امتي كانت اخر مرة شفت فيها فيلم عن حياة ضابطة شرطة واحدة ست طايحة تلطيش في خلق الله باسم العدالة و الانسانية .. انت شفتها كتير مع ضباط شرطة رجاله .. شفتها في فيلم Shaft بتاع (صامويل جاكسون Samuel L. Jackson) .. شفتها في فيلم Street Kings بتاع (كيانو رييفز Keanu Reeves) .. بس انت شفتها مع ممثلة ست؟ .. ده اللي بيخليني انا شخصيا مبسوط جدا بفيلم Destroyer من بطوله (نيكول كيدمان Nicole Kidman) وده اللي حتكلم عنه النهاردة.
تفتكر ليه الناس حبت شخصية زي (سليم الانصاري) اللي قدمها (امير كرارة) في مسلسل كلبش؟ احنا بنحب الضابط الباشا اللي معندوش مشكلة يقتل شوية حرامية و مجرمين بدم بارد عشان يحمي الابرياء اللي ملهمش ذنب .. بنحب اوي الشخصية اللي بيعمل الغلط باسم الصح .. الفكرة ان افلام و مسلسلات قليلة اوي اللي بتاخد البطل لحد الاخر لحد انت كمشاهد بتسأل نفسك هو بعد الدم و العنف ده كله الموضوع يستاهل؟ هل فعلا الغاية تبرر الوسيلة؟ .. فيه فيلم قديم شوية اسمه Dirty Harry كان البطل بتاعه (كلينت ايستوود Clint Eastwood) في الفيلم ده هو بيقدر يوقف عملية سرقة بنك بانه ضرب نار علي الحرامية و قتل اتنين منهم .. هنا انت محتاج تقف شوية و تفكر هل ده كان القرار الصح؟ .. افرض ان فيه ناس مدنيين ماتوا في ضرب النار؟ هل ده حيبقي مقبول؟ بس احنا كمشاهدين مش بيهمنا الاجابة علي الاسئلة دي .. احنا كل اللي بنفكر فيه هو واااااو قد ايه هو جامد تنين و ازاي كل بنت بتتفرج علي الفيلم بتقول لنفسها ياريتني مرتبطة بيه كان وهو ماشي معايا اي حد يبصلي بصة وحشة يمسك في خناقة .. اهو بسبب الدماغ بتاعتنا دي كمشاهدين فيلم Destroyer تقدر تقول ادانا كلنا علي قفانا.
شخصية (كارين كوزاما Karyn Kusama) اللي بتقدمها (نيكول كيدمان Nicole Kidman) في الفيلم انت شفتها في افلام كتير قبل كده .. شخصية ضابط شرطة مش فارق معاها اي حاجة .. شخصية فتحت النار علي حرامية جايين يسرقوا بنك وكان ممكن ناس كتير تموت وسط ضرب النار بس في رأيها مش مهم .. طالما الحرامية ماتوا يبقي مش مهم .. بس فيه فرق .. لما بتتفرج علي Dirty Harry و بتشوف (كلينت ايستوود Clint Eastwood) وهو طايح في خلق الله فانت في الفيلم بيتقالك ده بيحصل لان الشخصية كده .. في فيلم Street Kings شخصيه (كيانو رييفز Keanu Reeves) دخل بمسدسه قتل مجرمين خاطفين بنتين عشان يغتصبوهم و بعد كده لعب في مسرح الجريمة عشان يبان ان هم اللي ضربوا عليه نار الاول مش هو اللي دخل عليهم شايل سلاحه في وشهم مش لحاجة قد ما لان الشخصية كده .. هو بني ادم شايف ان العدل مش بيتحقق الا كده .. ليه؟ .. لانه رجل .. ده مبيحصلش لما البطلة تبقي ضابطة شرطة ست .. عادة بيتقالك ان العنف اللي هي فيه ده له سبب و السبب غالبا حاجة حصلت ليها في ماضيها .. مثال بسيط علي كده فيه مسلسل محترم اوي اسمه Top of the Lake بطلته ممثلة اسمها (اليزابيت موس Elizabeth Moss) في حلقة بتشوفها بتهجم علي مجرم وهي مكنش معاها سلاح فمسكت ازازه بيرة من رقبتها خطبتها في الحيط كسرتها زي ما البلطجية في الافلام بتاعتنا كانوا بيعملوا و شرحته بيها لحد ما تكتشف بعدين ان كم العنف و الغضب اللي كان جواها ناحية المجرم ده مكنش سببه غير ان زمان الرجل ده اغتصبها .. ده اللي بيميز فيلم Destroyer لانك لاول مره تشوف ضابطة شرطة عنيفة مش لسبب غير انها كده خلقة ربنا .. في واحد من اجمل مشاهد الفيلم (نيكول كيدمان Nicole Kidman) بتكلم بنتها و بتقولها بلاش تطلعي حجج و مبررات لافعالك لان الضعفاء بس هم اللي بيعملوا كده.
نرجع تاني لموضوع المبرر .. احنا كبشر لسبب ما مبنقدرش نفهم ان ممكن ست تبقي بطبيعتها عنيفة .. فكرة الامومة مخليانا نقول لما نشوف ست عنيفة مستعدة تعمل اي حاجة حتي القتل عشان تجيب حقها او حق غيرها اصل اكيد فيه سبب لان مفيش ست كده بس فيه رجاله كده عادي خالص .. عندك مثلا في فيلم زي Kidnap بتاع (هالي بيري Halle Berry) بتشوف ام كيوت خالص بتقلب فجأة علي شخصية من بتوع (محمد رمضان) لما شوية بلطجية خطفوا ابنها .. في فيلم Peppermint بتشوف الممثلة (جينيفر جارنر Jennifer Garner) واحدة من اكتر الستات الرقيقة في الدنيا بتقلب علي (جون ويك John Wick) لما جوزها و بنتها بيتقتلوا و مش بتبقي شايفة حاجة في الدنيا غير انها تجيب حقهم .. حتي (اوما ثيرمين Uma Thurman) في فيلم Kill Bill مبتشوفهاش بتتنطط و ماسكة سيف بتقطع بيها الناس زي ما تكون بتقطع خيار تحطه ع السلطة الا عشان تنتقم من اللي قتلوا ابنها وهي لسه حامل فيه .. العكس خالص في الافلام اللي بيبقي البطل فيها رجل عامل زي الثور الهايج في عنبر 9 اللي بيبقي اخر حاجه بيفكر فيها هي بيته و عياله .. خد عندك مثلا شخصية (فينسينت هانا Vincent Hanna) اللي قدمها (ال باتشينو Al Pacino) في فيلم Heat واللي طول الفيلم تقريبا مبيروحش بيته عشان يجري ورا العصابات و المجرمين لدرجة انه في مشهد الكافية المشهور اوي مع قصاد (روبيرت دي نيرو Robert Di Nero) وصف حياته الشخصية بانها منطقة كوارث .. يمكن المشهد الوحيد اللي انت حسيته فيها كأب لما انقذ بنته (اللي هي تبقي بنت مراته مش بنته هو) من الانتحار وخلاك تقول لنفسك ما انت يا ابن التيييت لو مكنتش اهملت البنت مكنش بقي ده حالها ولا بقت مكتئبة كده لدرجة انها قررت تنتحر.
اللي بتقدمه (نيكول كيدمان Nicole Kidman) هو شخصية ست شغالة ضابطة شرطة عنيفة بطبعها و هي عندها وقت انها تبقي ام كويسة تراعي بنتها بس هي بتقرر متعملش ده .. هي بتحب بنتها و عندها القدرات انها تحميها كويس اوي بس هي عندها مشكلة انها مبتعرفش تبقي ام زي اي ام طبيعية تعمل الاكل و تنظف البيت و تودي المدرسة و تذاكر لبنتها .. اللي الفيلم حسيته عايز يوصله انه مش عايز البنات تاخد شخصية (كارين كوزاما Karyn Kusama) كمثل اعلي وان انا فيمينيست و سترونج اينديبيندت وومان و كل الكلام ده .. لا انا حسيت ان الفيلم عايز يقولك خلي بالك فيه ستات مبيعرفوش يبقوا امهات بالصورة اللي اتحفرت في مخنا عن الدور الطبيعي لاي ام .. و بيقولك ان مش كل الستات مكسورين الجناح محتاجين ظل راجل يحميهم .. فيه ستات جامدة اوي و ب100 رجل.
المصدر:
مقالة بعنوان Enter the Destroyer: The rise of the feminist detective .. المدمرة جت: عودة فكرة ضابطة الشرطة الفيمينيست .. نشرت في جرنان The Guardian البريطاني وده لينك المقالة الاصلية:
tps://www.theguardian.com/film/2018/sep/14/rise-of-the-feminist-detective-movie-destroyer-out-of-blue
