فعلياً و الله و دي شهادة لله يعني نادر أوي تلاقي بلد تقف جنب بلد في وقت زنقتها زي ما السعودية وقفت جنب باكستان في السبعينات .. المفروض يعني باكستان تشيل الهلال و النجمة في علمها و تحط مكانهم صورة الملك (فيصل) الله يرحمه .. المشكلة إن زي ما السعوديين بقي ليهم تصور تاني خالص عن علاقتهم مع باكستان فبرده الباكستانيين بقي ليهم تصور تاني خالص عن مستقبلهم كدولة .. فعلياً و مش ببالغ لو قلتلك إن باكستان إترمت في حضن الصين.
الإنفاق العسكري الياباني اللي عمال يزيد يوم عن يوم ده بيخليني أبص لمنطقة جنوب شرق أسيا و أحس إني قصاد نفس الوضع في أوروبا في السنين اللي قبل الحرب العالمية الأولي.
ده بيحطك قدام حقيقة إن القروض الصيني دي لقت طريقها لأكتر من 112 دولة .. صحيح إن فيه منهم كتير بياخدوا القروض دي بناء علي مبادرة OBOR اللي هي One Belt One Road.
لإن إحنا مدرسناش جغرافيا أسيا وأوروبا بشكل عميق فإحب أقولك إن سنة 1916 في عز الحرب العالمية الأولي ما كانت مولعة إتعمل خط سكة حديد إسمه Trans-Siberian Railway والخط ده عبارة عن 3 خطوط سكة حديد في بعض.
بناء علي كلام جرنان أمريكاني إسمه The Wall Street Journal فأغلب معسكرات الإعتقال دي موجوده في ولاية صينية إسمها جين-يانج Xinjiang في شمال غرب الصين وخلال سنة واحدة مساحة معسكرات الإعتقال دي تضاعفت.
الحقيقة اللي إنت حتكتشفها كل ما تغوط شوية في موضوع OBOR إن دي خناقة بين الصين واليابان علي مين يفرض نفوذه وسيطرته علي دول أسيا .. تقدر تقول إن دي حرب باردة جديدة بين أكبر قوتين إقتصاديتين في أسيا بس الفرق إن المعركه الأساسية في الحرب دي مش سباق تسلح قد ما هي سباق هندسي وتجاري وخصوصاً في تكنولوجيا هندسة السكك الحديدية السريعة High Speed Rail وعشان تفهم النقطة دي كويس خلينا ناخد مثال علي الأرض هو تايوان.