الغواصة كورسك .. قصة أسوأ كارثة بحرية يتعرضلها سلاح الغواصات الروسي.

اللي ححكيه النهارده هي قصة كارثة حصلت سنة 2000 لواحدة من أسود الأيام اللي عدت علي القوات البحرية الروسية في تاريخها .. في اليوم ده غرقت الغواصة النووية الروسية كورسك Kursk بسبب إنفجار حصل جواها قتل أغلب طاقمها و اللي فعلاً يزعل هو إن ال24 بحار اللي نجوا من الإنفجار فضلوا محبوسين جواها في قاع المحيط و ماتوا من الإختناق قبل ما فرق الإنقاذ تلحق توصلهم .. هي إتسمت كورسيك علي إسم واحدة من أشهر معارك الحرب العالمية الثانية اللي حصلت عند مدينة كورسك الأوكرانية .. حبدأ الأول أفهمك مين هي كورسيك Kursk؟ وبعد كده نروح لإزاي غرقت؟

قيادة القوات المسلحة السوفيتية فضلت لسنين بتعتبر إن أكبر تهديد علي أمن البلد هو حاملات الطائرات الأميريكية .. هم كانوا شايفين إن حاملة الطائرات دي عبارة عن مطار عايم علي وش المياه و الأهم من كده إن حاملة الطائرات نفسها بتقدر تضرب صواريخ عابرة للقارات شايلة روؤس نووية .. هم كانوا شايفين إن حاملات الطائرات هي رأس الأفعي للقوات المسلحة الأميريكية وعشان تقطع رأس الأفعي مكنش فيه حل أحسن من الغواصات  .. السوفييت عملوا فئة من الغواصات مخصوص لضرب حاملات الطائرات سموها أنتاي Antey-Class Submarines بس الأمريكان سموها أوسكار-2  Oscar II .. غواصات Oscar II دي كانت طولها بيعدي 150 متر و الزعنفتين بتوعها عرضهم 18 متر و وزنها بيعدي 19,400 طن يعني بتتكلم عن ضعف وزن المدمرة .. للناس اللي مش فاهمة أوي في الغواصات فالغواصة دي كانت كبيرة حبتين .. زي بالضبط لما أقولك إن شركة KIA نزلت عربية جديدة فالمفروض إن وزنها يبقي زي وزن باقي العربيات اللي إتعملت يعني بتتكلم عن طن تقريباً بس العربية اللي KIA عملتها وزنها معدي 3 طن يعني داخلين في وزن ترله فطبيعي إنك تسأل نفسك هو معلش أنتوا عاملين عربية أو خليني في حالتنا أسأل أنتوا عاملين غواصة تقيلة أوي كده ليه؟

الحقيقة ده سببه حاجتين: أول سبب هو إن الموتور اللي بيمشي الغواصة دي كانوا عبارة عن إتنين مفاعلات نووية OK-650 بيدو للغواصة 97,990 حصان بيخلوها تجري تحت المياه بسرعه 33 عقدة (61 كيلومتر في الساعة) وده هدفه إن بما إن الغواصات دي إتعملت عشان تصطاد حاملات طائرات فهي لازم تجري بسرعة شبه سرعة حاملات الطائرات … السبب الثاني هو إن الغواصات Oscar II كانت بتشيل صواريخ كبيرة و كتير في نفس الوقت .. يعني مثلاً .. الغواصة الواحدة كانت بتشيل 24 صاروخ P-700 Granit مضاد للسفن ده لوحده صاروخ جامد زحليقة طوله 10 متر و وزنه داخل في 7000 كيلوجرام يعني تقريباً عمارة 3 أدوار مستريح .. أهي الغواصة الواحدة شايلة 24 عمارة من دول .. الصاروخ الواحد سرعته بتوصل 1.6 ماخ يعني 1.6 سرعة الصوت و مداه بيوصل 582  كيلومتر .. الصاروخ ده كان بيستخدم نظام توجيه بالأقمار الصناعية اسمه ليجيندا Legenda و وقتها كان أحدث حاجة بس دلوقتي طلع معاش و فكرته إنه عشان يصطاد حاملات الطائرات بيبقي قدامك حلين: يا إما الصاروخ يشيل رأس متفجر عادي وزنه 740 كيلوجرام وده بيقدر يسبب أضرار محترمة في جسم حاملة الطائرات وده في حالة إن حاملة الطائرات اللي حتدمرها قريبة من الساحل و انت خايف علي السكان من الإشعاع النووي .. أو إنك تحط للصاروخ رأس نووي بقدرة تدميرية 500 كيلوطن و ساعتها حاملة الطائرات هي و السفن اللي معاها حيتبخروا زي ما المياه جوه الكاتل بتتبخر وانت بتسخن المياه عشان تعمل شاي .. السوفييت عملوا 13 غواصة من الOscar II ومن ضمنهم كانت الغواصة K-141 اللي إتسمت كورسيك Kursk.

الغواصة كورسيك دخلت الخدمة سنة 1994 ضمن الأسطول الشمالي الروسي و يوم 15 أغسطس 2000 كان المفروض إن الغواصة حتعمل مناورة مع حاملة الطائرات الروسية الأدميرال كوزنيستوف Admiral Kuznestov و المدمرة بيتر فاليكتي Pyotr Valikity بحيث إن السيناريو حيكون إن الغواصة كورسيك كأنها بتصطاد حاملة الطائرات و المدمرة دورها إنها تحمي الحاملة .. المناورة كانت شغالة و وزي الفل لحد ما في الساعه 11:20 صباحاً بتوقيت موسكو حصل إنفجار تحت المياه هز منطقة المناورات .. الإنفجار لما حصل عمل هزة أرضية سجلت 4.2  علي مقياس ريختر بتاع الزلازل .. بعدها بدقيقتين إنفجار تاني حصل .. الإنفجارات كانت قوية لدرجة إن المدمرة بيتر فاليكتي كانت بتترج .. الإنفجارين خلوا الغواصة تغرق لمسافة 100 متر و هي مايلة علي العمودي علي الأرض بزاوية 20 درجة بس.

لإن دايماً في المصايب مخنا بشكل أوتوماتيكي بيروح لأسهل الإحتمالات فانت لا تتخيل كم الفتي و الهبد اللي الروس عاشوه لما جالهم خبر إن الغواصة كورسيك غرقت .. الهبد أحياناً كان بيجي من حتت مينفعش بأي حال من الأحوال إنها تهبد زي لما قيادة القوات البحرية الروسية أول ما الكارثة حصلت قالوا إن والله الغواصة إنفجر جنبها لغم بحري قديم من أيام الحرب العالمية الثانية .. بس ناس قالت إزاي يا جدعان ده تصميم كورسيك مخلي إن جسمها عبارة طبقتين من الصلب و متقسمه ل9 حتت ضد تسريب المياه فأكيد لغم بحري من أيام الحرب العالمية الثانية مش حيغرقها ده أخره يخدش سطحها الخارجي زي ما انت تكون راكب بيجو قديمة و تحك في عربية هيونداي وتلاقيها الهيونداي إتدغدغت لما خبطت الإكصدام بتاعك وانت يدوبك طالع بخدشة بسيطة .. شوية و قالوا لا معلش أصلها إنفجرت بسبب تعرضها لنيران صديقة من المدمرة اللي شاركت معاها في المناورات بس أطقم الإنقاذ لقت من إن أثر الإنفجار إنه حصل من جوه الغواصة مش براها فكده النظرية دي ترميها في الزبالة.

فكرة إن أكيد الإنفجار حصل من جواها دي و عمل فتحة في مقدمة الغواصة عند المنطقة اللي بتتحط فيها الطوربيدات خلي الهبد ميقلش قد ما خلاه مركز علي حتة معينة .. وقتها طلعت هبداية من العيار التقيل إن سبب غرق كورسيك هو إنها كانت شايلة طوربيد جديد لانج الروس إخترعوه و كانوا بيجربوه اسمه شكفال Shkval .. شوية و طلع إن يا جدعان مفيش طوربيد بالاسم ده في الترسانة البحرية الروسية أصلاً .. فين وفين لما أطقم التحقيقات البريطانية حلت اللغز وهو إن الطوربيدات اللي كانت علي متن الغواصة كورسيك هي طوربيدات Type 65-76A اللي إلي حد ما قديمة بدأت تدخل الخدمة في القوات البحرية الروسية بداية من سنة 1997 بس بتستخدم سائل اسمه بيرو-أوكسايد الهيدروجين Hydrogen Peroxide Liquid .. الروس كانوا بيحطوا نوع معين من الHydrogen Peroxide Liquid اسمها HTP ودي إختصار High Test Peroxide .. و عايزك تركز معايا أوي بقي هنا.

حاول تتخيل إن الطوربيد زيه زي الصاروخ . واحد بيمشي في المياه و الثاني بيمشي في الهواء بس الإتنين بيعملوا حاجة واحدة وهي إنهم يتحط عليهم قنبلة و يجروا بيها بسرعة عالية أوي عشان تروح تنفجر في هدف ما .. عشان الصاروخ أو الطوربيد يجري بالسرعة العالية دي فهو بيحتاج محرك أو موتور و الموتور ده عشان يشتغل محتاج أكسجين .. في حالة الصاروخ الموضوع سهل لإن الهواء الجوي مليان بالأكسجين فالموتور بتاع الصاروخ بيسحب الأكسجين اللي هو عايزه .. المشكلة بتبقي في المياه .. طبعاً الطوربيد مش سمكة عشان يبقي عندها خياشيم توفرلها الأكسجين رباني كده فده معناه إننا لازم نحط مع الطوربيد حاجة توفرله الأكسجين اللي الموتور بتاع الصاروخ محتاجه عشان يجري و الحاجه دي هي الHTP .. الHTP دي مادة من أعجب المواد اللي ربنا خلقها .. دي مادة مش قابلة للإشتعال .. ومش بتتفاعل مع الوقود ولا حتي بتمتزج به .. حاول تتخيلها إنها عامله زي عصير الجوافة كده .. بس فيها ميزة حلوة أوي .. لو الHTP دي إتحطت مثلاً في إسطوانة من الفضة فبتلاقيها إتحللت لبخار مياه و أكسجين وده اللي بيروح للموتور عشان يشتغل .. المشكلة إن التفاعل ده بيصاحبه تمدد في حجم الHTP بما يعادل 5000 مرة .. عشان كده انت لازم تكون واخد بالك أوي لإن تلامس الHTP مع الفضة لازم يحصل لما الموتور بتاع الطوربيد يكون شغال و يكون في المياه فعلياً عشان التمدد الرهيب ده يدي للطوربيد قوة دفع إضافية .. بس لو حصل إن التمدد ده حصل بره محرك الطوربيد فانت بتتكلم عن إنفجار.. هي مش بتشتعل هي بتنفجر .. الحقيقة إن مش الروس هم اللي إكتشفوا المادة دي لأول مرة إنما الإنجليز.

في يونيو 1955 كانت فيه غواصة بريطانية اسمها سايدون Sidon كانت بتبحر قدام شواطيء مدينة بورتلاند الأميريكية .. المفروض إن البحارة بتوع الغواصة كانوا في مهمة تجربة نوع جديد من الطوربيدات بيستخدم الHTP لأول مرة .. يحكي أن و البحارة بتوع غرفة الطوربيدات بيشيلوا الطوربيد الجديد بيحطوه جوه صومعة الإطلاق بتاعته فجأة إنفجر و مات 13 بحار في الكارثة دي .. طبعاً الإنجليز لإنهم أحسن ناس تكفي علي الخبر ماجور فمحدش عرف بالمصيبة دي ولا قرأ عنها لحد ما زي ما قلتلك بالصدفة ناس من طاقم التحقيقات وقع في إيدها مقالة إتكتبت في هيئة الإذاعة البريطانية BBC بتتكلم عن كارثة الغواصة Sidon و بشوية تدوير الفريق بدأ يجمع النقط الناقصة.

عشان انا عارف إن فيه ناس تاهت مني فخليني ألخلصلك اللي حصل في اليوم الأسود ده .. غالباً تسلسل الأحداث في الغواصة كورسك مشي كالأتي:

• حصل تسريب لHydrogen Peroxide من جوه واحد من الطوربيدات Type 65-76A وده سبب حريق أدي غالباً إن الرأس المتفجر جوه الطوربيد فرقع وخلي بالك إن الرأس المتفجر بتاع طوربيد زي ده بيبقي عبارة عن قنبلة وزنها 450 كيلوجرام فهو كفيل إنه يدمر برج سكني كامل.
• الإنفجار الأول غالباً هو اللي سبب الفتحة في جسم الغواصة فوق مكان تخزين الطوربيدات .. الإنفجار الثاني غالباً برده سببه هو إن باقي الطوربيدات اللي في الغواصة إنفجرت.
• الإنفجارين مقتلوش كل طاقم الغواصة ال118 لإن القوات الروسية إستلمت رسالة لاسلكية من ضابط اسمه (ديميتري كوسيلنيكوف Dmitri Koselnikov) قال فيها إن فيه 23 بحار لسه عايشين والرسالة دي إتبعتت بعد ساعتين من الإنفجار الثاني.

فرق الإنقاذ الروسية ومعاها فريقين إنقاذ واحد من بريطانيا و الثاني من النرويج مقدرتش توصل للبحارة اللي لسه عايشين في الوقت المناسب و كلهم ماتوا .. الغواصة نفسها تم إنتشالها من قاع البحر سنة 2001 و الغواصة إتقطرت لحد ما وصلت ميناء روزلياكوفو Roslyakovo الروسي .. مهم تكون فاهم تأثير كارثة زي غرق غواصة نووية ممكن يعمل إيه في الروح المعنوية للقوات المسلحة بتاعة أي دولة .. الروس زيهم زي الأمريكان عندهم الي حد ما جنون العظمة إن إحنا جامدين زحليقة و محدش يقدر يهزنا فلما تحصل كارثة زي دي و 118 بحار يموتوا و محدش يعرف ينقذهم بتعمل هزة ثقة في النفس .. حاجة تانية وهو إحساس العظمة بيخلي عندك إحساس بإن لا مستحيل ده يحصلنا .. إحنا أجمد من إن يحصل فينا كده .. ده يفسرلك ليه (فلاديمير بوتين) اللي كان وقتها لسه منتخب رئيس للجمهورية كان في أجازة ولما حصلت كارثة غرق الغواصة كورسيك مكلفش نفسه إنه يقطع أجازته عشان يتابع الموقف بنفسه .. مش لسبب غير إن يا جدعان مستحيل قوات بحرية بقوة و خبرة القوات البحرية الروسية تحصلها كارثة بالشكل ده .. إحنا بنتدرب كتير و بنصرف كتير عشان نتفادي النوع ده من الكوارث.

المصادر:
مقالة بعنوان The True Story of the Russian Kursk Submarine Disaster .. القصة الحقيقة لكارثة غرق الغواصة الروسية كورسك .. نشرت علي موقع Popular Mechanics وده لينك المقالة الأصلية:
https://www.popularmechanics.com/military/navy-ships/a23494010/kursk-submarine-disaster/
مقالة بعنوان What really happened to Russia’s ‘unsinkable’ sub .. نشرت في جريدة The Guardian وده لينك المقالة الأصليه:
//www.theguardian.com/world/2001/aug/05/kursk.russia