تابعونا

افلام و مسلسلات

فيلم جوكر: السواد عدي .. اللي جاي أسّود.

فيلم Joker والمقتبس من سلسلة Batman عرف كويس أوي إنه يوريك كم الإحباط واليأس اللي ممكن المريض العقلي يحس به بس للأسف هو محولش ده لفيلم تراجيدي.

27 نوفمبر، 2019 3.2 ألف

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/x2l0rgrlm9zj?si=f2548ba700644481bfaaf5518894ce36

ناس كتير لما شافت فيلم Joker تعاطفت جداً مع شخصية (أرثر فليك Arthur Fleck) .. ناس كتير شافت نفسها مكانه .. براحة كده نشوف ليه وإنت حتتفهم رأي الناس دي جداً .. ده رجل عايش في مجتمع خيالي في مدينة خيالية إسمها (جوثام Gotham) .. مجتمع دايس علي وش الضعيف وشايل الغني علي كفوف الراحة .. شبهنا صح؟ .. مجتمع لو إنتي ست زي ما بنقول كده Single Mother اللي هو سواء مطلقة أو أرملة وبتكحي تراب عشان تقدري تشتغلي وتربي عيالك لوحدك فالمجتمع ده حيسففك التراب زيادة .. شبهنا أوي صح؟ .. مجتمع الفقراء فيه معندهمش أي فرصة إنهم يعيشوا حياة كريمة .. هار أسود كفاية بقي يا عم .. (أرثر فليك) رجل نفسه يبقي كوميديان بس مضطر يشتغل شغلانة بياخد فيها ملاليم اللي هي مهرج تحت إسم مهرجان أو Carnival .. رجل أمه عيانة وبتموت بس هو معندوش أي طريقة إنه يدخلها دار رعاية مسنين فهو اللي عايش بيها .. حتي لو هو بني أدم سوي نفسياً فمادياً هو معندوش أي قدرة إنه يتجوز ويكون أسرة .. (أرثر فليك) عايش في مجتمع الفقراء فيه عايشين في عشوائيات والأغنياء مش بس عايشين في نعيم إنما كمان واحد زي (توماس واين Thomas Wayne) واحد من أغني أغنياء البلد بيستغل ثروته عشان يخش الإنتخابات ويمسك البلد تحت شعار الفقراء هم اللي عايزين يعيشوا فقراء والأغنياء ملهمش ذنب في الحياة الزبالة اللي هم عايشين فيها .. يالهوي دول شبهنا فشخ .. صدقني لو قلتلك جوثام دي تبقي نسخة سينمائية من مجتمعنا .. السؤال دلوقتي وفكر قبل ما تجاوب .. كام واحد فينا عنده إستعداد نفسي إنه يقرر يقلب الطرابيزة علي الكل وإن الحل الوحيد مش إن الفقراء ياخدوا حقهم إنما إن الأغنياء دمهم يسيل في الشوارع لإن ده محور قصة فيلم Joker في رأيي .. الغضب .. لا الصحة العقلية Mental Health ولا الإكتئاب Depression .. مجرد تعمل إيه لما يكون عندك طاقة غضب ممكن تسحق أي حاجة في سكتها؟

السر كله في كلمة معينة في سؤالي .. الإستعداد النفسي .. يمكن عشان كده شخصية (أرثر فليك) زي ما تقول كده إتخلق عشان يبقي هو عقاب ربنا لجوثام علي إزاي البني أدمين اللي في المدينة عملوا مجتمع الناس فيه بتاكل بعض .. تقريباً ده أول فيلم يحكي حكاية من وجهة نظر واحد مريض عقلياً يعني عنده Mental Illness وأداها بشكل رائع الممثل (يواكين فينيكس Joaquin Phoenix) .. مشكلة (أرثر فليك) إن عنده حالة مرضية إسمها التأثير البصلي الكاذب أو Pseudobulbar Affect اللي هو بمنتهي البساطة بيضحك بشكل هيستيري غصب عنه في مواقف مينفعش يتضحك فيها وعشان كده هو دايماً شايل ورقة مكتوب عليها سامحني علي ضحكي وبياخد 7 أدوية مختلفة عشان بس يبان طبيعي قدام الناس .. مثال علي كده مشهد لما كان في الباص وبيلعب مع طفل فأم الطفل زعقتله .. ملامح وش (أرثر فليك) وقتها توريك حجم المشكلة .. ده بني أدم عايش في حالة إحباط مستمر .. كتير مننا معهوش فلوس .. كتير مننا بيجي عليه نص الشهر يلاقي نفسه فلس .. كتير مننا مبياكلش غير فول وفلافل عشان مفيش فلوس .. بس مش كتير مننا حاسس إن محدش فاهمه لدرجة إنه حاسس إنه عايش في حبس إنفرادي وهي دي مشكلة الفيلم .. هو جاب بني أدم المجتمع دايس عليه مش بس إقتصادياً لا وكمان نفسياً وبيطلب منه إنه يستحمل زي ما بقية الخلق مستحملة لحد ما ربنا يفتكرك وتريح الأغنياء من همك .. ومش بس كده .. ده جاب بني أدم مريض عقليًا مش نفسياً وخلاه يعيش في مجتمع فقير وجعان وبالتالي هو مجتمع مش متعلم ومش مثقف وبقي مُطالب إنه يتعامل مع المجتمع ده كأنه بني أدم طبيعي وهي دي مشكلة الفيلم في رأيي .. إنه عيّش شخصية (أرثر فليك) في مجتمع متصمم أو Designed عشان يستفزه لحد ما يخرج أسوأ ما فيه وبعد كده يقوله إنت أساساً سيء و إبن وس%$.

ده بيخليني أقف قدام حقيقة إن الفيلم أرباحه بره أميركا كانت عالية جداً في حين نجاحه جوه أميركا كان عادي وأقول لنفسي إن عشان كده الناس اللي أنا أعرفها عايشين في المجتمع بتاعنا تعاطفوا مع (أرثر فليك) جداً .. إحنا عايشين في مجتمع شبه مجتمع جوثام اللي إتصور فيه فيلم Joker .. خدها مني كلمة الجوكر مش حتلاقيه يطلع في مجتمع زي المجتمع الأميريكي أو الأوروبي .. لا خالص .. الجوكر ده إنت حتلاقيه في مجتعنا لإن اللي هو إتعرضله إحنا كل يوم بنشوفه.

إحنا مجتمع أولاً فقير وبالتالي إحنا أخر حاجة بنفكر فيها هي الثقافة .. إحنا مجتمع بيجري ورا لقمة العيش عشان كده إحنا بنجري علي أغنية مهرجان تنسينا مشاكلنا ولا فيلم تافه يسلينا لحد ما ننام .. الفقر بيخلق جهل والجهل بتلاقيه في قلة الأدب وقلة الأدب هنا مش معناها إن البنات تمشي عريانة .. لا خالص مش ده قصدي .. قلة الأدب إنك متبقاش عارف تتصرف إزاي مع الناس .. المجتمعات الفقيرة اللي بيتظلم فيها هم الناس اللي مش عارفه تعبر عن مشاعرها زي مرضي الأمراض العقلية أوMental Illness زي مثلاً مرضي الإكتئاب .. دي ناس عندها إعاقة عقلية بس عشان إنت شايفه بني أدم بإيدين ورجلين ومش ماشي علي كرسي متحرك فإنت بتبقي متخيل إنه إنسان طبيعي وبمجرد ما تتعامل معاه وتلاقيه مختلف بتلاقي نفسك غصب عنك بتخاف منه وبتبعد عنه .. ده لو إنت مؤدب .. لو إنت قليل الأدب بتلاقي نفسك غصب عنك بتتريق عليه .. لو إنت متربتش خالص بقي بتلاقي نفسك عايز تأذيه .. عشان كده الأغلبية العظمي من المرضي العقليين بتلاقيهم ضحايا مش مذنبين .. الإختلاف في فيلم Joker إنك بتشوف المعاق عقلياً مش بيتهان ويسكت .. مش بيتضرب ويروح يعيط في الحمام .. لا ده بيقرر إنه يرد ويضرب ويقتل كمان والمصيبة إن كل ده إنت شايفه مُبرر .. أنا مش بقتل عشان أنا قاتل .. أنا مش بضرب عشان أنا مفتري .. أنا بعمل كده لإن المجتمع ظلمني ولازم أرجع حقي بدراعي .. تخيل لو ثورة يناير مثلاً كان فيها حد زي (أرثر فليك) .. شخص إتظلم وجاتله الفرصة إنه يرد الظلم علي اللي ظلموه.

ناس كتير علي الإنترنت بتقارن بين الجوكر زي ما جسده (هيث ليدجر Heath Ledger) الله يرحمه وبين الأداء بتاع (يواكين فينيكس) بس الحقيقة إنك مينفعش تقارن بين الإتنين لإن دماغ الشخصيتين مختلفة .. الجوكر بتاع The Dark Knight جاي يثبت وجهة نظر وهي إن قصاد الظروف المثالية أي بني أدم بيدعي الصلاح والفضيلة حتلاقيه بيمشي في السكة البطالة ويبقي علي قلبه زي العسل إنه يقتل ويسرق ويغتصب .. بس الجوكر بتاع فيلم Joker جاي يثبت حاجة تانية خالص .. ده رجل جواه طاقة غضب تكفي إنه يدمر أي حاجة تقف قدامه .. طاقة غضبه دي جاية من الظلم اللي هو وغيره إتعرضوله من الأغنياء في المجتمع المريض اللي هو عايش فيه .. في الفيلم (أرثر فليك) قال إنه ملوش دعوة بالسياسة وممكن يكون هو شخصياً شايف كده .. هو شايف إن مشكلته مع المجتمع بس ده في حد ذاته بيخلي اللي هو عايز يعمله له دافع سياسي .. ودي يمكن الحاجة اللي ضعفت أوي من السيناريو اللي كتبه (سكوت سيلفر Scott Silver) مع مخرج الفيلم (تود فيليبس Todd Philips) .. أنا فاهم كويس إنهم حبوا يبعدوا الفيلم بتاعهم عن أي أراء سياسية بس خلينا نكون منطقيين إن في الزمن الأغبر اللي إحنا عايشين فيه ده كل حاجة بقت سياسة .. يا رجل ده تشجيع الأهلي والزمالك بقي ملوش علاقة بالكورة وبقي له علاقة بالسياسة.

بمناسبة السياسة .. من أول ما Trailer بتاع الفيلم نزل وحصلت خناقة علي Social Media بين ناس بتقول هو بذمتكوا ينفع تعملوا فيلم عن الجوكر ولسه الشخصية متداس وشها في فيلم Suicide Squad؟ وناس تانية تقولك يا جماعه أدوا ل(يواكين فينيكس) فرصة .. إنت متخيل حجم التفاهة بتاعة الخناقة؟ .. ينزل الفيلم وتلاقي الخناقة بقت علي حوار تاني خالص وهو إن أساساً الفيلم ده لازم يتمنع عرضه عشان فيه ناس شايفاه بيحرض علي العنف وإن عيالنا الصغيرة مش محتاجين يشوفوا حاجة عنيفة زي دي .. ده يوريك قد إيه دماغ الناس يا بتروح يمين أوي يا شمال أوي .. هل الفيلم تافه لدرجة إن أكتر حاجة تشغل دماغنا هو يا تري أداء (يواكين فينيكس) أحلي ولا أداء (هيث ليدجر) ولا أداء (جاريد ليتو Jared Leto) في Suicide Squad؟ .. ولا الفيلم عميق ومؤثر لدرجة إننا محتاجين نتكلم فعلاً عن إزاي لو الشباب الصغير إتعلق بتفكير شخصية زي الجوكر فده يبقي نهار أزرق يا أستاذ (ممتاز)؟ .. الحقيقة في رأيي إن الدنيا لا هي شمال أوي ولا هي يمين أوي .. الحياة مش سودا فشخ زي ما الفيلم صورها في جوثام .. الفيلم حسسك إن خلاص يا جدعان مفيش أي أمل إن بكره أحلي لدرجة إن في رأيي إسم الفيلم كان المفروض يبقي جوكر: السواد عدي اللي جاي أسّود.

 هل فيلم Joker بيعبر بشكل صح عن قضية المرض العقلي أو Mental Illness؟ متهيألي أنا لا .. إنت وصلت لمرحلة في الفيلم إنك مبقتش عارف هو إيه اللي حقيقي وإيه اللي في خيال شخصية (أرثر فليك)؟ .. براحة بس كده .. إنت دلوقتي نفسك تبقي كوميديان .. حلو .. عمرك شفت كوميديان بيقول علي نفسه إنه معجزة كوميدية لم تُكتشف بعد؟ عمرك شفت (محمد هنيدي) بيقول علي نفسه إنه أحسن كوميديان جه في تاريخ مصر؟ .. يا مؤمن دي حتي الحتة الحلوة اللي في حياة (أرثر فليك) اللي هي علاقته جارته طلعت وهم .. بس أنا في رأيي إنه مراية لينا كمجتعنا .. أحب أقولك إن مجتمعنا ميفرقش كتير عن مجتمع جوثام الثمانينات اللي عاش فيه (أرثر فليك) وبسببه إتحول للجوكر .. مجتمع فقير .. مجتمع جاهل .. مجتمع ظالم .. مجتمع بيضمن للأغنياء إن صوتهم يتسمع وبيضمن للفقراء إنهم حيعيشوا فقراء ويموتوا فقراء.

المصادر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!