أهم طيارتين بدون طيار في الترسانة العسكرية التركية هم أنكا إس Anka-S و بيرقدار Bayraktar TB-2 .. زي أي بلد بتصنع سلاح و لازم تجربه و تستعرضه عشان الزباين تتلم عليه فالأتراك إخترعوا أسباب تخليهم يتدخلوا عسكرياً في سوريا و العراق و ليبيا ده طبعاً جنب السبب الرئيسي اللي هو خدمة مصالحهم بس تجربة و إستعراض السلاح اللي هم بيصنعوه.
تركيا عندها ثالث أكبر أسطول طيارات F-16 في العالم بعد أميركا وإسرائيل .. إنت بتتكلم عن بلد عندها أسطول بيوصل 245 طيارة F-16 .. من الطيارات دي كلها فيه منهم 160 طيارة من Block 30 و Block 40 و Block 50 .. حتحس إن الأتراك دول عاملين زي اللي بيدخن سجاير ومش عارف يبطلها بس مش بيشرب غير نوع واحد اللي هو LM الزرقا.
سنة 2005 كان فيه شاب تركي إسمه (سلجوق بيرقدار Selcuk Bayraktar) بيدرس هندسة كهربية في معهد MIT المحترم جداً في أميركا .. سنة 2007 كان بيحضر الدكتوراة هناك لما فجأة قرر إنه يسيب الدكتوراة و الدكتور راح الدكتور جه و يرجع تاني تركيا عشان يفتح شركة تصنيع طيارات بدون طيار.