الأباتشي .. التصميم المثالي اللي إتبني علي عك الماضي.

موضوعنا اللي حنتكلم عنه النهاردة هو أشهر طيارة هليكوبتر في السوق حالياً .. في مصر حتلاقي ناس عارفه الإسم عشان ده إسم الدلع اللي طلع علي (شيكابالا) بس بره إسم أباتشي بقي علامة مسجلة .. مش لإنه إسم قبيلة من قبائل السكان الأصليين لأميركا الشمالية قد ما عشان هو إسم أجحد طيارة هليكوبتر و يمكن أغلاها كمان لإن سعر الطيارة الواحدة بيعدي 10 مليون دولار فهي مش رخيصة .. إسمها بالكامل AH-64 Apache من تصنيع شركة هيوز Hughes و هي طيارة إتصممت و إتصنعت عشان تعمل حاجة واحدة بس .. تصطاد دبابات .. النهاردة حنحاول سوا نجاوب علي سؤالين بس حيخلوك فاهم كويس هي الأباتشي دي بتعمل إيه بالضبط:

هو ليه أصلاً الأمريكان فكروا يعملوا طيارة هليكوبتر هجومية زي الأباتشي؟
إيه المميز في الأباتشي مخليها في حتة تانية عن باقي الطيارات الهليكوبتر؟

نيجي للسؤال الأولاني .. ليه الطيارة دي إتعلت؟

كان يا مكان في الستينات و السبعينات أميركا خزوقت نفسها في حرب ملهاش أي ستين لازمة إسمها حرب فيتنام .. في الحرب دي أميركا كانت معتمدة بشكل كبير علي موديل طيارات هليكوبتر إسمه هيوي Huey و دي حضرتك طيارة هليكوبتر أصلاً إتصممت للحياة المدنية يعني لما جم يعملوها محدش كان في دماغه إن الطيارة دي تروح تشارك في حرب فلما إتبعتت حرب فيتنام كل اللي الأمريكان عملوه إنهم دهنوها لون زيتي و حطولها مدفع رشاش متعدد جنب الباب و شكراً علي كده .. لا كان فيها دروع واقية تحمي الطيارين ولا فيها أسلحة هجومية تخليها تدافع عن نفسها و ده خلي طيارات الهيوي دي البطاية العايمة علي وش المياه .. أي مدفع مضاد للطيارات أو حتي قناص فاهم شوية ممكن يوقعها .. ده مش معناه إن الطيارة نفسها كانت علي الله حكايتها لإنها قامت بالواجب و زيادة في الحرب بس هي الفكرة إن لما يبقي عندك موديل طيارات هليكوبتر يقع منه 5,000 في حرب يبقي إنت كده عندك مشكلة كبيرة محتاجة تتحل.

الطيارة الهليكوبتر UH-1 Iroquois اللي إسمها كان مستفز أوي فالعساكر الأمريكان طلعوا عليها إسم هيوي Huey من تصنيع شركة بيل Bell.

بعد حرب فيتنام ما خلصت الأخوة بتوع حلف شمال الأطلنطي NATO قعدوا مع بعض و حسبوا حسبة بسيطة أوي .. دلوقتي لو فرضنا إننا عملنا طيارة هليكوبتر زي الهيوي بس بتقدر تدافع عن نفسها و يتحط عليها صواريخ عشان تدمر أهداف أرضية .. إحنا لسه مصممناش الطيارة دي ولا نعرف شكلها حيبقي إيه بس تعالي نفترض إننا عملناها و اللي إحنا محتاجينه إن الطيارة دي لما تتعمل إن شاء الله يعني يتحط عليها 16 صاروخ قادر إنه يدمر 16 دبابة أو منصة صواريخ أو بطارية دفاع جوي اللي هو بإختصار الطيارة الواحدة تقدر تدمرلها 16 هدف أرضي .. جميل .. تعالي إنت صنع من الطيارة دي 600 نسخة و دخلهم الخدمة في القوات الجوية حيبقي نظرياً عندك طريقة تدمر بيها 10,000 هدف أرضي للعدو .. يا بلاش .. من الحسبة البسيطة دي بدأ المهندسين يشتغلوا علي تصميم الأباتشي.

مبدأيا التصميم بتاع الطيارة الهيوي و اللي فيه الطيار و المساعد بتاعه بيقعدوا في كابينة واحدة هم الإتنين علي كرسيين بيتركبوا جنب بعض حيترمي في الزبالة .. ده بيخلي عرض الطيارة كبير و بالتالي حجمها بيكبر و بيبقي سهل علي العدو إنه يوقعها .. إحنا حنخلي الطيار و المساعد بتاعه يقعدوا ورا بعض و كل واحد فيهم في كابينة منفصلة و كل كابينة محمية بطبقات من الصلب بحيث أكن الطيار قاعد في بانيو مصفح بحيث لو حصل و الطيارة إتضربت و واحد من الطيار أو المساعد بتاعه مات فالتاني يبقي عنده فرصة إنه يفضل عايش .. حط للطيارة موتورين تربيني بحيث لو واحد عطل التاني يشتغل و قبل مدخل الهواء للموتور ركبلها شوية فلاتر عشان الرملة متدخلش للموتور تبوظه و ده علي فكرة الدرس اللي الأمريكان إتعلموه من عملية تحرير الرهاين الفاشلة في إيران .. حط كل ده جنب بعضه بقي عندك طيارة هليكوبتر هجومية شبه العربية التويوتا كورولا كده مبتعطلش بسم الله ما شاء الله.

نقطة تانية تتحط في إعتبارك إن في الوقت اللي الأباتشي فيه كانت بتتصمم كان السوفييت فرحانين بنفسهم أوي وهم بيوروا العالم إيه اللي ممكن الطيارة الهليكوبتر بتاعتهم Mi-24 Hind بتعمله خلال الغزو السوفيتي لأفغانستان .. الأباتشي إتعملت يمكن كنسخة معدلة من Hi-24 Hind .. زيها زي Mi-24 Hind كابينة القيادة بتشيل الطيار و المساعد بتاعه و الإتنين بيقعدوا ورا بعض .. زيها زي Mi-24 Hind تسليحها الأساسي هو الصواريخ الموجهة بالليزر .. بس يمكن الفرق اللي خلي الأباتشي تتفوق هو قدرتها العالية علي المناورة .. لو إنت طيار حاولت تخمس بالHi-24 Hind في الجو فبنسبة كبيرة الطيارة مش حتستحمل و حتقع منك.

نيجي للسؤال الثاني .. إزاي هي مختلفة عن غيرها؟

مبدأياً دي طيارة بتقدر تشيل 16 صاروخ طراز هيل فاير Hellfire موجه بالليزر زود عليهم مدفع رشاش عيار 30 مليمتر بيتحط في مقدمة الطيارة بيديها القدرة إنها تضرب 600 طلقة في الدقيقة .. دي طيارة بتقدر تطير لقدام بسرعة بتوصل 320 كيلومتر في الساعة و لو طرت بيها يمين أو شمال أو لورا ففي الحالة دي أقصي سرعة ليها 96 كيلومتر في الساعة .. فعلياً هي عربية فيراري بتطير .. بس الميكانيكا دي تبقي الجزء السهل في الموضوع .. إنك تعمل طيارة بتطير بسرعة و بتشيل صواريخ كتير فكل ده حلو مفيش كلام بس اللي بيفرق طيارة عن التانية هو المخ مش العضلات .. المخ بتاع الأباتشي بيتكون من 3 حاجات بيشتغلوا مع بعض يعتبروا من إبداعات الهندسة في العصر الحديث:

نظام الملاحة و التوجيه اللي بيشتغل خلال ساعات الليل و إسمه TADS/PNVS و اللي عملته شركة مارتن مارييتا Martin Marietta.
شاشة توجيه الصواريخ اللي بتتركب علي خوذة الطيار قدام عنيه و بتشتغل سواء الصبح أو بليل من تصنيع شركة هانيويل Honeywell.
الأنتينا اللي بتتركب علي جسم الطيارة و بتستخدم للتتبع و عشان تعرف هي فين و أعداءها فين و الأنتينا دي من تصنيع شركة ماكدونيل دوجلاس McDonnell Douglas و معاها شركة بيل Bell.

التلات حاجات دول مع بعض بيخلوا طيار الأباتشي يشوف بليل .. يشوف الأهداف حتي المستخبية عن عنيه .. بيقدر لو طار علي إرتفاع نخلة مثلاً فوق سطح الأرض إنه يعمل مسح جوي كامل للأرض حوليه سواء بليل أو حتي لو الجو فيه عاصفة رملية أو رعدية .. يمكن عشان الثلاث مكونات دول هم فعلاً نقطة تفوق الأباتشي فيمكن محتاجين نتكلم عنهم بشوية تفصيل:

الصورة دي بتوريك إزاي طيارة هليكوبتر هجومية زي الأباتشي تقدر تضرب أهداف و لتكن مثلاً طابور دبابات هي مش شايفاه لإنها زي ما إنت شايف مستخبية ورا تل .. اللي بيحصل إن الأباتشي بتكون شايلة صواريخ هيل فاير Hellfire و دي صواريخ بتتوجه بالرادار .. بيكون عندك يا إما طيارة هليكوبتر تانية أو وحدة قتالية علي الأرض معاها جهاز بيطلع شعاع ليزر جامد شوية بيسموه Designator .. لما الطيارة الأباتشي بتطلق صواريخ Hellfire بتاعتها فالصاروخ بيجري ورا النقطة اللي شعاع الليزر بيشاور عليها عشان يدمرها خصوصا إن مدي طيران الصاروخ الواحد بيوصل 6850 متر .. بمعني أخر .. الطيارة الأباتشي بتضرب هدف الطيار بتاعها حرفياً مش شايفه بعنيه.

نظام الملاحة و التوجيه TADS/PNVS .. لو بصيت علي مقدمة أو بوز الطيارة الأباتشي حتلاقي كورتين صغيرين .. هم دول يبقوا TADS/PNVS .. الكورتين دول بيتقال عليهم Optical Scanners بيتعملوا من الزجاج و خلينا نبسط الأمور و نتخيل سوا إنهم كاميرتين .. الكاميرتين دول بيلفوا 360 درجة بحيث هم الإتنين مع بعض يرسموا صورة بانوراما للي هو إيه اللي بيحصل حول الطيارة .. واحدة من الكورتين أو الكاميرتين زي ما قلت بتتسمي TADS و دي إختصار Target Acquisition Designation Sight .. دي الكاميرا اللي بتصطاد الأهداف المعادية بحيث كل اللي حضرتك محتاج تعمله كطيار إنك تنشن شعاع الليزر اللي بيطلع من الكاميرا بتاعة TADS علي الهدف و تتك علي زرار إطلاق صاروخ Hellfire اللي بشكل أوتوماتيكي حيجري ورا النقطة اللي شعاع الليزر نشن عليها .. شفت سهلة إزاي .. الكاميرا التانية اللي إسمها PNVS ودي إختصار Pilot Night Vision Sensor و دي عبارة عن كاميرا بتشتغل بالأشعة تحت الحمرا عشان تدي للطيار رؤية واضحة للدنيا حوليه سواء بليل أو لو الجو وحش أو لو فيه شبورة جامدة شوية .. دي فكرتها إن الطيار يشوف هو رايح فين لو عنيه مش شايفه حاجة و كمان تديله معلومة لو فيه بني أدمين أو أي حاجة بتشع حرارة حولين الطيارة.

شاشة خوذة الطيارة .. إسمها بالكامل IHADSS ودي إختصار Integrated Helmet and Display Sighting System .. الخوذة دي بالضبط عاملة زي الفرق بين إنك تسوق عربية مانيول و إنك تسوق أوتوماتيك .. لما بتلبس الخوذة و تحط قدامك الشاشة اللي من تصنيع شركة Honeywell حضرتك كطيار مش مطلوب منك غير إنك تبص علي الهدف اللي إنت عايز تدمرة و تتك علي زرار المدفع الرشاش .. حسب ما تحرك راسك المدفع الرشاش اللي في مقدمة الطيارة حيتحرك معاك .. إزاي ده بيحصل؟ .. الخوذة فيها عدسة شبه عدسة النظارات الطبية بتتحط قدام العين اليمين للطيار بحيث العدسة أو Optical Scanner دي بتقرأ حضرتك بتبص فين و بتنقل حركة راسك عن طريق شوية أسلاك للكاميرا بتاعة TADS اللي بفكرك بتشتغل صبح و ليل بحيث لو صبح بتبقي الكاميرا العادية ولو ليل بتبقي الحساس اللي بيشتغل بالأشعة تحت الحمرا .. المدفع الرشاش عشان متركب تحت الكاميرا TADS بالضبط فعن طريق موتور كهرباء من اللي بتشتريهم من العتبة بيتحرك علي حسب ما نظرة عينك تروح .. مش دي الميزة الوحيدة للشاشة لإن زي الInterface بتاع الموبايل بتاعك بيتحط عليه شوية داتا من ضمنها التاريخ و الساعة و المكالمات و الNotifications فبرده شاشة الخوذة بتاعة الطيار بيتحط عليها المعلومات الأساسية اللي مش بتخلي الطيار كل شوية محتاج يبص تحت للعدادات و الشاشات الكتير اللي في التابلوه قدامه.

الأنتينا المتعلقة علي جسم الطيارة .. مبدأياً دي البتاعة اللي شبه الطاجن اللي بتتركب فوق المروحة الرئيسية للطيارة .. البتاعة دي صممتها شركتي Bell و McDonnell Douglas مخصوص عشان خاطر الأباتشي بس بعد كده بقت بتتركب علي طيارات تانية و هي الحقيقة بتقوم بنفس الدور تقريباً اللي بتعمله TADS/PNVS يمكن بإستثناء حاجة واحدة وهي المكان بتاع التركيب .. بمعني .. عشان الكاميرتين بتوع TADS/PNVS يشتغلوا كويس لازم الطيارة الأباتشي تكون باصة ناحية الهدف اللي هي عايزة تشوفه .. في حالة الأنتينا العلوية اللي فوق المروحة مش لازم .. إنت ممكن الطيارة تكون طايرة ورا جبل و فعلياً الطيار مش شايف الهدف بعنيه بس الأنتينا شايفاه.

الكورتين اللي قدام خالص في مقدمة الطيارة يبقوا نظام TADS/PNVS في حين إن الطاجن اللي متركب فوق المروحة الرئيسية ده يبقي الإنتينا اللي بتعمل نفس الوظيفة بتاعة TADS/PNVS بس بيخلي الطيار مش لازم يكون باصص للهدف اللي هو عايز يدمره.

الصورة دي بتوريك كذا حاجة الحقيقة .. علي إيدك الشمال إنت شايف نفس اللي بيبقي معروض قدام عين الطيار اللي هو مش حتفرق إنت بتطير صبح ولا بليل لإن الصورة اللي بتبقي قدامك بتبقي واضحة جداً .. الخوذة اللي الطيار بيلبسها بيبقي فيها عدسه بتتركب قدام عينه اليمين و العدسة دي بتلقط هو الطيار باصص فين و بشكل أوتوماتيكي بتوجه المدفع الرشاش عيار 30 مليمتر اللي بيكون متركب في جسم الطيارة من تحت.

أنا بس حابب أختم إن السلاح عموماً ميفرقش كتير عن أي سلعة إنت بتشتريها بحيث لو شركة ما عملت سلعة حلوة أوي بتلاقي شركات كتير بتقلدها .. الأباتشي لما نزلت السوق فيه ناس كتير حاولت تقلدها منهم أمريكان و غير أمريكان .. شركة سيكورسكي Sikorsky الأميريكية عملت الطيارة UH-60A Black Hawk و اللي صحيح هي طيارة إتصممت عشان تنقل عساكر مش تبقي طيارة هجومية بس تصميمها الخارجي إعتمد علي نفس المبدأ بتاع الأباتشي عشان يديها سرعة و قدرة علي المناورة و كمان بتشيل صواريخ Hellfire الموجهة بالليزر زي الأباتشي .. حالياً قيادة القوات البرية الأميريكية تحت إيدها 1,100 طيارة Black Hawk و 675 طيارة أباتشي .. شركة Hughes عملت الطيارة 530MG Defender .. شركة ٍسيكورسكي عملت الطيارة H-76 متعددة المهام .. شركة Bell عملت الطيارة AH-1 Huey Cobra و كلها طيارات أمريكاني بشكل أو بأخر إتبنت علي نفس التصميم بتاع الأباتشي.

الصورة دي توريك إزاي تصميم الأباتشي لعب في دماغ شركات تصنيع الطيارات .. دي المفروض تبقي طيارة Black Hawk من تصنيع شركة سيكورسكي Sikorsky و المفروض إن الطيارة دي إتصممت عشان تنقل عساكر .. إعتبرها مكروباص بس بيطير .. تقوم شركة سيكورسكي عاملة الإفتكاسة اللي عندك في الصورة دي عشان تخلي الطيارة تشيل 16 صاروخ هيل فاير Hellfire اللي بيصطاد الدبابات.

الفرنساويين عندهم الطيارتين Aerospatiale Gazelle و Dauphin و الإتنين طيارات هليكوبتر هجومية علي أعلي مستوي .. الإنجليز عندهم Westland Lynx-3 اللي متركبلها نظام TADS/PNVS اللي موجود في الأباتشي .. الألمان عندهم PAH-2 من تصنيع شركة ميسرشميت-بولكوف-بلوم Messerschmitt-Bolkow-Blohm و اللي مش بس متركبلها نظام TADS/PNVS و صواريخ جو-أرض موجهة بالليزر دي كمان فيها نفس المدفع الرشاش عيار 30 مليمتر اللي متركب في الأباتشي .. الطليان عندهم A-129 Mangusta من تصنيع شركة أجوستا Agusta .. يمكن للعين اللي مش مدربة هي ممكن تتلخبط بين كم الطيارات دي كلها لإن زي ما قلت كلهم إتبنوا علي نفس التصميم بتاع الأباتشي و اللي مهم أوي إنك تبقي مستوعب إنه إتبني هو كمان علي إمكانيات و أخطاء الطيارة Mi-24 Hind و ده يخلينا قدام أهم درس النهاردة .. مش عيب تقلد .. بس بلاش تنقش .. إتعلم تشوف غيرك عمل إيه و تسأل نفسك هو إيه اللي في شوية اللوح اللي قدامي دول غلط و إزاي أصلحه؟

المصدر:

مقالة بعنوان PM Meets the AH-64 Apache: The Helo That Fights Back نشرت في مجلة Popular Mechanics و ده لينك المقالة الأصلية:
https://www.popularmechanics.com/military/aviation/a35699529/ah-64-apache-history/