اللي أنا عايزك تخرج بيه النهاردة من الكلام اللي حكتبه هو حاجة واحدة بس و هي إنك تبقي فاهم ولو جزئيأ هو إيه الهبد اللي بيحصل في نادي برشلونة ده؟ .. في حالة إنك مش فاهم أوي هي فين المشكلة أصلاً و شايف إن وضع النادي المالي علي الأقل هو عبارة عن شوب سوبيا بالمانجا فعايزك تفهمني إزاي نادي مطلوب منه إنه يوفر تكاليف إنتقال قلب الدفاع بتاع تشيلسي (أندرياس كريستينسين) ليهم و اللي صحيح راح كصفقة إنتقال حر بس الرجل ده حيدفعله مرتب و في نفس الوقت فيه كلام علي إن برشلونة زي ما يكون تشيلسي عاملهم أوفر العيد الكبير من كارفور فهم بيفكروا ياخدوا (سيزار أزبيليكويتا) و (ماركوس ألونسو) .. تاني الثلاثة لو حصل و راحوا برشلونة كلهم حيروحوا كصفقة إنتقال حر بس برده إنت حتبقي محتاج توفرلهم مرتباتهم .. زود علي كده إنتقال (فرانك كيسي) من إيه سي ميلان اللي برده حتحتاج توفرله مرتبه .. شوية و برشلونة خلصوا صفقة (رافينا) جناح نادي ليدز يونايتد الإنجليزي .. ده غير (روبيرت ليفوندوفيسكي) اللي لو حصل و راح برشلونة أقل مبلغ حيتدفع لنادي بايرن ميونيخ حيبقي 40 مليون يورو ده غير مرتبه .. و فيه كلام علي إن برشلونة عايز قلب دفاع إشبيلية (جولز كوندي) .. ده غير إن (عثمان ديمبيلي) ممشاش من النادي .. و أخيراً و ليس أخراً الصداع النصفي بتاع (فرانكي دي يونج) اللي النادي عايز يمشيه لمانشستر يونايتد مقابل 85 مليون يورو بس اللاعيب مش عايز يمشي و لسه عقده مخلصش فلو ممشاش فالنادي حيبقي مطالب إنه يوفرله مرتبه.
أنا طولت عليك في المقدمة بس إنت فاهم المشكلة فين؟ .. إزاي نادي مديون ب1.3 مليار يورو مطلوب منه يوفر فلوس المرتبات دي كلها؟ .. إزاي نادي المفروض إنه بناء علي سقف المرتبات اللي عامله الإتحاد الإسباني لكرة القدم فهم لازم الأول يشيلوا 144 مليون يورو مرتبات النادي بيدفعهم عشان بس العداد يصفر و بعد كده يلاقوا مصدر دخل إضافي عشان بس يقدروا يسجلوا اللاعيبة دي كلها في القائمة بتاعتهم في الإتحاد الإسباني لكرة القدم؟ .. إزاي نادي لما (خوان لابورتا) مسك رئاسته من كام شهر وصف الوضع المالي ليه إن النادي ميت إكلينيكيا دلوقتي بقي نادي عمال يبعزق في فلوس؟ .. بمنتهي البساطة محتاجين نعرف ده حصل إزاي؟
مبدأياً الكلام دلوقتي حتحسه أكتر رايح في سكة المحاسبة و الفلوس من سكة كرة القدم فلو إنت بتزهق من الكلام الكتير في الأرقام فنصيحة لوجه الله متكملش قراية .. لو إنت مُصر تكمل قراية فعايزك تفهم إن فيه سكتين إدارة برشلونة ماشية فيهم مع بعض و في وقت واحد:
- أول سكة و هي إن النادي يبقي ضامن إن مهما كانت الخطوات اللي الإدارة تاخدها دلوقتي فمش حنلاقي نفسنا كمان كام سنة قدام وضع إن النادي غرقان و حيقفل .. ده معناه إن الورق بتاع الحسابات يبقي مضبوط و مش ملعوب فيه.
- ثاني سكة و هي الهروب من مشنقة سقف المرتبات اللي حاطه الإتحاد الإسباني لكرة القدم .. ده معناه إن النادي بقدرة قادر كان محتاج يلاقي مصادر دخل إضافية و بسرعة عشان الفلوس اللي بتخش النادي تنط حبة حلوين قبل يوم 1 يوليو 2022 بتاع تقفيل السنة المالية فلما المحاسبين بتوع الإتحاد يشوفوا ده يقولوا للنادي إنت من حقك تضيف كذا لاعيب للقايمة بتاعتك.
البوبع في القصة دي كلها إسمه Limite Salarial و دي كلة إسباني معناها سقف المرتبات و دي زي ما قلت من شوية تعتبر النسخة الإسباني من لايحة اللعب المالي النظيف .. بمنتهي البساطة المحاسبين بتوع الإتحاد الإسباني لكرة القدم بيمسكوا الورق بتاع الإيرادات و المصروفات بتاعة كل الأندية اللي بتلعب في الدوري الممتاز و يحسبوا لكل نادي نسبة معينة من الميزانية هي دي اللي مسموح للنادي إنه يصرفها علي الفريق الأول كإنتقالات و مرتبات .. في المتوسط و دي مش قاعدة قد ما هي معلومة عشان تسهلك فهم الأمور فالإتحاد الإسباني لكرة القدم بيقول لكل الأندية ليك الحق تصرف 60% من إيرادات النادي علي الفرقة الأولي .. لكن .. و خلي بالك أوي من الحتة الجاية دي .. قاعدة سقف المرتبات دي مش بتتطبق بعد الميركاتوا ما يخلص .. بمعني أخر .. اللي بيعمله الإتحاد الإسباني مش زي اللي بيعمله الإتحاد الأوروبي لكرة القدم لما تلاقيه يوقع عقوبة علي نادي زي باريس سانجيرمان أو مانشستر سيتي سنة 2020 مثلاً بسبب تجاوزهم في مصاريف إنتقال اللاعيبه في موسم 2018 .. لا مش ده اللي بيحصل في إسبانيا .. فيه Data Base جاهزة و حسابات الإندية كلها محطوطة عليها فحتي خلال الميركاتو لو نادي زي برشلونة حب يسجل لاعيب في القايمة بس الحسابات بتاعة النادي مخلياه متجاوز سقف المرتبات فإدارة النادي لما تيجي تتك علي زرار Accept علي الموقع الأليكتروني عشان يسجلوا اللاعيب في القايمة فالزرار مش حيشتغل.
مفيش حل غير إنك تغير في الحسابات بتاعة النادي بحيث تزود مصادر دخلك .. فيه حركة إدارة برشلونة عملتها قبل كده في صفقة تبادل (أرثور) و (مريام بيجانيتش) لو تفتكر بس مش كل شوية حتلاقي فرصة تعمل حركة زي دي .. حالياً سقف مرتبات برشلونة -144 مليون يورو و أيوه هو بالسالب بس ده الرقم اللي منشور للإعلام و علي فكرة علي أخر شهر أغسطس الرقم الجديد حيعلن و ممكن يبقي صفر بس ساعتها وفق لايحة سقف المرتبات فبرده برشلونة مش حيبقي مسموح ليهم يسجلوا أي لاعيب في القايمة .. حالياً برشلونة بيصرفوا 560 مليون يورو سنوياً علي المرتبات بس .. ده معناه إن الخطوة اللي بعد كده هي بطريقة ما يقللوا كم الفلوس اللي هم بيصرفوها علي المرتبات و كمان يلاقوا طريقة يزودوا بيها دخلهم .. المفترض إنها سهلة أهي .. مش أوي كده.
مشكلة خفض المرتبات إنه بيكسر الفرقة:
خد عندك لاعيب زي (فرانكي دي يونج) .. ده لاعيب عنده 25 سنة يعني لسه في عزه بس إنت محتاج تبيعه عشان توفر فلوس مرتبه و كمان فلوس بيعه تزودلك دخلك فتقدر تسجل اللاعيبه اللي إنت عمال تجيبها .. حلو .. تيجي إدارة مانشستر يونايتد تحب تشتريه تقولك أنتوا أصلا محتاجين الفلوس فإحنا حنلوي دراعكوا و مش حندفع أكتر من 85 مليون يورو .. أولاً ده رقم قليل علي لاعيب زي (فرانكي) بس للأسف برشلونة محتاجين الفلوس اللي هو علي رأي (أحمد شيبة) الحاجة مرة و ياما بهدلت أبطال .. طب إفرض (فرانكي) مش عايز يمشي .. عقده لسه مخلصش .. هو بياخد مرتب كويس أوي .. مبسوط في مدينة برشلونة اللي جوها أحلي بكتير من مانشستر .. عشان النادي يجبره يمشي حيقوله بص إحنا حالتنا صعبة و عشان نقدر نسجل اللاعيبة الجديدة في القايمة لازم نخفض مرتبك .. (فرانكي) يقول لنفسه يعني أنا لاعيب أساسي يتخفض مرتبي عشان تسجلوا (رافينا) اللي هو أساساً حيلعب إحتياطي ل(عثمان ديمبيلي) و ل(بيير إيميريك أوباميانج) في حالة إن (روبيرت ليفوندوفسكي) جه .. هوبا بقي عندك شرخ في الفرقة لإن اللاعيبة بقت حاسه إنها مش متقدرة و الأهم إنها بقت بتبص لبعض في فلوسها.
مشكلة زيادة الدخل إنه بيخليك تعمل حاجات ممكن تندم عليها بعدين:
كلنا سمعنا عن خبر صفقة رعاية سبوتيفاي لبرشلونة و إتريقنا عليها .. كلنا قرينا في سوشيال ميديا خبر إن أرضية إستاد الكامب نو بقت بتتأجر كقاعة أفراح و مناسبات و سفينا بما فيه الكفاية .. بس فيه صفقتين هم اللي مينفعش نسف فيهم ولازم نتكلم عنهم جد لإن تجربة برشلونة دي لازم تقف قدامها كتير أوي و تتعلم منها:
- الصفقة الأولانية هي بيع 25% من حصتهم من بث ماتشاتهم في الدوري الإسباني لمدة 25 سنة .. اللي عرفوا يعملوه إنهم يبيعوا 10% من حصتهم في فلوس بث ماتشاتهم في الدوري الإسباني مش دوري أبطال أوروبا خلال ال25 سنة الجايين مقابل 207.5 مليون يورو .. حط التضخم في إعتبارك فإنت قصاد وضع إن برشلونة خلال 25 سنة حيخشلهم 400 مليون يورو بمعدل 16 مليون يورو كل سنة .. لو كمان شوية باعوا 15% من حصتهم فكده حيدخلهم 600 مليون يورو خلال ال25 سنة الجايين .. بمعدل 24 مليون يورو كل سنة.
- الصفقة الثانية هي بيع 49.9% من أسهم شركة BLM و دي الشركة اللي بتدير الدعاية و حقوق النشر بتاعة نادي برشلونة مقابل 300 مليون يورو.
اللي عملته إدارة النادي هي إنها باعت جزء من أملاكها عشان توفر سيولة مالية إنها تخرج بره الأزمة اللي هي فيها .. هل ده قرار صح ولا غلط؟ .. صدقني لو قلتلك الله أعلم و مفيش حد دلوقتي يقدر يقول بس أنا ممكن أقولك هي الارقام بتقول إيه .. رسمياً (خافيير تيباس) رئيس الإتحاد الإسباني لكرة القدم قال لو برشلونة عرفوا يوفروا 500 مليون يورو فهم كده يقدروا يسجلوا اللاعيبة الجداد في القايمة .. الواقع علي الناحية التانية بيقول غير كده .. مش قصدي أبقي متشائم أو متحامل علي الشغل اللي بتعمله إدارة برشلونة بس لو إنت مشجع للنادي فمسئوليتي تجاهك هي إني أفهمك الصورة كاملة:
- معلومة رقم واحد .. قيمة سقف المرتبات بتاعة برشلونة دلوقتي لحد ما إنت بتقرأ كلامي زي ما قلت من شوية -144 مليون يورو.
- معلومة رقم إتنين .. زي ما قلت من شوية إدارة برشلونة بتدفع مرتبات بس في السنة 560 مليون يورو وهم السنة دي بيسعوا عن طريق بيع لاعيبة ملهاش لازمة و إقناع اللاعيبة القديمة إنها تخفض شوية من مرتباتها إنهم يدفعوا 400 مليون يورو مرتبات بداية من السنة دي.
- معلومة رقم ثلاثة .. إجمع ال144 مليون علي ال560 مليون يورو يطلع إن إدرارة برشلونة عشان تصفر العداد بس محتاجين يخشلهم صافي ربح 704 مليون يورو.
- معلومة رقم أربعة .. زي ما برده قلت من شوية إن الإدارة بتسعي ورا صفقتين عشان يدخلوا فلوس و الصفقتين دول حيدخلولك فلوس ما بين 600-800 مليون يورو علي حسب شطارتهم في التفاوض .. لازم و حتماً و لابد إدارة برشلونة تسحر و معرفش هم حيعملوا ده إزاي عشان ياخدوا من الصفقتين 800 مليون يورو و ساعتها النادي حيبقي تحت إيده 96 مليون يورو يقدروا يزودوها لحساباتهم عشان يسجلوا اللاعيبة الجديدة اللي هم إشتروهم .. طبعاً ده مستحيل يحصل .. هنا بقي بيجي دور المعلومة رقم خمسة.
- بسبب جائحة كورونا فالإتحاد الإسباني لكرة القدم عمل تعديل علي لايحة سقف المرتبات و التعديل ده هو اللي ممكن ينقذ حياة نادي برشلونة .. التعديل بيسموه قاعدة 1:4 و دي بمنتهي البساطة إنك لو نادي عرفت توفر 4 يورو فإنت تقدر تستثمر قصادهم 1 يورو و مش حنقولك جبتهم منين .. مش فاهم صح .. نفترض جدلاً إن عندك لاعيب مرتبة في الشهر 10 مليون يورو و اللاعيب ده إنت نهيت عقده فإنت مش بس وفرت ال10 مليون يورو بتوع مرتبه إنما كمان من حقك تستثمر 2.5 مليون يورو و تدخلهم جوه حساباتك كأنهم إيرادات دخلت للنادي .. ده يفسرلك ليه هم كانوا حيموتوا و يمشوا (ليونيل ميسي) .. ده لاعيب لوحده مرتبه كان بيبلع 5% من إجمالي ميزانية المرتبات فلما لاعيب زي ده يمشي فمش بس النادي حيوفر مرتبه ده كمان بيتقاله إنت تقدر تدخل 50% من مرتبه الشهري كأستثمار مباشر لحسابات النادي.
اللي إدارة النادي عايزة توصله إنها تفضل تنزل بمصاريف المرتبات لحد ما تلاقي إن الفلوس اللي هي حتصرفها هي هي الفلوس اللي الإتحاد الإسباني سامحلها بيها بناء علي لايحة سقف المرتبات .. لو ده حصل فقاعدة 1:4 حتتحول ل1:1 .. بمعني .. كل يورو توفره تقدر تستثمر قده .. ده السبب في إنك سامع دلوقتي إن الإدارة بتضغط علي (فرانكي دي يونج) إنه يمشي ولو ممشيش و قعد فلازم يعدل عقده عشان يخفض مرتبه .. ده السبب إن لاعيبه زي (كيسي) و (كريستينسين) جم ببلاش .. ده السبب إن تجديد عقد (عثمان ديمبيلي) شمل تخفيض مرتبه و مش بس هو عندك كمان (سيرجي روبيرتو) .. ده السبب اللي الإدارة وافقت علي إعارة (كليمينت لينجلي) لتوتنهام .. ده السبب في إنك بتسمع علي إن النادي بيضغط علي (جيرارد بيكيه) إنه لو ناوي يقعد لازم يقبل إنه ياخد مرتب أقل.
اللي إنت محتاج تبقي فاهمه إن لو برشلونة ملاقوش مخرج للمصيبة دي فكل اللاعيبة اللي هم جابوهم دول مش حيتسجلوا في القايمة طالما النادي مش محقق شروط قواعد اللعب النظيف أو زي ما الإتحاد الإسباني لكرة القدم بيسميها سقف المرتبات المسموح بيه لكل نادي .. صحيح هم جابوا (ليفوندوفسكي) بس ممكن لما الموسم يبدأ تلاقيه مبيلعبش.
المصادر:
- مقالة بعنوان Barcelona finances, explained: Can the club really sign players while chasing more stars this summer? نشرت في موقع ESPN و ده لينك المقالة الأصلية:
https://www.espn.co.uk/football/barcelona-espbarcelona/story/4697467/barcelona-financesexplained-can-the-club-really-sign-players-while-chasing-more-stars-this-summer
