فعلياً و الله و دي شهادة لله يعني نادر أوي تلاقي بلد تقف جنب بلد في وقت زنقتها زي ما السعودية وقفت جنب باكستان في السبعينات .. المفروض يعني باكستان تشيل الهلال و النجمة في علمها و تحط مكانهم صورة الملك (فيصل) الله يرحمه .. المشكلة إن زي ما السعوديين بقي ليهم تصور تاني خالص عن علاقتهم مع باكستان فبرده الباكستانيين بقي ليهم تصور تاني خالص عن مستقبلهم كدولة .. فعلياً و مش ببالغ لو قلتلك إن باكستان إترمت في حضن الصين.
دي أزمة البلد مش عارفه تخرج منها لأسباب كتير .. منها إن السياسيين خايفين علي مستقبلهم أكتر ما هم خايفين علي مستقبل البلد .. أديك شايف حزب الله بيقول لو راحوا لصندوق النقد الدولي فشروطه حتبهدلهم هم شخصياً .. و منها إن ديون لبنان مشكلتها إن أغلبها دين داخلي.
جرنان The National Enquirer ده جزء من شركة نشر كبيرة اسمها AMI مملوكة لبني أدم اسمه (ديفيد بيكر David Pecker) .. لحد يناير 2019 يعني قبل ما الجرنان يفضح (جيف بيزوس Jeff Bezos) كان الرجل ده مديون ب1.3 مليار دولار و شركته بتخسر في السنة 70 مليون دولار .. تسلسل الأحداث بتاع إزاي الرجل ده إتعرف علي (بن سلمان) مسلي جداً.
مشكلة السعوديين مع الإخوان المسلمين بدأت مع يناير 2011 .. زي ما عيلة (لانيستر Lannister) بيكرههوا عيلة (ستارك Stark) عشان شايفينهم عايزين الكرسي فكمان الخلايجة شايفين إن الإخوان المسلمين عايزين يقعدوا علي الكراسي و قد يكون عندهم حق بس ده جزء من لعبه السياسة إنك تحكم و تيجي إنتخابات تخسرها و حد غيرك يحكم و بعد كده تيجي إنتخابات فتحكم انت تاني .. بس الخلايجة معندهمش الكلام ده .. إنتخابات إيه و بتاع إيه.
لو رحت سألت المسئولين السعوديين هو إيه اللي بيحصل؟ حتلاقيهم بيقولولك متقلقش كل حاجة تحت السيطرة وفيه تفسير بسيط خالص.
اللي حصل مع (محمد بن سلمان) هو هو بنفس تفاصيلة اللي حصل بين (أوباما Obama) والإيرانيين .. زي ما الإيرانيين خدوا الفلوس اللي جاتلهم لما العقوبات الإقتصادية إتشالت وإستخدموها عشان يفتروا علي خلق الله .. (محمد بن سلمان) هو كمان إفتري علي خلق الله .. دخل في حرب ملهاش أي ستين لازمة مع اليمن .. إتعارك مع قطر متفهمش بسبب إيه .. يا راجل ده خطف (سعد الحريري) رئيس وزراء لبنان لما راح زيارة للرياض وفي الأخر زعلان إن (تميم) مرضاش يروح يحضر القمة العربية.
(محمد بن سلمان) مبيفكرش غير في حاجة واحدة بس و هو عارف كويس إن هي دي اللي حيتحاسب عليها وهي إنه يلاقي طريقة ينقذ بيها إقتصاد بلده .. السعودية بلد عايش فيها 32 مليون بني أدم معرضين إن بلدهم تفلس إلا إذا البلد إتفتحت للإستثمارات الأجنبية بس مش دي المشكلة .. المشكلة إن (محمد بن سلمان) مقتنع و معرفش الإقتناع ده جاله منين إن قدامه علي الأقل 20 سنة عشان يحقق الهدف ده.
ده يبقي أكتر حد جمع فلوس دعاية إنتخابية ل(ترامب) و أكتر حد (ترامب) بيثق فيه و هو كان حلقة الوصل بين (ترامب) قبل حتي ما يبقي رئيس و بين الإماراتيين و السعوديين .. (ترامب) شخصياً إختار (توم باراك) عشان يبقي هو اللي يمسك لجنة تنظيم حفلة تنصيبه كرئيس .. علي فكره (ترامب) كان عايز يعينه وزير ماليه و كان عايز يعينه سفير للمكسيك بس هو رفض لإنه علي حسب كلامه مبيحبش يشتغل في السياسة.
علي مستوي العالم المتوسط بتاع الناس اللي شغالة في القطاع العام مش بيعدي 7% من إجمالي الناس اللي شغالة عموماً في حين إن في الامارات الرقم بيوصل 9% و هوبا في السعودية بينط جامد ل33%.
ده بيحطك قدام حقيقة إن لبنان محدش حينقذها ومحدش في دماغه إنه ينقذها .. انت بتتكلم عن بلد بتحتل المركز 143 من أصل 180 دولة علي مقياس الشفافية الدولية ضد الفساد .. بلد بقالها أكثر من 12 سنة البرلمان مش عارف يوافق علي ميزانية لحد ما ربنا أخيراً كرمهم سنة 2016 و وصلوا لإتفاق.
إنت لما بتتكلم عن أرامكو فإنت بتتكلم عن شركة شغالة بقالها 80 سنة في مجال التنقيب عن البترول وخلال ال80 سنة دول قدرت إنها تنتج 145 مليار برميل ولو صدقت كلامهم فهم لسه عندهم إحتياطي نفطي حوالي 260 مليار برميل بترول وده رقم كفيل إنه يسد إحتياجات العالم كله من البترول لمدة 7 سنين .. ده غير إنهم بيقولوا إن عندهم كمان إحتياطي نفطي بس لسه مفيش تأكيد بإنه موجود فعلاً أو لا بحوالي 400 مليار برميل بترول.
أنا ليه بقولك إحنا رايحين في ستين داهية؟ .. لو حصل فعلاً و الإسرائيليين قالوا إن أرض المستوطنات اللي في الضفة الغربية دي بتاعتنا فالعالم كله حيقولهم هو أنتوا إيه اللي بتعملوه ده؟ أنتوا بتعملوا في الفلسطينيين زي بالضبط ما نظام التفرقة العنصرية في جنوب أفريقيا كان بيعمل في السمر.
ده بيحط (الوليد بن طلال) و بيحطنا كلنا قدام واقع جديد .. الفلوس مبتشريش صحاب .. كل صحابه أو اللي كان متخيل إنهم صحابه خايفين إنهم إذا طلعوا وقفوا جنبه فبكده هم ممكن يزعلوا الأمير (محمد بن سلمان) ولي العهد السعودي و إبن الملك (سلمان بن عبدالعزيز) و اللي بيقود الحملة الشرسة دي ضد اللي هو بيسميه الفساد اللي إنتشر في كل حتة في المملكة.
القصة دي بدأت في نوفمبر 2011 أيام ثورات الربيع العربي لو تفتكر .. بعد ثورات و مليونيات و مصادمات و إعتصامات وخناقات قرر الديكتاتور اليمني (علي عبدالله صالح) الله يرحمه إنه يسيب الحكم خالص و يتنحي و اللي يمسك مكانه هو النائب بتاعه (عبدربه منصور هادي) .. حركة كده زي حركة تنحي الرئيس (محمد حسني مبارك) الله يرحمه بس بدل ما (مبارك) إتحاكم في مصر ف(علي عبدالله صالح) قعد في السعودية مأنتخ و مفخد و ساب (عبدربه منصور هادي) يشيل الليلة.
مشكلة الإصلاح المفاجيء والمتسرع إنه بيخلق أعداء والأعداء دول بيبدأوا يتحالفوا مع بعض ضدك .. عشان تبدأ تنتصر عليهم لازم تبقي سمعتك قدام الناس تبقي أنظف من الماس .. الناس لازم تقتنع وتصدق إنك بني أدم نظيف ومش حرامي ومش عايز حاجة غير مصلحة البلد .. هو سجن أو خلينا نقول حط أفراد العائلة المالكة اللي هو شايفهم أعداء ليه تحت الإقامة الجبرية بتهم فساد .. بس إيه اللي حيحصل لو الإعلام بدأ يتسربله قصص عن فساد (محمد بن سلمان) نفسه.
خلينا نكون صرحاء مع بعض إن شركة Aramco واحدة من أفضل شركات البترول في العالم و بيديرها ناس علي أعلي مستوي من الكفاءة و النزاهة بس المشكلة إن مديري الإدارات اللي بيمشوا الدنيا غالباً بيكونوا أجانب بس مش هم اللي بيتحكموا في الشركة .. شركة Aramco زي ما قلتلك مملوكة للعائلة المالكة السعودية يعني كل أمير سعودي شايف إن الشركة دي عبارة عن Business العائلة.