لينك التسجيل الصوتي للمقالة علي Sound Cloud:
https://soundcloud.com/user-112011687-312727988/zxame8w5bqss
يحكي أن زمان كان فيه حاجة إسمها الحرب الباردة Cold War بين أميركا و بين كيان إسمه الإتحاد السوفيتي اللي إنت تعرفه دلوقتي بإسم روسيا .. الحرب دي بدأت من بعد الحرب العالمية الثانية سنة 1945 ما خلصت لحد سنة 1990 بحيث إنها مكانتش حرب بالمعني التقليدي لكلمة حرب قد ما كانت إن الأمريكان و السوفييت بيلعبوا مونوبولي بس بحق و حقيقي .. خناقة علي مين يفرض سيطرته علي حتت أكتر من العالم .. فعلياً الأمريكان و السوفييت مضربوش طلقة واحدة علي بعض .. بس من تحت الطرابيزة فيه فلوس بالهبل إتدفعت و أرواح متتعدتش ماتت في الخناقة دي .. جزء من الحرب الباردة كان سؤال مهم اللي هو دلوقتي أنهي قوات بحرية تقدر إنها تسيطر علي طرق التجارة العالمية؟ .. مين فيهم عنده قوات بحرية أقوي؟ .. إجابة الأمريكان علي السؤال ده كانت إن إحنا عندنا حاملات طائرات محصلتش قبل كده .. إتكلمنا قبل كده عن حاملات الطائرات و قلنا إنها مطارات متحركة في المياه بس إجابة السوفييت علي السؤال ده كانت إن إذا كان الأمريكان عندهم حاملات طائرات فإحنا عندنا غواصات .. و مش بس كده .. إذا كان الأمريكان عندهم حاملات طائرات لم تخطر علي بال أحد فإحنا عندنا طوربيدات مالم نسمع بها من قبل و مفيش أقوي من الطوربيدات اللي بتتحط تحت فئة Supercavitating Torpedoes .. لو إنت مهندس ميكانيكا فإنت غالباً أول ما قريت كلمة Cavitation قلت بعلو صوتك لاااااااااا .. إنتي لااااااا .. لو إنت مش مهندس ميكانيكا فمتحاولش تترجمها عربي لإن ملهاش ترجمة بس أنا ممكن أفهمك إيه البتاعة دي.
أول طوربيد سوبركافيتيتنج Supercavitating يعمله السوفييت كان إسمه الصرخة .. اه و الله إسمه كان كده .. السوفييت سموه شكفال VA-111 Shkval و ترجمتها Squall يعني الصرخة .. رغم إن الطوربيد ده بالذات السوفييت عملوه وقت الحرب الباردة و بدأوا شغل عليه في الستينات تحت إشراف حاجة إسمها NII-24 و دي زي ما تقول كده تبقي الهيئة الهندسية للقوات المسلحة بتاعة السوفييت و دخل الخدمة فعلياً سنة 1979 إلا إن الأمريكان معرفوش إنه موجود إلا بعد ما الحرب الباردة خلصت و إنهار الإتحاد السوفيتي في التسعينات و ده في حد ذاته في رأيي يعني حاجة لازم تحسب للمخابرات السوفيتية إنها قدرت تحمي سلاح زي ده من إنه يتكشف .. هو طوربيد يبان عادي و شكله حتي عادي .. أبعاده زي أي طوربيد Standard معمول بقطر 533 مليمتر و بطول 8.3 متر و بيقدر يشيل عبوة ناسفة كتلتها 208.6 كيلوجرام .. حتي مداه مش كبير أخره يجري 7,500 متر .. بس أهم معلومة تعرفها عن الطوربيد ده سرعته .. في الوقت اللي قوانين الفيزياء كلها بتقول إن أقصي سرعة لأي حاجة متحركة تحت سطح المياه مستحيل تعدي سقف 50 عقدة يعني 92.6 كيلومتر في الساعة إلا إن الطوربيد ده كان بيقدر يعوم بسرعات تعدي 200 عقدة يعني بسم الله ما شاء الله 370.4 كيلومتر في الساعة .. عشان بس أحطك في الصورة فدي سرعة تقريباً أربع أضعاف سرعة الطوربيد Mark 48 اللي أغلب الغواصات الأميريكية بتستخدمه .. عارف إنك يا بتهرش في شعرك يا شاكك إن دي تكون غلطة مطبعية يا عايز تزعقلي و تقولي ما تعقل الكلام اللي إنت بتقوله يا جدع إنت بس صدقني الرقم مش غلطة و في نفس الوقت هو لا سحر ولا شعوذة.
براحة كده .. أي طوربيد في الدنيا عادة بيمشي لقدام عن طريق رفاص أو Propeller زي أي غواصة أو أي مركب .. طوربيد Shkval أو الصرخة ده شالوا فيه الرفاص خالص و حطوا محرك صاروخي بس مش دي الفكرة .. مش معني إني جبت صاروخ ركبته في طوربيد و طلقته في المياه إن الطوربيد ده حيجري بسرعة لإن فيه حاجة إسمها Drag أو مقاومة المياه لحركة الطوربيد و كل ما الطوربيد سرعته في المياه زادت كل ما Drag أو مقاومة المياه هي كمان بتزيد .. فتاني .. مش معني إني جبت بنزين و حرقته و خليت العادم يجري بالطوربيد إني بقدرة قادر حخلي الطوربيد يوصل لسرعة عالية .. الحل مش كده .. الحل إنك تشيل المياه خالص من قدام الطوربيد و هو بيجري و من هنا جت تسميه Supercavitation.
هو يجري حاجة لو جبنا العادم بتاع غازات الإحتراق اللي بتطلع من حرق البنزين بتاع الوقود في المحرك الصاروخي اللي ركبناه في الطوربيد و بدل ما خليناه يطلع من ورا زي ما العادم بيطلع من شاكمان عربيتك مشيناه في مسارات جوه الطوربيد بحيث طلعناه قدام الصاروخ و هو ماشي؟ .. لما تطلع غازات عادم سخنة في المياه فإنت كده بتغلي المياه يعني بتحولها من مياه لبخار .. يعني إنت تقدر تخلق فقاعة هواء حول الطوربيد و هو ماشي في المياه و لإن مقاومة الهواء أقل بكتير من مقاومة المياه فإنت تقدر تخلي الطوربيد بتاعك يجري بسرعات بتوصل 200 عقدة أو 370.4 كيلومتر في الساعة .. لكن .. و حط كذا خط تحت كلمة لكن دي .. العيلة دي من الطوربيدات ليها كذا مشكلة:
- الطوربيد ده يبقي شغال و زي الفل طول ما هو ماشي في خط مستقيم .. مجرد إن الطوربيد تقوله يحود فده معناه إن جزء من جسم الطوربيد حيطلع بره فقاعة الهواء اللي إنت عاملها حوليه .. عارف ده معناه إيه؟ .. معناه إنك عرضت الطوربيد لمقاومة مياه بشكل مفاجيء و هو بيجري بسرعة 350 كيلومتر في الساعة .. زي ما إنت كده تكون بتجري بعربيتك و مقفل عداد علي الطريق و فجأة أحطلك مطب.
- فكرة إن يبقي عندك محرك صاروخي و حرق وقود و إنفجار جوه غرفة إحتراق كل ده تحت المياه فبيخلي الطوربيد وهو بيطلع من الغواصة صوته عالي أوي و بمجرد ما ينطلق فالغواصة المعادية ضابط السونار اللي فيها حيقدر يحدد بالضبط هي الغواصة السوفيتية اللي ضربت الطوربيد دي فين؟ و علي عمق كام؟ و ماشية بسرعة قد إيه؟ .. صحيح إن الغواصة الأميريكية مثلاً اللي الطوربيد ده إتضرب عليها مش حتلحق تهرب منه و هو جاي عليها بسرعة تعدي 350 كيلومتر في الساعة بس ممكن ضابط السونار يلحق يبعت المعلومات دي لأي غواصة تانية أو أي حاملة طائرات أميريكية عشان تبدأ هي تجري ورا الغواصة السوفيتية.
- النقطة دي الذات خلت السوفييت يُجبروا إنهم يصنعوا طوربيدات Shkval بأنظمة توجيه بدائية جداً لإنهم عارفين إن الصاروخ مينفعش تقوله إحود .. الأهم إن أغلب الطوربيدات دي كان بيتركب عليها رؤوس نووية بحيث إن حتي لو الطوربيد منفجرش جوه الهدف بتاعه فهو حيكون قريب منه بما يكفي إن لما الرأس النووي بتاعه ينفجر فالهدف اللي إنت عايز تدمره حيروح في ستين داهية.
- العيب الرابع و يمكن أسوأ عيب هو إنك حتي لو نشفت دماغك و قلت عليا الطلاق لأركبلك نظام توجيه عشان أخليك تحود و تناور في المياه بدل ما إنت ماشي في خط مستقيم كده فإنت حتلبس في الحيط .. تحت المياه أنظمة التوجيه بتعتمد علي حاجة إسمها سونار سواء بقي إنت بتتكلم عن سونار Active أو Passive و الفرق بينهم ممكن نتكلم فيه بعدين بس إنت محتاج تركب جهاز سونار علي الطوربيد .. المشكلة إن فقاعة الهواء و المحرك الصاروخي بيعملوا دوشة جامدة لدرجة إن السونار عمره ما حيشتغل .. الحل اللي الروس عملوه مع النسخ الأحدث من طوربيد Shkval هو إنهم يخلوا الطوربيد يجري بسرعة في خط مستقيم و بعد كده المحرك الصاروخي ده يبطل يشتغل و الطوربيد يمشي زي أي طوربيد عادي برفاص بحيث إن أنظمة التوجيه علي الطوربيد تبدأ تدور علي الهدف بتاعه و تجري وراه.
فيه دول كتير بقت بتسعي ورا تطوير فكرة Supercavitiating Torpedoes .. عندك أميركا مثلاً اللي القوات البحرية بتاعتها بتحاول تطلع الطوربيد اللي عندهم Mark 48 بره الخدمة و يحلوا محله بطوربيد أحدث و ياسلام بقي لو شغال بالتكنولوجيا دي بس تبقي المشكلة إن Requirements أو طلبات القوات البحرية الأميريكية تخليك تحس إنهم عايزين (زكريا الدرديري) مش طوربيد .. هم عايزين طوربيد يجري بنفس سرعة Shkval بس بيكون بيقدر يناور تحت المياه و يحدد الأهداف بتاعته و يجري وراها .. معني الكلام ده إن أيوه لحد دلوقتي مفيش إلا دولة واحدة بس بتقول إن عندها طوربيدات من نوعية Supercavitating Torpedoes اللي روسيا .. علي فكرة الروس بيصدروا الطوربيدات دي و النسخة اللي بتتصدر إسمها Shkval E .. الإيرانيين من ناحيتهم بيقولوا إن عندهم Supercavitating Torpedo بتاعهم مسميينه الحوت Hoot بس لما تيجي تبصله تلاقيه هو هو طوربيد Shkval بس معمول بReverse Engineering ده غير إن الله أعلم الطوربيد الإيراني ده بيشتغل أصلا ولا لا.
المصادر:.
- مقالة بعنوان Russia’s 200 knot ‘supercavitating’ torpedoes leave America speechless نشرت في مجلة The National Interest و ده لينك المقالة الأصلية:
https://nationalinterest.org/blog/buzz/russias-200-knot-supercavitating-torpedoes-leave-america-speechless-112496 - مقالة بعنوان Supercavitating Torpedoes نشرت في مجلة Popular Science و ده لينك المقالة الأصلية:
http://www.popsci.com/scitech/article/2004-06/supercavitating-torpedo/
