البندقية دي شركة Heckler & Koch فضلت تشتغل عليها 10 سنين لحد ما في سنة 2000 بدأت تنتجها .. بندقية إتعملت بروقان .. البندقية مش متصنعه من البلاستيك إنما متصنعه من البوليمرات بنسبة 15% متصنعه من Fiberglass فده معناه إنها خفيفة بس في نفس الوقت قوية ومش بتصدي.
هنا بقي يجي دور (ميخائيل كلاشينكوف) .. الرجل ده شاف إن السوفييت محتاجين يقلدوا الألمان و زي ما المثل بيقول ليه تتعب أكتر بدل ما ممكن تتعب أقل فكل اللي الأخ (كلاشينكوف) عمله هو إنه خد البندقية الألمانية StG44 غير في شكلها شوية و سماها AK-47 .. بس التعديلات اللي هو عملها علي التصميم الألماني هي فعلاً اللي خلت البندقية الكلاشينكوف أسطورية بالشكل ده.
لما بدأت قيادة القوات الأميريكية توزع الM-16 علي عساكر المشاة بدأت المشاكل تظهر .. بداية من يوليو 1966 و الشكاوي عماله تزيد من عساكر أمريكان البندقية عطلت منهم ومش راضيه تشتغل.
الروس مبيعرفوش يصنعوا حاجة بتشتغل في صمت .. صوت موتور العربية اللادا نفسه تحس إن السليندرات بتتخانق مع عمود الكرانك والعربية كلها بتترج وهي شغاله .. الكلاشينكوف هي كمان كده .. الكلاشينكوف طريقة شغله عنيفة ولما بتيجي تستخدمه رد فعله أعنف من البنادق الأمريكاني وده سبب أساسي فيه هو إن الكلاشينكوف متصنع من الصلب في حين إن البنادق الأمريكاني متصنعه من ألياف الكربون