بنادق القناصة .. دليل المبتدئين لأحسن الأنواع.

فيه مننا من كتر ما لعبوا Call of Duty و Medal of Honor يقدروا يميزوا البنادق الألية من بعض .. يعني تلاقيه عارف ال AK-47 من الM4A1 Carbine .. بس لما بيجي الكلام عن تمييز بنادق القناصة تلاقيه مش فاهم الألف من كوز الدرة .. هو شايف بندقية عليها عدسة تبقي بندقية قناصة .. طب إسمها إيه؟ ولا موديلها إيه؟ ولا إيه المميز فيها؟ مبيبقاش عارف .. النهاردة حنتكلم عن أشهر 5 أنواع بنادق قناصة في العالم .. عشان بندقية يتقال عليها بندقية قناصة محترمة لازم نسبة الخطأ في التصويب أو Deviation متعديش نص بوصة يعني 1.5 سنتيمتر لكل متر وده اللي بتقدمهولك البنادق الخمسة اللي حنتكلم عنها دلوقتي .. معلومة موحدة عن بنادق القناصة وهي إن مفيش في القناصة ضرب نار أوتوماتيك زي البنادق الألية .. بنادق القناصة يا إما نص ألي Semi-Automatic يعني كل ضغطة زناد بتضرب طلقة يا إما Bolt Action يعني مع كل طلقة بتضربها بتشد أجزاءها عشان تطرد مظروف الطلقة اللي إتضربت وبعد كده تضرب الطلقة اللي وراها وهكذا.

البندقية M40A5:

فيه سلسلة طويلة عريضة من بنادق القناصة إسمها M40 أكتر ناس بتستخدمها هم بتوع سلاح مشاة البحرية الأميريكية US Marines وأخر العنقود في السلسلة دي هي M40A5 .. بنادق M40 هي بنادق بتتصنف علي إنها Bolt Action ولو جيت تفكها وتتفرج عليها حتلاقي هي بندقية صيد عادية جداً موديل ريمينتجون 700 أو Remington 700 بتستخدم طلقة عيار 7.65×51 مليمتر أو 0.308  بوصة يعني طلقة أبعادها تقريباً قريبة من أبعاد الطلقة بتاعة بنادق AK-47 الألية .. مهم تفهم إن بنادق القناصة بتبقي عامله زي الLaptop في إنها بتتجمع من كذا حتة .. يعني مثلاً تلاقي Laptop ماركة Dell بس كارتة الفيجا بتاعته ماركة nVidia والسماعات Beats Audio والProcessor ماركة intel وهكذا والأجزاء دي بتتجمع مع بعضها وفي الأخر بتبقي Laptop .. نفس الكلام في بنادق القناصة .. عندك مثلاً M40A5 دي مبنية علي هيكل عاملاه شركة ريمينجتون Remington والطلقة بتاعتها بتعملها شركة إسمها وينشيستر Winchester .. الماسورة بتاعتها طولها 25 بوصة من تصنيع شركةإسمها شنايدر Schneider .. الزناد والكعب عاملاهم شركة رابعة إسمها ماكميلان McMillan .. العدسة موديل Police Marksman II 4-16x50mm عاملاها شركة إسمها شميدت أند بيندر Schmidt and Bender .. في الأخر خالص كل ده بيتجمع في بندقية بتقدر تجيب أهداف بدقة متناهية لحد بعد 1000 متر بنسبة خطأ مبتعديش نص بوصة لكل 100 متر .. عشان برده أحطك في الصورة .. تخيل إني حضرب هدف علي بعد 800 متر وليكن الهدف ده مثلاً كوباية إزاز فالطلقة بتاعتي أقصي إنحراف ليها مش حيطلع بره دايرة نص قطرها 2 بوصة يعني 5 سنتيمتر.

البندقية M24:

دي بندقية القناصة اللي بتستخدمها القوات البرية الأميريكية وهم بيسموا الجيل ده من البنادق Sniper Weapon System أو SWS .. المهم إن البندقية دي دخلت الخدمة سنه 1988 عشان تحل محل البندقية M21 .. الحقيقة إن فيه حاجات مشتركة كتير بين M24 وبين M40A5 .. الإتنين بيتصنفوا علي إنهم Bolt Action .. الإتنين مبنيين علي الهيكل أو الشاسيه بتاع بندقية الصيد Remington 700 .. الإتنين بيستخدموا طلقات نفس العيار 7.65×51 مليمتر من تصنيع شركة Winchester .. الإتنين برده متجمعين من منتجات شركات مختلفة .. البندقية M24 الماسورة بتاعتها طولها 24 بوصة من تصنيع شركة Remington والعدسات بتاعتها موديل Mark IV M3 من تصنيع شركة  ليوبولد Leupold .. الجديد في M24 هو إن الماسورة بتاعتها بيتقال عليها Free-Floating يعني ماسورة عايمة وده بيعلي أوي من دقة التصويب بتاعة البندقية.

البندقية L115A3:

دي بندقية القناصة الرسمية بتاعة القوات المسلحة البريطانية وزيها زي أي حاجة متصنعة في بريطانيا فهي عاملة زي عربياتهم مثلاً اللي هو شكلها عربية بس الدريكسيون ناحية اليمين .. البندقية دي كده برده .. تشوفها تقول عليها زي M24 وزي M40A5 بندقيه بتتصنف علي إنها Bolt Action يعني القناص المفروض بيحطلها طلقة تضرب وبعد كده يشد الأجزاء يطرد المظروف ويحط الطلقة الجديدة وهكذا .. بس بندقية L115A3 معمولها خزنة ذخيرة بتشيل 5 طلقات عيار 0.388 بوصة بتتسمي لابوا Lapua  ودي طلقات بتديلك مدي تصويب بيعدي 1600 متر وده مدي أبعد من اللي ممكن بنادق M24 و M40A5 تديهولك بسبب إنها بتستخدم طلقات أخف عيار 0.308 بوصة .. العدسات بتاعتها موديل 5-25x56mm من تصنيع شركة Schmidt and Bender .. سنة 2009 قناص بريطاني إسمه (كريج هاريسون Craig Harrison) في أفغانستان قدر ببندقية L115A3 يضرب 3 طلقات علي مسافة 2700 متر عشان يموت إتنين من عناصر طالبان والثالثة دمرت المدفع الرشاش PKM اللي كان معاهم ودي كانت واحدة من أبعد عمليات القنص اللي إتعملت في التاريخ.

البندقية Berrett M82:

فكرة إنك تعمل بندقية قناصة بتستخدم طلقة تقيلة عيار 0.5 بوصة يعني 12.7 مليمتر محدش فكر يعملها لحد الثمانينات لإن ليه تعمل بندقية قناصة بتستخدم نفس الطلقات بتاعة المدافع الرشاشة؟ .. أول شركة تشتغل علي الموضوع ده كانت شركة Berrett Firearms اللي عملت بندقية سمتها M82 بتستخدم طلقات عيار 0.5 بوصة إسمها BMG اللي هي نفسها اللي بتستخدم في المدافع الرشاشة بس Semi-Automatic يعني كل ضغطة زناد بطلقة بتطلع .. من ساعتها والبندقية دي بتستخدم في كل حتة في العالم من أوكرانيا لحد أميركا .. هي بندقية تقيلة وزنها 13.7 كيلوجرام وماسورتها لوحدها طولها 20 بوصة .. بس أخرك فيها إنك تجيب أهداف علي بعد 900 متر بعد كده دقة البندقية بتروح في ستين داهية وده بيخليها بندقية مثالية لو إنت ناوي تدمر بيها معدات أو توقع بيها طيارة مثلاً .. طلقة منها علي مروحة ديل طيارة هليكوبتر علي بعد 1700 متر ممكن تطيرلك المروحة كلها .. إنما تستخدمها ضد بني أدمين منصحكش.

البندقية زيجيانج Zijiang M99:

دي بندقية القناصة الرسمية بتاعة القوات المسلحة الصينية وزيها زي أي حاجة صيني تحس إنهم مجمعين مية حاجة في بعض لدرجة إنك متفهمش هي البتاعة دي عاملينها ليه .. هي Semi-Automatic زيها زي Berret M82 وبتستخدم عيار طلقات قريب من ال0.5 بوصة اللي هو 12.7×108 مليمتر وده سببه إن ده نفس العيار بتاع طلقات المدافع الرشاشة السوفيتية الصنع وفيها خزنة ذخيرة بتشيل 10 طلقات .. بس في نفس الوقت تلاقي الميكانيزم اللي مظروف الطلقة بتطلع بيه والطلقة الجديدة بتحل محل الطلقة اللي إتضربت هو بضغط الغاز زيه زي اللي موجود في البنادق الألية M16 و M4 Carbine الأمريكاني .. ده مخلي M99 بندقية تقيلة وزنها 12 كيلوجرام .. البندقية دي كانت البندقية المفضلة للثوار السورين في الحرب الأهلية السورية وأغلب الظن البنادق دي إشترتها قطر من السودان وهربتها لسوريا عشان تساعد الثوار عشان يوقعوا نظام (بشار الأسد).

المصدر:

• مقالة بعنوان Analysis of top 5 sniper rifles? Which one is best?  يعني تحليل لأحسن 5 أنواع بنادق قناصة ومين أحسن واحدة فيهم .. نشرت علي موقع Defense Maven وده لينك المقالة الأصلية:
  https://defensemaven.io/warriormaven/land/analysis-of-top-5-sniper-rifles-which-one-is-best-qJh5vz4e4kKdyQGONL6UbQ/