لينك التسجيل الصوتي علي ساوند كلاود:
https://on.soundcloud.com/fSNPP
من ضمن كل المقاتلات السوفيتية اللي خرجت من تحت إيد مكتب التصميمات الروسي المشهور ميكويان جوريفيتش Mikoyan Gurevitch سواء كنت بتتكلم عن MiG-15 Fagot أو MiG-21 Fishbed أو MiG-25 Foxbat تبقي السوخوي-27 فلانكر أو Su-27 Flanker و الMiG-29 Fulcrum هي الشويبس أناناس و الشويبس جولد بتاعتهم .. محدش قال إن منتجات شويبس التانية وحشة بس لما بتطلب معاك تشرب شويبس متنكرش إنك أول حاجة بتدور عليها هي الشويبس أناناس أو الشويبس جولد .. سبب إن أنا بشكر أوي في الSu-27 Flanker هو إنك لما تيجي تبص علي هم السوفييت كانوا بيفكروا في إيه لما جم يصنعوها فهم كانوا عايزين طيارة زي شخصية (زكريا الدرديري) كده اللي قدمها الفنان (يوسف عيد) الله يرحمه في فيلم الناظر صلاح الدين .. هم كانوا عايزين طيارة تنفع لتوجيه ضربة جوية ساحقة لقواعد دول حلف شمال الأطلنطي NATO في أوروبا وفي نفس الوقت طيارة تنفع للدفاع عن المجال الجوي السوفيتي ضد أي محاولات للقاذفات الأميريكية إنها تخترقه.
لما تيجي تشوف الCareer بتاعة الSu-27 Flanker تلاقيها طيارة حققت اللي المهندسين الروس كانوا عايزينه منها و كمان جابت فلوس حلوة أوي لروسيا من بيعها لدول تانية .. بإختصار الطيارة دي كانت هي (كريستيانو رونالدو) لريال مدريد .. جابلهم كل البطولات اللي هم عايزينها و حتي لما باعوه كسبوا فيه فلوس.
إزاي فكرة الSu-27 Flanker إتولدت؟
في السبعينات و الثمانينات الأمريكان و السوفييت طقت في دماغهم يعملوا مقاتلة Mix اللي بتعمل كل حاجة .. تنفع قاذفة و مقاتلة هجومية و دفاعية أو اللي زي ما المهندسين بتوع الطيران بيسموها مقاتلة متعددة المهام Multi-Role Fighter .. الفكر ده إترجم في المقاتلات F-16 Fighting Falcon و F-15 Strike Eagle و الإتنين دخلوا الخدمة في القوات الجوية الأميريكية و كمان في المقاتلات F-14 Tomcat و F/A-18 Hornet والإتنين دول خدموا في القوات البحرية الأميريكية .. الروس بقي الفكر الجديد ده إترجم عندهم في المقاتلتين Su-27 Flanker و MiG-29 Fulcrum .. لما تيجي تبص علي الSu-27 Flanker كإمكانيات تلاقيها قريبة أوي من الF-15 Strike Eagle الأميريكية في حاجات كتير:
- الإتنين تقريباً ليهم نفس السرعة بحيث إن الSu-27 Flanker ليها القدرة إنها تطير بسرعة Mach 2.35 يعني 2.35 ضعف سرعة الصوت.
- الإتنين بيقدروا يشيلوا تسليح كتير .. عندك الSu-27 Flanker بتقدر تشيل 8 صواريخ جو-جو معظمها صواريخ مداها إما قصير أو متوسط وفيه نسخ منها بتبقي عليها صواريخ بتقدر تصطاد مقاتلات معادية أبعد من مدي الرؤية بتاع الطيار ده غير إنها بتقدر تشيل كوكتيل من الصواريخ و القنابل.
- إدي الSu-27 Flanker لطيار فاهم هو بيعمل إيه و حيقدر يعمل بيها شقلباظات و مناورات جوية ممكن تخليك تعمل حمام علي نفسك و إنت بتتفرج.
- الإتنين ليهم مدي طيران كبير و إن كان الفرق بين الإتنين في الشكل صعب متلاحظوش .. تحس إن الF-15 Strike Eagle شبه واحد عامل فورمة ومعضل حبتين بس الSu-27 Flanker شبه لاعب جومباز من كتر ما هو جسمه مفيهوش حتة دهن أو عضلة ملهاش لازمة .. بس رغم كل ده بداية الSu-27 Flanker العملية كانت عبارة عن سلسلة من الكوارث اللي ربنا ستر فيها.
في فترة الإختبارات بتاعتها إتعرضت الSu-27 Flanker لشوية حوادث أدت لوفاة طيارين و حتي لما ربنا فتح علي الروس وعرفوا يدخلوها الخدمة في منتصف الثمانينات إكتشفوا فيها شوية مشاكل في التصنيع خدت وقت عشان تتحل وحتي لما كل المشاكل دي إتحلت إذا بسنة 1989 الإتحاد السوفيتي ينهار وتدخل روسيا في فوضي سياسية أدت هي كمان لتأخير زيادة في دخول المقاتلة للخدمة .. مجموعة الكوارث والمشاكل و سوء الحظ دي كلها و اللي تحسسك إنها طيارة وشها فقر كانت سبب في إن دخول الSu-27 Flanker في الخدمة إتاخر أوي عن الF-15 Strike Eagle أو الF-16 Fighting Falcon و إتأخر حتي عن الMiG-29 Fulcrum.
النسخة اللي بتتصدر من الSu-27 Flanker:
النسخة الأصلية من الطيارة دي إتباعت لدول كتير أوي ولسه لحد دلوقتي فيه منها 809 مقاتلة في الخدمة في القوات الجوية ل11 دولة مختلفة .. روسيا عندها 359 طيارة منها و بكده هي أكتر دولة في العالم عندها النوع ده من المقاتلات تيجي وراها الصين اللي عندها 59 مقاتلة في الخدمة .. من النادر إنك تشوف حرب قامت بين دولتين وتلاقيهم هم الإتنين بيستخدموا نفس السلاح ضد بعض بس ده حصل كتير في حروب حول العالم زي مثلاً حرب روسيا مع أوكرانيا و حرب أثيوبيا مع أريتريا و حرب فيتنام مع الصين لما الدولتين إستخدموا مقاتلات Su-27 Flanker ضد بعض.
بس لما روسيا صدرت الطيارة دي للصين ده عمل مشكلة كبيرة بين البلدين و المشكلة دي محتاجه تتشرحلك عشان تفهم إن تصدير السلاح لدول تانية أحياناً بيفرقع في وش الدولة المصدرة .. أول ما الروس طرحوا الSu-27 Flanker للتصدير الصين إشترت منها عدد محترم و مضت عقد مع روسيا عشان الصين تبدأ تتعاون معاها لإنتاج الطلبية التانية وكمان الصين خدت من روسيا رخصة إنها تصنع الSu-27 Flanker علي أرضها .. فجأة الروس إكتشفوا إن الصينيين خدوا الSu-27 Flanker وعدلوا فيها شوية وهوبا قاموا منزلينها السوق علي إنها طيارة مقاتلة صينية إسمها J-11 و قبل ما روسيا تستوعب الصدمة الصين نزلت النسخة الأحدث منها J-16 اللي فعلاً تعتبر نسخة طبق الأصل من الSu-27 Flanker ومن ساعتها و الروس حالفين إنهم مش حيصدروا سلاح تاني للصين.
سجل الSu-27 Flanker في المعارك:
بالنظر لإمكانيات الSu-27 Flanker المحترمة أوي إلا إنها مدخلتش معارك بالشكل اللي إنت ممكن تتخيله .. صحيح هي أُستخدمت في الحرب اللي إندلعت بين روسيا و أوكرانيا بعد إنهيار الإتحاد السوفيتي لما أوكرانيا أعلنت إستقلالها زي ما قلتلك بس مش زي مثلاً الF-15 Strike Eagle اللي أول ما دخلت الخدمة في القوات الجوية الإسرائيلية مثلاً شاركت في حرب لبنان 1982 .. المشكلة إن كتير من الدول اللي إشترت الSu-27 Flanker من روسيا هي دول مسالمة بشكل مستفز زي إسبانيا.
أخر حاجة ممكن تتقال عن الSu-27 Flanker هي إنها أخر حلقة من سلسلة مقاتلات الجيل الرابع اللي بتنتجها روسيا لإن الكلام دلوقتي هو إن روسيا حتبدأ تخش جامد في موضة مقاتلات الجيل الخامس أو اللي بتتمتع بخاصية التخفي من الرادارات Stealth بس المشكلة إن الروس عندهم مشاكل في اللمسات الأخيرة للتصميم بتاع المقاتلة PAK FA أول مقاتلة جيل خامس تنتجها روسيا و اللي بعد كده إتسمت سوخوي سبعة و خمسين أو Su-57 و لحد ما ربنا ينفخ في صورتهم و يدخلوها الخدمة حتفضل الSu-27 Flanker معانا كمثال للطيارة الناجحة اللي تصميمها مفيهوش غلطة و إن كانت في بدايتها خالص كانت تحسسك إنها أكبر كارثة هندسية في تاريخ صناعة الطيارات الروسية.
المصدر:
مقالة بعنوان Su-27: The Russian fighter jet that almost crashed into a US spy plane نشرت في مجلة The National Interest وده لينك المقالة الأصلية:
http://nationalinterest.org/blog/the-buzz/su-27-the-russian-fighter-jet-almost-crashed-us-spy-plane-24277
