لينك التسجيل الصوتي علي ساوند كلاود:
https://on.soundcloud.com/3Eqx6hccgEGsn9sWTR
فيه عربيات لما بتمشي في الشارع وتشوفها لازم تبلم قدامها .. فيه عربيات شكلها بيبقي سيكسي أوي بحيث مينفعش تشوفها من غير ما تديها احترامها وتلاقي نفسك بصوت (الكبير أوي) بتقول أووووه هنا سأسكت قليلاً .. عربيات زي بورشة Pourche 911 أو لامبورجيني أفينتادور Lamporgini Aventador لو حصل وشفتهم في الشارع مش بعيد تتصور جنبهم سيلفي وتنزلها علي انستجرام رغم إن لو ربنا عطاك فلوس تخليك تقدر تشتري واحدة فيهم ممكن أساساً يعني تقول لنفسك لا يا عم شوارع مصر مينفعش معاها العربيات دي .. الطيارات كده برده .. فيه طيارات شكلها لوحده خلاها أيقونة من أيقونات هندسة الطيران .. طيارة زي الكونكورد أو زي الطيارة الهليكوبتر تشينوك CH-47 Chinook اللي يمكن متكونش عارف اسمها أو معداش عليك قبل كده بس مجرد إني اقولك الطيارة الهليكوبتر أم مروحتين فبتلاقي نفسك بشكل أوتوماتيك مخك بيفتكرها .. عادة أنا مش بحب أتكلم عن الطيارات من غير سبب والمبرر اللي حيخلينا نتكلم شوية عن الطيارة تشينوك هو الخبر اللي نزل علي موقع شركة بوينج Boeing الأمريكية اللي بتصنع الطيارة إن مصر مضت عقد لشراء 12 طيارة يوم 3 يناير 2023 بقيمة 426 مليون دولار .. الحقيقة إن صحيح المنطق بيقول إن المفروض إنك تتكلم في هل ده وقته؟ وهل في وسط أزمة الدولار اللي إحنا عايشين فيها ده ضروري إننا ندفع المبلغ ده في شراء سلاح؟ أنا عارف إنها أسئلة بنحس إننا دمنا محروق لما بنسألها بس سامحني أنا مش ناوي أخش في السكة دي دلوقتي لإن مفيش منها رجا .. النهاردة إحنا جايين نسأل سؤال واحد .. هو يا تري إحنا بنشتري إيه بالضبط؟
مبدأياً تعالي نحسم موضوع العدد .. الكلام اللي علي الورق الرسمي إننا حنشتري 12 طيارة موديل إف Model F بس انت مسموحلك توصل لحد 23 طيارة ولو حبيت يعني ممكن نزودلك 11 كمان .. عشان شراء السلاح بالذات مختلف عن شراء العريات مثلاً فانت لما بتروح تشتري عربية انت بتبقي مقرر حتشتري كام عربية وفئة إيه .. شراء السلاح مش كده أوي .. انت بيتحطلك Range اللي هو من 12-34 طيارة وانت كزبون لسه مقررتش حتشتري كام طيارة فالكلام اللي بيتكتب في العقد إن ده (وركز معايا أوي في المصطلحات) ما يسمي عرض بيع سلاح أجنبي محتمل Potential Foreign Military Sale بقيمة 2.6 مليار دولار .. يعني السعر ده اللي ممكن تلاقيه موجود علي سوشيال ميديا وتحت منه ناس بتشتم وبتسب وتلعن في ازاي القوات المسلحة بتضيع فلوس البلد هو أقصي سعر ممكن الصفقة توصله في حالة إننا قررنا نشتري كل العدد المتاح من الطيارات وده ممكن ميحصلش بس في المتوسط يعني سعر الطيارة الواحدة بيوصل 64 مليون دولار .. تاني نقطة اللي عايزه تتأكد هو انت حشتري إيه بالضبط بناء علي الكلام اللي طالع من وكالة تأمين التعاون الدفاعي الأمريكي Defense Security Cooperation Agency ودي المسئولة عن أي صفقة سلاح بتطلع من أميركا لأي بلد من حلفاءها واللي بتقول إن وزارة الخارجية الأمريكية وافقت علي طلب مصر إنها تستلم الأتي:
- إحنا حنشتري 23 طيارة موديل CH-47F ودي الUpgrade بتاع طيارات CH-47D اللي بتخدم سواء في سلاح الجو المصري أو القوات البرية الأمريكية .. الفرق بين النسختين هو الشغل اللي اتعمل في الكهربا زي ما حنشوف كمان شوية.
- كمان الصفقة بتشمل إنك تاخد 56 موتور T-55-GA-714A عشان يتركب علي الطيارات بحيث كل طيارة بيركبلها موتورين وزود عليهم 10 مواتير إحتياطي.
- بالنسبة لشغل الكهرباء فإحنا حنستلم 52 نظام ملاحة بالGPS .. حنستلم 52 نظام ملاحة اسمه Inertial Navigation System أو INS إختصاراً .. حنستلم 29 جهاز تحذير ضد الصواريخ المعادية من طراز CMWS ودي إختصار Common Missile Warning System بحيث الجهاز ده حيتركب علي 23 طيارة و 6 أجهزة إحتياطي .. المفروض إن كل طيارة CH-47F بيتركب فيها 3 مدافع رشاشة M-240 فإحنا حنستلم 75 مدفع بحيث 69 يتركبوا علي 23 طيارة وفيه 6 مدافع إحتياطي.
طبعاً فيه منكوا تاه وسط الكلام الكتير اللي كله أسامي إنجليزي ده وعشان كده جه وقت إننا نشرح هي تطلع إيه البتاعة دي اللي اسمها CH-47 Chinook للمبتدئين و خلينا نبدأ بالاسم .. لسبب لا يعلمه إلا الله الحقيقة كل طيارة هليكوبتر تشتغل مع القوات البرية الأمريكية بيختارولها اسم قبيلة من قبائل الهنود الحمر .. يعني مثلاً الهليكوبتر الهجومية أباتشي أو AH-64 Apache اتسمت علي اسم قبيلة الأباتشي .. الهليكوبتر المخصصة لنقل العساكر بلاك هوك UH-60 Blackhawk اتسمت علي اسم قبيلة الصقر الأسود أو بلاك هوك .. نفس الكلام مع التشينوك لإن كان فيه قبيلة من قبائل الهنود الحمر اسمها تشينوك عايشة في الحتة اللي اسمها ولاية واشنطن دلوقتي في أميركا .. فيه منكوا ممكن خد باله من كلمة أنا قلتها هو تخيل إنها غلطة مني وهي إن الطيارات الهليكوبتر دي بتخدم في القوات البرية الأمريكية .. الحقيقة هي اه دي مش غلطة .. زي ما في مصر القوات المسلحة بتاعتنا متقسمة أفرع رئيسية اللي هي البحرية والجوية والبرية والدفاع الجوي فبرده الأمريكان عندهم نفس التقسيمة بس فيه فرق بسيط .. إذا كان سلاح الجو عندنا في مصر هو بس اللي عنده طيارات فالأمريكان عندهم حاجة مختلفة شوية إن كل فرع من الأفرع الرئيسية له طيارات خاصة بيه .. القوات البرية تحت ايدهم طيارات هليكوبتر سواء كانت طيارات هجومية زي الأباتشي أو لنقل العساكر زي بلاك هوك أو لنقل المعدات زي تشينوك .. ودي تاني نقطة عايزك تعرفها .. التشينوك دي ما هي إلا عربية نقل بس بتطير .. بداية إن التشينوك تخش الخدمة في القوات المسلحة الأمريكية كان سنة 1961 وقت حرب فييتنام .. ولإنها طيارة نقل فهي كبيرة حبتين .. كبيرة أوي لو قارنتها بالطيارات الهليكوبتر اللي في السوق.
الطيارة CH-47 Chinook طولها بيوصل 15.6 متر وعرضها لو حسبت قطر المروحتين بتوعها فإنت بتتكلم عن 29 متر .. عشان بس أحطك في الصورة .. عارف ملعب كرة القدم .. عارف منطقة الجزاء اللي لو أي مهاجم إتكعبل فيها بتتحسب ضربة جزاء .. أهي طيارة Ch-47 Chinook واحدة يدوبك تركن في منطقة الجزاء بتاعة ملعب كرة قدم .. دي طيارة نقل بس بتقدر تطير بسرعة 313 كيلومتر في الساعة .. تخيل عربية نقل بس سرعتها علي الطريق نفس سرعة العربية الفيراري وده بيخلي التشينوك فعلياً في حتة تانية خالص .. السر في إن طيارة بالحجم ده بتقدر تشيل أوزان محترمة وفي نفس الوقت تجري زي الهيونداي فيرنا علي الطريق هو الموتورين بتوعها .. مواتير T-55 اللي بتصنعهم شركة اسمها هانيويل Honeywell اللي بيتركبوا علي الطيارات التشينوك بتاعة دلوقتي بيقدروا يدولك 5000 حصان وعشان تعرف دول قد إيه فعايزك تعرف إنك لو جيت تشوف هي أول نسخة من التشينوك اللي دخلت الخدمة سنة 1961 موتورها كان بيديلك كام حصان فحتلاقي إن مواتير دلوقتي أقوي بنسبة 150% .. عايزك تعرف إن المروحتين اللي قدام واللي ورا بيتركبوا علي نفس الكرانك شافت فلو حتي يعني موتور من الموتورين عطل في الجو فالطيارة تقدر تطير بموتور واحد عادي جداً .. لو ناوي تبعتها لمنطقة قتال فزي ما قلنا انت أخرك تركب فيها 3 مدافع رشاشة بس في الأخر لو ناوي تبعت طيارة تشينوك عشان تنقل عساكر خلف خطوط العدو فهي مش بتطير لوحدها ولازم تبعت معاها طيارات أباتشي تحميها.
التشينوك طيارة بتتصنف علي إنها طيارة متعددة المهام أو Multi-Role Aircraft .. أنا قلت إنها عربية نقل بتطير فالمفروض يعني إن ده بيخليها طيارة ليها شغلانة واحدة وهي إنها تنقل بضاعة بس الفكرة إن تنوع البضاعة اللي هي ممكن تنقلها اللي بيخليك تسميها طيارة متعددة المهام .. يعني مثلاً .. انت تقدر تنقل جواها 33 عسكري لأي حتة .. تقدر تخليها تشيل أي بضاعة سواء جواها أو بتتعلق بحبال تحتها .. بتقدر تركب فيها خزانات بنزين بتتسمي ERFS ودي اختصار Extended Range Fuel Systems عشان تبقي محطة بنزين طايرة في الجو وتقدر تمون طيارات تانية.
التشينوك بتعمل حاجات مفيش طيارة هليكوبتر تانية في السوق بتقدر تعملها .. هي بتنقل بضاعة .. بتنقل دبابات .. بتنقل مدافع .. بتنقل عساكر .. بتطير بليل وفي النهار .. بتطير في الحر والبرد .. النسخة CH-47F اللي مصر حتستلمها بتقدر إنها تشيل لحد 44 عسكري وتنقلهم لمسافة بتوصل 1063 كيلومتر .. دي طيارة بتخدم في القوات المسلحة ل22 دولة علي مستوي العالم من السعودية لأندونيسيا لتركيا لمصر وأسبانيا وإنجلترا .. محدش الحقيقة بيشكك في قدرات الطيارة أو حتي بيسأل نفسه إحنا جبناها ليه .. مش ده السؤال .. السؤال هو ده وقته؟
المصادر:
- مقالة بعنوان Egypt buys 12 Chinook helicopters from Boeing in $426M deal نشرت في موقع The Defense Post وده لينك المقالة الأصلية:
https://www.thedefensepost.com/2023/01/04/boeing-chinook-helicopter-egypt/ - فيديو بعنوان CH-47 Chinook-The wold’s most iconic helicopter نشر علي YouTube وده لينك الفيديو:
https://www.youtube.com/watch?v=g90QUoORmc0
