غواصات دولفين .. إزاي ممكن إسرائيل تستخدم سلاحها النووي؟

لينك التسجيل الصوتي للمقالة علي ساوند كلاود:
https://on.soundcloud.com/9WVmh

إسرائيل عندها سلاح نووي .. ده السر اللي عارفه الناس كلها .. اللي إحنا مش عارفينه هو بالضبط إسرائيل عندها كام رأس نووي؟ و لإن في غياب المعلومة المؤكدة بيزيد الهبد فإنت عندك هبيده بتقول إن إسرائيل عندها ما بين 80 ل 300 رأس نووي .. مع إن لو فعلاً إسرائيل عندها 300 رأس نووي يبقي كده ترسانتها النووية كعدد أكتر من الترسانة النووية الصينية .. اللي إنت محتاج تفهمه إن الفكرة مش إن يبقي عندك قنبلة نووية .. ده الجزء السهل .. الجزء الصعب إنك تلاقي طريقة توصل بيها القنبلة النووية اللي عندك دي للهدف اللي إنت عايز تدمره .. بما إننا بنتكلم عن إسرائيل فخلينا نكمل معاها .. إسرائيل كانت بتعتمد بشكل شبه كلي علي إما الطيارات المقاتلة أو نوع من الصواريخ الباليستية هم اللي عاملينه إسمه صاروخ جيريكو Jericho و كلمة جيريكو دي اللي هي أريحا و دي مدينة فلسطينية بالمناسبة .. عندك مثلاً في حرب أكتوبر 1973 إتعرف إن كان فيه سرب من مقاتلات F-4 Phantom كل واحدة فيهم شايله قنبلة نووية و جاهزين إنهم يطلعوا علي القاهرة و دمشق و مستنيين أمر من رئيسة الوزراء وقتها (جولدا مائير Golda Meir) في حالة إن الجيشين المصري و السوري كانوا خلاص حيدخلوا الأراضي الإسرائيلية .. اللي هي فكرة هحد المعبد عليا و علي أعدائي.

الإسرائيليين بيترعبوا من فكرة إنهم يتضربوا بالصواريخ .. يمكن لإن في دماغهم هم بيتطمنوا أوي لما يتحصنوا ورا سور و محدش يقدر يوصلهم بس الصواريخ بعيدة المدي بتدمر الفكرة دي تماماً .. عشان كده أي دولة عربية تفكر إنها تطور من قدراتها بتاعة الصواريخ بعيدة المدي تلاقي الإسرائيليين مبقوش قاعدين علي بعضهم و لازم يدمروا أو يخربوا المشروع ده .. عملوا كده مع المشروع النووي السوري .. عملوا كده مع المشروع النووي العراقي .. كل ما إيران تحط منصات صواريخ في سوريا دلوقتي تسمع في الأخبار إن الطيران الإسرائيلي ضربها .. اللي حتكلم عنه النهاردة هو إزاي الظروف ساعدت الإسرائيليين إن يبقي عندهم طريقة تانية يضربوا بيها أي حد يفكر يدمرهم بالسلاح النووي اللي عندهم و الطريقة دي هي الغواصات.

أغلب الدول العظمي اللي عندها سلاح نووي سواء كنت بتتكلم عن أميركا أو روسيا أو حتي الصين بيعتمدوا بشكل كبير علي أسطول الغواصات النووية اللي عندهم .. الغواصات دي إسمها بالكامل Nuclear-Powered Ballistic Missile Submarines يعني غواصات شغالة بالطاقة النووية و ليها القدرة علي إنها تضرب صواريخ بتشيل رؤوس نووية .. الغواصات دي ممكن تفضل بالشهور قاعدة تحت المياه محدش عارف إنها موجودة و في لحظة تضرب صواريخها علي أي هدف .. و لإن الغواصات دي صعب أو يمكن مستحيل تتلقط و بالتالي إنت متقدرش تحمي نفسك قدام صواريخها فالغواصات النووية دي تعتبر أهم سلاح في الترسانة النووية لأي دولة عندها سلاح نووي .. المشكلة إن تكلفة إستخدام السلاح النووي عالية بشكل إنت لا تتخيله .. إنت لو عندك غواصة نووية واحدة أو حتي عندك صومعة إطلاق صاروخ عابر للقارات اللي هم Surface Launched Ballistic Missile أو SLBM فإنت حتكع فلوس لحد ما تتعمي بداية من تكلفة الإنشاء لتكلفة الصيانة لتكلفة التشغيل و المرتبات .. عشان كده الحظ خدم إسرائيل أوي في بناء أسطول الغواصات بتاعها.

في الستينات كانت إسرائيل بتصوت بس محدش كان سامعها إن فيه علماء ألمان كتير كانوا شغالين لحساب حكومات عربية في إنهم يطورولهم مشاريع طاقة نووية عسكرية و تكنولوجيا صواريخ بعيدة المدي .. الموضوع كبر لدرجة إن الموساد الإسرائيلي اللي هو المخابرات العامة بتاعتهم بدأوا ينفذوا عمليات إغتيالات ضد علماء ألمان شغالين في الحكاية دي .. فين و فين في حرب الخليج الثانيةسنة 1991 اللي إحنا عارفينها بإسم حرب تحرير الكويت بدأ العالم يفوق إن المشروع النووي العراقي و كمان مشروع الصواريخ بعيدة المدي اللي كان عامله (صدام حسين) الله يرحمه كان شغال عليه علماء و مهندسين ألمان .. بفكرك إن المشروع ده هو اللي خلي (صدام حسين) يضرب إسرائيل بصواريخ سكود Scud بعيدة المدي للي منكوا يفتكر .. المهم إن اللي كان ماسك ألمانيا وقتها كان رجل بيفهم أوي في الBusiness إسمه (هيلموت كول Helmut Kohl) .. اللي منكوا من مواليد الثمانينات ممكن يكون سمع إسم الرجل ده من مشروع كبير إتعمل في مصر كان إسمه مبارك-كول عشان يطوروا التعليم الفني الصناعي بس ما علينا مش دي قصتنا دلوقتي .. الأخ (هيلموت كول) كان عارف إن بعد ما فضيحة الألمان بقت بجلاجل و لإنه عارف إن الإسرائيليين حيفضلوا يعيطوا و يصوتوا و يقولوا للعالم شفتوا العلماء الألمان بيعملوا فينا إيه مش عاتقينا من أيام الهولوكوست .. فهو قال لنفسه ليه لا نسكت الإسرائيليين و في نفس الوقت نشغل شركات صناعة السفن الألمانية اللي يا عيني حالها بقي يصعب علي الكافر بسبب إن بعد ما الحرب الباردة خلصت و الإتحاد السوفيتي إنهار قررت ألمانيا ان مفيش داعي تصرف علي الميزانية العسكرية بتاعتها و لغت عقود كتير كانت ممضية مع الشركات دي .. الفكرة اللي كانت بتلعب في دماغ (هيلموت كول) كانت سهلة أوي.

دلوقتي من أول السبعينات كانت فيه شركة تصنيع سفن ألمانية إسمها HDW و الشركة دي كانت بتصنع نوع من الغواصات إسمه Type 209 و اللي معروفة أوي بإسم دولفين Dolphin-Class و الغواصات دي مكنتش نووية دي كانت شغالة بموتور ديزل و موتور كهربا .. الغواصة Dolphin-Class كانت الواحدة طولها 57 متر و بتشيل طاقم من 35 بحار و زود عليهم 10 أفراد قوات خاصة .. الغواصة الواحدة بيبقي فيها 6 فتحات عادية عشان تضرب منهم إما طوربيدات DM2A4 و دي طوربيدات قطر الواحد فيهم 533 مليمتر و بتتوجه بكابل من الألياف البصرية Fiber Optics أو إنك تضرب منها صواريخ هاربون Harpoon أو الحربة و دي صواريخ مضادة للسفن .. غير ال6 فتحات العاديين دول و اللي حتلاقيهم في أي غواصة حديثة حتلاقي إن غواصات Dolphin-Class فيها 4 فتحات زيادة قطر الواحدة فيهم 650 مليمتر و دي فتحات نادر أوي إنك تلاقيها في الغواصات الحديثة .. الفتحات دي إتعملت عشان يخرج منها الضفادع البشرية اللي حينفذوا أي مهمة خلف خطوط العدو .. الغواصات دي كان عليها الطلب و كان فيه لحد ما بعد حرب الخليج يعني بتتكلم في سنة 1993 حوالي 60 غواصة من النوع ده شغالين في القوات البحرية لدول مختلفة حول العالم .. اللي (هيلموت كول) عرضه علي الإسرائيليين إنه حيديهم غواصتين Dolphin-Class مجاناً و ألمانيا حتتحمل 50% من تكلفة الغواصة الثالثة بحيث إن الثلاث غواصات إسرائيل تستلمهم بداية من سنه 1994 و طبعاً الإسرائيليين قبلوا الهدية و خلال الفترة من 1999 لحد 2000 الغواصات الثلاثة دخلوا الخدمة في القوات البحرية الإسرائيلية و كانت أسماءهم INS Dolphin و INS Leviathan و INS Tekumah و دي كلمة عبري معناها البعث.

الإسرائيليين كانوا طايرين بالغواصات الثلاثة لسبب واحد و هو ال4 فتحات الكبار شوية اللي قلتلك قطر الواحدة فيهم 650 مليمتر .. الفتحات دي أساساً إتعملت زي ما إتفقنا عشان رجالة الضفادع البشرية يخرجوا منها لما الغواصة تبقي تحت المياه عشان ينفذوا مهماتهم .. غير كده الفتحات دي بشوية تعديلات بسيطة أوي ممكن تستخدمها لإطلاق صواريخ بعيدة المدي اللي بتتصنف بإسم صواريخ كروز Cruise Missiles .. لما صاروخ كروز من دول يتضرب من علي غواصة ساعتها بيتقال عليها Submarine-Launched Cruise Missile و إختصاراً بيتسمي SLCM .. صواريخ كروز دي بتبقي كبيرة بما يكفي إنها تشيل رأس نووي و عشان كده الإسرائيليين كانوا طايرين بيها .. دلوقتي إسرائيل كان عندها القنابل النووية و دلوقتي بقي عندها الغواصات .. كده فاضل الصواريخ و عشان يجيبوهم راحوا للأمريكان .. في التسعينات الإسرائيليين راحوا للأمريكان قالولهم عايزين صواريخ توماهوك Tomahawk و دي صواريخ SLCM بس الأمريكان رفضوا يدوها للإسرائيليين لإن القانون الأميريكي فيه حتة إسمها Missile Technology Control Regime يعني نظام التحكم في نشر تكنولوجيا الصواريخ بتقول إن مش مسموح لإميركا تصدر صواريخ مداها بيعدي 150 كيلومتر لأي دولة مهما كانت الدولة دي مين.

طبعاً الإسرائيليين إتقمصولهم شوية بس قرروا إن يعني هو إحنا ناقصين إيد ولا رجل طب ما نعمل إحنا صواريخ SLCM بتاعتنا .. الحقيقة الموضوع مخدش منهم وقت لإن سنة 2000 وكالة المخابرات المركزية الأميريكية CIA قالت إنها لقطت تجربة إطلاق صاروخ من طراز Popeye Turbo و ده صاروخ كروز سرعته أقل من سرعة الصوت بس بيطلق من علي متن غواصات و بيقدر يشيل رأس نووي قدرته التدميرية 200 كيلوطن و في التجربة الصاروخ أصاب هدف كان علي بعد 465 كيلومتر .. الCIA قالت إن التجربة دي إتعملت في المحيط الهندي و إن اللي عملها غالباً الإسرائيليين .. هل الكلام ده حقيقي؟ الله أعلم .. هل فعلاً إسرائيل عندها صواريخ SLCM بتطير لمسافات بتعدي 300 كيلومتر؟ برده الله أعلم .. أي معلومات دقيقة عن الصواريخ من النوع ده بتبقي سرية فمقدرش أقولك أي تفاصيل لإني ببساطة مش عايز اهبد .. بس اللي أنا أقدر أقوله ليك إن إسرائيل إتفقت مع ألمانيا إنها تستلم منها 3 غواصات إضافية بس من طراز Dolphin 2.

سنة 2012 الإسرائيليين و الألمان إتفقوا علي إن إسرائيل حتستلم 3 غواصات كمان و الألمان كانوا عارفين إن الإسرائيليين حيستخدموا الغواصات دي عشان يحطوا عليها صواريخ بتشيل رؤوس نووية بس يمكن اللي خلي المستشارة الألمانية (أنجيلا ميركل Angela Merkel) توافق علي الصفقة هو إنها خدت وعد من رئيس الوزراء الإسرائيلي (بنيامين نتنياهو Benjamin Netanyahu) بإنه حيسعي بجد عشان يمضي إتفاق سلام مع الفلسطينيين .. طبعاً الوعد ده كان فشنك و لما جريدة Der Spiegel الألمانية نشرت تفاصيل الصفقة الدنيا في ألمانيا هاجت علي (أنجيلا ميركل) بشكل إنت لا تتخيله بس إذا كانت الدنيا كانت صعبة عليها فالوضع في إسرائيل كان زي الزفت .. قيادة القوات البحرية الإسرائيلية كان رأيها إن إسرائيل مش محتاجه 3 غواصات إضافية بس الصفقة مشيت بالعافية و فيه تحقيق كبير بيتعمل دلوقتي في إسرائيل بسبب القضية دي بس ده ممنعش إن إسرائيل إستلمت غواصتين فعلاً سنة 2018 اللي هم INS Rahav و دي كلمة عبري معناها كوكب نبتون و INS Tanin و دي كلمة عبري معناها التمساح .. و خلال سنة 2019 إسرائيل حتستلم الغواصة الثالثة INS Dakar.

غواصات Dolphin 2 دي هي هي غواصات Type 212 اللي تعتبر النسخة الأحدث من Type 209 لإنها بتمشي بسرعة أكبر و كمان الألمان زودوا عليها حاجة إسمها Air-Independent Propulsion Technology أو AIP .. بص يا سيدي .. الغواصات نوعين يا إما غواصات نووية بتشتغل بمفاعل نووي و ساعتها الغواصة مش بتبقي محتاجة إطلاقاً إنها تطلع لسطح المياه إلا عشان تستلم رسالة لاسلكية .. أو غواصات بتشتغل بموتور ديزل و موتور كهربا بحيث موتور الكهربا بيشتغل لما الغواصة تبقي تحت المياه و الديزل بتشتغل يا إما لو الغواصة عايمة علي وش المياه أو بتعمل سنوركيل Snorkel يعني بتطلع انبوب فوق سطح المياه عشان تسحب هوا تشغل به موتور الديزل زي ما إنت بالضبط بتعمل سنوركيل في المياه لما بتسافر دهب أو شرم الشيخ .. الجديد في AIP إنه بيخلي الغواصة تمشي بموتور الكهرباء بتاعها بسرعات واطية أوي و ممكن تفضل أسابيع تحت المياه .. ده معناه إن مش بس الغواصات من النوع ده بيبقي صعب أوي إنك تلقطها إنما كمان بتبقي مثالية أوي إنها تعمل نباطشيات تحت المياه بصواريخها اللي بتشيل رؤوس نووية جاهزة إنها تطلع ضد أي هدف .. حالياً مفيش إلا الغواصات Dolphin 2 الألمانية و 32 Qing-Class الصينية هم بس اللي شغالين بالتكنولوجيا دي .. بس فيه مشكلة صغيرة أوي محتاجه نختم بيها كلامنا.

دلوقتي لو إسرائيل حبت تضرب طهران بصاروخ شايل رأس نووي فعشان ده يحصل لازم غواصة إسرائيلية في البحر المتوسط تضرب صاروخ و لنفترض يا سيدي إن الإسرائيليين مش كدابين و إن مدي الصاروخ بتاعهم 465 كيلومتر فعلاً فده معناه إن الصاروخ حيطير ساعة كاملة في الجو و حيعدي فوق إسرائيل و الأردن و سوريا و العراق عشان يوصل إيران و ده في حد ذاته حيدي الإيرانيين وقت كبير أوي إنهم يلقطوا الصاروخ و يوقعوه كمان .. ده معناه إن لازم الغواصة الإسرائيلية تبقي في حتة قريبة من إيران و ده حيدي للإسرائيليين 3 إختيارات:

• الإختيار الأول إن الغواصة الإسرائيلية تضرب صاروخها من البحر الأحمر بعد ما تعدي من قناه السويس و ده حل صعب لإن ساعتها حيبقي من حق إيران تضرب مصر.
• الإختيار الثاني إن الغواصة الإسرائيلية تلف من رأس الرجاء الصالح لحد ما توصل للبحر الأحمر و ده حل مش مناسب إطلاقاً لغواصة صغيرة زي Dolphin 2 لإن ده زي ما تقول لنفسك أنا حسافر من إسكندرية لأسوان بعربيتي بس عربيتك كيا بيكانتو.
• الإختيار الثالث هو إن الغواصة الإسرائيلية تطلع من ميناء إيلات علي خليج العقبة و ساعتها لازم إسرائيل تبقي منسقة مع مصر و الأردن و السعودية و لازم الدول الثلاثة توافق و إلا وسط اللخبطة ممكن أي دولة فيهم تفتكر إن إسرائيل بتضربها هي.

ده بيخليني أنا شخصياً أقول إن إسرائيل مش محتاجه يبقي عندها 6 غواصات لإنها مش حتعرف تستخدم ولا واحدة فيهم عشان تضرب إيران و يبقي الحل الأمثل في رأييي إن الصاروخ اللي شايل القنبلة يتحط علي طيارة مقاتلة .. غير كده إسرائيل بتتحط في موقف إنها حتبقي معتمدة علي غيرها.

المصدر:

مقالة بعنوان Israel may have as many as 300 nuclear weapons. And some are in the ocean. .. إسرائيل ممكن يكون عندها 300 رأس نووي بس فيه منهم في المحيط .. نشرت في مجلة The National Interest و ده لينك المقالة الأصلية:

https://nationalinterest.org/blog/buzz/israel-might-have-many-300-nuclear-weapons-and-some-are-ocean-27011