موضوعنا النهاردة اللي حنتكلم فيه هو شركة أرامكو Aramco السعودية و دي في حالة إنك أول مرة تسمع الإسم ده فهي تبقي الشركة السعودية المملوكة للدولة لإنتاج النفط و الغاز الطبيعي .. كلامنا النهاردة حيركز شوية علي صفقة بيع القرن أو Sale of the Century و ده الإسم اللي بقي بيطلق علي عملية بيع أو بلاش نسميها بيع خلينا نختار الإسم اللي مش بيسبب خوف و ذعر للناس اللي هو خصخصة 5% من إجمالي أسهم الشركة .. لازم أحاول أخليك تستوعب قد إيه الصفقة دي ضخمة و أول خطوة إنك تبدأ تفهم قد إيه شركة أرامكو Aramco دي عملاقة.
الشركة دي يومياً بتنتج 10 مليون برميل نفط و بتقول إنها بتمتلك الحق الحصري في التصرف في إحتياطي النفط السعودي كله اللي لو صدقت كلامهم فالإحتياطي النفطي السعودي يعادل 266 مليار برميل نفط و 8.3 ترليون متر مكعب غاز طبيعي .. أرامكو Aramco مش بس شركة تنقيب عن النفط لإنها كمان داخلة في مجال تكرير البترول و الشحن .. برده لو صدقت كلام السعوديين فإنت بتتكلم عن شركة قيمتها لو السعوديين حبوا يبيعوها كلها علي بعضها حوالي 2 ترليون دولار و ده علي فكرة رقم أكبر من الناتج الوطني لدول زي إيطاليا أو الهند .. يعني السعوديين شايفين إن Aramco ثمنها زيه زي إجمالي الفلوس اللي بيدخلها الإقتصاد الهندي كله .. إضحك أو إتريق عليهم أو صدقهم زي ما تحب بس اللي متقدرش تنكره إن السعوديين دلوقتي عايزين يبيعوا 5% بس من أسهم Aramco مقابل 100 مليار دولار.
اللي عايزك تعرفه إن حالياً فيه مئات المحاسبين اللي شغالين في مجالات البورصة و البنوك و الإقراض المالي بقالهم أسابيع و يمكن شهور عايشين في العاصمة السعودية الرياض و في مدينه الظهران و دي اللي بتضم مقر شركة Aramco عشان يحضروا للصفقة دي .. بس الصفقة دي فيه ناس بتقول إنها عمرها ما حتتم بالسعر اللي السعوديين طالبينه .. في المقالة دي حنعرضلك 3 مشاكل و ال3 مشاكل دول هم اللي ممكن يلغوا الصفقة أو علي الأقل يأجلوها شوية لحد ما السعوديين يلاقوا حل لعلي الأقل مشكلة من الثلاثة و المشاكل الثلاثة اللي هم:
- العائلة المالكة السعودية نفسها.
- المخاطرة السياسية.
- سعر برميل النفط.
خلينا ناخد أول مشكلة و هي العائلة المالكة السعودية:
السؤال اللي السعوديين لازم يسألوه لنفسهم هو مين المستثمر المجنون اللي حيجي يقبل يشتري 5% بس من حصة شركة مملوكة بالكامل للدولة السعودية أو خلينا نكون واضحين أكثر مع بعض مملوكة بالكامل للعائلة المالكة السعودية؟ .. فكر فيها .. لو إنت شخصياً ملياردير و معاك فلوس كتير هل إنت تثق في أمراء المملكة بإنهم بصفتهم بيملكوا أغلبية الأسهم (95%) إنهم و هم بياخدوا أي قرارات مهمة يعملوا حساب لمصلحة الأقلية اللي هو حضرتك؟ .. الأهم من كده .. هل إنت بتثق في الحكومة السعودية أصلاً؟ .. متنساش إنك بتتكلم عن دولة مش ديموقراطية و ملهاش برلمان و مفيهاش معارضة .. يعني إنت متقدرش تقولهم أنا مش موافق علي سعر البيع ولا حتي تقدر تقولهم أنا شاكك أصلاً في الرقم بتاع إحتياطي النفط اللي أنتوا بتقولوا عليه .. السعوديين بيقولوا إن عندهم إحتياطي نفطي يعادل زي ما قلتلك 266 مليار برميل نفط بس الرقم ده مخدش موافقة رسمية من منظمة أوبيك OPEC و دي عبارة عن تحالف للدول المصدرة للنفط و مفيش أي جهة مستقلة أكدت أو نفت صحة الرقم ده.
سيبك من الرقم بتاع إحتياطي النفط .. ركز علي إحتياطي الغاز الطبيعي اللي بيدعي السعوديين إنه تحت إيدهم .. أي شركة بترول يهمها إنها تنوع من نشاطاتها يعني تشتغل في البترول و الغاز الطبيعي و التكرير .. المشكلة إن Aramco بتصرف كتير أوي علي التنقيب عن الغاز الطبيعي بس إنتاجهم من الغاز يدوبك بيزيد بمقدار 100 مليار متر مكعب سنوياً .. لازم العائلة المالكة السعودية تفهم إن بيع Aramco مش حيحصل إلا لو وافقوا إن جهات أجنبية محايدة تتأكد من صحة أرقام إحتياطي النفط و الغاز الطبيعي السعودي عشان علي الأقل أي حد ناوي يشتري يكون مطمن إن فلوسه مش بتترمي علي الأرض.
ثاني مشكلة هي المخاطرة السياسية:
خلينا نكون صرحاء مع بعض إن شركة Aramco واحدة من أفضل شركات البترول في العالم و بيديرها ناس علي أعلي مستوي من الكفاءة و النزاهة بس المشكلة إن مديري الإدارات اللي بيمشوا الدنيا غالباً بيكونوا أجانب بس مش هم اللي بيتحكموا في الشركة .. شركة Aramco زي ما قلتلك مملوكة للعائلة المالكة السعودية يعني كل أمير سعودي شايف إن الشركة دي عبارة عن Business العيلة .. فكرة بيع جزء من أسهم الشركة أساساً جت من دماغ ولي العهد السعودي الحالي (محمد بن سلمان) اللي بالمناسبة يبقي إبن الملك (سلمان) و الفكرة دي جاتله بعد ما هو شخصياً جاب شركة إستثمارات إسمها ماكنزي McKinsey عشان تعمل مراجعة كاملة للإقتصاد السعودي سنة 2015 و منها تبدأ تطلع شوية مقترحات عشان في الأخر يوصل لخطة تخلي الإقتصاد السعودي يضاعف من ناتجه الوطني أو GDP و يضيف 6 مليون وظيفة بحلول سنة 2030.
شوف .. الخطة إتعملت سنة 2015 و إحنا دلوقتي في 2017 يعني عدي سنتين و فاضل 13 سنة بس علي الDeadline اللي (محمد بن سلمان) كان حاطه لنفسه و لسه لحد دلوقتي ولا حاجة من الخطة اللي هو عملها إتنفذ .. جزء من الخطة بتاعته اللي هو مسميها رؤية 2030 أو Vision 2030 إنه بحلول سنة 2020 يعني بعد 3 سنين بس من دلوقتي يخلي الإقتصاد السعودي مش معتمد خالص علي عائدات النفط .. أنا بشهدك بذمتك يا شيخ ده منظر دولة فاضلها 3 سنين بس علي تحقيق معجزة إقتصادية زي دي؟ .. كل ده بيخلي أي مستثمر بيقول لنفسه إن أي وعود تقولها العائلة المالكة عموماً و (محمد بن سلمان) خصوصاً هي مجرد كلام فاضي ملوش أي معني أو قيمة .. الأهم إن فيه إنطباع عند المستثمرين إن لو فعلاً حصة ال5% من شركة Aramco إتباعت فكل اللي العائلة المالكة حتفكر فيه هو إنهم ياخدوا الضرائب المستحقة علي المستثمر أكتر ما حيكون همهم إن المستثمر ده حيكون نصيبه كام من أرباح الشركة.
ثالث مشكلة هي سعر بيع برميل النفط:
دلوقتي الوضع علي الأرض إن سعر برميل النفط واقع خالص .. الموضوع بمنتهي البساطة إن شركة Aramco دي بتبيع بترول و طالما سعر البترول في السوق واقع فلو السعوديين حبوا يبيعوا الشركة فكمان سعرها حيكون واقع .. المشكلة إنك لما تشوف الناس اللي ماسكة إدارات شركة Aramco و اللي المفروض إنهم ناس فاهمين و دارسين الكلام اللي بيقولوه (علي رأي واحد صاحبنا) يطلعوا يقولوا إنهم بيتوقعوا إن سعر بيع برميل النفط حينط تاني علي أخر السنة لإن الطلب علي النفط حيزيد أوي قريب جداً و الحقيقة الكلام ده غريب جداً عشان ده في الوقت اللي العالم كله بدأ يتجه للطاقة المتجددة Renewable Energy .. من حق Aramco تقول اللي هي عايزاه لإن زي ما بنقول الكلام معلهوش ضرائب بس اللي كلنا عارفينه إن سعر الشركة حيزيد أوي لو كمان سعر برميل النفط زاد و في نفس الوقت الشركة كانت غلطانة بسبب حاجة عملتها من 3 سنين و لإن السعوديين بيزعلوا أوي لما حد يجيبلهم السيرة دي فخليني أفكرك بيها:
سنة 2014 السعوديين شافوا إن شركات البترول الأميريكية بدأت تزود من إنتاجها بإنها بدأت تلجأ لتكنولوجيا إسمها Shale Oil Fracking .. مشكلة الطريقة دي إنها مكلفة أوي و عشان الشركات الأمريكية تحقق أرباح كان لازم سعر بيع برميل النفط يفضل عالي .. السعوديين لما حسوا إن الشركات الأميريكية حتاكل حصتها من السوق قرروا إنهم يغرقوا السوق بالبترول و زودوا إنتاجهم بشكل السوق مستوعبوش .. خلال 3 سنين بس سعر بيع برميل النفط قل من 100 دولار سنة 2014 لحد ما بقي 56 دولار النهاردة لمجرد إن السعوديين طمعوا أو خلينا منقولش طمعوا إنما خافوا إن القرشين اللي بيدخلوا لجيبهم يقلوا .. اللي إنت محتاج تفهمه إن سبب إن سعر بيع برميل النفط ثابت عند 56 دولار و مش بيقل عن كده هو إن السعوديين مقللين من إنتاجهم .. اللي إنت محتاج تفهمه إن السعوديين في موقف فعلاً صعب لإنهم لو زودوا إنتاجهم سعر برميل النفط حيقل أوي عن كده و لو فضلوا علي حالهم مقللين إنتاجهم فأرباحهم حتفضل تقل و حصتهم في السوق حتفضل تقل.
الوضع دلوقتي علي الأرض إن السعوديين سايبين أمرهم لله .. بمعني .. السعوديين شايفين إن الشركات الأميريكية مكملة في زيادة إنتاجها لإن الكلام علي إن إنتاج الشركات الأميريكية من النفط حيزيد السنة دي ل9.2 مليون برميل يومياً و علي سنة 2018 إنتاجهم اليومي حيزيد ما بين 500,000 ل600,000 برميل .. فعشان سعر برميل النفط يعلي لرقم 60 دولار و ده الرقم اللي لازم سعر بيع برميل النفط يوصله عشان السعوديين يقدروا يلاقوا مشتري لحصة ال5% من أسهم Aramco لازم السعوديين يفضلوا مقللين إنتاجهم و يستحملوا الخسائر الرهيبة في الأرباح.
بس هل معني كده إن مفيش حلول؟ لا طبعاً الدنيا ممكن تتحل و تبقي زي الفل بس لازم العائلة المالكة السعودية تاخد شوية خطوات:
- أولاً هم لازم يقبلوا فكرة إن شركة أو جهة مستقلة تيجي تتأكد من هل فعلاً الرقم اللي بتقوله السعودية لقيمة الإحتياطي النفطي بتاعها حقيقي ولا مجرد هجص.
- لازم العائلة المالكة تقبل إنها تشيل إيدها خالص من شركة Aramco ولا يبقي ليهم علاقة بالتأثير علي القرارات الإدارية الكبيرة.
- لازم برده السعوديين يفهموا إن مش من مصلحتهم إنهم يتحكموا في سعر بيع برميل النفط لإنهم في كل مرة بيحاولوا يتحكموا في السوق الدنيا بتخرب في وشهم.
لو كل ده إتحقق ساعتها ممكن السعوديين يلاقوا مشتري كويس لحصة ال5% من أسهم Aramco و بسعر عادل يرضي ربنا بس لحد دلوقتي الكلام علي إن ده مش حيحصل .. (محمد بن سلمان) اللي هو إبن الملك و ولي العهد و اللي حالياً هو اللي بيتحكم في مصير Aramco بيحب يظهر قدام الناس بصفته المصلح الإقتصادي بس فعلياً هو مخدش ولا خطوة في طريق الإصلاح و الشفافية .. و لإن ده الوضع علي الأرض دلوقتي فالمتاح قدام العائلة المالكة أقل بكتير من اللي كانوا بيحلموا به .. الأمل اللي قدامهم إنهم بدل ما يعرضوا ال5% من أسهم Aramco في بورصة لندن أو نيويورك و يفاجئوا إن محدش راضي يشتري و ساعتها حيبقي موقف محرج جداً للسعودية ممكن يروحوا في السر لشركات البترول الكبيرة في العالم يتكلموا معاها بس لو ده حصل عمر ما ال5% دول حيتباعوا ب100 مليار دولار زي ما السعوديين كانوا بيفكروا .. لحد دلوقتي قرار عرض ال5% في بورصة لندن و نيويورك إتأجل لأخر السنة الجايو و إحتمال يتأجل تاني لحد سنة 2019.
المصدر:
مقالة بعنوان Can the bankers sell Saudi Aramco? نشرت في جريدة The Financial Times الأميريكية و ده لينك المقالة الأصلية:
https://www.ft.com/content/10d40fc5-ef38-3ef8-851d-46a79c6b4097
