البندقية دي شركة Heckler & Koch فضلت تشتغل عليها 10 سنين لحد ما في سنة 2000 بدأت تنتجها .. بندقية إتعملت بروقان .. البندقية مش متصنعه من البلاستيك إنما متصنعه من البوليمرات بنسبة 15% متصنعه من Fiberglass فده معناه إنها خفيفة بس في نفس الوقت قوية ومش بتصدي.
ألمانيا بتزود صرفها العسكري بالفصال .. سنة 2014 الميزانية العسكرية كانت 38 مليار دولار بس .. سنة 2018 الميزانية العسكرية الألمانية كانت 44 مليار دولار .. السنة اللي وراها اللي هي 2019 الرقم زاد شوية بقي 48.5 مليار دولار و إن شاء الله سنة 2025 حيوصل 67 مليار دولار.
سنة 1933 وصل (أدولف هتلر) لحكم ألمانيا بوعد إنه حيرجع ألمانيا لمجدها تاني .. اللي كان الجنرال (هانز فون سيكت) بيعمله في السر عمله (أدولف هتلر) قدام الناس كلها .. هو قال للحلفاء في وشهم إتفاقية فرساي دي تبلوها وتشربوا ميتها .. بس مش دي النقطة اللي عايزين نركز عليها .. إذا كان (هانز فون سيكت) كان بيعيد بناء القوات المسلحة عشان ولاءها يبقي للشعب الألماني ف(هتلر) بدأ يبرمجها عشان ولاءها يبقي له هو شخصياً.