لينك التسجيل الصوتي للمقالة علي ساوند كلاود:
https://on.soundcloud.com/go5Pz
لو أنا جيت قلتلك إن المدير الفني الجديد للنادي الأهلي (مارسيل كولر) أول ما كابتن (محمود الخطيب) عينه قام رايح لإستاد التتش اللي هو المفروض إنه بيتدرب فيه الفريق الأول للنادي الأهلي وطلب يعمل إجتماع ضروري مع عمال النجيلة بتوع أرضية الملعب وقعد معاهم بالساعات عشان يطلب منهم إن النجيلة في الإستاد تبقي بإرتفاع معين مينفعش بأي حال من الأحوال إنه يعديه .. مش كده وبس .. هو كمان طلب إن نجيلة الإستاد تتروي مياه بمعدل معين عشان هو له أسلوب لعب معين في اللعب محتاج تبقي النجيلة مبلولة شوية عشان اللاعيبة يبقي أسهل ليها في التدريبات .. هل تفتكر لو إنت كمشجع أهلاوي أو غير أهلاوي حتي لما تسمع خبر زي ده إيه رد فعلك وحيكون إيه رأيك في دماغ الرجل ده؟ .. هل حتقول عليه بيهتم بأدق تفاصيل شغله وإن عشان إدارة الأهلي جابته فده دليل علي إنه أحسن نادي في أفريقيا والكلام الكبير بتاع الأهلاوية ده؟ ولا حتقول عليه ماشي بمبدأ يابا علمني أبقي مهم قاله تعالي في الهايفة وإتصدر؟ .. هو الحقيقة مش (كولر) اللي عمل كده .. اللي عمل كده هو (بيب جوارديولا Pep Guardiola) لما إتعين مدير فني لمانشستر سيتي في 2016.
(جوارديولا) كان عايز طول النجيلة ميزدش عن 19 مليمتر وده نفس الطول اللي كانت عليه نجيلة أرضية الاستاد وملاعب التدريب في ناديي برشلونة وبايرن ميونيخ واللي كان (جوارديولا) بيدربهم قبل ما يجي السيتي .. وسط القعدة العمال بتوع أرضية النجيلة قالوله إن الجو في مانشستر غبي شوية ومش جاف زي الجو بتاع برشلونة ولا ساقع زي الجو بتاع بافاريا اللي هو الإقليم اللي في جنوب ألمانيا واللي فيه نادي بايرن ميونيخ وعشان كده في الأخر إتفقوا كلهم إن في الشتا بس حيسيبوا طول النجيلة يوصل 23 مليمتر .. نفس الكلام علي معدل ري النجيلة اللي (جوارديولا) طلب يكون بمعدل عالي شوية عشان إسلوب اللعب المبني علي حركة الكرة الكتير محتاج النجيلة تبقي مبلولة .. تاني برجع أكرر السؤال .. بلاش (جوارديولا) .. لو (كولر) أو (أوسوريو) اللي كان بيدرب الزمالك أو حتي كابتن (حسام حسن) اللي بيدرب سموحة دلوقتي طلب نفس الطلبات دي إنت حيكون رأيك فيه إيه؟ .. والسؤال الأهم .. هو إيه اللي ممكن يخلي نادي أيا كان هو مين يفكر يجيب مدرب مجنون بالتفاصيل بالشكل ده؟
سنة 2013 لما إدارة السيتي مشت المدير الفني بتاعها (روبيرتو مانشيني Roberto Mancini) الكلام اللي إتقال إنهم مش عايزين مدير فني موظف بيجي في ساعات العمل الرسمية ويمشي بعد ما التدريبات تخلص .. هم كانوا عايزين حد زي السير (أليكس فيرجسون Alex Ferguson) .. سميها غيرة سميها تقليد سميها زي ما تسميها .. الناس بتوع السيتي شافوا إن حد زي السير (أليكس فيرجسون) بني إمبراطورية مع اليونايتد وأحسن طريقة إنهم يعملوا حاجة كده إنهم يجيبوا حد زيه .. حد بيهتم بأدق تفاصيل النادي .. السير (أليكس فيرجسون) كان هو اللي بيختار مينيو الأكل بتاعة اللاعيبة بتاعته وهو اللي كان بيحدد لاعيبته تلبس إيه وتقعد في أي فندق .. بإختصار الإتنين سواء (أليكس فيرجسون) أو (جوارديولا) بيتعاملوا علي إنهم أصحاب مكان مش مجرد إتنين مدربين وظيفتهم يختاروا تشكيلة يلعبوا بيها الماتشات ويشرفوا علي التدريبات وخلاص وده السبب اللي كان مخلي إدارة السيتي عايزه تجيب (جوارديولا) من سنة 2013 بس هو كان وقتها مع بايرن ميونيخ .. عشان كده إدارة السيتي إختارت (مانويل بيليجريني Manuel Pellegrini) والحقيقة إن الرجل كسب الدوري الإنجليزي بنفس التشكيلة اللي كانت تحت إيد (مانشيني) وده يثبتلك إن (بيليجريني) من المدربين الكويسين واللي أنا شخصياً مستني أشوف منه نتايج كويسة مع ريال بيتيس الإسباني .. بس تاني السيتي مكانوش عايزين مدرب موظف هم كانوا عايزين مدير فني.
وجهة نظر السيتي إنهم عايزين حد له فلسفة .. خد عندك مثلاً أرسنال لما جابوا (أرسين فينجر Arsene Wenger) سنة 1997 .. ده رجل كان بيدرب في اليابان ومحدش كان عارفه في إنجلترا وأنا مكنتش عايش في إنجلترا وقتها بس أنا معنديش ذرة شك إن الصحافة الإنجليزية مبطلتش تريقة علي قرار تعيينه .. بس الرجل ده هو اللي دخل لإنجلترا فكرة إن مدرب الفرقة لازم يبقي مدير فني .. هو اللي دخل لإنجلترا مفهوم إن لازم المدير الفني يتحكم في أكل اللاعيبة وهو اللي يشرف علي المينيو بتاعة المطعم وهو أول واحد فكر إنه يبعت كشافين مواهب لدول أوروبا عشان ينقوا اللاعيبة الصغيرين ويجيبهم إنجلترا .. السيتي كانوا عايزين حد زي (جوزيه مورينيو Jose Mourinhu) أو (رافا بينيتيز Rafa Benitez) اللي هم ناس ليهم فكر مختلف وبيتكلموا بإسلوب مختلف وعايزين يبقي ليهم رأي في كل صغيرة وكبيرة .. أنا بس حابب أفكرك إن واحد زي (بينيتيز) ده خد تريقة للصبح لما بدأ يتكلم عن فكرة تدوير اللاعيبة Squad Rotation أيام ما كان بيدرب ليفربول سنة 2005 وإن مينفعش نفس التشكيلة تلعب كل الماتشات طول الموسم بس دلوقتي أندية العالم كلها بتطبق نفس الفكرة .. ده اللي كان السيتي عايزه وكانوا شايفين إن (جوارديولا) فيه الميزة دي.
الإسلوب ده مش دايماً بيجيب نتيجة علي فكرة .. إنك تبقي مدير فني متحكم في كل حاجة في النادي أحياناً كتير بتفرقع في وش مش بس المدير الفني إنما النادي كمان .. شوف (فينجر) في أواخر أيامه بقي عامل إزاي .. شوف (مورينيو) اللي كل نادي يدربه يسيبه بخناقة .. أحب بس أفكرك إن أول موسمين للسير (أليكس فيرجسون) كانوا كوارث بس النادي وثق في قدراته وخلوه يكمل وشوف دلوقتي الرجل ده صنع إسطورة إسمها مانشستر يونايتد إزاي .. (جوارديولا) كمان تجربته في بايرن ميونيخ مكنتش زبادي خلاط لإن الألمان وصلوا لمرحلة إنهم إتخنقوا منه ومن تحكمه في كل صغيرة وكبيرة وإنه زي ما كانوا شايفينه بيتدخل في شغل غيره .. خناقته الشهيرة مع دكتور الفرقة تعتبر دليل علي ده .. بس في نفس الوقت الشخصيات اللي زي (جوارديولا) و(أليكس فيرجسون) و(مورينيو) لإنها بتؤثر أوي في مكان شغلها فلما بتسيبه بتسيب فراغ كبير زي اللي إشتكي منه (عمرو دياب) كده .. من بعد ما (أليكس فيرجسون) مشي واليونايتد مش عارف يكسب بطولة عليها القيمة .. كمان (جوارديولا) رغم زي ما قلتلك كتير جوه ألمانيا كانوا مخنوقين منه إلا إنه بعد ما مشي إعترفوا بإن بايرن ميونيخ عمره ما لعب كرة قدم تحب إنك تتفرج عليها إلا لما هو مسك الفرقة .. (ثياجو ألكانتارا) اللي بيلعب في بايرن ميونيخ واللي (جوارديولا) شخصياً حارب عشان يجيبه من برشلونة له رأي فيه إنه غيّر فلسفة لعب الكرة في ألمانيا .. في رأي (ألكانتارا) الألمان زمان كانوا بيلعبوا كرة قدم عنيفة وسريعة لو عايز فعلاً تفهم هو قصده إيه اتفرج علي فيديوهات الأهداف بتاعة ألمانيا في كأس العالم 2002 و 2006.. بس لما (جوارديولا) جه وعلم لاعيبة بايرن ميونيخ مباديء الإستحواذ علي الكرة فلإن تقريباً أغلب لاعيبة منتخب ألمانيا هم لاعيبة بايرن ميونيخ فمستوي منتخب ألمانيا في كأس العالم 2014 كان كشكل حتي وطريقة لعب غير طريقة لعب منتخب ألمانيا اللي الناس كلها متعودة عليها.
خليني أديلك مثال بسيط لإزاي البني أدمين زي (جوارديولا) دول أحياناً بيبقوا صداع في الرأس إنك تشتغل مع أو تحت حد زيه .. لو مثلاً مدرب زي (أوسوريو) بتاع الزمالك خد باله إن تشجيع جمهور الزمالك لفرقته مش حماسي وإنه جمهور من سكوته في الماتشات كإنه جاي يتفرج علي مسرحية مش علي ماتش كرة قدم .. ده علي فرض يعني إن الماتشات عندنا بيخشها جمهور عشان كده قلت مثلاً … هل تفتكر حد زي (أوسوريو) أو (كولر) أو حتي كابتن (حسن شحاته) حيفرق معاه قد إيه الجمهور بيشجع ولا قاعد ساكت ولا أهم حاجة عنده إن الفرقة بتكسب وخلاص .. (جوارديولا) بداية من الموسم ده حط خطة مع الدكتور النفسي بتاع الفرقة عشان يدربوا الاعيبة يقولوا إيه للإعلام وفي المؤتمرات الصحفية عشان يخلوا الجمهور يشجع بحماس أكتر .. أظن اللي أنا عايز أقوله ليك إن (جوارديولا) بيلاقي وقت إنه بعد ما يخلص التدريبات ويحضّر للماتش الجاي ورغم إن اليوم فيه 24 ساعة بس إلا إنه بيلاقي وقت يقعد مع الدكتور النفسي للفرقة عشان يتكلموا إزاي يخلوا الجمهور يشجع بحماس أكتر.
أنا عارف إن ناس كتير بتكره سيرة (جوارديولا) وشايفينه مدرب مبالغ فيه ورأيهم ده ناس كتير إتأكدت منه بعد الموسم الأول له مع السيتي واللي خرج منه زي ما بنقول كده خرج من المولد بلا حمص … صفر بطولات .. بس الموسم التاني له كان خرافي .. إنت كاسب الدوري الإنجليزي بفرق السما عن الأرض بينك وبين التاني اللي كان مانشستر يونايتد ومعدي حاجز ال100 نقطة مستريح .. كسبان كأس إنجلترا وخارج من نص نهائي Champions League قدام فريق يعتبر تاني أحلي فريق بيلعب كرة قدم هجومية في العالم .. ده محصلش عشان (جوارديولا) ساحر .. ده حصل لإن (جوارديولا) مدرب بيهتم بأدق التفاصيل في شغله زيه زي السير (أليكس فيرجسون) علي فكرة.
بس هنا إنت محتاج تسأل نفسك هو فكر الإستحواذ علي الكرة هو الصح ولا فكرة حندافع وأنتوا مالكوا خلي الهجوم ينفعكوا أحسن؟ .. فكك من (جوارديولا) وشغل حارس المرمي اللي بيعرف يلعب برجله وإن مفيش حاجة إسمها نطفش الكرة من الدفاع وإننا لازم الكرة متتقطعش مننا والكلام اللي مبيأكلش عيش في رأي ناس كتير ده .. خد عندك واحد زي (يورجين كلوب Jurgen Klopp) .. هل فيه حد حيعترض لو قلت إن فرقة ليفربول هي أحلي فرقة بتلعب هجمة مرتدة في العالم؟ .. (كلوب) عامل شغل حلو أوي لدرجة إن فيه ناس بقوا بيشجعوا ليفربول مش بس عشان (محمد صلاح) إنما لإنهم بقوا معجبين بطريقة اللعب الهجومية دي .. واحد تاني زي (ماوريشيو بوتشتينو Mauricio Pochettino) .. الرجل ده لو معاه نص الفلوس اللي بتتصرف في السيتي ولا اليونايتد كان زمان تونهام أقوي فرقة في العالم .. هل معني كده إنك عشان تبقي مدير فني ناجح لازم تمسك الكتالوج بتاع (كلوب) و (بوتيشتينو )؟ .. ولا لازم تعمل زي (مورينيو)؟ .. أحب بس أفكرك و أفكر نفسي إن (مورينيو) كسب بطولة دوري إنجليزي مع تشيلسي موسم 2017 بنسبة إستحواذ معدتش ال53% .. قبلها بسنة (كلاوديو رانييري Claudio Ranierri) عمل معجزته مع ليسترسيتي وخد بيهم الدوري بنسبة إستحواذ معدتش ال40%.
بما إننا جبنا سيرة التكتيك وطرق اللعب .. فيه مدرب كباره كده إسمه (أوتمار هيتسفيلد Ottmar Hetzfeld) جيل التمانينات اللي زي حالاتي عارفينه كويس بس جيل الألفينات التوتو ده مسمعوش إسمه قبل كده .. الرجل ده كان بيدرب بايرن ميونيخ وبروسيا دورتموند وده اللي إخترع فن ركنة الأوتوبيس ودفاع المنطقة .. الرجل ده قال إن لو إنت عايز تقفل اللعب وتموته ففيه حتة إسمها المنطقة الحمرا Red Zone ودي المنطقة بره منطقة الجزاء بتاعتك لو سيطرت عليها يبقي إنت كده ركنت أوتوبيسك في موقف الأتوبيسات خلاص .. ساعتها الفرقة اللي قدامك مش حتلاقي حل غير إنهم يلعبوا علي العرضيات ولو إنت عندك قلبين دفاع طوال شوية فخلاص إنت كده تقريباً ضمنت إنك مش حيخش فيك جوان .. لما الفكر ده ظهر كان الحل السحري عشان تكسر فرقة راكنة الأوتوبيس بالشكل ده إن يبقي عندك صانع ألعاب رجله تتلف في حرير زي (كاكا Kaka) أو (زين الدين زيدان) اللي هو لاعيب بيعرف يشوط من بره منطقة الجزاء وبيعرف يلعب الثرو اللي بالمقاس للمهاجم عشان يكسر التكتل الدفاعي ده .. الناس اللي مشت علي نفس السكة بتاعة (أوتمار هيتسفيلد) وبقوا محترفين ركن أوتوبيسات طلعلولنا طريقة لعب 4-2-3-1 اللي بدأت تنتشر أوي في كأس العالم 2006 بإنك تلعب بإتنين إرتكاز عشان تحجم من خطورة صانع اللعب.
جري الشريط ل2008 وفرقة برشلونة أيام ما كان (جوارديولا ) ماسكهم اللي مجاش ومش حيجي بعدها .. الفرقة دي لو ركنت الأوتوبيس قدامها حتخسر برده لإنهم مبقوش يلعبوا علي الRed Zone اللي (أوتمار هيتسفيلد) كان بيقفلها .. هم كانوا بيلعبوا علي الحتة الصغيرة اللي بين قلب الدفاع والباك .. فيه حتتين كده صغيرين بين الإتنين قلوب دفاع وبين الإتنين باكات عامله زي مسألة الحساب اللي بتخلي الطلبة ميقفلوش الإمتحان لإن دايماً حد بيغلط فيها .. مفيش ماتش بيعدي إلا لما علي الأقل تحصل غلطة في المنطقتين دول .. يا قلب الدفاع والباك يتعازموا علي مين يمسك المهاجم ووسط الدربكة المهاجم ينفرد .. يا إما الإتنين أصلاً ميمسكوش المهاجم .. (جوارديولا) أيامها كان عنده 3 مهاجمين عتاولة اللي هم (تييري هنري Thierry Henry) و(صامويل إيتو Samuel Eto’o) و(ليونيل ميسي Lionel Messi) .. كل اللي كان بيعمله إنه يخلي (هنري) يفضل واقف بين الباك اليمين وقلب الدفاع اللي جنبه ويخلي (إيتو) يقف بين الباك الشمال وقلب الدفاع اللي جنبه .. كده إنت خليت الأربعة خط الظهر بتوع الفرقة اللي قدامك واقفين ورا مبيتحركوش خايفين أي حد فيهم يتقدم .. هنا (ميسي) يقوم نازل لخط الوسط وبيبقي جنبه (تشافي Xavi) و(أندريس إنييستا Andres Iniesta) وعندك كمان (داني ألفيش Dani Alves) لما يتقدم لخط الوسط هو كمان وهوبا برشلونة بقوا ماسكين الفرقة اللي قدامهم ولا تعبان الأناكوندا عمالين يعصروا فيهم لحد ما ينهاروا خالص.
ده الكتالوج بتاع (جوارديولا) .. فيه صورة عندك لأرضية ملعب متقسمة مستطيلات كتير .. دي التقسيمة بتاعة أرضية ملعب التدريبات اللي بيرسمها (جوارديولا) عشان يحفظ لاعيبته يتحركوا إزاي وفين من أيام ما كان في برشلونة وبعدها في بايرن ميونيخ ودلوقتي في السيتي .. إنت عندك 20 مستطيل لازم تكون حافظ إنت حتقف فين طول الماتش .. الفكرة بمنتهي البساطة إن الملعب متقسم أفقي ورأسي .. مينفعش أكتر من 3 لاعيبة يبقوا واقفين علي خط أفقي واحد ومينفعش أكتر من إتنين لاعيبة يبقوا واقفين علي خط رأسي واحد .. أنا عارف إنك تهت فخليني أديلك مثال .. لو أنا قلب دفاع و خدت الكورة من عند الجون بتاعي وجريت بيها لحد ما بقيت واقف عن الحتة الشمال من دايرة نص الملعب بتاعة فرقتي .. ده معناه إن قبل ما أجري كان فيه 3 لاعيبة زمايلي واقفين علي الخط الرأسي ولما وصلت بالكورة بقينا أربعة واقفين علي نفس الخط الراسي .. يبقي لازم واحد من الثلاثة اللي معهمش الكورة من زمايلي يتحرك .. عشان لما أنا حد من الفرقة اللي قدامي يضغط عليا ألاقي يا إتنين يا تلاتة من زمايلي فاضيين أعرف أباصيلهم الكورة .. التقسيمة دي بتخلي الفرق اللي بيدربها (جوارديولا) بتعرف تستغل الحتتين الصغيرين اللي إتكلمنا عنهم اللي بين قلبين الدفاع وبين الإتنين الباكات .. ومش (جوارديولا) لوحده اللي هو أبوالعريف اللي عرف يستغل نقطة الضعف دي .. (أنتونيو كونتي Antonio Conte) في الموسم اللي خد فيه الدوري الإنجليزي مع تشيلسي كان بيلعب بطريقة 3-4-2-1 بحيث كان مخلي (إيدن هازارد Eden Hazard) و(وليان Willian) عمالين ياكلوا كريب نوتيلا من علي قفا المدافعين اللي بيغلطوا.
إنت لو مكان مجلس إدارة أي فرقة إنت بتشجعها حاول تسأل نفسك السؤال الصعب .. تجيب مدير فني يكسبك الدوري بإنه راكن الأوتوبيس وبيلعب علي المرتدات والكرات الثابتة ولا تجيب مدير فني زي (جوارديولا) واخد الدوري بنسبة إستحواذ معدية ال71.5% وكاسر حاجز ال100 جون .. من ناحيتها إدارة السيتي عايزه (جوارديولا) يكمل معاهم لما بعد سنة 2020 وياريت لو يكمل معاهم زي ما السير (أليكس فيرجسون) كمل كده مع اليونايتد بس لما تمسك الCV بتاع (جوارديولا ) تكتشف إنه أخره مع الفرقة اللي بيمسكها 4 سنين وبعد كده بيمشي .. فيبقي السؤال .. تلعب سيكسي فوتبول .. ولا تقضيها أورديحي.
المصادر:
- مقالة بعنوان The greatness of Pep Guardiola, in a blade of grass يعني عظمة (بيب جوارديولا) في ورقة نجيلة نشرت في جريدة The New York Times الاميريكيه وده لينك المقالة الأصلية:
https://www.nytimes.com/2018/04/06/sports/soccer/manchester-city-united-pep-guardiola.html - مقالة بعنوان Vulnerable channels and 20 zones: the tactics behind Guardiola’s title win يعني فتحات ضعيفة و تقسيمة العشرين منطقة: التكتيكات ورا فوز (جوارديولا) بالدوري .. نشرت في جريدة The Guardian الإنجليزية وده لينك المقالة الأصلية:
https://www.theguardian.com/football/2018/apr/16/tactics-pep-guardiola-manchester-city-title
