لينك التسجيل الصوتي للمقالة علي Sound Cloud:
https://soundcloud.com/user-112011687-312727988/wmxsya2gqlbp
لو عايز تكسب حرب يبقي لازم تسيطر علي الأرض و عشان تسيطر علي الأرض لازم يبقي عندك دبابات .. فكك من الطيارات المقاتلة و الF-35 و الF-16 و أي رقم تاني بعد الF .. من غير قوات علي الأرض قادرة تفرض سيطرتها علي أي حد يفكر يعمل مشاكل يبقي إنت بتهري .. الأمريكان شافوا ده بنفسهم في فييتنام و العراق و أفغانستان .. و السعوديين و الإماراتيين شايفينه في اليمن .. الدبابة لو حبيت تشبهها بحاجة فهي بالضبط عامله طور هايج في عنبر تسعة .. لو إنت ليك في الكورة فالدبابة هي الديفيندر الرخم اللي بيجري كتير و بيكسر أي حد قدامه زي (طارق حامد) كده الله يمسيه بالخير .. لو إنت مهندس فالدبابة هي الهيلتي الدكاك اللي بتكسر بيها أجدعها خرسانة .. اللي حنتكلم عنه النهاردة هو إيه اللي يحصل لو أحسن دبابتين في العالم دخلوا قصاد بعض في حرب؟ .. الدبابتين اللي حتكلم عنهم هم الM1A1 Abrams الأمريكاني و الأرماتا Armata الروسي.
علي إيدك اليمين الM1A1 Abrams الأميريكية:
في الثمانينات لما الأمريكان جم يصنعوا دبابتهم الجديدة اللي سموها M1 كان عندهم مشكلة و هي يا تري يا هل تري نجيبلها مدفع عامل إزاي؟ .. مهم تكون فاهم إن الدبابات بتتجمع من حتت مختلفة زيها زي الكومبيوتر اللي في بيتك .. فيه شركات مخصوص بتصنع الدروع و شركات تانية بتصنع الشاسيه و شركات تالتة بتصنع المدفع .. لما جم الأمريكان يختاروا يركبوا أنهي مدفع كانت فيه خناقة بين طرفين .. الطرف الأول كان ضباط الجيش و دول الناس اللي المفروض إنهم اللي حيستخدموا الدبابة و اللي كلامهم و طلباتهم لازم تتحط في الإعتبار .. الطرف الثاني كانت القيادة المدنية بتاعة وزارة الدفاع و دول يبقوا المهندسين و المحاسبين اللي ماسكين الوزارة .. كل طرف إفتكس إقتراح و الحقيقة إن الإقتراحين كانوا أصعب من بعض:
الحل الأولاني بتوع الناس المدنيين اللي بفكرك إنهم ماسكين الوزارة قالوا إن بما إننا عاملين دبابة جديدة لانج فإحنا نجيب مدفع جديد لانج و يبقي كله جديد في جديد .. هم قالوا إحنا نجيب مدفع عيار 120 مليمتر ألماني الصنع إسمه راين-ميتال إم256 أو Reinmetall M256 .. الحقيقة هم فكروا في المدفع ده بالذات لكذا سبب .. أولاً زي ما قلتلك ده مدفع ألماني فلما الأمريكان يستخدموه علي دباباتهم فهم حيشتروه بفلوس حتروح لجيب الألمان و ده إعتراف من الأمريكان إن الألمان دول جامدين في صنع السلاح و أبقوا روحوا أشتروا منهم سلاح يا جماعة و الأمريكان كانوا عايزين يعملوا الدعاية دي للألمان كمكافأة ليهم علي شغلهم اللي مش طبيعي عشان يعملوا برنامج إسمه AWACS و ده مشروع ضخم أوي عشان دول حلف شمال الأطلسي NATO يبقي عندهم شبكة رادارات و إتصالات عسكرية موحدة .. حاجة تانية و هي إن عاجلاً أم أجلاً لما الأمريكان ينزلوا الدبابة M1 فسواء روسيا أو غيرها حيبدأوا هم كمان يروحوا في سكة إنهم يعملوا دبابة جديدة فإنت لما من دلوقتي تركب علي دبابتك مدفع جديد و يعتبر أحدث مدفع ينزل السوق فإنت ضمنت إنك لحد سنين و سنين قدام مش حتضطر إنك تكع فلوس عشان تعمل تطوير لدباباتك و تركبلها مدفع أحدث و أقوي يقدر يقف قصاد الدبابات الروسي أو غير الروسي الجديدة اللي نزلت .. أزيدك من الشعر بيت .. هم قالوا طب ما إحنا كمان حاطين في خطتنا إن في المستقبل حنزل Upgrade للدبابة M1 حنسميه M1A1 و هم حاطين في دماغهم إن لما الوقت ده يجي حيكون المدفع اللي الناس كلها بتستخدمه هو الM256 الألماني ده فليه بما إننا كده كده حندفع فنحط المدفع ده من دلوقتي عشان أسعار كل حاجة بتغلي .. تحس إنهم كانوا حاسبينها بالورقة و القلم و الألة الحاسبة .. بس هم نسيوا نقطة .. و النقطة دي هي اللي حتودينا للحل الثاني.
الحل الثاني و ده الحل اللي ضباط الجيش كانوا عايزينه و ده كان قايم علي نقطة منطقية أوي الصراحة .. دلوقتي الدبابة M1 الجديدة دي جايه تحل محل دبابة قديمة إسمها M60 و الدبابات دي كمساحة أكبر من الM1 .. الM1 إتصممت بحيث تشيل طاقم من 4 عساكر و المساحة المتاحة ليهم يدوبك تكفيهم .. حط النقطة دي علي جنب .. دلوقتي دبابات M60 كانت بتستخدم مدفع إنجليزي مش بطال بيؤدي الغرض إسمه Royal Ordnance L7 يعني الذخيرة الملكية عيار 105 مليمتر .. الأمريكان كعادتهم دايماً بيحبوا يغيروا من إسم الحاجة قال يعني تبقي بتاعتهم .. عملوا كده في السدق و سموه هوت دوج و اه إسمه سدق مش سجق يا قاهراوية .. و عملوا كده في المدفع L7 اللي سموه M68 .. لاحظ إن المدفع M68 أصغر من المدفع M256 اللي المدنيين كانوا عايزين يركبوه و معني إنه مدفع أصغر يعني حجم دانته أصغر يعني الدبابة M1 كده حتشيل ذخيرة أقل .. منطق الضباط الأمريكان إن فكك من حكاية إن الM68 ده مدفع إحنا عارفينه كويس و عارفين عيوبه و مشاكله و حتة اللي نعرفه أحسن من اللي منعرفوش .. لو سمعنا كلام الناس اللي حاسباها بالألة الحاسبة دول و إستخدمنا المدفع عيار 120 مليمتر ده فكده البرج أو Turret بتاع M1 اللي هو البتاعة اللي بتلف و بيبقي طالع منها المدفع و اللي بيتحط فيها الذخيرة حتقدر تشيل 55 دانة ذخيرة بس .. ده مشكلة لإن الدبابة M60 القديمة كانت بتقدر تشيل 62 دانة .. يعني إحنا صارفين دم قلبنا علي دبابة جديدة عشان في الأخر تشيل ذخيرة أقل من الدبابة القديمة اللي هي جايه تحل محلها؟ ده كلام برده؟
حصلت خناقة كبيرة أوي بين الطرفين إنت لا تتخيلها لدرجة إن مشروع الدبابة M1 ده كان مهدد إنه يتلغي أصلاً لحد ما في الأخر وصلوا لحل وسط .. الحل كان إن النسخ الأولانية من الدبابة M1 حتنزل بمدفع M68 القديم و بعد كام سنة حيتشال المدفع ده و يتركب بداله مدفع M256 بحيث لما إن شاء الله تنزل النسخة الجديدة أو Upgrade من الدبابة اللي هي M1A1 حتنزل بالمدفع M256 .. إنت ممكن تكون شايف ده حل وسط بس الضباط مكانوش شايفينه كده .. هم شافوه علي إن المحاسبين اللي ماسكين الوزارة خدوا اللي هم عايزينه إنهم عملوا دبابة إسمها جديدة بس مش حيصرفوا عليها كتير قدام لكن عشان يعملوا كده حطوا فيها نقطة ضعف مهمة و هي إنها مش بتشيل كمية ذخيرة كبيرة .. اللي خلي دم الضباط الأمريكان يفور إن دبابات M1 إتحطلها نظام توجيه ضرب نار أو Fire Control System يعتبر أحدث حاجة نزلت في السوق وقتها كان بيخلي طاقم الدبابة يصطاد أي دبابة معادية و هي بتجري من علي بعد يعدي 2000 متر بنسبة دقة تصويب بتعدي 90% .. الضباط الأمريكان كانوا شايفين مش المشكلة إن الدبابة M1 متعرفش تصطاد العدو .. المشكلة إن الذخيرة اللي في الدبابة حتخلص و لسه العدو مخلصش .. بس إذا كان الضباط كانوا ماسكين في خناق المحاسبين فاللي سلك العركة دي هم المهندسين .. هو يعني اللهم يزيدنا تواضع بس أنتوا من غيرنا كمهندسين ولا تسووا حاجة.
في الوقت ده (اللي هو أوائل الثمانينات) المهندسين الأمريكان كانوا بيفكروا هو ليه لا نعمل خارق الدروع بتاع دانة مدفع الدبابة من اليوارنيوم المستنفذ أو Depleted Uranium و إختصاراً بيتسمي DU .. فيه كلمتين أنا قلتهم في الجملة اللي فاتت محتاجين يتشرحوا .. الأولانية هي يعني إيه خارق دروع؟ و الثانية هو يعني إيه يورانيوم مستنفذ؟ .. خلينا نبدأ باليورانيوم المستنفذ .. عشان مطولش عليك تخيل إن التفاعل النووي اللي بيحصل جوه أي مفاعل نووي في الدنيا عامل بالضبط زي عمايل الأكل .. هو إنت لما بتخش المطبخ تعمل أكل مش بيبقي فاضل زبالة اللي هي بواقي البصلة اللي إنت قشرتها و كيس المكرونة اللي إنت سلقتها و كده؟ .. أهي الزبالة اللي إنت بترميها دي هي اليورانيوم المستنفذ .. ده المفروض إنه هدر أو زبالة بيتم التخلص منه بطرق مختلفة بس هم قالوا ليه لا ناخد اليورانيوم ده اللي نسبة الإشعاع فيه قليلة أوي أوي بس أقوي من أي معدن تاني علي الأرض و كثافته أعلي من كثافة أي مادة تانية علي الأرض و نصنع منه خارق الدروع بتاع دانة المدفع .. هنا يجي دور إنك تفهم يعني إيه دانة مدفع؟ .. في الصورة اللي عندك حتلاقي الحتة اللي قدام في الدانة اللي شكلها مخروطي .. دي الحتة اللي المفروض دورها إنها تبقي عاملة زي بونطة الشنيور .. اللي منكوا مستخدمش شنيور أو Drill قبل كده فالبونطة هي البتاعة اللي علي شكل حلزوني اللي بتلف عشان تخرم الحيطة .. زمان خارق الدروع أو Armor Penetrator ده كان بيتعمل من معدن إسمه تنجستين بس هم قالوا شيل التنجستين و حط يورانيوم مستنفذ .. طب هم ليه فكروا في كده؟ .. فيه خاصية في اليورانيوم إسمها بايرو-فوريك Pyrophoric بتخلي الصلب لما بيتحط مع اليوارنيوم في حتة واحدة لازم يتحرق .. اللي بيحصل لما دانة المدفع اللي خارق الدروع بتاعها مصنوع من اليورانيوم المستنفذ تبدأ تخترق الصلب فهي بتولع فيه و ده بيسبب أضرار رهيبة للدبابة المعادية .. فعلياً خارق الدروع المصنوع من اليورانيوم المستنفذ بيسيح الصلب اللي معمول منه الدبابة.
عشان بس تبقي عندك خلفية بالأرقام .. زي ما إنت بتقيس الطول بالمتر و الكتلة بالكيلوجرام فالناس بتوع الدبابات بيقيسوا قوة درع الدبابة أو المدرعة بحاجة إسمها Rolled Homogeneous Armor أو RHA و ده إنت بتقيسه بالمليمتر .. زمان الدبابة M60 اللي بفكرك إنها النسخة القديمة اللي الدبابة M1 جاية تحل محل محلها كانت بتستخدم دانة مدفع إسمها M735 .. المهم إن الدانة دي تقدر تخترق درع الRHA بتاعه 350 مليمتر .. حلو .. الدانة M833 DU المصنوعة من اليورانيوم المستنفذ و اللي حتتحط في دبابات M1 بتقدر تخترق دروع الRHA بتاعها 420 مليمتر .. حلو أوي .. علي الناحية الثانية الدبابة T-72 الروسية اللي كانت أجحد دبابة عند روسيا وقتها كان المدفع بتاعها بيقدر يخترق دروع الRHA بتاعها 450 مليمتر .. ده معناه إن المدفعين سواء بتاع M1 أو T-72 يقدروا إنهم يدمروا بعض .. هنا الM1 كان لازم تتفوق في حاجة و هي إزاي تقدر تحمي نفسها؟ مش إزاي تتفوق في إنها تقتل العدو خصوصاً إن الروس كانوا وقتها وصلوا لمرحلة إنهم عملوا الدبابة T-80 اللي الحقيقة كانت وحش .. لا وحش إيه دي ديناصور .. هنا جه وقت إن الأمريكان يسرعوا شوية من شغلهم عشان ينزلوا الجيل الجديد من الدبابات M1 اللي هو M1A1 و اللي زي ما كنا إتفقنا حيتحط عليه مدفع عيار 120 مليمتر عشان بس يبقي له فرصة إنه يقف قصاد الدبابة T-80 الروسية.
دبابات M1A1 الجديدة بدأت تطلع من المصانع الأميريكية بداية من سنة 1985 .. في حرب الخليج الثانية سنة 1991 إتجربت لأول مرة في مواجهة عسكرية مباشرة قصاد دبابات T-72 اللي كانت تحت إيد العراقيين وقتها و كانت دبابات M1A1 بتستخدم مش بس مدافع عيار 120 مليمتر إلا إن كمان الدانة بتاعتها كانت من اليورانيوم المستنفذ و إتسمت الدانة دي M829A1 و كانت فعالة أوي لدرجة إن العساكر الأمريكان بقوا يسموها Silver Bullet يعني الرصاصة الفضية ده بسبب الحكايات بتاعة المذئوبين Werewolves اللي كانوا مش بيموتوا إلا برصاصة مصنوعة من الفضة و قصص أفلام الرعب اللي إتهرست في مليون فيلم قبل كده بس مش ده موضوعنا دلوقتي .. الدانات M829A1 دي كانت بتقدر تخترق أي درع لحد سمك 570 مليمتر من علي بعد أكتر من 2000 متر و ده معناه إن مش بس دي تقدر تدمر دبابة T-72 إنما كمان تقدر تدمر دبابة T-80 .. طب أزيدك من الشعر بيت .. الدانة دي دي كانت لما بتطلع بتمشي في خط مستقيم كإنها شعاع ليزر ماشي في الجو لحد مسافة 3600 متر يعني و إنت بتضربها مبتحطش في إعتبارك الBullet Drop اللي هو تأثير الجاذبية الأرضية علي الدانة و هي ماشية .. الجديد بقي إن الأمريكان حينزلوا جيل جديد من دانات مدافع الدبابات حيسموه M829E4 لحد دلوقتي إحنا مش عارفين مداه كام أو قدراته إيه بس اللي أقدر أقوله ليك إنه إتعمل عشان يلاقي نقطة ضعف في أنظمة الحماية الجديدة Active Protection Systems زي اللي موجودة في دبابة T-14 Armata الجديدة .. الأهم من كده إن الأمريكان عملوا دروع الدبابة M1A1 Abrams هي كمان من اليورانيوم المستنفذ و سموه درع تشوبام Chobham Armor و كان قوي لدرجة إن حتي الدانة بتاعة الM1A1 Abrams مكنتش بتقدر تخترق الدرع ده.
خلال حرب العراق و أفغانستان ثبت إن الM1A1 و حتي الM1A2 مش جامدة زحليقة زي ما الأمريكان مقتنعين .. كتير منها مش بس في العراق و أفغانستان إنما كمان في اليمن إتدمروا إما بعبوات ناسفة أو بصواريخ مضادة للدبابات زي RBG و AT-14 Kornet و كلها إعتمدت علي ضعف دروع الدبابة اللي بتحمي المحرك .. الأهم من كده إن الM1A1 مدخلتش في مواجهة مفتوحة إلا قدام T-72 و الكلام ده كان سنة 1991 .. يعني دي دبابة لا واجهت الT-80 ولا الT-90 الروسي و طبعاً مدخلتش في مواجهة ضد الChallenger 2 البريطاني و لا Leopard 2 الالماني و لا Merkava 4 الإسرائيلي .. فإنت عشان تقولي إن الM1A1 هي أحسن دبابة في العالم كإنك بتقولي إن الاهلي هو تاني أحسن نادي في العالم عشان هو كسب بطولات أفريقية كتير .. حقولك جميل بس لو الأهلي بيلعب في الدوري الأسكتلندي مقولتش في الدوري الإنجليزي حتي فإحتمال ينافس علي الهبوط .. عشان الأمريكان يحلوا المشكلة دي فهم إخترعوا حاجة إسمها TUSK و دي إختصار Tank Urban Survival Kit و دي عبارة عن شوية إكسسوارات بتتحط علي الدبابة عشان تحميها لو حصل و دخلت في حرب مدن .. الإكسسوارات دي شملت درع إضافي لبطن الدبابة .. مدفع رشاش جديد سموه CROWS و دي إختصار Crew Remotely Operated Weapons Station و ده بإختصار مدفع رشاش عيار نص بوصة بيشتغل بعصاية ألعاب زي بتاعة PlayStation أو Joystick عشان طاقم الدبابة ميتعرضش لخطر و هم بيستخدموه .. و أخيراً و يمكن أهم إكسسوار حاجة إسمها ERA و دي إختصار Explosive Reactive Armor يعني دروع فيها عبوات ناسفة بتتركب داير ما يدور حول البرج بإعتبار إنه أضعف حتة في الدبابة .. كل ده إتضاف بعد كده في تعديل جديد نازل علي الدبابة إسمه M1A2 SEP V3 ممكن نبقي نتكلم عنه في وقت تاني.
علي إيدك الشمال الدبابة T-14 Armata الروسية:
إذا كانت الدبابة M1 جت عشان تحل محل دبابة عفا عليها الزمن اللي هي M60 فوضع الT-14 Armata مختلف شوية .. هي جايه عشان تحل محل دبابة تعتبر جاحدة بكل ما تحمله الكلمة من معني اللي هي T-80 .. الجديد فيها إن الروس شالوا دروع الصلب اللي بتحمي الدبابات وقتها بدأوا يحطوا مكانها دروع من حاجة بيسموها Mixed Composite Matrix اللي هو إنت بمنتهي البساطة بتصنع مادة جديدة في المعمل عبارة عن كوكتيل مواد داخلين في بعض و مضروبين في الخلاط .. حاول تتخيل إن الComposite Material دي هي السموثي أو Smoothies اللي هي المشروب اللي بيتضرب في الخلاط من كذا حاجة في بعض ده .. الدروع الأمامية للبرج بتاع الT-80 كانت بتستحمل دانة مدفع الRHA بتاعها 500 مليمتر .. جسمها نفسه بيستحمل دانة مدفع الRHA بتاعها 450 مليمتر .. بس بسبب التفوق بتاع دبابات M1A1 Abrams فالروس بدأوا يروحوا للدبابة T-14 Armata و اللي الحقيقة هي فعلاً الدبابة اللي روسيا محتاجاها .. دبابة جديدة بتكنولوجيا جديدة و لسه قدامها وقت عشان تضيف ليها إمكانيات جديدة و قدراتها تزيد أكتر و أكتر .. هي من تصنيع شركة روسية إسمها اورال فاجونزافو Uralvoganzavo .. لحد دلوقتي الروس تحت إيدهم 100 دبابة منها يعني تقريباً بتتكلم عن لواء مدرع كامل و خلال السنين الجايه طالبين 2,200 دبابة يعني بتتكلم تقريباً عن 7 لواءات دبابات .. لو حنتكلم عن مواصفات الT-14 كإننا بنتفرج علي إمكانيات موبايل علي GSM Arena فإنت حتلاقيها دبابة محترمة جداً .. طولها حوالي 10.5 متر و وزنها حوالي 50 طن و أقصي سرعة ليها علي الطريق 75 كيلومتر في الساعة يعني تقريباً متفرقش كتير عن الM1 .. المدفع الأساسي بتاعها عيار 125 مليمتر و فيها مدفعين رشاش: الأول في البرج عيار 12.7 مليمتر و الثاني في جسمها عيار 7.62 مليمتر .. الطاقم بتاع الدبابة دي بيتكون من 3 عساكر.
عشان تصمم دبابة كويسة فإنت كمهندس محتاج توازن بين 3 حاجات عكس بعض .. إنت عايز دبابة دروعها قوية عشان تحميها و في نفس الوقت فيها مدفع قوي عشان تدمر الدبابات المعادية و بقدرة قادر تخليها خفيفة و بتجري بسرعة .. إنت بالضبط عشان تعمل دبابة كويسة إنت محتاج تعمل حاجة شبه (محمد علي) الملاكم المشهور الله يرحمه .. اللي منكوا جيل الألفينات ميعرفش مين (محمد علي) خش علي YouTube دلوقتي حالاً إتفرج عليه .. ده رجل كان بسم الله ما شاء الله حيطة واقفه طول بعرض بس خفيف لدرجة مذهلة .. عشان الروس يحققوا ده في الT-14 فهم خلوا الدروع بتاعتها من Composite Material بس فيه سبيكة صلب جديدة لانج إسمها 44C-SV-W و السبيكة دي طلعت من تحت إيد معهد JSC الروسي لأبحاث الصلب .. السبيكة دي إتصنعت بتكنولوجيا ممكن نتكلم فيها بعدين إسمها Electroslag Melting و ده بيديك نوع صلب أخف من الصلب العادي .. ده في الأخر إترجم إن في الوقت اللي دبابة زي M1A1 Abrams وزنها بيقرب من 70 طن تلاقي الT-14 وزنها قرب من 50 طن بس .. سامعك يا اللي بتقول يعني هو السبيكة 44C-SV-W عامله زي الفايبرينيوم Vibranium اللي في وكاندا Wakanda ده اللي إتصنع منه الدرع بتاع Captain America؟ .. حقولك لا الدبابة T-14 لو خدت دانة مباشرة من مدفع 120 مليمتر اللي في M1A1 Abrams قول عليها يا رحمن يا رحيم .. الروس معتمدين بشكل إنت لا تتخيله علي طريقة جديدة يحموا بيها T-14 و هي نظام إسمه Active Protection System و ده اللي أنا محتاج أشرحه ليك دلوقتي.
كلمة Active Protection System دي كلمة عامة بتشمل حاجات كتير تحتها زي ما كده عندك حاجة إسمها Android Operating System و تحت منه فيه أنواع كتير .. الActive Protection System برده هو تكنولوجيا كل دولة خدتها طبقتها بنظام مختلف .. الروس سموا التكنولوجيا بتاعتهم أفغانيت Afganit .. ده عبارة عن شوية Sensors أو حساسات متوزعة علي الدبابة عشان تلقط الصواريخ المضادة للدبابات اللي جايه بإتجاه الدبابة بتاعتك و تحسب هم كام واحد و جايين من أنهي إتجاهات و ترمي عليهم شوية ألواح معدنية عشان الصاروخ يخبط فيهم قبل ما يوصل للدبابة .. فكرة شيك و جديدة .. فيه شوية إكسسوارات كده بتتركب مع Afganit زي مثلاً:
- الناس اللي درست أو إشتغلت في مكافحة الحريق عارفين إن فيه حاجة إسمها إيروسول Aerosol .. أهم الروس جابوه و حطوه في System عشان يرش مادة تبرد الموتور عشان ميطلقتش لأن أي صاروخ موجه ضد الدبابات بيجري ورا الحرارة العالية اللي بتطلع من الموتور بتاع الدبابة.
- الروس ركبوا درع حول جسم الT-14 سموه ملاشيت Malachite و ده عبارة عن ألواح صلب متركب فيها عبوات ناسفة عشان لو حصل و صاروخ مضاد للدبابة قدر بقدرة قادر يعدي من من Afganit فالعبوات الناسفة دي لما بتفرقع بتخلي إنفجار الصاروخ ينعكس بدل ما يروح في إتجاه جسم الدبابة يطلع بعيد عنها.
- عملوا حاجة إسمها Electronic Counter-mine System و ده عبارة عن نظام بيعطل إشارة تفجير الألغام المضادة للدبابات.
- ميزة كمان و هي إن T-14 بقي زيها زي M1 الذخيرة بتاعة المدفع الأساسي بقت بتتحط بعيد عن الطاقم .. ليه هم عملوا كده؟ .. حصل إن في حرب الخليج الثانية لما M1A1 دخلت في مواجهة ضد T-72 و إستخدمت دانات من اليورانيوم المستنفذ كان أحياناً الحرارة بتاعة اليورانيوم لما بيولع حتي لو مقدرش إنه يخترق دروع الدبابة بتفجر الدانات اللي متخزنة في الدبابة الروسي جنب الطاقم بتاعها.
ده بالنسبة لإزاي الT-14 Armata بتحمي نفسها .. طب إزاي بتدمر العدو؟ .. إذا كان الأمريكان مركبين مدفع 120 مليمتر من تصنيع شركة Rheinmetall الألمانية فالT-14 Armata فيها مدفع 2A82 عيار 125 مليمتر و اللي علي حسب رأي ناس كتير أقوي من المدفع الألماني ب17% تقريباً .. ده بالنسبة للمدفع .. الArmata حتستخدم دانات إسمها Vavuum-1 و دي عبارة عن دانات مضادة للدبابات ليها القدرة علي إختراق الدروع .. الدانات دي و هي بتطير بتثبت نفسها في الجو عن طريق زعانف و عشان كده إسمها بالكامل APFSDS و دي إختصار Armor Piercing Fin-Stabilized Discarding Sabot .. فكك من كل ده .. الVacuum-1 ده بيقدر إنه يخترق دروع بيوصل سمها 1000 مليمتر من علي بعد 2000 متر .. لو صادف و الArmata حبت تصطاد هدف بعيد حبتين علي بعد مثلاً 8000 متر فهي بتستخدم صاروخ تاني إسمه 3UBK21 .. المكنة اللي بتعمر المدفع أو الAutoloader زي ما بيتسمي بتقدر إنها تضرب 10 دانات في الدقيقة و ده معدل خزعبلي .. زي ما الأمريكان أول ما نزلوا الدبابة M1 قالوا إحنا نركبلها مدفع 105 مليمتر و بعدين نبقي نركب ال120 مليمتر فالروس برده حيركبوا لArmata مدفع 125 مليمتر دلوقتي و بعدين إن شاء الله حيبقوا يركبولها ال152 مليمتر قدام.
المصادر:
- مقالة بعنوان The secret reason no nation wants to fight America’s tanks in a war .. السر ورا إن مفيش ولا دولة في العالم عايزه تواجه الدبابات الأميريكية في حرب .. نشرت في مجلة The National Interest و ده لينك المقالة الأصلية:
http://secret-reason-no-nation-wants-fight-americas-tanks-war-23271 - مقالة بعنوان Russia’s Armata super tank: could it beat the world’s best in a fight? .. دبابة روسيا الجامدة Armata: هل تقدر تكسب أقوي دبابات العالم في حرب؟ .. نشرت في مجلة The National Interest و ده لينك المقالة الأصلية:
https://nationalinterest.org/blog/the-buzz/russias-armata-super-tank-could-it-beat-the-worlds-best-24318
