الطيارات المقاتلة زيها زي الموبايلات .. حضرتك بتشتري مثلاً Smartphone و ليكن +Samsung Galaxy A6 و بتخش زي أي حد شاطر بيدور كويس قبل ما يدفع فلوس علي موقع GSM Arena و تشوف إمكانيات الموبايل .. بتنزل بعينك للحتة بتاعة نظام التشغيل أو Operating System و تلاقيه بيقولك (Android 8.0 (Oreo) Upgradable to Android 9.0 (Pie .. البقين دول معناهم إن الموبايل ده لما تشتريه حتلاقيه بنظام تشغيل معين و لما إن شاء الله Google تنزل النسخة الأحدث حتلاقي موبايلك بيشتغل عليه عادي .. في الطيارات نفس القصة بس بدل ما بتتسمي Operating System بتتسمي Block .. زي ما فيه عندك Android 8.0 (Oreo) و فيه الأحدث منه Android 9.0 (Pie) فبرده فيه Block 1 و الأحدث منه Block 2 و هكذا .. نيجي بقي نتكلم عن طيارات F-35 .. حالياً طيارات F-35 اللي في الخدمة في القوات المسلحة الأميريكية و غيرها شغالة علي Block 3F و ده الOperating System بتاعها .. الجديد منه حيبقي إسمه Block 4 و اللي بس عشان أوريك قد إيه إنك تشيل Block قديم و تنزل مكانه Block جديد دي حاجة مش سهلة فعايزك تعرف إن Block 4 ده عشان يركب في الطيارات اللي في الخدمة حيكلف 16 مليار دولار.
إذا كنت في موبايلك عشان تنزل Operating System أعلي كل اللي إنت محتاج تعمله إنك تفتح Wi-Fi و تسيب جهازك يحمل البرنامج و يعمله Setup و تعمله Restart لما يخلص ففي الطيارات الموضوع أعقد شوية من كده .. إنت مش مجرد بتجيب فلاشة عليها البرنامج و تدخلها في كومبيوتر الطيارة كإنك بتنزل Windows .. إنك تشيل Block قديم و تركب Block جديد فده معناه إن الSoftware بتاع الطيارة حيتغير .. معناه إن فيه Sensors أو حساسات في الطيارة حتتغير .. في أسلحة جديد حتتركب و فيه أسلحة قديمة حتتشال .. اللي عايز أتكلم عنه النهاردة هو إيه حكاية Block 4 اللي الأمريكان طايرين بيها السما و نحاول نفهم هم قصدهم إيه بالضبط بكلمة F-35 Block 4؟
أهم ميزة هي تركيب قنابل GBU-54/B Stormbreaker:
أيوه سامعك يا اللي بتشبه علي الإسم .. ستورمبريكر ده نفس الإسم بتاع المطرقة بتاعة (ثور Thor) في فيلم Avengers: Infinity War و ده يوريك قد إيه الناس اللي في وزارة الدفاع الأميريكية يا عيني مش لاقيين أسامي لدرجة إنهم بياخدوا أسامي الأسلحة الجديدة من الأفلام .. يمكن لما الناس إتريقت علي الإسم الناس بتوع وزارة الدفاع الأميريكية إخترعولها إسم تاني اللي هو Small Diameter Bomb II أو القنبلة أم قطر صغير 2 .. معلش أنا عارف إنهم فاشلين شوية في موضوع الأسامي ده .. المهم إن أغلب طيارات F-35 اللي في الخدمة دلوقتي بما إنهم كلهم شغالين علي Block 3F فهم بيقدروا يشيلوا قنابل GBU-39 SDB I و دي قنابل متوجهة بالليزر يعني حاول تتخيل إنها قنبلة عادية بس مركبين عليها Google Maps .. الجديد في القنبلة ستورمبريكر Stormbreaker دي أولاً إن وزنها 93.6 كيلوجرام و قطرها ميعديش 18 سنتيمتر .. الحجم الصغير ده بيخليك تقدر ترص منها 8 قنابل جوه جسم الطيارة و تقفل عليهم عشان لو كنت عايز الطيارة تبقي Stealth يعني متتلقطش بالرادار .. لو إنت في مهمة مش فارق معاك حكاية Stealth دي فإنت ممكن تركب منها 8 في جسم الطيارة و 16 قنبلة تانية يتركبوا علي الجناحين.
الجديد في قنبلة Strombreaker دي غير فكرة إنها صغيرة إنها لما بتترمي تقدر كطيار تتحكم في مسارها كأنها صاروخ طالما هي أبعد عن الهدف اللي هي رايحاله ب60 كيلومتر .. لو إنت رسمت دايرة نصف قطرها 60 كيلومتر حول الهدف اللي إنت عايز تدمره و ليكن مثلاً مبني مجمع التحرير فلو القنبلة عدت الدايرة دي فخلاص إنت إتأخرت .. طالما هي بره الدايرة إنت تقدر تديها أمر تروح في أي حتة لإنها عكس أي قنبلة تانية موجهة بالGPS فهي بتتوجه للهدف بتاعها عن طريق إن فيه 3 حاجات بيشتغلوا مع بعض: أول حاجة إن لو أنا عايز أضرب مبني مجمع التحرير ففيه ناس شغلتهم إنهم يرسموا موديل للمبني ببرنامج رسم هندسي و بيدخلوا الرسمة دي جوه الكومبيوتر بتاع القنبلة بحيث إن فيه حاجة إسمها Uncooled Infrared Seeker و ده طول ما القنبلة بتطير عمال يصور في المباني اللي تحته و يقارنها بالموديل المرسوم عنده .. ثاني حاجة إن فيه رادار متركب علي القنبلة بيبقي متحدد عليه الموقع بتاع مبني مجمع التحرير و القنبلة بتطير بإتجاهه .. ثالث حاجة إن فيه طرف ثالث سواء بقي قوات علي الأرض أو طيارة في السما أو قمر صناعي بيفضل منشن شعاع ليزر علي المبني كإنه بيقول للقنبلة و هي طايرة أنا أهو أنا أهو تعالي فرقعي فيا .. قنبلة بالدقة دي إنت ممكن ترميها ضد أي حاجة .. أسطول بحري معادي .. مبني عايز تنسفه .. قوات برية بتزحف عليك .. بيت الإيكس بتاعتك.
فضلت مشكلة السعر .. حضرتك القنبلة الواحدة من GBU-54/B Stormbreaker بتتكلف 115,000 دولار و ده رقم خزعبلي لقنبلة لدرجة إن لما وزارة الدفاع الأميريكية لقت إن ده حيكون ثمنها قالت مش لازم تسليح Block 4 يبقي كله من القنابل دي إحنا ممكن نبقي نركب معاها قنابل تانية أرخص شوية إسمها GBU-54 Laser – JDAM ثمن الواحدة فيهم مش بيعدي 20,000 دولار بس و برده ليها القدرة إنها تغير مسارها و هي طايرة .. ده بيخليني أسأل طب ما دام عندكوا حاجة بتؤدي الغرض و رخيصة إيه لازمتها تصرفوا دم قلبكوا علي قنبلة جديدة و تطلع أغلي و تلاقوا نفسكوا بتقولوا طب ما تخلينا في القديمة الرخيصة؟
تاني ميزة هي قنابلAGM-154 JSOW-C1 المضادة للسفن:
القنبلة دي بالذات حتتركب علي طيارات F-35C و دي تبقي الفئة من طيارات F-35 اللي حتخدم علي متن حاملات الطائرات الأميريكية .. دي فكرتها إن لو مثلاً أميركا حبت تدمر حاملة الطائرات اللي عندنا اللي هي من طراز ميسترال فممكن طياره F-35C تضرب الحاملة بتاعتنا بقنبلة من دول .. لما القنبلة بتترمي فهي بتطلع جناحات و تبدأ تطير كإنها طيارة بدون طيار بس الطيار بتاع الF-35C اللي رماها بيقدر يتحكم في مسارها لحد ما توصل لهدفها .. القنبلة الواحدة وزنها بيعدي 500 كيلوجرام و بسهولة أوي تقدر تغرق سفينة زي حاملة الطائرات ميسترال.
ثالث ميزة هي إنهم زودوا الأرفف اللي ممكن تركب عليها صواريخ:
واحدة من أسوأ عيوب الF-35 و اللي ناس كتير إتكلمت عنها هي إنها مش بتشيل صواريخ جو-جو كتير و بالتالي لو طيارة F-35 طلع عليها سرب مثلاً من طيارات F-16 فإحتمال كبير الصواريخ اللي تحت إيد طيار الF-35 تخلص و ميكونش لسه قدر يبقي في أمان .. عشان كده في Block 4 حيزودوا الأرفف اللي بيتركب عليها الصواريخ جوه جسم الطيارة بحيث تقدر تشيل 6 صواريخ AIM-120 و دي صواريخ جو-جو بعيدة المدي بعد ما كان Block 3F بيخليها تشيل 4 صواريخ بس.
رابع ميزة إن Block 4 حيبقي فيها طلبات الدول اللي إشترت F-35 و كل واحدة ليها حاجة معينة عايزاها:
خد عندك مثلاً بريطانيا .. بريطانيا كانت عايزة يتركب علي طيارات F-35 بتاعتها صواريخ SPEAR و دي صواريخ كروز Cruise بعيدة المدي و كمان عايزة يتركب علي طياراتها صواريخ ميتيور Meteor المضادة للطيارات و دي تعتبر من أحسن الصواريخ الجو-جو اللي في السوق .. الأتراك قبل ما الأمريكان يطردوهم بره مشروع F-35 كانوا عايزين طيارات F-35 بتاعتهم يتركب عليها صواريخ SOM و دي برده صواريخ كروز بعيدة المدي .. النرويج مثلاً طلبت يتركب علي طياراتها صواريخ كونجسبيرج Kongsberg و ده صاروخ جاحد يقدر يضرب أي هدف سواء في البر أو في البحر من مسافة بتوصل 255 كيلومتر ده غير إنهم طالبين يتركب علي الطيارات بتاعتهم باراشوتات إضافية عشان تفرمل الطيارة و هي بتهبط علي الثلج لإن النرويج بلد مبيطلعش فيها شمس تقريباً.
خامس و يمكن أهم ميزة هي إمكانية تركيب قنابل نووية B-61 Mod 12:
بمنتهي البساطة دي قنبلة نووية بتتوجه للهدف بتاعها بالGPS بحيث نسبة الدقة بتاعتها هي إنها حتيجي في دايرة نص قطرها 30 متر من الهدف اللي إنت عايزه و دي نسبة إلي حد ما كويسة مش بطالة .. ميزتها إنك تقدر تركب عليها قنابل نووية من كل شكل و لون .. القنبلة النووية بتتصنف بحاجة إسمها Yield و بيتقاس بالكيلوطن يعني القنبلة النووية بتاعتك قدرتها التدميرية تعادل كام طن متفجرات TNT .. القنبلة B-61 Mod 12 تقدر تركب عليها قنابل نووية الYield بتاعها بيتراوح من أول 0.3 لحد 50 .. و فوق ده كله هي ليها القدرة علي إختراق الدشم و ده بيخليها مثالية لو إنت مثلاً عايز تضرب بيها مقاعل نووي أو تضرب بيها مقر قيادة دولة معادية .. المصيبة إن إتفاقية الدول الأعضاء في حلف شمال الأطسلي NATO بتقول إن أي دولة من دول الحلف من حقها تستلم القنابل دي.
أنا بس حابب أسيب حتة في الأخر لF-35B .. دي تبقي النسخة اللي حيستلمها سلاح مشاة البحرية الأميريكية U.S. Marine Corps .. عشان بس أوضحلك فيه F-35A و دي حتروح لسلاح الجو و أنا جبت سيرة F-35C اللي حتروح للقوات البحرية .. إذا كانت F-35A و F-35C حالياً نازلين بBlock 3 فلسه F-35B شغالة علي Block 2 بسبب مشاكل كتير في Software بس يمكن أكبر مشكلة مخليه Block 2 لحد دلوقتي مش عايز يشتغل كويس في الطيارات دي هي إن لسبب ما محدش فاهمه صواريخ AIM-9X و دي صواريخ جو-جو قصيرة المدي مش راضية تشتغل .. الصواريخ دي ميزتها إن أنا كطيار مش محتاج أبقي منشن عليك عشان أضربها .. أنا ممكن أتك علي زرار الإطلاق في Joystick بتاعتي و بعد ما الصاروخ يطلع أنشن و الميزة دي بيسموها Lock-On-After-Launch .
علي فكرة الأمريكان صحيح إنهم لسه منزلوش Block 4 بس فيه كلام من دلوقتي علي يا تري إمكانيات Block 5 و Block 6 حتبقي عامله إزاي .. زي مثلاً هل حنركب علي الطيارات صواريخ JASSAM-ER البعيدة المدي و صواريخ مضادة للسفن بعيدة المدي .. حاجة تانية و هي إنهم بيفكروا ينزلوا محركات جديدة في Block 5 و Block 6 بتدي Power أعلي .. الفكرة إن بقي عندك محرك بيطلع Power أعلي إنت إحتمال متبقاش محتاجه فإنت ممكن تدخل الPower ده علي دينامو و إنت كده حولت الPower الميكانيكي لPower كهرباء .. هات إنت الكهرباء الزيادة اللي إنت أنتجتها علي الطيارة حطها في مدفع ليزر يقدر يوقع الطيارات و الصواريخ المعادية .. واخد بالك إني بدأت أخش ولا كإني بتكلم عن طيارة في سلسلة Star Wars أو Star Trek .. زي ما إنت شايف كلها أحلام و أماني و يديني و يديك طولة العمر و نشوفها.
المصدر:
مقالة بعنوان How the ‘Block’ 4 F-35 Stealth Fighter Could Become A Navy Killer (and Much More) .. نشرت في مجلة The National Interest و ده لينك المقالة الأصلية:
https://nationalinterest.org/blog/buzz/how-block-4-f-35-stealth-fighter-could-become-navy-killer-and-much-more-44737
