لينك التسجيل الصوتي علي ساوند كلاود:
https://on.soundcloud.com/6IoDguna8Z4G3560H7
في نوفمبر 2019 اتعمل مؤتمر دبي للطيران Dubai Airshow وده مؤتمر عامل زي العتبة لو انت قاهري أو سوق الجمعة لو انت اسكندراني بس للطيارات سواء المقاتلة أو المدنية .. الناس اللي حضرت المؤتمر ده اتصدمت لما شافت ايه اللي شركة تشينجدو Chengdu Aircraft Industry Group الصينية بتعرضه .. الناس بصت لقت إن الصين بتعرض طيارة مقاتلة اسمها J-10CE للي عايز يشتريها .. مبدأياً عادي الصين صنعت حاجة و الحاجة دي طيارة مقاتلة و عايزه تشوفلها مشتري .. اللي مش عادي إنك لما تبص علي الطيارة دي حتلاقيها نسخة طبق الأصل زي ما تكون صورة بالكربون من الطيارة الأمريكية الأسطورية F-16 Fighting Falcon واللي اتكلمت عنها في مقالة قبل كده .. يمكن أهم سؤال اتسأل للاخوة الصينيين اللي بيعرضوا الطيارة بتاعتهم لا معلش ثانية واحدة .. دلوقتي انت بتقولي إن امكانيات J-10CE ودي النسخة اللي بتتصدر من الطيارة Chengdu J-10C Vigorous Dragon أو J-10C اختصاراً تعتبر هي هي امكانيات F-16 بس ازاي؟ .. الطيارة F-16 نزلت السوق في الثمانينات و بتتباع بقالها أكتر من 45 سنة و بتخدم في القوات الجوية لاكثر من 24 دولة علي مستوي العالم و انت دلوقتي جاي تقولي إنك في سنة 2019 عملت طيارة بنفس امكانيات طيارة تانية اتصنعت في الثمانينات؟ .. اللي انا جاي اكلمك عنه في المقالة دي هو اننا نحاول نجاوب سوا علي كذا سؤال:
- ايه الفرق بين الطياره J-10C اللي هي أحدث نسخة تنزل من الطيارة J-10 و بين الطيارة F-16؟
- ازاي الصين خدت تصميمات F-16 عشان تعمل زيها و تعملنا الطيارة J-10؟
- ليه الصين نفسها تبيع طيارة J-10CE واشمعني الطيارة دي بالذات؟
خلينا نبدا مع بعض نجاوب علي السؤال الأول .. هو أنا لو قدامي J-10C و قدامي F-16 فايه الفرق بينهم؟
شكلاً مفيش فرق .. سواء F-16 أو J-10 فشاسيه الطيارتين بيتقال عليه Aerodynamically Unstable .. ده معناه إنك لو جبت الشاسيه ده حطيته زي ما هو كده في Wind Tunnel فالقرايات اللي انت حتاخدها حتخليك تبصم بالعشرة إن التصميم ده زي ما هو كده مينفعش تستخدمه .. الشاسيه متصمم بحيث يخلي الطياره تقع .. الفكرة إن الطيار وهو بيطير بيبقي معاه برنامج كومبيوتر بيساعده اسمه Fly-By-Wire عامل بالضبط زي الPower Steering في دريسكيون العربية بحيث إن البرنامج ده بيشوف انت عايز تعمل ايه وبيحرك هو Flaps أو حتت متحركة في شاسيه الطيارة بيسموها Canard ودي الأجنحة الصغيرة اللي قدام خالص في مقدمة الطيارة عشان يخليها تطير و متقعش وفي نفس الوقت تعمل مناورات جوية شبه مستحيل انها تتعمل بأي طيارة تانية .. إنك تعمل حاجة زي Fly-By-Wire فدي حاجة صعبة فشخ و بتحتاج تجارب كتير ويمكن عشان كده خلال فتره التجارب بتاعة J-10 من 2014 لحد 2018 وقعت 8 طيارات من ضمنها طيارة طارت بيها أول طيارة مقاتلة ست صينية واللي أدت لوفاتها.. ده شكلاً .. حتي كوزن الاتنين قريبين جداً من بعض .. إذا كانت الطيارة F-16 وهي فاضية من غير أي تسليح وزنها 9,208 كيلوجرام و أقصي وزن ليها تقدر تطير بيها وهي شايلة تسليحها كامل 21,772 كيلوجرام فالطيارة J-10 وزنها فاضية 8,850 كيلوجرام و أقصي وزن ليها 19,277 كيلوجرام .. إذا كانت F-16 دخلت الخدمة في القوات الجوية الأمريكية في الثمانينات فالطيارة J-10 دخلت الخدمة في القوات الجوية الصينية سنة 2006 ولحد دلوقتي اتصنع منها 350 طيارة وده رقم محترم جداً علي فكرة .. العدد ده اكتر من إجمالي طيارات رافال Rafale اللي صنعتها شركة داسولت Dassault الفرنسية واكتر من اجمالي عدد طيارت Gripen السويدية اللي اتصنعت .. يا مؤمن ده أكتر من عدد مقاتلات F-35 اللي شركة لوكهيد مارتن Lockheed Martin صنعتها لحد دلوقتي.
زي ما طيارة F-16 مرت بمراحل تطور كتير يعني مثلاً أول موديل ينزل منها اللي هو F-16A يعتبر بدائي أوي و قديم لو قارنته بامكانيات الموديل اللي بيتصنع حالياً F-16V فبرده الطيارة J-10 مرت بمراحل كتير بداية من J-10A و J-10B وحالياً J-10C .. صدقني لو قلتلك إن امكانيات J-10C تعتبر هي هي امكانيات أي طيارة جيل أربعة ونص في الخدمة دلوقتي في أي حتة في العالم زي Rafale الفرنسية مثلاً .. عارف إن فيه ناس استغربت كلمة طيارات جيل أربعة و نص دي .. بص يا سيد الناس .. فيه حاجة اسمها طيارات الجيل الرابع زي F-16 و F-15 وفيه حاجة اسمها طيارات الجيل الخامس زي F-35 و F-22 ودي الطيارات اللي ليها القدرة علي التخفي من الرادار .. طيارات جيل أربعة و نص هي بتبقي طيارات جيل رابع عادية جدا بس محطوط ليها نفس أنظمة التوجيه و الملاحة الجوية و يمكن تسليح طيارات الجيل الخامس .. طيارات جيل أربعة و نص كامكانيات هي هي طيارات الجيل الخامس باستثناء نقطة التخفي من الرادارات .. المهم خليني أكلمك شويه عن امكانيات J-10C عشان تفهم انت بتتكلم عن ايه:
- ختم النسر بتاع أي طيارة جيل أربعة ونص اللي من غيره مينفعش تقول علي الطيارة إنها طيارة محترمة هو نوع رادارات اسمه AESA ودي اختصار Active Electronically Scanned Array Radar .. الصينيين سبقوا الروس بحبة حلوين في مجال رادارات AESA ودي رادارات بتدي للطيار Resolution أعلي و الأهم إنها بتقدر تقاوم أنظمة التشويش علي الرادارات اللي ممكن منصات الدفاع الجوي تكون بتستخدمها.
- عشان الصينيين يصعبوا علي منصات الدفاع الجوي إنها تلقط الطيارة J-10 بالرادارات بتاعتهم فهم خلوا الطيارة تتطلي من بره بطبقة من مادة Composite ليها معامل انعكاس قليل اوي .. كمان فتحت دخول الهواء للمحرك اتعدل تصميمها بحيث لما الطيارة تطير بسرعات أعلي من سرعة الصوت فحركة الهواء وهو داخل للمحرك متولدش كمية حرارة كافية إن الرادارات تلقطها .. محدش قال إن الطيارة J-10 ليها القدرة علي إنها تختفي من الرادارات .. لا خالص .. انا بس بقول إن التعديلات دي في التصميم خلت إنك عشان تلقطها بقي الموضوع أصعب و محتاج رادارات قوية حبتين.
- مش سر إن فيه طيارات J-10 اتصورت وهي شايلة صواريخ PL-15 ودي صواريخ جو- جو بس موجهة بالرادار خرجت من تحت ايد المعهد 607 وده الاسم الصيني للكيان اللي انت تقدر تسميه الهيئة الهندسية بتاعتهم .. الصاروخ ده بيتحط تحت بند BVRAAM ودي اختصار Beyond Visual Range Air-to-Air Missile يعني صواريخ عشان انا كطيار اضربها مش لازم اكون شايف بعنيا الطيارة اللي قدامي و كفاية اوي إن الرادار اللي علي الطيارة بتاعتي يلقطها وهو مع نفسه حينشن الصاروخ و يوجهه .. أول مرة الصين تجرب الصاروخ ده كان في سبتمبر 2015 وأقصي سرعة له ماخ 4 و بيقدر يطير مسافة 300 كيلومتر و عشان احطك في الصورة بس فالصاروخ الأقدم منه علي طول PL-12 كان أخره يطير 100 كيلومتر فاظن الفرق واضح .. المشكلة إن مدي صواريخ PL-15 دي أعلي شوية من مدي صواريخ AIM-120D الأمريكية .. اتقال كمان إن طيارات J-10 بتقدر تشيل صواريخ جو-أرض بعيدة المدي مضادة للإشاعات النووية بحيث إن لو انا طيار مقاتل أقدر اضرب بيها منصات الدفاع الجوي المعادية.
النقطة اللي ناس كتير خدت بالها منها لما شافت الData Sheet بتاع الطيارة J-10CE اللي عرضتها الصين في مؤتمر دبي للطيران هو إن كلنا كنا عارفين إن أقصي سرعة للطيارة J-10A بتوصل ماخ 2.2 ودي كانت أعلي من أقصي سرعة بتقدر تطير بيها طيارة F-16 بحوالي 10% .. المشكلة إن التطوير اللي حصل لأنظمة الملاحة الجوية أو Avionics في الموديلات الأحدث من J-10 زودت من وزن الطيارة و بالتالي قللت من أقصي سرعة بتطير بيها .. طيارة J-10CE مثلاً الData Sheet بتاعها بيقول إن أقصي سرعة ليها ماخ 1.8.
أظن جه الوقت نشرحلك هو ازاي الصين خدت تصميمات F-16 عشان تبني بيها الطيارة J-10 و اللي الحقيقة السبب في ده هو إسرائيل:
بسبب نكسة يونيو 1967 قررت دول أوروبا إنها تفرض حظر تصدير للأسلحة لإسرائيل .. المفروض إن إسرائيل وقتها كانت بتخطط إنها تشتري عدد كبير من طيارات ميراج خمسة Mirage V من تصنيع شركة داسولت Dassault بس طبعاً الصفقة باظت .. وقتها الموساد الإسرائيلي اللي هو المخابرات العامة بتاعتهم قدروا يسرقوا تصميمات الطيارة Mirage V و التصميمات دي الإسرائليين خدوها و استخدموها عشان يصنعوا أول طيارتين مقاتلتين تصنيع محلي .. واحدة اسمها نيشر Nesher و التانية اسمها كفير Kfer و الطيارتين دول اثبتوا كفاءة حلوة أوي و اتباعوا بره علي فكرة .. في الفترة من 1969 لحد سنة 1979 استلمت إسرائيل من أميركا اتنين من أهم الطيارات المقاتلة اللي خرجت من الترسانة العسكرية الأمريكية اللي هم F-4 Phantom و F-15 Eagle .. المشكلة اللي كانت بتواجه سلاح الجو الإسرائيلي إن سواء F-4 Phantom أو F-15 Eagle دي طيارات تقيلة و مش سريعة و ملهاش قدرة عالية علي المناورة .. الطيارات الوحيدة ضمن سلاح الجو الإسرائيلي اللي ليهم نفس الميزة دي هم طيارات A-4 Skyhawk و طيارات نيشر Nesher ودي طيارات بقت قديمة و محتاجه تطلع بره الخدمة .. الفكرة اللي جت للإسرائيليين هو ليه لا نعمل احنا الطيارة اللي تحل محل Nesher؟ هو احنا يعني ناقصين ايد ولا رجل؟ زي ما عملنا Nesher نعمل اللي تحل محلها.
المهندسين الإسرائيليين اللي شغالين في شركة IAI الإسرائيلية ودي اختصار Israeli Aeronautics Industries جابوا ورقة و قلم و قعدوا يرسموا ملامح الطيارة الجديدة اللي سموها لافي Lavi ودي كلمة عبري معناها الشبل .. قالك احنا جربنا في طيارات Nesher إن لما الجناحين يبقوا علي شكل دلتا فده بيدي للطيارة قدرة عالية علي المناورة فاحنا حنعمل الطيارة الجديدة برده الجناحين بتوعها علي شكل دلتا .. قالك احنا عشان نزود قدرتها علي المناورة حنركبلها شوية Canard ودي أجنحة صغيرة قدام خالص في مقدمة الطيارة .. مش ملاحظ حاجة؟ .. لما بدأوا يصنعوها لقوا إن التصميم بتاعها فعلياً Aerodynamically Unstable وعشان الطيار يعرف يتحكم فيها حيحتاج كومبيوتر خاص بتكنولوجيا Fly-by-Wire ودي كانت تكنولوجيا جديدة هم سمعوا عنها من الأمريكان فقالوا لنفسهم احنا ممكن نكلم الأمريكان يسلفونا التكنولوجيا دي .. بفكرك إن وقتها الإسرائيليين مكانوش يعرفوا إن الأمريكان بيصنعوا الطيارة F-16 خلي بالك .. قالوا إنهم عشان يخففوا من وزن الطيارة حيعملوا جسمها من مواد Composite بحيث خلوا وزنها يقل جامد ل6,802.5 كيلوجرام وهي فاضية .. قالك احنا حنجيب موتور 1120 Turbofan من تصنيع شركة برات أند ويتني Pratt & Whitney نحطه تحت بطن الطيارة وده موتور فشيخ حطه علي طيارة خفيفة و حتلاقيها بتعمل مناورات مش طبيعية .. الإسرائيليين عملوا الطيارة Lavi و كانوا فرحانين بنفسهم فشخ .. تيجي سنة 1980 و يتقال للإسرائيليين انهم حيستلموا أحدث طيارة تطلع من الترسانة العسكرية الأمريكية واسمها F-16 .. الإسرائيليين وهم بيتفرجوا عليها كانوا شوية و حيرقعوا بالصوت .. فعلياً Lavi هي نسخة طبق الأصل من F-16 .. بمجرد ما الطيارة F-16 دخلت الخدمة في سلاح الجو الإسرائيلي وفيه كلام إن رئاسة الوزراء بتفكر تلغي مشروع Lavi بحجة إن ليه إسرائيل تصرف 2 مليار دولار سنوياً علي طيارة محلية في حين إن أميركا مديانا طيارة شبهها ببلاش .. لو حتقيسها من ناحية الفلوس ففعلياً القرار ده كان صح بس المهندسين بتوع IAI كانوا بيشدوا في شعرهم .. من وجهة نظرهم القرار ده حيكون سكينة و اتغرزت في قلب التصنيع العسكري الإسرائيلي ومن وجهة نظرهم برده هم عندهم حق.
صحيح إن أقصي سرعة للطيارة Lavi كانت 1.6-1.8 ماخ قصاد إن F-16 كانت أقصي سرعة ليها 2 ماخ بس كان مدي طيران Lavi اعلي من F-16 بحوالي 50% .. الإسرائيليين كانوا مركبين عليها أنظمة تشويش علي الرادار أقوي بكتير من F-16 .. أنظمة الملاحة الجوية Avionics اللي كانت تصنيع إسرائيلي كلها كانت عالية فشخ لدرجة إن مستواها كان تقريباً في نفس مستوي الUpdate الثالث اللي ينزل للطيارة F-16 اللي كان F-16C وأعلي كتير من مستوي Avionics اللي كانت متاحة علي طيارات F-16A اللي كانت الجيل الأول من مقاتلات F-16 .. المهم .. الإسرائيليين حاولوا يعوضوا خسايرهم بإنهم يبيعوا الطيارة Lavi لدول نفسها تشتري F-16 بس كانت مفروض عليها عقوبات اقتصادية و عسكرية من أميركا زي مثلاً تشيلي و الارجنتين و جنوب أفريقيا أيام ما كانت تحت حكم حكومة التفرقة العنصرية .. لما الأمريكان عرفوا وقفولهم في الصفقات دي كلها .. الأمريكان قالوا إن حوالي 40% من مكونات Lavi جايه من أميركا و بناء عليه لازم الحكومة الأمريكية توافق علي أي صفقة تصدير لLavi ولإن الأمريكان كان احسنلهم إنهم يبيعوا F-16 من إنهم ياخدوا نسبة من بيع Lavi فكانوا بيرفضوا أي صفقة تحاول إسرائيل تخلصها لتصدير Lavi .. يوم 30 أغسطس 1987 اتعمل تصويت في الحكومة الإسرائيلية بالغاء مشروع Lavi و الموافقة علي شراء 90 طيارة F-16 من أميركا .. التصويت ده علي فكرة خلص بفرق صوت واحد .. 12 صوت قصاد 11 وده يوريك قد ايه مشروع Lavi كان عامل خناقة جوه الحكومة الإسرائيلية.
محدش عارف بالضبط الأحداث مشيت ازاي بعد كده بس اللي اقدر اقوله ليك إن سنة 1995 طلع تقرير من المخابرات المركزية الأمريكية اتهم إسرائيل بانها عطت للصين تصميمات الطيارة Lavi و طبعاً وقتها الإسرائيليين حلفوا ميه يمين إن ده محصلش .. اللي اقدر اقولك إنه حصل إن سنة 1988 يعني بعد سنة من قرار إسرائيل إلغاء مشروع الطيارة Lavi الصين بدأت تشتغل علي مشروع الطيارة J-10 و اللي مسك المشروع كان مهندس صيني اسمه (سونج ويكونج Song Wecong) .. في يناير 1992 رجعت تاني العلاقات الدبلوماسية بين الصين و إسرائيل ومن ساعتها و التعاون العسكري الإسرائيلي الصيني وصل لمرحلة إن فيه مهندسين إسرائيليين سافروا الصين عشان يراجعوا ورا شغل المهندسين الصينيين اللي شغالين علي مشروع J-10 .. لما الأمريكان اتأكدوا إن فعلاً الإسرائيليين هم اللي عطوا الصين تصميمات الطيارة Lavi ده كان السبب في قرار حكومة الرئيس الأمريكي (بيل كلينتون Bill Clinton) حرمان إسرائيل إنها تستلم طيارات F-22 Raptor أول طيارة ليها القدرة علي التخفي من الرادار تصنعها أميركا.
مهم برده تكون فاهم ليه الصين نفسها تمضي عقد تصدير لطيارات J-10CE بالذات؟ الحقيقة السبب هو ميكس بين حاجتين:
أول حاجة إن الصين تقول للعالم إن احنا بنعرف نصنع طيارات مقاتلة مش بس طيارات تدريب .. الحاجة الثانية هي إن السُمعة اللي طلعت علي الصين إن إذا كان انتوا بقيتوا بتعرفوا تصنعوا طيارات فانتوا لسه مش عارفين تصنعوا مواتير الطيارات .. خليني بس اشرحلك الحاجتين دول عشان تبقي فاهم الدنيا احسن:
- الصين قبل كده صدرت طيارة J-7 و J-6 ودي طيارات اقدم من J-10 و كمان بتصدر طيارات تدريب خفيفة زي K-8 وJL-9 و L-15 Falcon بس عمرها ما صدرت طيارات من الجيل الرابع رغم إن فعلياً الصين حفيت ورا دول تانية انها تجرب .. اتقال إن الأرجنتين بتفكر تشتري J-10 بس محصلش نصيب .. موقع إسرائيلي هبد إن إيران بتفكر تشتري 150 طيارة J-10 بعد ما الاتفاق النووي الإيراني اتمضي و العقوبات الاقتصادية الدولية علي إيران اتشالت بس طلع الكلام فعلاً هبد لإن حتي لما العقوبات اتشالت وقتها إيران مكنش عندها السيولة المالية إنها تمول صفقة بالحجم ده.
- الموتور اللي راكب علي طيارات J-10 اسمه WS-10 .. ده موتور فيه كذا مشكلة .. مش بيعيش كتير .. بيعطل كتير .. و مش بيسحب معاك يعني لو انت طيار عايز تحرق بنزين زيادة عشان يديك زقة جامدة في وقت قليل فهو مش حيسعفك .. الموتور ده نزل علي طيارات J-10A ولقوا إن فيه مشاكل فشالوه خالص و حطوا مكانه موتور روسي اسمه AL-31FN ركبوه علي الموديل الأحدث J-10B .. شوية و الصينيين صلحوا مشاكل WS-10 و نزلوه تاني في J-10C .. عشان بس الكلام يبقي واضح فالموتور WS-10 مش حلو وفي نفس الوقت مش وحش .. هو أقل بكتير في الكفاءة من المواتير الروسي أو الأوروبي بس هو يعتبر ارخصهم.
وإن كان أي حد بيفكر يشتري J-10 بيتقاله خلي بالك اديك شفت بنفسك اللي حصل مع الباكستانيين وياريت تتعلم الدرس و تقول لنفسك خليني في المضمون و اشتري F-16 أحسن .. بمناسبة باكستان .. هو ايه اللي حصل بين الصين و باكستان بخصوص الطيارة J-10؟
اللي حصل يا سيدي إن باكستان كانت حتموت و تصنع الطيارة المقاتلة الخاصة بيها فراحوا للصينيين قالولهم ساعدونا نعمل طيارة شبه J-10 .. الصين قالوا لا احنا حنديكوا الطيارة J-7 الأقدم منها و نركبلها شوية إضافات زي Canards اللي بتدي للطيارة شوية مرونة في Aerodynamics بتاعتها و بتخليها ليها قدرة عالية علي المناورة و حنركبلها رادر جديد و نركبلها أنظمة توجيه بتخلي الطيارة فيها امكانية بتتسمي BVR او Beyond Visual Range ودي باختصار إن انا لو انا طيار اقدر اصطاد طيارة معادية بصاروخ جو-جو من غير ما فعلياً اقدر اشوفها بعيني .. كفاية الرادار بتاعي يلقطها .. المهم الطيارة دي اتصنعت فعلاً و اتسمت JF-17 .. صحيح JF-17 مش J-10 .. و صحيح هي مجرد طيارة J-7 قديمة متركبلها شوية اكسسوارات إلا إن باكستان عرفت تبيعها بره و كسبت منها فلوس حلوة أوي و الصين فضلت يا مولاي كما خلقتني بتجري ورا أي دولة ترضي تشتري منها J-10 .. أرجوك متنساش إن النسخة اللي حتتصدر من J-10 اللي هي زي ما قلت في أول فقرة حتتسمي J-10CE مفيهاش نفس الامكانيات الكاملة بتاعه J-10C وده طبيعي علي فكرة .. لو مصر صنعت سلاح ما و حبت تبيع منه لدولة تانية فالنسخة اللي بتتصدر بيبقي مفيهاش نفس الامكانيات بتاعة السلاح اللي حيخدم في القوات المسلحة بتاعتنا و طبيعي إن فيه أنظمة حساسة بتتشال من النسخ اللي بتتصدر.
المصادر:
- مقالة بعنوان The J-10 fighter is China’s F-16, and now it is for sale نشرت في مجلة The National Interest وده لينك المقالة الأصلية:
tps://nationalinterest.org/blog/buzz/j-10-fighter-china%E2%80%99s-f-16-and-now-its-sale-99112 - مقالة بعنوان How good is China’s J-10C fighter? We ask Justin Bronk from the RUSI think-tank نشرت في مجلة The Alternative Aviation Magazine وده لينك المقالة الأصلية:
ps://hushkit.net/2019/02/26/how-good-is-chinas-j-10c-fighter-we-ask-justin-bronk-from-the-rusi-think-tank/ - مقالة بعنوان New Chinese weapons seen on J-10C fighter نشرت في موقع AIN Online وده لينك المقالة الأصلية:
s://www.ainonline.com/aviation-news/defense/2017-07-20/new-chinese-weapons-seen-j-10c-fighter - مقالة بعنوان China’s F-16: Meet the J-10 fighter (Possibly thanks to Israel) نشرت في مجلة The National Interest وده لينك المقالة الأصلية:
tps://nationalinterest.org/blog/buzz/chinas-f-16-meet-j-10-fighter-possibly-thanks-israel-48727
