اللي حنتكلم عنه النهاردة هو حاجة اسمها عدي عليك قبل كده .. لو انت زي حالاتي كده Gamer قديم فانت عدت عليك في Video Game بنفس الاسم اللي هو Delta Force .. لو انت من الجيل اللي اول علاقتك بVideo Games كانت من سكة Call of Duty و Medal of Honor فانت برده اسم Delta Force مش غريب عليك .. لو انت ليك في الأفلام فبرده اسمهم اتقال في كتير من أفلام الأكشن يعني سنة 1986 اتعرض فيلم The Delta Force وكان من بطولة (تشاك نوريس) وسنة 2001 اتعرض فيلم Black Hawk Down واللي حنجيب سيرته كتير في المقالة دي .. يمكن الوحيدين اللي فعلياً حستغرب لو اتقالي انهم عارفين مين هي Delta Force هم البنات .. لمن لا يعلم فدلتا فورس Delta Force تبقي واحدة من أفضل خمس قوات خاصة علي مستوي العالم .. اسمها بالكامل First Special Forces Operation Detachment-Delta (1FOD-D) اللي اختصاراً زي ما انت عارف Delta Force أو Delta بس وخلاص .. فيه ناس كتير علي فكرة شايفين إنهم مع SEAL Team 6 هم أحسن قوات خاصة حالياً بس أصحاب الرأي ده كلهم امريكان فسيبك منهم أصل مين حيشهد للعروسة يعني .. اللي حنحاول نفهمه النهاردة سوا هو اننا نجاوب سوا علي سؤالين:
- يا تري تطلع ايه Delta Force دي بالضبط؟ .. يعني احنا عارفين انها قوات خاصة بس تفرق ايه عن Navy Seals أو Rangers أو المارينز حتي؟
- هي الناس دي ايه سجلها التاريخي؟ عملت ايه في حياتها يخليني أقول عليهم جامدين زحليقة؟
الميلاد .. سيبه يعتمد علي نفسه:
لو فتحت جوجل سالته هي ياتري Delta Force اتعملت امتي فيحقولك ان تاريخ ميلادها هو 19 نوفمبر 1977 بس هو الحقيقة ده تاريخ مش صح أوي لإن عشان تعرف هي اتولدت امتي لازم يجي بعد ما اعرفك علي اللي خلاها تتولد من الأساس وهو الكولونيل (تشارلز ألفن بيكويث Charles Alvin Beckwith) .. الكولونيل أو العقيد (تشارلز) ده كان ضابط في القوات الخاصة بتاعة القوات البرية الأميريكية اللي هم بيسموهم الطواقي الخضرا أو Green Beret ودي من الحاجات المستفزة الحقيقة في القوات المسلحة الأميريكية اللي هم ورثوها لكل القوات الخاصة بتاعة الدول اللي حليفة أو صديقة لأميركا إن المفروض أي قوات مسلحة في الدنيا بتتكون من أفرع رئيسية اللي هم البرية والجوية والبحرية وهكذا .. الأمريكان عاملين قوات خاصة لكل فرع منهم .. يعني القوات البحرية ليها قوات خاصة اللي هم Navy SEALs .. القوات البرية ليها قوات خاصة اللي هم Green Beret .. المهم .. سنة 1951 بتحصل جريمة عملية اغتيال واحد اسمه السير (هنري جيرني) .. يطلع مين الأخ ده؟ .. ده كان المندوب السامي البريطاني لماليزيا .. عارف انك بتهرش في شعرك حفهمك.
عشان ماليزيا كانت تحت الاحتلال الياباني خلال فترة الحرب العالمية الثانية فلما الحرب خلصت بريطانيا حطت ايدها علي البلد .. قامت كذا حركة انفصالية بتطالب باستقلال ماليزيا عن بريطانيا .. الماليزيين سموها حركات استقلال شعبية .. البريطانيين سموها حركات ارهابية .. كل واحد علي حسب هو واقف في مدرجات مين .. بعد اغتيال سير (هنري جيرني) بيجي وراه السير الجنرال (جيرالد تيمبلر) اللي هو بغض النظر عن انه سير و عن انه جنرال يعني منتمي للمؤسسة العسكرية وان اسمه تيمبلر Templer يعني فرسان المعبد .. بغض النظر عن كل ده .. الرجل كان جاي وفي دماغه خطة إنه يتعامل مع التهديد الأمني اللي بتشكله حركات الاستقلال الماليزية علي انه تهديد ارهابي وبناء عليه هو جاب معاه فرق من القوات الخاصة البريطانية SAS ودي اختصار Special Air Service ودي تبقي القوات الخاصة البريطانية اللي تحت ايد سلاح الجو .. تاني .. الامريكان بدأوا الموضة وكله مشي وراها .. المهم ان سنة 1962 الأمريكان بيبعتوا (تشارلز ألفن بيكويث) عشان يبقي ممثل للقوات الخاصة الأمريكية ويتعلم من الانجليز سر الصنعة بتاع ازاي تجري ورا ناس شايله سلاح في غابات .. اشمعني؟ .. عشان خاطر الأمريكان كان حيطلع سلسفينهم مع ناس شايلة سلاح برده ومستخبيه في غابات بس في فيتنام.
لما رجع (تشارلز) من ماليزيا كانت توصيته إن والله القوات البرية الأميريكية محتاجه يبقي تحت ايدها قوة خاصة متخصصة في حتة مكافحة الإرهاب وكان توقعه إنه محتاج ست شهور عشان يختار العناصر اللي حتشكل باكورة خط انتاج أفراد الوحدة دي ومحتاج كمان سنتين عشان يمرنهم علي نفس التكتيك اللي هو شايف الناس بتاعة SAS بتستخدمه في ماليزيا .. سنة 1965 بيتم ارسال عناصر الوحدة الجديدة تحت قيادة (تشارلز) بنفسه في فييتنام عشان يشاركوا في برنامج اسمه المشروع دلتا Project Delta واللي عشان كده الوحدة بعد كده اتسمت بالاسم ده .. مشروع دلتا ده كان عبارة عن مجموعة من العمليات الخاصة بتتم بالتعاون بين عساكر أمريكان مع عساكر من فيتنام الشمالية ضد قوات الفييت كونج.. البرنامج ده كان فشيخ لدرجة إن في واحدة من العمليات بتاعته عناصر Delta Force قدرت تقتل 1000 مقاتل من الفييت كونج.
ملخص تجربة (تشارلز) في ماليزيا ومن بعدها في فيتنام إن بمنتهي البساطة المؤسسة العسكرية الأمريكية عندها مشكلة وهي إن معندهاش قوات خاصة شغلتها هي التعامل مع العمليات الإرهابية وهي دي الفكرة .. Delta Force مش قوة معمولة عشان تخش بيها حرب .. دي قوة معمولة عشان تنفذ بيها عملية محددة وياخدوا بعضهم ويروحوا .. اللي هو نفس الموديل بتاع SAS .. يوم 19 نوفمبر 1977 بيتم رسميا انشاء وحدة Delta Force تحت قيادة (تشارلز ألفن بيكويث) .. طبعاً الأفكار اللي بره الصندوق دي لما بتتعرض جوه المؤسسة العسكرية بتلاقي الجنرالات الكبار بيطبطبوا عليك بحنية كده وبيقولولك بصوت واطي بس يا حبيبي متخليش حد يزعل منك .. لحد ما بتيجي المصيبة اللي انت حذرت منها من بدري وساعتها بتلاقي نفس سيادة اللواء اللي قالك بس يا حبيبي نقطنا بسكاتك هو أول واحد بيترجاك تعالي الحقنا والنبي .. في يناير 1978 بيحصل واحد من الزلازل السياسية اللي غيروا الشرق الأوسط لحد دلوقتي وهو الثورة الإسلامية الإيرانية .. من أول ضربة نار ومع أول مظاهرة في الثورة دي وكان واضح إن الشارع الإيراني مشحون ضد أمريكا .. هم كانوا شايفينها الداعم الأكبر للرجل اللي هم قاموا بالثورة ضده الشاه (محمد رضا بهلوي) فكتير من الثوار لموا بعضهم وحاصروا السفارة الأميريكية في العاصمة طهران يوم 4 نوفمبر 1978 ومش بس كده دول اقتحموها كمان واحتجزوا 53 موظف من اللي فيها رهاين .. اللي منكوا شاف فيلم Argo فهو عارف ده كويس.
يقوم يتفتق ذهن القيادة العسكرية الأميريكية إن ليه لا نبعت طيارات هليكوبتر عليها 118 عسكري من عناصر قوات خاصة يطيروا فوق إيران كلها وسبحان الله محدش حيحس بيهم لحد ما يوصلوا للعاصمة طهران .. تقوم الطيارات نازلة فوق سطوح السفارة وفي مشهد يليق بسلسلة أفلام جيمس بوند عناصر القوات الخاصة الأمريكان البواسل يحرروا الرهاين ويحطوهم علي الطيارات اللي هم جم بيها وتوتا توتا خلصت الحدوتة .. فكر ميطلعش غير من طفل صغير اتفرج علي افلام أكشن كتير وهو صغير بس ده الفكر اللي اتبنت عليه عملية مخلب النسر Operation Eagle Claw وفيه ناس تانية بتسميها عملية الصحراء واحد Operation Desert One واللي تمت يوم 24 إبريل 1980 .. كفاية إني أقولك إن العملية باظت خالص لدرجة إن الباشاوات اللي خططولها محدش كلف نفسه يقرأ تقرير الأرصاد الجوية اللي بعد كده عرفنا منه ان حتقوم عاصفة رملية تسببت في سقوط طيارة هليكوبتر من اللي راحوا ينفذوا العملية ومات فيها 8 عساكر أمريكان واتصاب 4 تانيين .. فشل عملية مخلب النسر دي كان كابوس حقيقي علي كل الناس اللي اتقال اسمهم ضمن اللي اشتغلوا عليها من اصغر عسكري لحد الرئيس الأميريكي شخصياً وقتها (جيمي كارتر).
من ضمن النتايج المترتبة علي الكارثة بتاعة عملية مخلب النسر إن وحدة Delta Force انفصلت عن قيادة القوات البرية ومش بس كده .. فاكر لما قلتلك إن فيه أفرع رئيسية للقوات المسلحة كل فرع له وحدة قوات خاصة مستقلة .. اللي حصل إنهم عملوا فرع جديد من أفرع القوات المسلحة الأميريكية سموه JSOC ودي اختصار Joint Special Operations Command أو قيادة العمليات الخاصة المشتركة ودي بمنتهي البساطة جابوا كريمة الكريمة بتوع القوات الخاصة من كل الأفرع الرئيسية للقوات المسلحة حطوهم في وحدة مستقلة بحيث Delta Force بتاخد أوامرها من JSOC بشكل مباشر ومقر الليلة الكبيرة دي كلها في قاعدة فورت ليبرتي في ولاية كارولينا الشمالية.. أول اختبار حقيقي ليهم بعد ما بقوا وحدة منفصلة كانت غزو جزيرة جرانادا سنة 1983 ودي قصة تتحكي لوحدها في يوم تاني بس هي كانت عملية خفيفة لإن عناصر Delta كانوا جزء صغير من قوة عسكرية كبيرة قوامها 7,600 عسكري.
معركة مقديشيو .. هو انا مكتوب علي وشي ارزعني قلم وامشي:
دي يمكن تعتبر في رأيي ألم عباسي علي قفا المؤسسة العسكرية الأميريكية يمكن أقوي من الالم بتاع عملية مخلب النسر لإن معركة مقديشيو الأولي اللي حصلت في 3 أكتوبر 1993 تعتبر في رأيي يعني درس قاسي أوي في إن يمكن أهم حاجة أي قوة عسكرية لازم تتعلمها وتعرفها وكويس إنها تبقي عارفه هي حدود قدراتها إيه .. أنتوا قوة عسكرية مكونة من بني أدمين خليهم ربنا .. أنتوا مش سوبرهيروز .. أنتوا مش الأفينجرز .. قصة معركة مقديشيو الأولي اتحكت في كتاب Black Hawk Down اللي اتحول لفيلم من أخراج (ريدلي سكوت) .. المعركة دي مات فيها 18 عسكري أمريكاني من ضمنهم اتنين قناصة من وحدة Delta Force اللي هم (جاري أيفان جوردون) و (راندال ديفيد شوجارت) والاتنين خدوا ميدالية الشرف Medal of Honor واللي تعتبر أهم وسام عسكري بيمنح لأفراد القوات المسلحة الأميريكية.
معركة مقديشيو بدأت بعملية عسكرية محدودة عشان خاطر إن القوات الأميريكية في الصومال تعتقل كذا واحد من حكومة (محمد فرح عيديد) اللي علي حسب كلام الأمريكان كان أمير حرب في الصومال .. في رأي صوماليين كتير وقتها هو كان بيحارب ضد الوجود العسكري في بلدهم .. تاني .. رأي الناس في الحرب بيختلف علي حسب هم واقفين في مدرجات مين بس مش دي القضية .. القضية إن العملية المحدودة لإعتقال 3 بني أدمين تحولت لحرب شوارع ليوم كامل وقعت فيها طيارتين هليكوبتر من طراز بلاك هوك ومات فيها 18 عسكري أمريكاني من ضمنهم 5 عناصر من Delta.
اغتيال (أبوبكر البغداد) .. بيدي لا بيد ديلتا:
في اكتوبر 2019 حصلت العملية اللي تعتبر النقطة المضيئة في سجل Delta Force وهي عملية كايلا ميولر Operation Kayla Mueller واللي لو دخلت علي اي موقع بيتكلم عنهم حتلاقيهم ماسكين العملية دي طايرين بيها علي أساس إنها الدليل إن Delta Force بشكل ما هي أحسن قوة عسكرية خاصة حصلت في تاريخ البني الأدمين والعملية دي هي اغتيال (أبوبكر البغدادي) اللي كان وقتها قائد تنظيم الدولة الإسلامية في العراق .. المشكلة مش في كده .. المشكلة إن خلال ضرب النار اللي حصل خلال العملية ولما (أبوبكر البغدادي) لقي نفسه متحاصر هو لبس حزام ناسف وفجر نفسه.
يمكن اللي عايز اختم بيه إن خلال مدة خدمة Delta Force في رأيي الشخصي علي الأقل هم معملوش غير يدوبك مهمة ناجحة واحدة عليها القيمة وفي مقابل ده لما بتتكلم مع المؤسسة العسكرية الأميريكية تلاقيهم رافعينهم السما .. يارجل دي حتي ميزانية وزارة الدفاع مش معترفة أصلاً بيهم وبتعتبرهم مش موجودين رسمياً في سجلات الوزارة كنوع من أنوع الحفاظ علي السرية اللي ارتبطت بالوحدة دي .. بس ده ميمنعش إن القيادة العسكرية الأميريكية نفسها واخدة Delta Force جد فشخ وده بيبان في مرحلة الأنضمام ليهم .. لنفترض إنك ضابط عايز تبقي عضو في Delta Force فانت بسم الله الرحمن الرحيم كده بتاخد كورس مدته شهور في الملاحة ومعاه اختبار لقدراتك البدنية .. بعد ما بيتأكدوا إنك تقدر تقف علي حيلك مع الضغط البدني فانت بتتقيم ذهنيا من ضمنها انترفيوهات مع دكاترة نفسيين عشان يقيموا هل انت حتقف علي حيلك مع الضغط النفسي اللي انت حتشوفه في الشغلانة .. تقريباً يعني 10% بس من اللي بيقدموا للأنضمام للوحدة بيتقبلوا إنهم يخشوا مرحلة التدريب .. إنت متخيل؟ .. يعني إنت بتتسحل عشان تخش وبعد ما 90% من المتقدمين بيترفضوا فاللي فالح فيهم بيتأهل عشان يدوبك يخش مرحلة التأهيل للإنضمام ومدتها 6 شهور بتتعلم فيهم اقتحام المباني السكنية وبتتعلم الاشتباك اليدوي وبتتعلم اساسيات النسف والتدمير ومكافحة الارهاب وانقاذ الرهاين .. مش بس كده .. إنت في الست شهور دول بيجيلك ناس من وكالة المخابرات المركزية CIA يدوك كورسات في أساسيات التجسس.
تفضل مشكلة التقييم في رأيي هي النقطة اللي مفيش حد حيعرف يحسمها .. يعني أنا لو سألت هو ياتري بعد كل التدريب والفلوس والدم والضحايا هل Delta Force جايبه همها؟ حتلاقي إن مفيش حد عنده إجابة قاطعة وأنا شخصياً مش حبقي أبوالعريف اللي حجيبلك التايهة وأقولك إجابة شافية وافية .. اللي نقدر نعمله دلوقتي هو أننا نسأل السؤال ونحاول سوا ندور علي إجابة .. بناء علي أحصائية غريبة شوية إن خلال الفترة من 2001 لحد 2009 اللي هي فترة عز ما يسمي الحرب الأمريكية علي الإرهاب الإسلامي حتلاقي إن في 8 سنين بس قوات Delta Force خسرت 20% من إجمالي عدد أفرادها كقتلي في ضرب نار وإن 50% من أفرادها خلال نفس الفترة حصلوا علي وسام القلب البنفسجي Purple Heart اللي هو واحد من الأوسمة اللي بتديها المؤسسة العسكرية الأميريكية لعساكرها.
السرية جزء مهم من السبب ورا صعوبة التقييم .. حديلك مثال بس إن الوحدة دي اتكونت زي ما قلت سنة 1977 بس اول مرة يتقال اسمهم قدام الناس كانت سنة 1983 لما مؤسس الوحدة (تشارلز بيكويث) اعترف بوجودهم في كتاب .. ده بيخلي أي حد عايز يقيم نجاحهم مش حيعرف .. لو دخلت علي YouTube دورت بس علي اسم Delta Force حتلاقي فيديوهات كتير لناس كانوا عساكر جوه الوحدة دي فاضلهم شوية ويقولوا علي نفسهم تنانين بيطلعوا نار من بقهم .. هل دي حاجة نقدر نبني عليها رأي؟ .. بالتأكيد لا .. ده زي إني أعمل بودكاست اقول فيه إني أحسن رجل في السرير ومفيش زيي في الدنيا .. ما هو الكلام معليهوش ضرايب.
المصادر:
- مقالة بعنوان The Delta Force Looks Unstoppable يعني قوات دلتا فورس شكلها بيقول إن مفيش حد يقدر يقف قدامها .. نشرت في مجلة The National Interest وده لينك المقالة الأصلية:
The Delta Force Looks Unstoppable – The National Interest - مقالة بعنوان Unstoppable Delta Force: The Very Best Special Forces Unit on Planet Earth يعني دلتا فورس اللي محدش يقدر وقفها اللي تعتبر أفضل وحدة قوات خاصة علي الأرض .. نشرت في مجلة The National Interest وده لينك المقالة الأصلية:
Unstoppable Delta Force: The Very Best Special Forces Unit on Planet Earth – The National Interest - مقالة بعنوان 10 Facts About Secretive US Army Unit Delta Force يعني 10 حقايق عن الوحدة السرية للقوات البرية الأميريكية ديلتا فورس نشرت في موقع History Hit وده لينك المقالة الأصلية:
10 Facts About Secretive US Army Unit Delta Force | History Hit
