المشروع النووي الباكستاني .. علي قد لحافك مد رجليك.

المشروع النووي الباكستاني لو حبيت تفهمه فهو فعلاً ملوش حاجه تشرحه غير المثل بتاع علي قد لحافك مد رجليك  .. المشروع ده بدأ عشان باكستان خافت إن الهند تعلم عليها و مش لسبب تاني غير ده .. حبسطهالك خالص .. عارف الخناقة بين الأهلي و الزمالك؟ .. مش قصدي الخناقة بين المشجعين اللي بتشوفها علي سوشيال ميديا .. انا قصدي الخناقة اللي بحق و حقيقي علي صفقات اللاعيبه .. مش بتسمع أخبار تقولك إن الزمالك مثلا بيفكر يشتري (صالح جمعه) مش لسبب غير إنه ينكد علي الأهلي؟ .. أهو ده بالضبط حال الخناقة بين الهند و باكستان .. إحنا جايين ننكد علي بعض وكل واحد علي حسب إمكانياته .. كنت إتكلمت في مقالة قبل كده عن حكاية الخناقة بين الهند و باكستان و إنها كانت زي طلاق إتنين متجوزين بس مشكلة نعيد تاني.

الحكاية بدأت سنة 1947 بإنهاء الإحتلال البريطاني للهند .. في التشبيه بتاعنا الهند هي الأهلي و باكستان هي الزمالك و حتفهم الحكمة من ده بعدين .. شوية و المسلمين اللي عايشين في الهند قالوا إحنا لازم تبقي لينا دولتنا المستقلة اللي هي باكستان .. سنة 1965 البلدين حاربوا بعض أولاني .. سنة 1971 حاربوا بعض ثاني .. لحد هنا والخناقة بين الهند و باكستان انت شفتها قبل كده إتهرست في التاريخ كتير .. شعب كان عايش في بلد بس بسبب إختلافات دينية ولعها أكتر الإحتلال الأجنبي قرر إنه يتقسم نصين .. حصلت في أيرلندا .. حصلت في السودان  .. عادي أهو .. مجرد ما الهند بقي عندها سلاح نووي الدنيا إتغيرت.

في مايو 1974  الهند كانت بتزغرط وهي بتفجر أول قنبلة نووية ليها و اللي عشان ينكدوا علي الباكستانيين سموها بوذا المبتسم Smiling Buddha .. زي ما الأهلي فرحان إنه عمال ياخد الدوري كل سنة فالهند من السبعينات لحد سنة 1998 وهي فرحانة بتفوقها الفشيخ علي باكستان .. هو مش فشيخ ولا نيلة بس زي ما بنشوف في الخناقات علي السوشيال ميديا فطول السنين دي كل ما باكستان تعترض أو تقول إن ليها مطالب معينة من الهند فالهنود يردوا عليهم و يقولولهم يلا يا بوابين .. يا اللي صياحكم طرب .. ياللي معندكوش نووي .. باكستان فضلت تسمع التهزيق و تسكت وهي من جواها بتغلي مستنيه اليوم اللي تقول فيه للهنود قبل أي حد تاني إن إحنا مش بوابين .. إحنا جامدين أوي .. سنة 1956 يعني من زمان ومن قبل حتي ما الهند تفجر أول قنبلة نووية ليها و الباكستانيين عملوا هيئة طاقة نووية عشان تبقي هي المسئولة عن المشروع النووي الباكستاني .. سنين و الهيئة دي ماسكها واحد إسمه (منير أحمد خان) عمال هو و الفريق بتاعه يحاولوا يخلوا المكنة تطلع قماش ومفيش فايدة .. هم إختاروا يمشوا في سكة السلاح النووي اللي شغال بالبلوتونيوم مش اليورانيوم و إختاروا يشتغلوا من مفاعل كاراتشي النووي .. و برده مفيش فايدة.

فين وفين سنة 1975 ربنا يبعت للباكستانيين هديه إسمها (عبدالقدير خان) .. الباشمهندس ده أساساً بتاع ميتالوروجي Metallurgy يعني علم المعادن و الرجل ده كان شغال تبع شركة شغاله من الباطن لحساب شركة كبيرة أوي إسمها يورينكو URENCO في هولندا .. عشان تفهم الباشمهندس ده عمل إيه تخيل معايا للحظة إنك عايز تجمع جهاز كومبيوتر .. لسنين و الطريقة اللي (منير أحمد خان) و الناس اللي معاه في هيئة الطاقة النووية الباكستانية بيسعوا فيها إنهم يروحوا للشركات الكبيرة في مجال الطاقة النووية يقولولهم طب تعالوا ورونا أجهزة الطرد المركزي بتشتغل إزاي؟ .. طب تعالوا ورونا الماء الثقيل بيتصنع إزاي؟ .. طب تعالوا ورونا أي حاجه و حندفع .. الشركات الكبيرة كانت خايفة تروح تساعد باكستان عشان أولاً متخسرش شغل مع الهند و ثانياً لإن بعد ما الهند بقي عندها سلاح نووي فمحدش عايز باكستان و الهند يخشوا في سباق تسلح ضد بعض و ياعالم ما يمكن تخرب معاهم و يستخدموا السلاح ده فعلاً ضد بعض .. اللي (عبدالقدير خان) قاله هو ليه نروح نشتري Desktop مقفول من شركة hp ولا شركة Dell ؟ ما إحنا ممكن نجمع الكايسة بتاعة الكومبيوتر .. إحنا حنروح لشركة nVidia نشتري منها كارتة الفيجا .. حنروح لشركة intel نشتري منها الProcessor و نجمع الجهاز .. (عبدالقدير خان) ساب شغله في هولندا و مرتبه و حياته اللي زي الفل و رجع باكستان عشان يساعد بلده يبقي عندها سلاح نووي.

(عبدالقدير خان) قال للباكستانيين أرموا بقي شغلكوا القديم ده في الزبالة .. إحنا حنصنع قنبلة نووية باليورانيوم مش بالبلوتونيوم .. وانا جايب معايا من بره التصميمات بتاعة أجهزة الطرد المركزي و حنصنعها بنفسنا .. أي قطعة مش عارفين نصنعها حنكلم شركة شغاله في الباطن تجيبهالنا أو حتي نجيبها من السوق السودا  .. (عبدالقادر خان) كان عامل شبكة كاملة من التجار اللي يقدروا بمكالمة تليفون يورودوله أي قطعة غيار هو محتاجاها .. شبكة إتبنت في سنين و إمتدت من الصين لإيران لكوريا الشمالية لحد ليبيا..  يوم 28 مايو 1998 كان اليوم اللي باكستان كانت مستنياه من سنين.

في يوم واحد باكستان إختبرت 5 قنابل نووية مرة واحدة .. مش بس كده .. بعدها بيومين إختبروا السادسة .. شوف الفجر .. بس انا عايز أقف قدام نقطة محددة .. من ضمن الخمس قنابل نووية اللي الباكستانيين فرقعوهم يوم 28 مايو 1998 كان منهم أربع قنابل نووية بيتحطوا تحت تصنيف قنابل نووية تكتيكية Tactical Nuclear Weapons .. مهم أوي تفهم هي بالصلاة علي النبي تطلع إيه القنابل النووية التكتيكية دي؟

القنبلة النووية مهم تخلي في دماغك إنها في الأول و في الأخر قنبلة .. اه هي بتطلع إشعاع نووي و اه الإنفجار بيولد حاجه إسمها E.M.P يعني Electromagnetic Pulse بيوقف أي دايرة كهربية وعشان كده انت بتشوف في الأفلام إن أي منطقة جنب الإنفجار النووي الكهرباء بتقطع فيها و أي حد لابس ساعة بتقف .. بس برده هي قنبلة .. هي بتعمل بووم و بتفرقع .. القنبلة النووية قوتها التدميرية بتتقاس بحاجه إسمها كيلوطن .. الفكرة إنك بتتخيل إن القنبلة النووية دي شلناها و فرقعنا مكانها مادة TNT الشديدة الإنفجار فانت بتسأل نفسك هو القوة التدميرية للإنفجار بتعادل إنك جبت كام كيلو طن من مادة TNT و فرقعتها؟ .. القنابل النووية الكبيرة حبتين واللي بتتسمي قنابل نووية إستراتيجية Strategic Nuclear Weapons بتلاقي إن القدرة التدميرية بتاعتها بتعدي الألف كيلو طن .. في حالة القنابل النووية التكتيكية فانت بتتكلم عن قوة تدميرية يدوبك أقل من 10 كيلوطن بس .. هي اه قنبلة نووية بس صغننة شوية .. لو القنبلة النووية الإستراتيجية هي الترلة فالقنبلة النووية التكتيكية هي العربية النص نقل .. نرجع تاني للقنابل اللي باكستان فرقعتها يوم 28 مايو .. انا قلتلك إن أربعة من أصل خمس قنابل نووية فرقعوهم في اليوم ده كانوا قنابل نووية تكتيكية واللي الواحدة فيهم قدرتها التدميرية ما بين 2-3 كيلوطن بس.

طبيعي إن فيه منكوا يكون بيسأل نفسه طب معلش هو إيه اللي يخلي أي بلد تقرر إن يبقي عندها قنابل نووية تكتيكية؟ .. هو مش الأحسن إن بما إني عملت برنامج نووي و صنعت قنبلة نووية يبقي أضرب في العالي و أعمل قنبلة نووية إستراتيجية؟ .. بص هو كلامك منطقي بس انت برده لازم تسأل نفسك هو باكستان حتضرب مين بالقنبلة النووية؟ .. شطور الهند صح .. طب هل تعلم إن المسافة بين العاصمة الهندية نيودلهي و بين العاصمة الباكستانية إسلام أباد يدوبك 688 كيلومتر؟ يعني لو باكستان ضربت نيودلهي بقنبلة نووية إستراتيجية فأكيد يعني الإشعاع النووي حيوصل لباكستان .. عشان كده فكرة إن بلد زي باكستان أو الهند يبقي عندهم قنبلة نووية إستراتيجية مش عملية أوي لإنك فعلياً ساعة الجد مش حتستخدمها .. اللي حتحتاجه فعلاً هو القنبلة النووية التكتيكية و إسمحلي أشرحلك ليه؟

الحقيقة إن فيه سببين بيخلوا القنابل النووية التكتيكية سيكسي أوي في عيون الباكستانيين و الهنود كمان وحياتك .. السبب الأولاني إنها قنابل إتصممت عشان تضرب بيها أهداف محددة .. يعني لو مثلاً لا قدر الله إسرائيل ضربت مقر وزارة الدفاع المصرية في العباسية بقنبلة نووية تكتيكية فالإنفجار حينسف نص مساحة القاهره و الإشعاع النووي مش حيعدي قناة السويس .. ده معناه إن إسرائيل خلصت من نص سكان القاهرة و ريحت دماغها من القيادة العسكرية المصرية كلها و أجبرت مصر إنها تعلن إستسلامها و فوق ده كله الإشعاع النووي مش حيوصل إسرائيل أصلاً .. يا بلاش .. القنبلة النووية التكتيكية دي عامله زي برشامة بنادول إكسترا المستوردة الغالية دي اللي انت بتاخدها لما يبقي عندك صداع ومش عارف تنام .. بتاخد البرشامة و تشتري دماغك .. ده كان السبب الأولاني .. السبب الثاني له علاقة بأكتر حاجه كنا بنكرهها إاحنا صغيرين في المدرسة .. الحساب.

باكستان بلد إقتصادها علي قد حاله حبتين .. أي دولة بتقيس حجم إقتصادها بحاجه إسمها الناتج الوطني الإجمالي Gross Domestic Product أو GDP وده بإختصار هو كل الفلوس اللي بتخش البلد في السنة .. باكستان بلد الGDP بتاعها قيمته حوالي 305 مليار دولار .. جميل .. باكستان بلد لو جيت تشوف قواتها المسلحة فيها كام ضابط و عسكري في الخدمة حتلاقيهم 767,000 الغالبية بتاعتهم مشاة و نسبة كبيرة منهم مشاة ميكانيكي و مدرعات .. لو جيت تبص علي الهند فدي بلد GDP بتاعها 2.597 ترليون دولار .. أحيه .. لو جيت تبص علي تعداد قواتها المسلحة اللي في الخدمة حتلاقيهم 1.2 مليون بني أدم زود عليهم 990,000 إحتياط يعني بتتكلم عن قوات مسلحة عددها بيوصل 2.1 مليون بني أدم .. فهمت المشكلة فين؟ .. المشكلة إن الهند هي الأهلي و باكستان هي الزمالك .. الهند معاها فلوس أكتر .. عندها عدد مقاتلين أكتر .. بتصرف علي تسليحها أكتر .. قواتها البرية أكبر .. فيه حالة إن الهنود قرروا إنهم يغزوا باكستان بريا فبحسبة عدد القوات رجل لراجل حتخلي الهند تكسب .. الحل إن القوات الهندية اللي حتخش باكستان تتضرب بقنابل نووية تكتيكية.

حالياً تقارير عسكرية كتير بتقول إن باكستان تحت إيدها ما بين 150-180 رأس نووي فيه منهم رؤوس نووية إستراتيجية و فيه منهم رؤوس نووية تكتيكية .. عشان تفهم أهمية الرؤوس النووية التكتيكية بالنسبة للباكستانيين فلو إفترضنا إن عندهم 150 راس نووي بس فعايزك تعرف إن بالميت خالص هم عندهم 40 راس نووي تكتيكي .. في حالة إنك من الناس اللي بتسأل هو انا جبت الكلام ده منين؟ فانا أقدر أجاوبك بإن انت عندك حق اللي يقدر يقول الرقم الحقيقي هو رتبة كبيرة في المؤسسة العسكرية الباكستانية بس إحنا نقدر نهبد هبد يكون مبني علي أساس علمي شوية بإننا نحسب عدد الرؤوس النووية اللي تحت إيد باكستان عن طريق إننا نشوف عدد منصات الإطلاق اللي عندهم .. عشان أقربهالك حاول تتخيل إني جيت سألتك هو فيه كام حارس مرمي بيلعبوا في أندية الدوري الممتاز المصري؟ من غير ما توجع دماغك انت بتشوف فيه كام نادي بيلعب في الدوري الممتاز اللي هم 18 نادي  وبتقول إن كل نادي فيه إتنين حراس مرمي يعني بتتكلم عن 36 حارس مرمي .. هل الطريقة دي صح بنسبة 100% إنك تحسب بيها عدد الرؤوس النووية اللي تحت إيد باكستان؟ أبقي بفتي لو قلتلك اه بس هي طريقة تقريبية .. الطريقة دي مشي بيها تقرير طلع من معهد إسمه Bulletin of the Atomic Science و حتلاقيه عندك في المصادر و الناس دي قالت إن منصات الإطلاق اللي تحت إيد الباكستانيين هي عربيات نقل أو ترلات بس الإخوة بتوع الصواريخ بيحبوا يسموها Transporter-Erector-Launcher أو TEL إختصاراً و باكستان عندها ما بين 20-30 واحدة .. تقدر تقول إن المنصات المتحركة دي هي النبلة اللي الباكستانيين بيرموا بيها الطوبة .. الطوبة نفسها هي صواريخ باليستية قصيرة المدي إسمها نصر تسعة NASR-9 .. كل عربية TEL بتقدر تشيل صاروخين NASR-9 وكل صاروخ بيشيل راس نووي .. ده معناه إن علي أقل تقدير باكستان عندها 40 راس نووي تكتيكي بما يعادل 26% من إجمالي ترسانتهم النووية.

عشان الرؤوس النووية التكتيكية زي ما قلتلك بتبقي معمولة بحيث ميكونش ليها تأثير إشعاعي ضخم فانت فعلياً مش محتاج الصواريخ اللي تشيلها تبقي فشيخة .. عشان كده صاروخ NASR-9 بتاع الباكستانيين هو صاروخ علي قده شوية .. هو بيشتغل بالوقود الصلب و أقصي مدي طيران ليه 70 كيلومتر فهو مش معمول عشان يضرب أهداف في عمق الهند .. هو معمول عشان لو الهند قررت تغزو باكستان برياً فالقوات الهندية حيتم تدميرها بالصواريخ دي اللي حتبقي شايله رؤوس نووية تكتيكية.

لو دولتين صادف يعني إنهم جنب بعض و الإتنين مش طايقين وش بعض و بيلعنوا سلسفين بعض و الإتنين قرروا يبقي عندهم سلاح نووي فساعتها العلاقة بين الإتنين بتبقي غريبة أوي .. هي بتبقي ماشية بمبدأ لما وزارة الكهرباء تتخانق مع وزارة الموارد المائية فيقولوا لبعض حتكهربني حغرقك .. ده إسمه الردع النووي Nuclear Deterrence .. الفكرة بسيطة .. انا معايا نووي وانت معاك نووي واللي حيضرب فينا الأول فلازم التاني يرد عليه .. اللي هو حتكهربني حغرقك .. عشان كده جملة الردع النووي دايماً بيجي لازق فيها علي طول جملة تانية إسمها No First Use Policy يعني سياسة انا مش حضرب الأول .. ده الأساس اللي البلد اللي عندها سلاح نووي بتبني عليه تسلسل القيادة بتاع سلاح إطلاق الصواريخ النووية .. بس الكلام ده مش ماشي علي باكستان أوي يعني .. سنة 2002 رئيس الوزراء بتاعهم وقتها (نواز شريف) طلع قال إن السلاح النووي اللي عند بلده مش حيستخدم إلا ضد الهند بس الحق يتقال هو قال إنه مش حيستخدم إلا إذا كان بقاء دولة باكستان بقي في خطر .. سنة 2003 أعلنت الهند إن ترسانتها النووية حتمشي بمبدأ No First Use .. لسه باكستان حتقول هيييييه جه وزير الدفاع الهندي سنة 2009 رجع في كلامه وقال والله إحنا منعرفش الزمن مخبيلنا إيه .. و صدقني لو قلتلك إن الباكستانيين مرعوبين من اليوم اللي الهنود فيه يكونوا متقلين قبليها بالليل في أكل الكاري و يقوموا الصبح مزاجهم متعكر و دماغهم تخرب و لما تقوم خناقة بينهم علي إقليم كشمير مثلاً زي ما حصل السنة اللي فاتت تقوم الهند ضاربه باكستان بالنووي .. خصوصاً لو عرفت هي الهند تقدر تستخدم سلاحها النووي إزاي؟

إذا كانت باكستان معندهاش غير منصات إطلاق TEL فالهنود عندهم 3 طرق يقدروا يستخدموا بيها سلاحهم النووي و الهنود بيسموا الطرق الثلاثة مع بعض Triad أو الثالوث:

• اول طريقة هي الطيارات .. شوف من دلوقتي أهو .. مفيش أي دليل يثبت صحة الكلام ده بس الهنود بيقولوا إن طيارات Mirage 2000 الفرنساوي اللي عندهم ليها القدرة علي إطلاق قنابل نووية .. طب أزيدك من الشعر بيت .. فيه كلام كتير بيتقال إن القنابل النووية اللي تحت إيد الهند مش من النوع اللي بيتوجه بالليزر أصلاً يعني لازم طيارة تشيل القنبلة و تطير بيها لحد فوق الهدف و ترميها و القنبلة مش بتفرقع غير لما تخبط في الأرض.
• ثاني طريقة هي الصواريخ اللي بتتضرب من البر ودي نفس الطريقة اللي تحت إيد باكستان .. الفرق إن الهند يمكن حظها أحسن شوية إنها إشتغلت مع روسيا علي منظومة إطلاق إسمها أجني Agni .. الهند حالياً تحت إيدها مظومتين Agni II و Agni III واللي يقدروا يضربوا صواريخ باليستية تقدر توصل للعاصمة الصينية بكين علي فكرة و الروس و الهنود شغالين مع بعض علي تطوير منظومتي إطلاق الصواريخ Agni IV و Agni V .. برده الحتة الجايه مهم أبقي مأكد علي إن مفيش أي دليل يدعم صحة المعلومة دي .. الروس و الهنود شغالين مع بعض علي مشروع صاروخ أسرع من الصوت إسمه براهموس BrahMos بيقدر يشيل رؤوس نووية.
• ثالث طريقة هي الصواريخ اللي بتتضرب من الغواصات .. مفيش غير الأمريكان بس اللي بيقولوا إن الروس ساعدوا الهنود يبقي عندهم صواريخ بتقدر تشيل رؤوس نووية ينفع تتضرب من الغواصات بس الصواريخ دي مداها أخره 1000 كيلومتر بس .. لتالت مرة مفيش برده أي دليل يؤكد أو ينفي صحة المعلومة دي.

قصاد تهديد بالشكل ده فباكستان بتنتج سلاح نووي بنفس المعدل اللي والدتك بتعمل بيه كيكة من ساعة ما الحظر بتاع فيروس كورونا بدأ .. في السنة الواحدة باكستان بتنتج حوالي 3 طن يورانيوم عالي التخصيب ودي كمية كافية جداً إنها تعمل 10-15 راس نووي في السنة .. زود عليهم برده إن سنوياً باكستان بتنتج 280 كيلوجرام من البلوتونيوم اللي ينفع يستخدم في الأسلحة النووية .. كل ده بس كان محاولة لشرح حكاية المشروع النووي الباكستاني و قدراته و إتعمل ليه .. زي ما حضرتك شايف فالهنود و الباكستانيين ربنا خلقهم عشان يمسكوا في خناق بعض وصدقني لو قلتلك إني مقدرش أقول وانا متؤكد إن مش حيجي اليوم اللي الإتنين يضربوا بعض بالنووي لإن بالشكل اللي انا شايفه الدنيا واقفه علي شعرة.

المصادر:

مقالة بعنوان Pakistan’s tactical nuclear weapons should terrify you نشرت في مجلة The National Interest وده لينك المقالة الأصلية:
https://nationalinterest.org/blog/buzz/pakistan%E2%80%99s-tactical-nuclear-weapons-should-terrify-you-142937

مقالة بعنوان Why India’s nuclear triad is such a dangerous weapon نشرت في مجلة The National Interest وده لينك المقالة الأصلية:
https://nationalinterest.org/blog/buzz/why-india%E2%80%99s-nuclear-triad-such-dangerous-weapon-142272

تقرير بعنوان Tactical nuclear weapons 2019 نشر عن معهد Bulletin of Atomic Scientists وده لينك PDF  بتاعه:
https://www.tandfonline.com/doi/pdf/10.1080/00963402.2019.1654273?needAccess=true