يوم 22 يونيو 2017 صحي الناس المهتمة بمجال القناصة علي مستوي العالم علي خبر جابلهم صدمة نفسية وهو إن فيه إتنين قناصة كنديين تبع وحدة إسمها Joint Task Force 2 ودي تبقي أعلي فئة في القوات الخاصة الكندية اللي هي حاجة كده زي الوحدة 777 أو 999 عندنا في الصاعقة المصرية .. المهم إن الإتنين قناصة دول قتلوا فرد من تنظيم داعش في العراق بطلقة ضربوها من علي مسافة 3,540 متر .. الرقم ده مش غلطة علي فكرة .. هم قتلوا فرد من داعش من علي بعد 3.5 كيلومتر .. الإتنين اللي هم واحد قناص والتاني إسمه Spotter أو مساعد القناص كانوا قاعدين فوق سطوح بيت والطلقة عشان تطلع من البندقية لحد ما وصلت للهدف إحتاجت تقريباً 10 ثواني .. إستخدموا طلقة عيار نص بوصة أو 0.5 Caliber وضربوها من بندقية قناصة إسمها McMillan TAC-50 .. سبب إني قلتلك إن اللي حصل ده جاب صدمة نفسية للناس اللي مهتمة أوي بموضوع القنص ده إن أخر رقم متسجل لأطول عملية قنص في التاريخ كان بإسم قناص بريطاني إسمه (كريج هاريسون Craig Harrison) قتل واحد من طالبان في أفغانستان سنة 2009 من مسافة 2475 متر .. الأسوأ من كده إن الWebsite بتاع الشركة اللي بتصنع بندقية القناصة McMillan TAC-50 بيقول إن أقصي مدي صحيح للبندقية هو 1800 متر بعدها إنت وشطارتك بقي يعني الإتنين قناصة الكنديين إستخدموا البندقية عشان يصطادوا هدف من علي بعد يعتبر ضعف المسافة اللي المُصنع اللي صنّع البندقية قالك عليها.
لحد دلوقتي الخبر خلص .. اللي حنحاول نشرحه في المقالة دي هو إزاي تبقي قناص بدون معلم؟ .. إحنا حنحاول نقولك هي الطلقة دي إتضربت إزاي بالورقة والقلم؟ .. الموضوع فيه رياضيات وفيزياء كتير فلو إنت من الناس اللي مش بتحب الرياضيات والحساب خد بعضك وإقفل المقالة من دلوقتي.
أطول 5 عمليات قنص في التاريخ وكمان مسار الطلقة اللي بنتكلم عنها ولاحظ إزاي الطلقة بدأت تقع جامد في أخر لحظاتها في الجو.
أولاً إنت عشان تبقي قناص كويس لازم تبقي شاطر أوي في الفيزياء وحساب المثلثات .. فيه كمية معلومات بيكون القناص عارفها ملهاش علاقة خالص بتدريبه العسكري ونسبة قليلة أوي هي اللي تقدر توصفها علي إنها معلومات لازم ضابط جيش يعلمهالك .. إنت مثلاً لو عايز تبقي قناص حتحتاج تعرف إن الطلقة عيار نص بوصة ممكن تطير لمسافة 7.5 كيلومتر .. بس إنت محتاج تكون فاهم إيه هي الحاجات اللي بتأثر علي الطلقة وهي طايرة في الجو ودي حد درس فيزياء ورياضيات وحساب مثلثلات هو اللي لازم يعلمهالك .. عندك الجاذبية .. عندك سرعة وإتجاه الريح .. عندك هو إنت إرتفاعك كام من علي سطح البحر؟ .. عندك هو إنت في مكان الضغط الجوي فيه كام؟ .. عندك الرطوبة .. عندك حاجة إسمها تأثير كوريليوس أو Coriolis Effect وده يمكن أهم عامل بيؤثر علي الطلقة وهي ماشيه في الجو .. إنت عشان تقول علي نفسك قناص بتعرف تصطاد أهداف من مسافات بعيدة لازم تكون عارف كويس أوي إزاي تحسب الحاجات دي كلها وتعرف هي بتؤثر إزاي علي مسار الطلقة؟ .. في الشرح حنركز كلامنا علي 4 عوامل كانوا هم أهم العوامل اللي أثرت علي عملية القنص اللي حنتكلم عنها:
- الجاذبية الأرضية.
- سرعه الريح.
- الضغط الجوي.
- تأثير كوريليوس أو Coriolis Effect.
عشان بس تفهم يعني إيه قناص يقتل حد من علي بعد 3.5 كيلومتر فده رسم بيوريك المسافة إزاي علي الخريطة.
خلينا نبدأ بيمكن أهم عامل اللي هو الجاذبية الأرضية:
حضرتك بمجرد ما بتضغط علي الزناد والطلقة بتطلع من البندقية فهي بتطلع شايلة شوية طاقة .. وهي ماشية الطاقة دي بتفضل تقل ولما الطاقة دي بتقل قدرة الطلقة إنها تقاوم تأثير الجاذبية الأرضية هي كمان بتقل .. كل ما الطلقة طارت مسافة أطول وكانت ماشية بسرعة أقل كل ما قدرة الجاذبية الأرضية إنها تشدها ليها حتزيد ودي ظاهرة بتتسمي Bullet Drop أو سقوط الطلقة .. الطلقة وهي ماشية بتبدأ تقع والكلام ده يمشي علي أي طلقة قناصة حتي الطلقة عيار نص بوصة 0.5 Caliber اللي بتضربها من بندقية قوية أوي زي McMillan TAC-50 .. كل ما المسافة اللي بتطيرها الطلقة أو الRange زاد كل ما الBullet Drop هو كمان بيزيد .. عشان كده وإنت في الجيش لو أخدت فرقه قناصة بيقولك نشن فوق الهدف بشوية صغيرين والعكس مع البنادق الألية عشان رد الفعل بتاع ضرب النار بيخلي البندقية تطلع لفوق بس ده ممكن نشرحه بعدين مش دلوقتي.
المشكلة إن الإتنين قناصة الكنديين لما جم يصطادوا الهدف بتاعهم هم جابوه من علي مسافة 3,540 متر وده معناه إن لو القناص ضرب طلقته أفقي يعني منشنش أعلي من الهدف زي ما أي مدرب ضرب نار بيعلمك وإنت لسه طالب في الكلية الحربية فالBullet Drop لحظة ما الطلقة جت في الهدف كان حيبقي 6,705 بوصة يعني حوالي 170 متر .. إهدي بقي وركز في الرقم اللي إنت لسه قاريه .. مسافة ال3.5 كيلومتر دي عشان أصطادك من عليها وأنا منشن بندقيتي أفقي يعني مش منشن فوق الهدف زي ما بيتقالي في مدرسة القناصة فلازم أكون واقف فوق ناطحة سحاب عشان الطلقة وهي ماشية بتقع فلما إن شاء الله الطلقة توصلك تيجي فيك لو أنا نشنت أفقي وركز أبوس إيدك في النقطة دي.
الجدول ده بيحسبلك الBullet Drop علي حسب المسافة اللي بتطيرها الطلقة .. الناتج النهائي بتاع الحسبة اللي عملها الإتنين قناصين دول هي إن الطلقة لحظة ما جت في الهدف كانت بتطير بسرعه 282 متر في الثانية ودي سرعة تعتبر أسرع من سرعة الطيارة المدنية الجامبو اللي هي بوينج Boeing 747 ودي سرعة أقل من سرعة الصوت والطلقة وهي ماشيه كانت بتقع 50 سنتيمتر كل ما تمشي 30 سنتيمتر .. تاني الناتج ده لحظة إصابة الطلقة للهدف مش وهي طايرة في الجو .. أنا عارف إن فيه ناس مخها قريب يسيح .. معني الحسبة دي إن لازم الإتنين قناصة يكونوا قاعدين فوق سطح مبني أو أي مكان تاني عالي .. بعد كده عن طريق العدسة بتاعه البندقية بتبدأ تعوض الBullet Drop بإنك تنشن البندقية لفوق الهدف .. بحسبة تانية برده .. الطلقة إحتاجت حوالي 7 ثواني عشان تطلع من البندقية لحد ما تصيب الهدف ولحظة ما جت في الهدف سرعتها كانت 282 متر في الثانية وده معناه إن الطلقة دي بعد ما طارت أكثر من 3.4 كيلومتر كانت القوة اللي ضربت بيها الهدف كانت زيها زي ما أكون واقف قدامك بأقل من متر وتضربني بطلقة من بندقية كلاشينكوف AK-47.
الطلقة المستحيلة .. الحظ لعب دور كبير عشان طلقة زي دي تحصل.
يجي بعد كده دور سرعة الريح:
لما بتيجي تصطاد هدف من علي مسافات بعيدة سرعة الريح بتكون عامل مهم أوي في حسبتك .. إنت ممكن ريح بسيطة خالص سرعتها متعديش 1.5 متر في الساعة يعني يدوبك نسمة هوا معدية تخليلك الطلقة بتاعتك تبعد عن مسارها .. عشان بس تكون برده مستوعب الأرقام .. لو أنا معايا بندقية قناصة وطلقة عيار نص بوصة 0.5 Caliber وبصطاد هدف علي بعد 400 متر فممكن ريح بسيطة زي ما قلتلك سرعتها متعديش 1.5 متر في الساعة تبعد الطلقة بتاعتي عن مسارها بمسافة تعدي 75 سنتيمتر .. لو أنا بقي بصطاد هدف من علي مسافه 3800 متر فريح زي دي ممكن تفسحلي الطلقة بتاعتي بعيد عن الهدف بمسافة 9 متر .. ده معناه إن الإتنين قناصة كانوا المفروض يعملوا حسابهم إن الريح حتخلي الطلقة تبعد أكتر عن الهدف بمسافة حوالي 9 متر فده كمان بيخش في الحسبة.
مواصفات الطلقة عيار نص بوصة والبندقية McMillan TAC-50 اللي أستخدمت.
لو حبيت نتكلم بسرعة عن دور الضغط الجوي:
الضغط الجوي هو دالة في إرتفاعك عن سطح البحر بس لو إنت قناص بتصطاد هدف علي بعد 500 متر أو أقل فإنت العوامل زي الضغط الجوي والرطوبة ودرجات الحرارة مش بتاخدها في حسابك وبتعملها Ignore .. الكلام ده مبيحصلش لما بتصطاد هدف علي بعد 3,540 متر .. القناص بيبقي معاه Wind Sensor ومقياس للضغط الجوي وبيكون معاه تقرير عن حالة الجو .. اللي بيعقد الدنيا هو إنت بتضرب الطلقة الساعة كام .. إنك لو بتضرب طلقة ساعة الفجرية فدي بتبقي حسبة ولو إنت بتضرب نفس الطلقة علي نفس الهدف في عز الظهر بتبقي حسبة تانية خالص.
قناصة و الSpotter بتاعها من الأكراد في مدينة الرقا السورية.
نيجي بقي لحاجة محتاجه تفتيح مخ اللي هو تأثير كوريليوس أو Coriolis Effect:
عشان مدخلكش في قصة كبيرة .. عامل كبير في حسبة القناصة بيعتمد علي دائرة العرض اللي إنت عندها والتأثير ده بيبان أوي كل ما الهدف بعد عنك .. لو إنت زي ما الإتنين قناصة الكنديين كانوا في العراق يعني في النص الشمالي من الكرة الأرضية فالطلقة بتاعتك لما بتطلع بتحدف يمين .. العكس لو إنت في جنوب أفريقيا مثلاً يعني في مكان جنوب خط الإستواء في النص الجنوبي من الكرة الأرضية ساعتها حتلاقي الطلقة بتاعتك بتحدف شمال .. مقدار الحدفان ده بيزيد كل ما إنت طلعت لفوق بإتجاه القطبين الشمالي والجنوبي .. أزيدك من الشعر بيت .. لو الهدف بتاعك ناحية الشرق مع إتجاه دوران الكرة الأرضية فإنت بتلاقي الطلقة بتحدف لفوق .. لو الهدف بتاعك ناحية الغرب فالطلقة بتحدف لتحت .. ده برده له جداول ومعادلات القناص بيحسبها قبل ما بيضرب طلقته.
الحسابات دي كلها بتبقي سهل أوي تتعمل عن طريق كومبيوتر مقذوفات Ballistic Computer اللي أي قناص بيقدر يستخدمه.
فيه عوامل تانية ملهاش علاقة بالبيئة قد ما ليها علاقة بالبندقية نفسها .. البندقية McMillan TAC-50 تعتبر من أنظف و أحسن بنادق القناصة في العالم و ميزتها إن الماسورة بتاعتها محفور فيها من جوه شكل حلزوني بيتسمي ششخان عشان الطلقة و هي طالعه تلف حول نفسها و ده بيخليها Stable أو مستقرة أكتر .. المشكلة إن لو التصنيع بتاع الشكل الحلزوني ده كان ناحية اليمين فلو الطلقة طارت أكتر من 1000 متر بتلاقيها بتحدف 2.5 متر ناحية اليمين .. الله أعلم البندقية اللي كانت مع الإتنين قناصة كانت إيه ظروفها بس ده كمان بيخش في الحسبة .. حاجة تانية بتتحط في إعتبار القناص هو تقييم MOA بتاع البندقية .. كلمة MOA دي إختصار Minute of Angle و دي عشان تفهمها صح تخيل إن فيه قمع أو شكل مخروطي راسه هي فوهة البندقية اللي بيطلع منها الطلقة و قاعدته الدائرية بتوسع كل ما الطلقة طارت لقدام .. معني إني أقولك إن البندقية الفلانية تقييم الMOA بتاعها واحد فده معناه إن لما أنا أضرب طلقة من البندقية دي و الطلقة تطير مسافة 100 ياردة (تقريباً 100 متر) فده معناه إنك لو رسمت دايرة نص قطرها نص بوصة (1.3 سنتيمتر) فالطلقة حتيجي في حتة ما في الدايرة دي .. لما أقول إن البندقية MOA بتاعها واحد فده برده معناه إن لما الطلقة تطير 1000 ياردة (تقريباً كيلومتر) فالدايرة اللي هي حتيجي فيها نص قطرها بيبقي 5 بوصة (12.7 سنتيمتر) .. أبعد من الكيلومتر الدايرة بتوسع أوي بتبقي نص قطرها 30 سنتيمتر و إنت طالع .. علي بعد 3 كيلومتر انت لو قناص حيبقي صعب عليك إنك تشوف الهدف أصلاً.
توضيح لمعني كلمة MOA أو Minute of Angle.
في الأخر عايز أقولك إن الإتنين قناصة الكنديين دول عملوا حاجة مش كتير في العالم بيعرفوا يعملوها .. الإتنين حسبوا حسبة فيها كمية متغيرات لو كانوا غلطوا في رقم واحد كانت الطلقة باظت .. دور الSpotter إنه هو اللي بيحسب الحسبة و هو اللي بيقول للقناص ينشن فين و إزاي و إيه هي المسافة اللي ينشن فيها بعيد عن الهدف و هو باصص في المنظار عشان يعوض تاثير العوامل الكتير اللي إتكلمنا عنها.
المصادر:
- مقالة بعنوان The world’s longest sniper kill: The enemy shod dead at 3,871 yards (Over 2 miles away) يعني أطول عملية قنص في التاريخ: العدو إتقتل من علي بعد 3,871 ياردة يعني من علي بعد حوالي 3 كيلومتر .. نشرت في مجلة The National Interest و ده لينك المقالة الأصلية:
https://nationalinterest.org/blog/the-buzz/the-worlds-longest-sniper-kill-the-enemy-shot-dead-3871-2414 - مقالة بعنوان A Canadian sniper breaks the record for the longest confirmed kill shot-but how? .. قناص كندي بيكسر الرقم القياسي لأطول عملية قنص مسلجة بس إزاي؟ .. نشرت علي موقع هيئة الإذاعة البريطانية BBC و ده لينك المقالة الأصلية:
http://www.bbc.co.uk/newsbeat/article/40381047/a-canadian-sniper-breaks-the-record-for-the-longest-confirmed-kill-shot—but-how
برنس انا قريت وفهمت كل حاجة
يا محترم أنت شكلك كنت قناص سابق او قناص متقاعد علشان تشرح القصة دي بالشكل ده. تحياتي لك
وجديدة الصراحه