أهم طيارتين بدون طيار في الترسانة العسكرية التركية هم أنكا إس Anka-S و بيرقدار Bayraktar TB-2 .. زي أي بلد بتصنع سلاح و لازم تجربه و تستعرضه عشان الزباين تتلم عليه فالأتراك إخترعوا أسباب تخليهم يتدخلوا عسكرياً في سوريا و العراق و ليبيا ده طبعاً جنب السبب الرئيسي اللي هو خدمة مصالحهم بس تجربة و إستعراض السلاح اللي هم بيصنعوه.
سنة 2005 كان فيه شاب تركي إسمه (سلجوق بيرقدار Selcuk Bayraktar) بيدرس هندسة كهربية في معهد MIT المحترم جداً في أميركا .. سنة 2007 كان بيحضر الدكتوراة هناك لما فجأة قرر إنه يسيب الدكتوراة و الدكتور راح الدكتور جه و يرجع تاني تركيا عشان يفتح شركة تصنيع طيارات بدون طيار.
فيه دول كتير ريقها جري و راحت لماما أمريكا تبيعلها الطيارات دي و هنا ظهرت المشكلة اللي إحنا فيها دلوقتي .. الأمريكان في الأول رفضوا بشكل قاطع إنهم يبيعوا تكنولوجيا الطيارات بدون طيار دي لأي حد علي أساس إنهم كانوا عايزين يحتفظوا بالتكنولوجيا دي لنفسهم.