لينك التسجيل الصوتي للمقالة علي Sound Cloud:
https://soundcloud.com/user-112011687-312727988/22-35a?si=5ead01e898da4f70ad55a15f1f8e8262&utm_source=clipboard&utm_medium=text&utm_campaign=social_sharing
تخيل معايا حضرتك إنك بتشجع فرقة بيلعب فيها (ليونيل ميسي Lionel Messi) و (كريستيانو رونالدو Cristiano Ronaldo) مع بعض .. علي الورق دي حتبقي أجمد فرقة في العالم لإن فيها أجمد إتنين لاعيبه في العالم .. جيت يا عيني تتفرج عليهم أول ماتش يلعبوه سوا تكتشف إن الإتنين مش فاهمين بعض خالص و كأن الفرقة محكوم عليها يا تلعب ب(ميسي) لوحده أو ب(رونالدو) لوحده لكن الإتنين مع بعض مينفعش .. حاجة تجيب إحباط صح .. أهو ده اللي حصل مع القوات الجوية الأميريكية .. الناس دول عندهم (ميسي) و (رونالدو) بتوع الطيارات المقاتلة اللي هم F-22 Raptor و F-35 Lightening II .. الطيارتين دول هم أحدث طيارتين مقاتلتين في الترسانة الجوية الأميريكية و مش ببالغ لو قلت إنهم أقوي طيارتين مقاتلتين في العالم دلوقتي .. الإتنين من مقاتلات الجيل الخامس يعني ليهم القدرة علي التخفي من الرادارات أو زي ما بتتسمي Stealth .. الإتنين ليهم قدرة علي المناورة أكتر من أي مقاتلة تانية في العالم .. و رغم كل ده فالإتنين مبيقدروش يتكلموا مع بعض و ده سببه غلطة غبية تستغرب إزاي تطلع من مؤسسة المفترض إنها عارفه هي بتعمل إيه زي القوات الجوية الأميريكية.
المشكلة بدأت مع ولادة فكرة الF-22 Raptor حوالي سنة 1985 .. الفكرة كانت إنك تعمل طيارة مش بتتلقط بالرادارات السوفيتية و ده معناه إنك تلعب مش بس في تصميمها الخارجي إنما كمان في أنظمة الإتصالات بتاعتها لإن أكتر حاجة بتكشف مكان الطيارة مش الحرارة اللي بتطلع من محركها زي ما ناس كتير متخيله قد ما اللي ممكن فعلاً يكشف مكان الطيارة هو إعتراض الإتصالات بتاعتها .. لما الإتحاد السوفيتي إنهار سنة 1989 القوات الجوية الأميريكية مبقتش شايفة إنها محتاجه تصرف الفلوس دي كلها علي مشروع عسكري سوري في الكلمة فاشخ الميزانية العسكرية زي F-22 Raptor لحد ما في سنة 2009 وزير الدفاع الأميريكي وقتها (روبيرت جايتس Robert Gates) لغي المشروع و بداية من السنة دي الF-22 Raptor مبقتش تتصنع تاني و هي دي المشكلة .. القوات الجوية الأميريكية كانت طالبه يجيلها حوالي 370 طيارة F-22 Raptor بس الحقيقة عشان وزير الدفاع لغي المشروع بدري فبقي كل اللي تحت إيدها 183 طيارة بس و بالتالي العدد ده مبقاش يكفي إنه يشتغل لوحده في أسراب مقاتلة بحيث لما الF-35 Lightening II تدخل الخدمة تشتغل في أسراب مقاتلة تانية و الإتنين يكملوا بعض .. بسبب إن الأمريكان بقي تحت إيدهم عدد محدود من الF-22 Raptor فده خلاهم مجبرين إنهم فيه أسراب مقاتلة معينة لازم يدخلوا شوية طيارات F-35 Lightening II عشان تسند العدد القليل بتاع مقاتلات F-22 Raptor و هنا ظهرت المصيبة.
زي ما قلتلك تصميم الF-22 Raptor ثمانيناتي .. اللي هو حاجة كده زي لما تيجي تقول لمغني قديم حبتين زي (إيمان البحر درويش) تعالي إعمل دويتو مع (تامر حسني) فطبيعي الإتنين ميبقوش فاهمين بعض .. لما الأمريكان فكروا يصمموا الF-22 Raptor كان فكرهم إتبني علي أساس إنهم يخلوا الطيارة كلها Stealth و ده معناه إنهم حطولها أنظمة إتصالات مش بتتلقط .. وقتها تكنولوجيا Intra-Flight Data Link أو IFDL كانت ثورة في هندسة الإتصالات بس الكلام ده في الثمانينات و دلوقتي التكنولوجيا دي تعتبر قديمة أوي مقارنة بالتكنولوجيا بتاعة أنظمة الإتصالات اللي موجودة علي الF-35 Lightening II .. لما جم يجربوا يخلوا الF-22 Raptor تشتغل مع الF-35 Lightening II إكتشفوا إنها بتقدر تستقبل أي بيانات مش بس من الF-35 Lightening II إنما كمان من أي طيارة مقاتلة تصنيع غربي زي الF-16 Fighting Falcon الأميريكية أو Rafale الفرنسية أو حتي Typhoon الأوروبية بس الF-22 Raptor مش بتقدر تبعت أي Data أو أي إتصالات أو حاجة خالص للطيارات التانية .. حاجة كده لما تبقي رايح مشوار و تكتشف إن الموبايل اللي معاك إستقبال بس و منتش عارف تتصل بوالدتك تقولها إنك حتتأخر شوية أو تبلغها حاجة مهمة و بقيت مضطر يا عيني تستني لما هي تكلمك عشان تبلغها.
و هنا يجي دور إنك تستغرب .. إزاي مؤسسة محترمة المفروض إنها فاهمة شغلها زي القوات الجوية الأميريكية قدامها مشكلة من سنة 2009 و يمكن من قبل كده كمان و لحد دلوقتي متحلتش .. إنت مخطط بقالك سنين إن الF-22 Raptor حيجيلها يوم و تشتغل مع الF-35 Lightening II ليه محدش سأل نفسه طب هم الإتنين حينفعوا يتكلموا مع بعض؟ .. بلاش دي .. و إنت بتصمم الF-35 Lightening II قلت إنك عايز تعمل طيارة فشيخة بتقدر تشوف كل حاجة في أرض المعركة و عشان كده حطيت عليها نظام إتصالات جاحد إسمه Multifunction Advanced Data Link أو MADL بحيث إنه بيخلي الF-35 Lightening II كده عامله زي (محمد أبوتريكه) أو (زين الدين زيدان) في الملعب إنه بيقدر في دماغه متفهمش إزاي يشوف مين زمايله فاضي و يديله باصة متفهمش برده عملها إزاي خلاه هو و الجون منفرد .. طيارات الجيل الخامس هي كمان بتقدر تجمع كل الData اللي بتجيبها كل الSensors بتاعة الطيارة و تفسرها مع نفسها و تعرضها علي الشاشة اللي متثبتة علي خوذة الطيار قدام عنيه .. في الشاشة دي الطيار بيشوف ساحة المعركة كإنه بيلعب Video Game من بتوع الإستراتيجي .. يعني هو شايف كل حاجة رايحة فين و جايه منين بما فيها تحركات العدو في حين إن لا العدو ولا حتي الصديق شايفه .. أزيدك من الشعر بيت .. الطيارة الF-35 Lightening II الواحدة تقدر تطير مع سرب متشكل من مقاتلات جيل الرابع اللي هي الطيارات القديمة شوية زي F-16 Fighting Falcon و F-15 Strike Eagle و تبقي عامله زي المدير الفني اللي عمال يوجه لاعيبته في الملعب مين يروح فين و يضرب مين و إزاي .. ده بيحصل عن طريق إن طيار الF-35 بيبقي شايف كل حاجة و عمال يوجه بس .. لكن هل بالشكل ده ينفع إن طيارة F-22 Raptor تطير مع طيارة F-35 Lightening II؟ الإجابة مينفعش طبعاً.
الحل اللي الأمريكان جربوه إنهم عملوا نظام إتصالات صوتي زي اللاسلكي كده بحيث إن الإتنين طيارين اللي بيطير بF-22 Raptor و اللي بيطير بF-35 Lightening II يتكلموا مع بعض صوت بس حتي مش حيقدروا يوروا لبعض حاجة علي الشاشات بتاعتهم .. حاجة كده لما تبقي محتاس في الشغل و تكلم زميلك يفهمك حاجة و يقولك بص علي إيدك اليمين حتلاقي الزرار الفلاني إبقي إضغط عليه و قولي شايف إيه .. علي فكرة الحل ده إتجرب في التدريبات و في الSimulations بس يعني متجربش في ميدان معركة عشان بس تكون فاهم .. طبعاً فيه منكوا بيضحكوا علي الحل ده .. ده بالضبط زي ما لما تبقي شغال في شركة ليها فرع في القاهرة و زميلك شغال في فرع الشركة التاني بره مصر و إنت شغال علي كومبيوتر وهو شغال علي كومبيوتر و مش عارفين توروا بعض شغلكوا فمقضيينها تليفونات .. طبعاً هو عمال يوصفلك و إنت عمال توصفله و محدش فيكوا فاهم كلام التاني .. حاجة تشل أنا عارف .. و علي فكرة الحل العقيم ده جه بعد ما الأمريكان قعدوا من سنة 2003 لحد دلوقتي عملوا 10 تعديلات كبيرة علي الSoftware بتاع الF-22 Raptor و صارفين خلال ال15 سنة دول 12.9 مليار دولار و بعد كل الصرف و السنين دي كلها مش عارفين يحلوا المشكلة بغير إنهم يقضوها تليفونات.
طبعاً لو إنت شغال في شركة محترمة و بتوع الIT إكتشفوا مشكلة شبه المشكلة اللي بين الطيارتين دول فالإدارة حتخليهم سهرانين و بايتين في الشغل لحد ما يلاقوا حل .. لو إنت متخيل إن القوات الجوية الأميريكية حتعمل كده هي كمان يبقي إنت متعرفش القوات الجوية الأميريكية كويس .. هم عارفين المصيبة بس قالك ما إحنا كده كده حنعمل عمرة دورية لSoftware بتاع أسطول الF-22 Raptor بتاعنا كله سنة 2021 لما يجي وقتها يبقي يحلها الحلال .. و المصحف هم ناويين يعملوا كده فعلاً .. هم ناويين يسيبوا الوضع علي ما هو عليه لحد ما تيجي سنة 2021.
حط ده كله علي جنب و هاتلي الناس بتاعة الحسابات عشان تسبلهم مية ملة .. هل تعلم سيدي القاريء إن الF-22 Raptor هي أغلي طيارة مقاتلة في التاريخ؟ .. الطيارة الواحدة واقفه علي الأمريكان ب330 مليون دولار .. ده بالنسبة لF-22 Raptor .. لما تيجي تفتح الفواتير بتاعة الF-35 Lightening II حتطلع صوت من مناخيرك و أنا مش بهزر علي فكرة .. الطيارة الF-35 الواحدة و هي واقفة علي الأرض مبتطيرش عمالة تحرق في فلوس .. لو بقدرة قادر و معرفش ده حيتعمل إزاي شركة لوكهيد مارتن Lockheed Martin اللي بتصنع الطيارتين علي فكرة ملقتش طريقة إن تكلفة صيانة الطيارة F-35 تقل بنسبة 30% علي الأقل فساعتها القوات الجوية الأميريكية حتضطر إنها بدل ما كانت ناوية تشتري 1763 طيارة حيلغوا منهم 600 طيارة عشان يبقي العدد اللي حيشتروه 1163 طيارة بس .. طب ليه الكلام ده؟ .. لو فضلت تكلفة صيانة الطيارة الF-35 علي وضعها الحالي فإنت بتتكلم إن أسطول الطيارات ده صيانته بس حتقف علي ميزانية وزارة الدفاع ب4 مليار دولار في السنة و علي سنة 2070 إن شاء الله الفاتورة حتوصل ترليون دولار و تاني بأكدلك إن دي تكلفة الصيانة بس محدش جاب سيرة التسليح ولا المرتبات ولا ثمن الطيارة نفسها.
المصدر:
مقالة بعنوان Why America’s two top fighter jets can’t talk to each other يعني ليه أحسن طيارتين مقاتلتين في أميركا مبيقدروش يتكلموا مع بعض نشرت في مجلة Bloomberg الأميريكية و ده لينك المقالة الأصلية:
https://www.bloomberg.com/news/articles/2018-04-02/why-america-s-two-top-fighter-jets-can-t-talk-to-each-other
