكثر الأسلحة التقليدية فتكاً وتدميراً علي الإطلاق .. مفيش سلاح البشر إخترعوه له نفس القدرة التدميرية ومفيش سلاح أقوي منه غير القنبلة النووية .. السلاح ده هو صواريخ TOS-1 وده سلاح إتصمم مخصوص عشان يدك الدفاعات الحصينة وإحنا استخدمناه في حرب أكتوبر 1973 عشان ندمر به النقاط الحصينة في خط بارليف .. الروس استخدموه عشان يسووا مناطق سكنية كاملة بالأرض أيام حرب الشيشان .. الأمريكان استخدموه في حربهم في أفغانستان سنة 2001 عشان يدكوا الكهوف جوه جبال تورا بورا اللي كان بيستخبي فيها عناصر تنظيم القاعدة.
السلاح ده عشان تفهمه لازم تقسمه نصين:
- النص الأول هو منصة الإطلاق نفسها .. ودي بيتقال عليها Multiple Rocket Launcher System أو MRLS ودي زي ما إنت شايف من الصور عبارة عن علبة فيها أخرام طويلة قطرها 230 مليمتر بيتحط جواها الصواريخ والمنصة دي بتتركب علي مدرعة أو عربية نقل .. مشكلة صواريخ TOS-1 إنها تقيلة أوي وزنها لوحده 46 طن وعشان كده أحسن حل ليها إنها تتركب علي شاسيه دبابة زي T-72 الروسية .. صواريخ TOS-1 زيها زي البنادق الألية ممكن تضربها طلقة طلقة أو Automatic اللي هو إنت طول ما إنت ضاغط علي الزناد الطلقات حتنطلق .. صواريخ TOS-1 برده بتطلق صواريخها صاروخ صاروخ أو إن الصواريخ كلها بتنطلق دفعة واحدة خلال فترة ما بين 6 ل12 ثانية.
- النص الثاني هو الصاروخ نفسه واللي بيشيل شحنة من حاجة إسمها Fuel-Air Explosive Warhead أو رأس متفجر من خليط الوقود والهواء وده اللي إحنا حنركز كلامنا عليه النهاردة.
كلمة TOS دي إختصار Heavy Flame Thrower بس بالروسي لإن السلاح ده في الأصل روسي يعني رامي النار الثقيل .. سبب التسمية إن السلاح ده فكرته إنك بتجيب قاذف اللهب اللي هو عبارة عن تنك بيشيله جندي المشاة علي ظهره كأنه شنطة جواه مادة قابلة للإشتعال غالباً بتبقي بنزين بس علي صورة جل مش بالصورة السائلة اللي إنت بتحطه كوقود في عربيتك وفي إيده بك لحام زي بتاع لحام الأوكسي أسيتيلين بيرمي لهب لمسافات بعيدة قدام الجندي .. أكيد شفت السلاح ده في أفلام حربية قبل كده .. السؤال بقي لو إنت عايز ترمي كرات اللهب دي لمسافات مئات الكيلومترات مش بس كام متر قدام الجندي تعمل إيه؟ .. تعالي إنت هات البنزين الجيل ده وبدل ما تحطه في تنك علي ظهر الجندي حطه علي رأس صاروخ .. هنا الصاروخ ده بقي بيتسمي Fuel-Air Explosive أو إختصاراً FAE.
أول ناس فكرت تستخدم FAE كانوا الأمريكان في حرب فيتنام .. الأمريكان في الحرب دي كانوا بيستخدموا النابالم Napalm اللي بقي مٌحرم استخدامه دولياً وده مادة حارقة زيها زي البنزين والسولار بس علي صورة جيل مش سائل فلما بيتم إسقاطة علي منطقة بيولع الدنيا علي نطاق واسع بس ده أخره إنه يعمل حريقة كبيرة وملوش قدرة تدميرية زي الذخيرة الحية .. من هنا إتولدت فكرة FAE .. لما تحط عبوة ناسفة مع النابالم مثلاً وتنفجر فاللي بيحصل حاجة إسمها Aerosol Effect زي اللي بيحصل جوه موتور عربيتك وهو شغال إن الرشاش بيطلع البنزين علي شكل كرات صغيرة أوي لما بتنفجر كأنها بتعمل زي تأثير الدومينو لما بتقع .. الإنفجار مش بيبقي إنفجار واحد إنما بيبقي إنفجارات كتير أوي ورا بعضها .. زود علي كده إن الإنفجار بيخلي النابالم بصورته الجيل يتحول لصورة رذاذ فبيقدر يخترق الحيطان والكهوف والدفاعات الأرضية.
عشان تفهم القدرة التدميرية لFAE تعالي نتخيل إن عندك نقطة حصينة جوه خط بارليف وإحنا ضربناها بصواريخ FAE فيا تري إيه اللي حيحصل للجنود الإسرائيليين اللي قاعدين جوه النقطة الحصينة دي؟
- مبدأياً الوقود اللي جوه FAE لما بيتحرق بيولد حرارة رهيبة بتنتشر علي مسافة دائرة قطرها ما بين 200 ل 300 متر .. أي حد جوه الدائرة دي حيموت بحروق رهيبة بسبب الحرارة.
- اللي مش حيموت بالحرق حيموت بسبب الموجة الإنضغاطية اللي بتحصل بسبب إنفجار الوقود واللي مش حتفرق إذا كنت لابس درع واقي ضد الرصاص أو قاعد جوه دشمة معمولة من الخرسانة المسلحة .. تخيل إنك قاعد جوه الCombustion Chamber أو غرفة الإحتراق بتاعة موتور عربيتك .. الإنفجار بيعمل إنخفاض رهيب في ضغط الجو بسبب إنه بيشفط الأكسجين من المكان .. الضغط بتاع الإنفجار ده لما بيحصل بيبقي حوالي 427 PSI اللي هو (29 بار) يعني 29 ضعف الضغط الجوي اللي هو بالتقريب ضعف الضغط بتاع إنفجار أي عبوة ناسفة أو أي قنبلة عادية .. بإختصار لو إنت قاعد جوه الدشمة لو ممتش بالحرق حتموت بضغط الإنفجار اللي حيسحق جسمك .. فكرة إن جسمك يتعرض لموجة إنضغاط 29 بار دي كفيلة إنها تكسر عظمك وتفقع قرنية عنيك وتسببلك نزيف داخلي وتخرملك طبلة ودنك ده غير إن الأكسجين اللي في الجو بيتسحب فجأة فرئتيك بتنهار وحتموت بالإختناق.
صواريخ TOS-1 دي روسي بس مش هي الوحيدة في الدنيا اللي بتعتمد علي فكرة FAE .. الأمريكان عاملين حاجة إسمها M142 HIMARS بس الفرق بين الإتنين إن صواريخ M142 HIMARS بتستخدم أساساً صواريخ فيها رؤوس متفجرة عادية مش FAE في حين إن النسخة الروسي TOS-1 تقريباً مش بتستخدم غير صواريخ بتشيل FAE وده الفرق الجوهري بين الإتنين .. زمان صواريخ TOS-1 دي كان أقصي مدي ليها هو 3 كيلومتر بس يعني أنا مثلاً عشان أضرب بيها خط بارليف لازم أرص منصات الصواريخ دي يدوبك علي الضفة الغربية لقناة السويس وده بيخليها قريبة أوي من مدي نيران المدفعية الإسرائيلية .. سنة 2001 الروس نزلوا نسخة جديدة هي TOS-1A Solntspek ودي كلمة روسي معناها Burning Sun أو الشمس الحارقة ودي أقصي مدي ليها 6 كيلومتر .. معني إنك تزود مدي الإطلاق إنك حتزود وزن الصواريخ اللي بقي وزن الواحد فيهم 90 كيلوجرام ومعني ده إن عدد الصواريخ الي ممكن تُطلق كمان حتقل وبقوا 24 صاروخ بس.
عايزين بس ناخدك في جولة سريعة في تاريخ صواريخ TOS-1 في ميادين القتال حول العالم عشان تشوف قد إيه السلاح ده في ناس كتير بتحاول تشتريه:
- أول مرة السوفييت يستخدموا الصواريخ دي كانت في الفترة من 1988 لحد 1989 ضد المجاهدين الأفغان خصوصاً في وادي بانجشير بس الإستخدام فضل سري ومحدش عارفه والسوفييت أساساً مطلعوش قدام العالم يقولوا إنهم إخترعوا سلاح جديد ولا حاجة.
- بعد 10 سنين يعني سنة 1999 إتعرف قدام العالم إن فيه حاجة اسمها TOS-1 لما السوفييت استخدموها في حصارهم للعاصمة الشيشانية جروزني خلال الحرب الشيشانية الثانية .. في الحرب الشيشانية الأولي اللي حصلت ما بين 1994 لحد 1996 لما القوات الروسية حاولت تحتل العاصمة جروزني إتعرضت لخسائر فادحة في الأرواح والمعدات … في الحرب الثانية اللي حصلت سنة 1999 الروس إتعلموا الدرس وحاصروا المدينة بالمدرعات والدبابات وبعتوا فرقة مشاة صغيرة عشان تستطلع الدفاعات الشيشانية .. أول ما الشيشانيين ضربوا نار قام الروس طالقين عليهم صواريخ TOS-1 .. الصواريخ دي مسابتش حاجة سليمة .. مباني .. ألغام أرضية .. بني أدمين .. عبوات ناسفة .. فيه أحياء كاملة من جروزني مبقتش موجودة من القصف .. أقل التقارير إنصافاً قالت إن فيه 37 مدني قٌتلوا وأٌصيب 200.
- سنة 2014 روسيا باعت أربع منصات صواريخ TOS-1 للعراق والحكومة العراقية إدت الصواريخ دي للمليشيات الشيعية واستخدموها فعلاً في معركة جرف الصخر ودي منطقة قريبة من مدينة كربلاء العراقية ضد عناصر تنظيم داعش والمعركة دي إنتهت بنصر المليشيات الشيعية.
- الروس برده باعوا صواريخ TOS-1 دي للنظام السوري اللي استخدمها في معاركه ضد الثوار .. إحنا متؤكدين إن الجيش النظامي السوري استخدم الصواريخ دي في قصفه لمدينة حماة وفي شهر يونيو 2018 إتنشر فيديو علي YouTube لثوار سوريين وهم بيدمروا مدرعة شايلة منصة صواريخ TOS-1 بصاروخ RPG وده يوريك قد إيه الصواريخ دي فيها عيب رهيب إنك لازم تكون قريب أوي من العدو عشان تستخدمها.
- سنة 2015 إتعرف إن المتمردين الأوكرانيين الموالين لروسيا معاهم منصة صواريخ TOS-1 في منطقة لوهانسك شرق أوكرانيا .. الفكرة إن القوات المسلحة الأوكرانية معندهاش النوع ده من الصواريخ فده معناه إن روسيا هي اللي إدت الصواريخ دي للمتمردين الأوكرانيين .. الحكومة الأوكرانية بتقول إن المتمردين استخدموا الصواريخ دي في قصفهم لمطار دونيتسك الدولي في يناير 2015 و اللي بسببه إضطرت القوات الأوكرانية اللي بتدافع عن المطار إنها تنسحب لإن مكنش فيه أمل إنهم يحافظوا علي مواقعهم قدام صواريخ بالقوة التدميرية دي.
- من مناطق النزاع برده اللي بتستخدم فيها الصواريخ دي الحرب الطويلة اللي بين أرمينيا وأذربيجان حول منطقة ناجورنو-كاراباخ المتنازع عليها بين البلدين .. اللي يزعل إن روسيا باعت صواريخ TOS-1 للدولتين .. أذربيجان إشترت 18 منصة وأرمينيا محدش عارف هي إشترت كام واحدة.
المصدر:
- مقالة بعنوان Russia Has One Weapon the US Army Fears (And Has No Way to Match) نشرت في مجلة The National Interest وده لينك المقالة الأصلية:
http://nationalinterest.org/blog/the-buzz/russia-has-one-weapon-the-us-army-fears-has-no-way-match-23186?page=3
