لو إنتي بنت بتتفرجي علي فيلم وكان فيه مشهد إن البطل حاضن البطلة وبيقولها بصوت واطي كله حنية .. أنا مش قادر أبعد عنك خلاص أنا أدمنتك .. تفتكري إنتي مش حتتنهدي وتقولي لنفسك يا بختها .. وإنت كولد مش زمانك ماسك ورقة وقلم وبتكتب الجملة دي عشان تشقط بيها بنت عاجباك .. أهو ده تأثير فيلم Twilight عليكوا .. اللي حتكلم عنه النهاردة هو تأثير سلسلة Twilight علي دماغ الناس وطريقة تفكيرهم ويمكن الأهم إزاي السلسلة دي غيرت من طريقة تفكير منتجي الأفلام في هوليوود عن الأفلام الرومانسية لإن أرجوك متنساش إن السلسلة دي اللي مش متكلفة إلا ملاليم وأبطالها شوية شباب صغيرين بس جابت أرباح عدت 3.3 مليار دولار .. لما فيلم Twilight نزل الإعلان أو Trailer بتاعه محدش كان متوقع إنه ينجح ودي حاجة منطقية أوي الصراحة بالنظر للمعلومات اللي كانت عند الناس بخصوص الفيلم.
الفيلم مبني علي سلسلة روايات كتبتها واحدة إسمها (ستيفاني ماير Stephanie Meyer) حاجة شبه سلسلة روايات عبير كده .. الأبطال كانوا ممثلين من تحت بير السلم سواء كانت (كريستين ستيوارت Kristen Stewart) أو (روبيرت باتينسون Robert Pattinson) .. (كريستين ستيوارت) مثلت قبل كده في فيلم Panic Room وكانت بنت البطلة (جودي فوستر Jodie Foster) و(روبيرت باتينسون) الناس اللي بتحب سلسلة أفلام Harry Potter عارفينه كويس من دوره ك(سيدريك دوجري Cedric Diggory) .. المخرجة (كاثرين هاردويك Catherine Hardwick) كان عندها 44 سنة ومعملتش أي فيلم ناجح قبل كده وكان تحت إيدها ميزانية متجيش 37 مليون دولار .. يا جدعان دي حتة القصة تافهة .. بنت عندها 17 سنة إسمها (بيلا سوان Bella Swan) أبوها وأمها إتطلقوا فراحت تعيش مع أبوها في قرية بعيدة فشخ وهي في المدرسة الثانوي بتتعرف علي زميل ليها إسمه (إيدوارد كولن Edward Cullen) حيطلع مصاص دماء وهي حتكراش عليه بس حتكتشف إنه مش طايقها ومش قادر يقعد جنبها .. فيه مشهد يهلك من الضحك لما كانوا في حصة معمل وهي شكت إن تكون ريحتها هي السبب في إنه مش طايقها فبتشم تحت باطها بس هي مكانتش تعرف إنه بيحاول يسيطر علي رغبته في إنه يمص دمها وإنه لو قرب منها زيادة عن اللزوم حيقتلها .. المهم إن قصة حبهم دي محدش كان موافق عليها لا أهلهم ولا مصاصين الدماء ولا المذئوبين في المنطقة اللي كانت بينهم وبين مصاصين الدماء هدنة .. مش بقولك قصة تافهة .. سبب إني حتكلم أصلاً عن السلسلة دي هو إن شهر نوفمبر اللي فات حيكون عدي 10 سنين علي عرض الجزء الأول اللي فعلياً ومش بهزر كان زلزال هز صناعة السينما في العالم وحخليك تفهم ده دلوقتي.
فيلم Twilight خلي هوليوود تفهم إن البنات كمان بيتفرجوا علي أفلام:
مفيش حد فيكوا حصل وإتفرج علي الفيلم إلا وتخيلت نفسها مكان البطلة (بيلا سوان) ومتخيلتش نفسك مكان البطل (إيدوارد كولن) وده لأسباب كتير ومتنوعة تنوع الطرق اللي ممكن تستسخدم بيها النوتيلا في الحلويات .. الولاد عاجبهم أوي فكرة مصاص الدماء اللي مفيش بنت بتبصله إلا وتدوب في نظرة عنيه .. الأهالي عاجبهم فكرة الإمتناع عن الجنس بين المراهقين اللي الفيلم كان بيحاول يشجعها .. البنات عبجتهم شخصية (بيلا سوان) اللي كانت فعلاً سترونج إنديبندينت جيرل مبتحبش حد يجبرها علي حاجة والأهم إنها مكنتش بتلبس عريان عشان تعجب حد .. بسبب كوكتيل الأسباب ده الفيلم سمع أوي مع الناس .. هو إتعرض يوم السبت وعلي أخر يوم الأحد كان جاب أرباح عدت 69 مليون دولار .. عشاق الفيلم بقوا زي ما يكونوا بينتخبوا حزب سياسي وبقوا بيسموا نفسهم Twi-Hards ودي إختصار Twilight اللي هو إسم الفيلم و Die Hards وده مصطلح معناه اللي بيشجع حاجة بجنون زي ألتراس الأهلي والزمالك كده .. المهم إن النجاح الجماهيري للفيلم كان هو السبب إن يتعمل وراه 5 أفلام تانيين اللي هم New Moon و Eclipse و Breaking Dawn بجزئيه الأول والثاني.
علي حسب رأي واحدة زي (ميليسا سيلفرستون Melissa Silverstone) من مجلة Women & Hollywood فاللي عمله فيلم Twilight إنه فوق منتجي الأفلام لحاجة إسمها Girl Power .. حاول تتخيل إن منتجي الأفلام كانوا بيتعاملوا مع رأي الناس في الأفلام زي تعامل الMessenger كده علي موبايلك .. فيه رسايل بتيجي علي طول وتظهر قدامك وفيه رسايل الOther اللي محدش بيبصلها دي .. أهو منتجي الأفلام خصوصاً في هولييود كانوا بيتعاملوا مع رأي الولاد في الأفلام ورغباتهم وهم بيحبوا إيه وبيكرههوا إيه زي تعامل الMessenger مع الرسايل الأساسية .. رأي البنات لإنه من وجهة نظرهم مش مهم فكان بيترمي في الOther .. اللي عمله Twilight إنه خلي منتجي الأفلام يفهموا إن تذكرة السينما مبتفرقش ما بين بنت وولد وإنك لو عملت فيلم موجه أكتر للبنات فهو حيجيب فلوس زيه زي أي فيلم معمول للولاد .. بداية من سنة 2008 لحد دلوقتي وفيه ماسورة أفلام موجهة للبنات وأبطالها بنات إتكسرت في وشنا ومش عارفين نلمها .. سنة 2012 إتعرض الجزء الأول من سلسلة The Hunger Games من بطولة (جنيفر لورينس Jennifer Lawrence) .. سنة 2013 شركة Disney عملت لينا فيلمي الكرتون Frozen و Brave .. سنة 2014 إتعرض الجزء الأول من سلسلة Divergent من بطولة (شايلين وودلي Shailene Woodley) .. بس فيه نقطة مهمة وهي الإخراج والنقطة دي بتقع من ناس كتير.
فيلم Twilight خلي الناس تفهم إن ممكن واحدة ست تخرج فيلم ناجح:
فيلم Twilight زي ما قلتلك أخرجته واحدة ست اللي هي (كاثرين هاردويك) .. فيلم كتبته واحدة ست وأخرجته واحدة ست وقصته كلها بتدور حول مشاعر وحياة وإختيارات بنت وفوق ده كله جاب فلوس وعجب الناس .. كان المفروض إن المخرجة بتاعة الجزء الأول (كاثرين هاردويك) هي اللي تخرج الجزء الثاني New Moon بس شركة الإنتاج Summit Entertainment قالتلها إن حيبقي تحت إيدها ميزانية صغيرة أوي فهي رفضت وشركة الإنتاج محاولتش حتي تراضيها إنما قالتلها في داهية وجابت مكانها (كريس وايتز Chris Weitz) اللي كان أخرج قبل كده فيلم The Golden Compass وفشل وبعده شركة الإنتاج جابت إتنين مخرجين رجاله برده اللي هم (ديفيد سليد David Slade) و(بيل كوندون Bill Condon) .. سلاسل The Hunger Games و Divergent أخرجهم رجاله .. فين وفين لما نزل فيلم Winder Woman واللي أخرجته واحدة ست اللي هي (باتي جينكينز Patty Jenkins) اللي نجاحه التجاري عدي نجاح فيلم Twilight والسنة الجايه حينزل فيلم Captain Marvel واللي حتخرجه واحدة ست بعد ما Marvel عملت 20 فيلم كل اللي أخرجهم رجاله.
فيلم Twilight خلي شركات الإنتاج تفهم إن الفضايح بتساعد في نجاح الفيلم:
(كريستين ستيوارت) و(روبيرت باتينسون) كانوا بيحبوا بعض جوه الفيلم وبراه وزيهم زي أي إتنين حبيبة بيتخانقوا ويتصالحوا ويتخانقوا ويتصالحوا وطبعاً الإعلام يفضحهم والناس تروح تتفرج علي الفيلم ومكنة الفلوس عماله تعد .. الأمهات كانت مبسوطة من إن الولد مش عايز ينام مع البنت إلا لما يتجوزوا في فيلم Breaking Dawn 1 يعني بعد 3 أفلام وبقوا عاملين زي الكوميك بتاع (جابر الشرقاوي) في فيلم سور الصين العظيم وبيشاوروا لبناتهم ويقولولهم شايفين إعملوا زي (بيلا سوان) و(إيدوارد كولن) .. مفيش حاجة إسمها جنس قبل الجواز .. البنات كانوا مبسوطين من فكرة إن الولد يبقي مش مستعجل يقلع هدومه وإنه بياخد وقته لحد الأخر لدرجة إن فيه نقاد سموا اللي بيحصل في السلسلة Everlasting Foreplay يعني مداعبة مبتخلصش .. البنات الفيمينست عجبهم أوي فكرة إن الولد اللي في حالتنا مصاص دماء مبيفرضش علي البنت إنها تنام معاه وفي نفس الوقت البنات الفمينست معجبهش فكرة إن (إيدوارد كولن) زي ما بنسميه Overprotective يعني بيتحكم في كل صغيرة وكبيرة في حياة (بيلا سوان) لدرجة إنه بيتفرج عليها وهي نايمة .. يمكن عشان هو بحكم كونه مصاص دماء مبينامش فمش لاقي حاجة يعملها طول الليل .. وبعد كده جت الخناقة الأكبر .. الخناقة بين فريق (إيدوارد) وبين فريق (جايكوب بلاك Jacob Black) المذئوب المعضل اللي هو كمان بيحب (بيلا سوان) وجسده الممثل (تايلور لاوتنر Taylor Lautner) والإتنين بيتنافسوا علي مين فيهم يضحي أكتر عشانها وطبعاً مع كل مشهد (جايكوب بلاك) بيقلع التي-شيرت بتاعه البنات بتتنهد.
أنا حابب أختم بإني أقول إن سلسلة Twilight أثرت كتير أوي في السينما حتي لو إحنا كولاد فيه مننا كتير رأيهم إنها سلسلة بناتي أوي بس أظن إني حتي وإن كان ده كان رأيي في السلسلة زمان إلا إن مع الوقت بقيت مقتنع بإن سلسلة Twilight من السلاسل المحترمة أوي سواء كروايات أو أفلام.
المصدر:
- مقالة بعنوان Ten years of Twilight: The extraordinary feminist legacy of the panned vampire saga .. عشر سنين عدوا علي عرض فيلم Twilight: التراث الأنثوي اللي سابته سلسلة الأفلام عن مصاصين الدماء .. نشرت في جريدة The Guardian البريطانية وده لينك المقالة الأصلية:
https://www.theguardian.com/film/2018/nov/02/ten-years-of-twilight-the-extraordinary-feminist-legacy-of-the-panned-vampire-saga
