القوات الجوية التركية .. في الزمن ده اللي ملوش صحاب بيحتاس.

لينك التسجيل الصوتي للمقالة علي ساوند كلاود:
https://on.soundcloud.com/Pz7Fv

عادة المصايب مش بتيجي فرداني .. ده حقيقي .. دايماً بقول إن المصايب غالباً عاملين جروب WhatsApp ومعاهم نمر بعض عشان لما يختاروا ينزلوا فوق دماغ حد بييجوا كلهم سوا .. ده بيحصل مع أفراد ومع دول كمان وموضوعنا النهاردة حيكون عن الأيام السودا اللي عايشاها القوات الجوية التركية اليومين دول .. عشان تستوعب طبيعة المشكلة اللي هم فيها تخيل نفسك أبوك جابلك عربية لادا قديمة تتعلم عليها سواقة .. هي صحيح شغالة وبتوديك مشاويرك بس ده ميمنعش إنها لادا .. مش حقولك مفيهاش إزاز كهربا وفتحة سقف دي أصلاً مفيها باور ستيرينج .. جه أبوك قالك أنا حعمل شغلانة حلوة حتجيب فلوس حلوة أوي ولو جت معاه سكة فمش بس أبوك حيجيب عربية جديدة وكان حاطط عينه علي هيونداي توسان Hyundai Tucson الجديدة .. لا ده كمان حيجيبلك إنت الموتوسيكل الريس اللي بقالك سنين بتحلم بيه .. إنت عشت أيام بتحلم باليوم اللي أبوك يجيبلك فيه الموتوسيكل .. بتتخيل إزاي حتشقط بيه بنات وإزاي حتتصور وإنت سايقه وتنزل صورك علي الأنستجرام .. هوبا الشغلانة باظت .. هوبا مبقاش فيه عربيات ولا موتوسيكل .. ورجعت تاني زي الكلب لعربيتك اللادا.

ده بالضبط اللي حصل لسلاح الجو التركي .. الناس دي إتقالها إن تركيا شريك ضمن مشروع الطيارة F-35 Lightening II .. إتقالها إن إحنا حنستلم علي الأقل سرب كامل من الطيارات دي .. ومش بس كده .. لا .. بوشكاش حاسس إنه إيده فرطة النهاردة .. إحنا كمان حنصنع أول طيارة مقاتلة تصنيع محلي تركي وحيكون اسمها TF-X بالتعاون مع شركة BAE Systems الإنجليزية .. إنت لما كنت تتكلم مع أي طيار مقاتل تركي يحسسك إنه عايز يقولك حدوسك بالF-35 يا فقير .. هوبا تركيا إتطردت من مشروع F-35 .. هوبا مشروع TF-X إتحط في الفريزر .. ورجعت تركيا مبقاش قدامها غير أسطول F-16 Viper اللي تحت إيدها ..  وده اللي عايزين نتكلم عنه النهاردة .. النهاردة حنحاول نجاوب علي 3 أسئلة:

• هو أسطول طيارات F-16 اللي تحت إيد تركيا ده كبير أوي يعني؟
• هم بيفكروا يطولوا عمر طيارات F-16 بتاعتهم إزاي؟
• إزاي الأتراك أساساً لقوا نفسهم في المشكلة دي؟

خلينا نبدأ بالسؤال الأول .. لما أقولك أسطول طيارات F-16 التركي فأنا بتكلم عن كام طيارة؟

تركيا عندها ثالث أكبر أسطول طيارات F-16 في العالم بعد أميركا وإسرائيل .. إنت بتتكلم عن بلد عندها أسطول بيوصل 245 طيارة F-16 .. من الطيارات دي كلها فيه منهم 160 طيارة من Block 30 و Block 40 و Block 50 .. حتحس إن الأتراك دول عاملين زي اللي بيدخن سجاير ومش عارف يبطلها بس مش بيشرب غير نوع واحد اللي هو LM الزرقا .. بداية إدمان الأتراك لطيارة F-16 كان سنة 1984 لما الأتراك إختاروا يشتروا 160 طيارة F-16C و F-16D ضمن مشروع إسمه Peace Onyx 1 وللعلم يعني Onyx ده حجر كريم بيتقال عليه الجزع بس مش قضيتنا دلوقتي .. مشروع Peace Onyx 1 ده كان تحت مظلة برنامج المعونة العسكرية الأميريكية Foreign Military Sales أو FMS .. بسبب البرنامج ده وبسبب الصفقة دي بالذات إتولدت شركة الصناعات الجوية التركية Turkish Aerospace Industries واللي إختصاراً بتتسمي TAI .. صحيح تركيا حتستلم 160 طيارة بس فيه منهم 152 طيارة حيتجمعوا في تركيا و TAI هي المسئولة عن تجميع 70% من جسم الطيارة محلياً.

المشروع ده خلص سنة 1995 باستلام تركيا 43 طيارة F-16 Block 30 و 117 طيارة F-16 Block 40 .. في حالة إنك بتسأل إيه الفرق بين الإتنين فالفرق هو في الأوبشنز زي الفرق كده بين KIA Cerato موديل 2019 وأختها موديل 2020 .. الطيارات F-16 Block 40 إتركب فيها أوبشن جديد هو نظام التوجيه والملاحة الجوية LANTIRN بس .. قبل ما مشروع Peace Onyx I يخلص سنة 1995 كان أخوه الصغير Peace Onyx II بيتمضي سنة 1992 عشان تركيا تستلم 40 طيارة F-16C و F-16D بس كلهم Block 50 وزيه زي أخوه الكبير المشروع قال إن تقفيل وتجميع الطيارات دي حيكون في تركيا برده علي إيد شركة TAI .. بس عارف مين اللي دفع مصاريف المشروع ده؟ .. السعودية والإمارات وأميركا إتشاركوا في الفاتورة كمكافأة لتركيا علي دورها في حرب تحرير الكويت أو حرب الخليج الثانية سنة 1991 .. اااه يا زمن دوار مخلينا نتفرج وإحنا بناكل فشار .. المهم إن سنة 1997 مشروع Peace Onyx II خلص وتركيا بسم الله ما شاء الله بقي عندها 200 طيارة F-16.

سنة 1995 إتمضي إتفاق مشروع Peace Onyx III واللي بيقول إن تركيا حتستلم كمان 40 طيارة F-16C و F-16D بس الإتنين حيكونوا Block 50 وبكده إجمالي عدد طيارات F-16 اللي بقي تحت إيد الأتراك وصل 240 طيارة .. الطيارات دي كلها إتسلمت لسلاح الجو التركي سنة 1999 .. سنة 2005 إتعمل Upgrade محترم لأسطول الطيارات دي كلها ضمن مشروع إسمه Common Configuration Implementation Program وإختصاراً بيتسمي CCIP .. اللي حصل إن شركة لوكهيد مارتن Lockheed Martin اللي إشترت شركة جينيرال دايناميكس General Dynamics اللي صنعت الطيارة F-16 خدت 10 طيارات من تركيا ومعاهم طقم مهندسين وفنيين أتراك وعملوا العمرة و Upgrade ده قدامهم .. فكك من إيه بالضبط اللي إتضاف للطيارة بس اللي حصل بعد كده إن المهندسين الأتراك اللي شافوا العمرة دي رجعوا تاني تركيا عشان يعملوها لباقي أسطول 230 طيارة اللي تحت إيدهم وشركة لوكهيد مارتن بقت بتبعت هي قطع الغيار المطلوبة .. سنة 2008 إتمضي إتفاق Peace Onyx IV واللي زي ما قلتلك هو مشروع تحت مظلة برنامج المعونة العسكرية الأميريكية والإتفاق قال إن تركيا حتستلم 30 طيارة برده F-16C و F-16D بس كلهم Block50+ .. الطيارات كلها حتتجمع في مصنع TAI الجديد من أول سنة 2010 لحد 2012.

زي ما أنا شبهت في البداية أسطول طيارات F-16 التركي بالعربية اللادا بتاعتك فزي ما عربيتك إنت معتمد عليها وبهدلتها في مشاوريك فبرده الأتراك كل ما يروحوا عركة ياخدوا معاهم الطيارة دي :

• أول مرة الأتراك يستخدموها كانت سنة 1993 لما أسطول طيارات F-16 تركي راح إيطاليا عشان يشارك في عملية Operation Deny Flight وده إسم عملية فرض حظر طيران فوق البوسنة والهارسك وقت حرب البلقان.
• سنة 1999 طيارات F-16 تركية برده كانت ضمن الطيارات اللي ضربت يوغوسلافيا ضمن العملية اللي إسمها القوة المتحدة Operation Allied Force.
• دخلوا بيها الخناقة مع اليونان وكذا مرة طيارات تركي ويوناني يجروا ورا بعض وطبعاً شاركت كتير في العمليات العسكرية ضد حزب العمال الكردستاني.
• لما الأتراك راحوا يتعاركوا في سوريا خدوها معاهم وطيارات F-16 تركية هي اللي وقعت طيارة هليكوبتر Mi-17 Hip في سبتمبر 2013 وكمان وقعت طيارة MiG-23 Flogger في مارس 2014 والإتنين تابعين لسلاح الجو السوري .. في نوفمبر 2015 طيارة مقاتلة روسية Su-24M Fencer وقعت برده بصاروخ ضربته طيارة F-16 تركي فوق الأراضي السورية .. في مارس 2020 رجعت تاني طيارات F-16 التركية توقع طيارات تابعة لسلاح الجو السوري ووقعولهم طيارة Su-24 وطيارة L-39 ودي طيارة تدريب.
• طبعاً متنساش إن في يوليو 2016 حصلت محاولة الإنقلاب الفاشلة ضد الرئيس التركي (رجب طيب أردوغان) والإتهام اللي إتوجه كان لطيار مقاتل علي طيارة F-16 من قاعدة أنقرة الجوية وبسبب ده طلع قرار بحل 3 أسراب كاملة F-16 كانت شغالة من القاعدة وإتقبض علي عدد كبير من الطيارين الأتراك.
• في الحرب الأخيرة بين أذربيجان وأرمينيا فيه طيارتين F-16 أتراك شاركوا في الحرب ويُقال والله أعلم إن كان ده صح ولا غلط إن يوم 29 سبتمبر 2020 واحدة فيهم وقعت طيارة مقاتلة أرمينية Su-25 Frogfoot لإن الأرمن بيتهموا الأتراك بإنهم هم اللي وقعهوها بس الأتراك بيحلفوا مية يمين إن ملهمش دعوة.

ودلوقتي جه وقت السؤال الثاني .. الأتراك حينفخوا في صورة أسطول الطيارات ده كله إزاي؟

يوم 31 يناير 2021 صحي الأتراك علي خبر إن واحد إسمه (إسماعيل ديمير Ismail Demir) وده يبقي اللي ماسك حاجة إسمها الهيئة الرئاسية للصناعات العسكرية واللي الأتراك عارفينها بإسمها المختصر SSB وعشان تستوعبها حاول تتخيل إنها النسخة التركي من إدارة الأسلحة والذخيرة بتاعة الجيش المصري طلع قال إن القوات الجوية حتبدأ بإنها تمسك مجموعة طيارات Block 30 اللي تركيا إستلمتها سنة 1987 يودوها الكوافير عشان ترجع عروسة تاني .. بمنتهي البساطة حاول تتخيل إنك حتودي عربيتك اللادا للميكانيكي عشان تعملها عمرة كاملة تخليها كأنها لسه طالعة من المصنع بتاعها في الإتحاد السوفيتي قبل ما إنت تتولد شخصياً .. إنت بتتكلم عن إن المهندسين الأتراك حيمسكوا كل طيارة F-16 من Block 30 ده يغيرولها ما بين 1,200-1,500 قطعة غيار للطيارة الواحدة بحيث بدل ما الطيارة عمرها الإفتراضي إنها تعمل 8,000 ساعة طيران تعمل 12,000 ساعة طيران .. حاول بس تقف للحظة وتستوعب كم الشغل اللي حيبقي مطلوب يتعمل لكل طيارة .. تخيل ده علي عربيتك وقيس عليه .. تخيلت؟ .. اللي حيشتغل علي المشروع ده هي TAI وقطع الغيار نفسها حتيجي من شركة لوكهيد مارتن Lockheed Martin الأميريكية.

الحقيقة أنا عايز أقف قدام نقطة وهي عدد ساعات الطيران اللي الأتراك عايزين يوصلولها .. لما (إسماعيل ديمير) قال إنه عايز يخلي أسطول طيارات F-16 Block 30 عمرها الإفتراضي يوصل 12,000 ساعة طيران فهو مجابش الرقم ده من دماغه .. ده نفس الرقم اللي الأمريكان قالوه لما سنة 2017 إشتغلوا علي برنامج كبير أوي إسمه Service Life Extension Program يعتبر هو هو البرنامج اللي الأتراك قالوا إنهم حيعملوه .. في البرنامج الأمريكاني إتقال إن الأمريكان حيشتغلوا علي 300 طيارة F-16 لسه في الخدمة في القوات الجوية الأميريكية وحيمدولها عمرها الإفتراضي لحد سنة 2050.

خينا نختم بأخر سؤال .. إحنا إزاي بقينا هنا؟

زي ما قلتلك سلاح الجو التركي كان حاطط أمل إنه حيستلم 100 طيارة F-35A وحيبدأوا مع الوقت يطلعوا طيارات F-16 بره الخدمة .. في يوليو 2019 حصلت الأزمة اللي محدش كان عامل حسابه عليها .. تركيا طلبت تشتري منظومة الدفاع الجوي الروسية S-400 .. الأمريكان إعترضوا لإن لو تركيا بقي تحت إيدها طيارات F-35A وفي نفس الوقت عندها المهندسين الروس اللي حيدربوا الأتراك علي استخدام منظومة S-400 فده معناه إن المخابرات الروسية تقدر تسرق معلومات حساسة عن أنظمة التخفي من الرادارات بتاعة الطيارة F-35 .. اللي إتقال للأتراك يا دي يا دي .. يا تختاروا تاخدوا F-35A يا تاخدوا S-400 .. الأتراك ركبوا دماغهم وخدوا S-400 وبناء عليه الأمريكان طردوهم بره المشروع وراحت ال100 طيارة علي الأتراك.    

الروس حاولوا يخشوا في الليلة تحت شعار أهو كله بيسترزق .. في أغسطس 2019 (أردوغان) راح بنفسه حضر معرض MAKS  الجوي في العاصمة الروسية موسكو وهو هناك الرئيس الروسي (فلاديمير بوتين Vladimir Putin) وراه النموذج الأولي أو Prototype بتاع الطيارة سوخوي 57 أو Su-57 ودي تبقي أول طيارة جيل خامس روسي ليها القدرة علي التخفي من الرادارات .. بإختصار Su-57 تبقي النسخة الروسي من F-35 .. اللي الروس عايزينه إنهم يقنعوا الأتراك يشتروا منهم الطيارةSu-57 كبديل لF-35 بس في نفس الوقت الأتراك عندهم حلم تاني خالص .. ليه لا نصنع إحنا طيارة زي F-35؟

سنة 2010 الأتراك قالوا إنهم حيمشوا في سكة تصنيع طيارة محلية ليها القدرة علي التخفي من الرادار إسمها TF-X .. ماشي .. سنة 2015 إتقال إن شركة TAI هي اللي كسبت مناقصة العقد اللي هو عايز تقول للأتراك قال يعني عندكوا غيرها .. في أكتوبر 2018 شركة TAI طلعت قالت إنها إختارت موتور F110 من تصنيع شركة جينرال إليكتريك General Electric عشان يبقي هو الموتور المستخدم علي الطيارة TF-X الجديدة .. في حالة إنك بتسأل نفسك إشمعني يعني الموتور ده بالذات فأحب أقولك برده لنفس السبب اللي الأتراك إختاروا TAI .. معندهمش غيره .. الموتور ده هو هو المستخدم في طيارات F-16 وهو هو الموتور اللي TAI واخدة رخصة تجميعه من شركة جينرال إليكتريك .. طبعاً لما العلاقات التركية الأميريكية بقت زي الزفت بعد إصرار تركيا تشتري منظومة الدفاع الجوي S-400 خلي فكرة إن الأتراك ياخدوا موتور F110 ده يركبوه علي طيارتهم دي بقي مش نافع خلاص .. في يونيو 2019 شركة TAI التركية عرضت الConcept أو التصميم المبدئي خالص لطيارة TF-X في معرض باريس الجوي .. في ديسمبر 2019 إتقال إن الأتراك إتكلموا مع الإنجليز عشان شركة رولز رويس Rolls-Royce هي اللي تصمم الموتور بتاع الطيارة.

إن دولة تقرر إنها تصنع طيارة مقاتلة ده حوار كبير وصداع وفلوس ووقت ومجهود وليلة كبيرة أوي سعادتك .. الأتراك مش عايزين يمشوا بمبدأ شرا العبد ولا ربايته ودي حاجة تُحترم جداً بس في نفس الوقت إنت عشان تصنع طيارة مقاتلة وكمان تبقي ليها القدرة علي التخفي من الرادارات فإنت محتاج يبقي ليك صحاب يساعدوك ويشتغلوا معاك .. حالياً تركيا ملهاش صحاب من الواصلين علمياً ومادياً اللي يقدروا يخشوا معاها في المشروع ده .. لو تروح تسأل شركات السلاح الأوروبية يقولولك إن علي قلبهم زي العسل إنهم يروحوا يشتغلوا مع الأتراك بس الحكومات الأوروبية مش حترضي .. الروس مثقفش فيهم بكيس شيتوس .. عشان كده الأتراك ملقوش حل غير إنهم يشتغلوا علي أسطول طيارات F-16 بتاعهم .. يمكن أهم درس تطلع بيه إن في الدنيا دي إنت محتاج صحاب .. مش لازم يبقوا صحاب أنتيم يعني ليهم نفس الديانة وبيتكلموا نفس اللغة .. إنت عايز صحاب يقفوا معاك في زنقتك لإنهم عارفين إنك حتقف معاهم في زنقتهم .. حالياً تركيا معندهاش الصحاب اللي زي دول.

المصدر:

• مقالة بعنوان Turkey Prepares to Extend The Life of Its Massive F-16 Fleet After F-35 Embargo نشرت في مجلة The Drive وده لينك المقالة الأصلية:
  https://www.thedrive.com/the-war-zone/39088/turkey-prepares-to-extend-life-of-its-massive-f-16-fleet-after-f-35-embargo