لينك التسجيل الصوتي للمقالة علي Sound Cloud:
https://soundcloud.com/user-112011687-312727988/2fieea3c1ah4?si=516ad87266bb46fc85792fb00e90ca81
(ويل سميث Will Smith) مش محتاج إنه يتشرح .. ده من الشخصيات اللي الناس كلها عارفاه .. لو إنت ولد فإنت أكيد شفتله أفلام Independence Day و Bad Boys و لو إنتي بنت فإنتي أكيد شفتيله فيلم Hitch .. طبعاً ده غير الأغاني بتاعته .. بس أنا مش عايز أتكلم عن ده .. أنا مش جاي أعمل ريفيو لCareer بتاعة (ويل سميث) .. أنا جاي أعرفك علي جانب من شغله إنت يمكن متكونش فاهمه أو عارفه وهو الفلوس .. عشان أفهمك أنا قصدي إيه فأنا محتاج معلش أرجعك بالزمن شوية لمارس 2016 .. بعد 30 سنة من النجاح اللي مش عايز يقف فجأة (ويل سميث) بقي عامل زي الطالب في الكلية اللي بيذاكر قبل كل إمتحان وبيعمل اللي عليه ويخش اللجنة يلاقي أسئلة هو عمره ما شافها قبل كده وبيسقط .. لا هو فاهم هو فيه إيه؟ ولا حد شايف إنه بيفهم أصل معلش أقول عليك إزاي إنك بتفهم وإنت كل إمتحان تدخله تسقط فيه؟
الإمتحان الأولاني كان فيلم After Earth واللي النقاد خدوه غسيل ومكواة .. الإمتحان اللي وراه كان فيلم ملوش معني إسمه Focus .. الإمتحان الثالث كان فيلم في رأيي إنه كويس أوي إسمه Concussion وإترشح عنه لأوسكار أحسن ممثل بس الأفلام اللي ليها قصة زي دي غالباً مش بتجيب فلوس .. إنت بتتكلم عن 3 أفلام كلهم علي بعض جابوا إيرادات 451 مليون دولار علي مستوي العالم .. إنت ممكن تبص لده وتقول ما تحمدوا ربنا هو حد لاقي .. بس إنت محتاج تفهم إنك بتتكلم عن (ويل سميث) يعني كأنك بتتكلم عن (محمد صلاح) كده .. لو لعشر ماتشات ورا بعض ليفربول كسبهم كلهم و(صلاح) لعب كل الماتشات كأساسي بس مجابش ولا جون في العشر ماتشات فرأي الناس فيه حيكون إن مستواه وقع .. تاني .. ليفربول بيكسب وإحتمال ياخد الدوري بس ده مش مهم .. المهم إن (صلاح) يجيب جوان وجوان كتير كمان .. ودي كانت مشكلة (ويل سميث) .. من وجهة نظر أستوديوهات الأفلام بتاعة هوليوود يولع الترشيح للأوسكار .. فين الفلوس؟
الإمتحان اللي وراه كان كارثة بكل المقاييس .. فيلم متفهمش إتعمل إزاي؟ ولا إتصور ليه كده؟ والفيلم ده إسمه Collateral Beauty .. الأمل كان الفيلم اللي وراه اللي (ويل سميث) حيعمله .. فيلم الناس كلها كانت بتتكلم عنه .. فيلم Suicide Squad من إخراج (ديفيد اير David Ayer) وده مخرج كويس علي فكرة هو اللي عمل فيلم Fury بتاع (براد بيت Brad Pitt) بس لأسباب كتير مش وقت شرحها دلوقتي فيلم Suicide Squad طلع فيلم هو كمان ميتشافش .. هنا شركة CAA ودي الشركة اللي بتدير أعمال (ويل سميث) كانت عماله تزن عليه .. لازم تعمل حاجة .. مينفعش تسيب Career بتاعتك بتقع كده .. ولإن الزن علي الودان أمًر من السحر ودي الحكمة اللي كل ست مصرية أصيلة عارفاها وبتطبقها بحذافيرها ف(ويل سميث) قرر إنه يفكر بره الصندوق .. لا ده فشخ الصندوق .. هو خد أكبر Risk في Career بتاعته لما قرر إنه يشتغل مع (ديفيد أير) تاني في فيلم خيال علمي إسمه Bright بس المرة دي الفيلم حتنتجه شركة Netflix.
هنا حاول تبص للموضوع من وجهة نظره وإنت حتبدأ تفهم هو خد الخطوة دي ليه؟ .. صحيح أنا ك(ويل سميث) مشتغلتش في التليفيزيون من ساعة المسلسل اللي شهرني للعالم كله Fresh Prince of Bell Air .. صحيح إن فيلم Bright مش حيتعرض في السينمات .. بس علي الناحية الثانية Netflix وافقت تديني 27 مليون دولار كمرتب كاش ومقدم وده رقم مفيش شركة إنتاج أفلام حتديهولي .. لو قررت إني أشتغل مع Netflix فأنا حتشاف في حتت كتير في العالم .. حالياً Netflix ليها وجود في 190 دولة فتخيل الملايين اللي حتتفرج عليا .. الأهم من كل ده إن Netflix بتتعامل مع فيلم Bright علي إنه مشروع مهم ليهم ولما الفيلم ده إتعمل إتكلف 100 مليون دولار ودي كانت أكبر ميزانية تتحط لفيلم تنتجه الشركة في تاريخها .. يعني صحيح فكرة إن (ويل سميث) يروح يشتغل مع Netflix كانت Risk بس تقدر تقول إنها Risk محسوبة صح.
في الوقت اللي هو كان شغال فيه علي فيلم Bright كانت فيه فكرة تانيه بتحوم في دماغه .. هو كان مبهور بالشغل اللي بيعمله (دواين جونسون Dwayne Johnson) اللي إنت ممكن تكون عارفه بإسم الروك The Rock علي Social Media سواء كنت بتتكلم عن Facebook أو Twitter أو Instagram .. الفكرة إن شغل الدعاية اللي (دواين جونسون) بيعمله لنفسه بيجيب فلوس حلوة فليه لا أعمل زيه؟ .. (ويل سميث) خلي شركة إدارة الأعمال بتاعته CAA تجيبله فريق من الناس اللي بتفهم في Social Media عشان يبدأوا يستغلوا طريقة الإلقاء بتاعته وموهبته في إنه يعمل سلسلة فيديوهات وبوستات علي Social Media .. رغم إن لحد الوقت ده هو مكنش له أي حسابات علي أي موقع من مواقع Social Media بس بمجرد ما بدأ شغله في الحتة دي قدر يجيب 38.2 مليون Follower علي Instagram و 77 مليون Like علي Facebook و 6.75 مليون Subscriber علي YouTube .. الفلوس بدأت تجيب فلوس .. في يوليو 2019 أعلن إنشاء شركة إستثمارات سماها Westbrook Inc وبيملكها هو ومراته الممثلة (جايدا بينكت سميث Jada Pinkett Smith) .. دلوقتي هو شاري أسهم في شركة Uber .. عنده شركة مياة معدنية إسمها Just Water فكرتها جت من إبنه (جايدين Jaden) اللي علي فكرة مثل معاه في فيلم The Pursuit of Happiness وفكرة الشركة دي إنها بتبيع مياه معدنية جايه من مصادر متجددة زي تحلية مياة البحر بالطاقة الشمسية ومش بتتعبي في أزايز بلاستيك إنما علب كرتون وهنا واضح إنها بتستهدف شريحة معينة من الناس اللي مهتمه بالبيئة وعايزه تحافظ عليها .. مراته (جايدا) شغاله مع بنتهم (ويلو Willow) علي برنامج تليفيزوني إسمه Red Table Talk يعتبر أكتر برنامج تليفيزوني الناس بتتفرج عليه علي Facebook Watch .. عنده أستوديو إنتاج أغاني.
هنا الحظ لعب لعبته و(ويل سميث) إتعرض عليه دور الجني في فيلم علاء الدين Aladdin واللي نجح نجاح مكنش حد متوقعه الصراحة .. حتي اللي عملوا الفيلم لو كنت قلتلهم إن الفيلم حيجيب مليار دولار في شباك التذاكر العالمي مكنش حد فيهم صدقني .. دلوقتي بعد ما كان (ويل سميث) مهدد إنه ميلاقيش شغل إذا به دلوقتي بيتحط في نفس مسطرة المرتبات بتاعة (ليناردو دي كابريو Leonardo DiCaprio) و(روبيرت داوني جونيور Robert Downey Jr.).
يحكي أن عشان فيلم علاء الدين إتصور في الأردن فإتعمل عرض خاص للفيلم في العاصمة عمان ومن ضمن الناس اللي حضرت العرض الخاص واحد إسمه (شون بايلي Sean Bailey) وده مدير الإنتاج للأفلام اللي بتعملها شركة ديزني Disney اللي أنتجت فيلم علاء الدين .. و هو ماشي علي الريد كاربيت شاف طيارة بدون طيار صغيرة طايرة فوقه بس هو خد باله إن الطيارة فيها كاميرا مركزة علي (ويل سميث) .. لما سأل عن الطيارة لقي إن الفريق بتاع Social Media اللي شغال مع (ويل سميث) هو اللي جاب الطيارة عشان يروجوا للفيلم وهي دي النقطة اللي منتجي هوليوود بقوا يبصولها .. إحنا لو إخترنا (ويل سميث) عشان يشتغل معانا فإحنا مش بس بنجيب ممثل عارف هو بيعمل إيه إنما كمان مجند معاه فريق علي Social Media عشان يروج لنفسه ولأفلامه .. الMarketing ده بفلوس .. لو أنا شركة إنتاج سواء كنت ديزني أو حتي نيتفليكس وألاقي إن (ويل سميث) عدد الناس اللي بيتفرجوا علي الChannel بتاعته علي YouTube ضعف عدد الناس اللي بتتفرج علي فيديوهات (كريستيانو رونالدو Cristiano Ronaldo) مع العلم إن (رونالدو) هو أكتر شخصية علي أنستجرام الناس عاملاله Follow يبقي أكيد الشغل معاه حيجيب فلوس حلوة .. لما الناس بدأت تقيس هو بالصلاة علي النبي كام في المية من الدعاية علي الإنترنت لفيلم علاء الدين كان السبب فيها شغل الفريق بتاع (ويل سميث)؟ لقوا إن الإجابة إنك بتتكلم عن نسبة بتتراوح ما بين 12-20% .. طب فاكر شركة Westbrook Inc. اللي هو عملها؟ .. من فترة (ويل سميث) عشان يحتفل بعيد ميلاده الواحد وخمسين نط بالباراشوت من جبال جراند كانيون في أميركا وخلي ناس من شركته تصور النطة وتروج ليها علي Social Media .. بعدها فيه شركات تانية إتصلت بيهم وطلبت إنهم يعملولها حملات Marketing علي الإنترنت.
لما (ويل سميث) غامر وإشتغل مع Netflix هو بدأ تريند مشي فيه ممثلين سينما كبار أوي من بعده .. (ساندرا بولوك Sandra Bullock) عملت معاهم فيلم Bird Box .. (مارتن سكوريسزي Martin Scorsese) إشتغل معاهم في فيلم The Irishman .. الفلوس اللي جاتله من شركته Westbrook Inc. خلته في يوليو 2018 يشتري شركة Telepool الألمانية ب40 مليون دولار .. هو عامل صندوق إستثمار إسمه Dreamers عشان يحط فلوس في شركات صغيرة كإستثمارات مباشرة .. شركته Westbrook Inc. بتحضر نفسها إنها تخش سوق إنتاج المسلسلات التليفيزيونية بإنها حتبدأ تعمل مسلسلات مشتقة من المسلسل اللي أطلق نجومية (ويل سميث) اللي هو Fresh Prince of Bell Air .. ده في الوقت اللي مرتبه كممثل مش بيقل مع إن سنه زاد .. فيلمه الأخراني Gemini Man هو خد فيه 12 مليون دولار .. فيلمه الجاي إسمه King Richard بيقوم فيه بدور أبو لاعبتي التنس الأميريكيتين (فينوس وليامز Venus Williams) و(سيرينا وليامز Serena Williams) حياخد فيه مرتب 30 مليون دولار .. فيلمه اللي بعد كده حيرجع يشتغل تاني مع نيتفليكس ويعمل الجزء الثاني من فيلم Bright .. كل مليم هو بياخده كمرتب شركات الإنتاج بتاعة الأفلام بتاخد قصاده ألف .. هم بقوا عارفين إن إختيارهم ليه عشان يبقي ممثل في أفلامهم مش بس بيخليهم يتعاملوا مع نجم شباك إنما بيتعاملوا مع بني أدم معندوش مشكلة يعمل أي حاجة عشان يعمل دعاية لنفسه ولأفلامه .. عشان يروج لفيلمه Gemini Man مثلاً هو عمل حفلة 30 دقيقة في العاصمة المجرية بودابيشت غني فيها أشهر أغانيه .. في مرة تانية عمل بوست علي أنستاجرام عشان يوري الجمهور إزاي الفيلم بيتصور .. مع (ويل سميث) الفلوس بتجيب فلوس .. الفكرة إنك تشوف إنت ناجح في إيه وبتعرف تعمل إيه وتمشي في سكته.
المصدر:
- مقالة بعنوان How Will Smith cracked the code on making real money in Hollywood .. نشرت في مجلة The Hollywood Reporter وده لينك المقالة الأصلية:
https://www.hollywoodreporter.com/features/how-will-smith-cracked-code-making-real-money-hollywood-1246035
