(محمد بن سلمان) الشاب اللي عنده 32 سنة واللي يعتبر الحاكم الفعلي للمملكة العربية السعودية مع إنه ولي العهد مش الملك مش شخصية لطيفة .. ده مش بني أدم في مركز سلطة الغرب بيستناه يحضر مثلاً مهرجان كان السينمائي الدولي عشان يتصوروا معاه .. ده مش الأمير (وليام William) ولا الأمير (هاري Harry) ولاد الأميرة (دايانا Diana) الله يرحمها .. ده رجل أغلب المسلمين بره السعودية مش طايقينه أصلاً وشايفينه عيل أهبل حيودي بلده والمنطقة كلها في داهية .. ده رجل وصل به السفه إنه بيتخانق مع كندا .. هو بالذمة فيه حد يتخانق مع كندا .. هل مثلاً هو ماشي بمبدأ إضرب المربوط يخاف السايب ولا بمبدأ يابا علمني أبقي مهم قاله تعالي في الهايفة وإتصدر .. بلاش خناقة كندا .. هو (محمد بن سلمان) عايز يوصل لإيه في اليمن؟ .. طب بلاش اليمن اللي خلاص إتدمرت ومعادش ليها قومة .. هو إيه أخره لعب العيال اللي هو بيعمله مع قطر ده؟ .. أقولك بلاش دي كمان .. هو ليه السعودية دلوقتي قريبة أوي من إسرائيل بالشكل المستفز اللي يحرق الدم ده؟ .. وليه السعودية بتتمحك أوي كده في (دونالد ترامب Donald Trump) ده رجل بينه وبين إنه يتشال من منصبه تكة؟
شايف كل المصايب اللي أنا رصتهالك دي .. ولا حاجة فيهم تعتبر من أولويات (محمد بن سلمان) .. لو شفت مسئول سعودي أو أي حد من اللي معلقين صورته ومؤمنين أوي باللي هو بيعمله قالك إن (محمد بن سلمان) مبينامش الليل لحد ما يجي اليوم اللي إيران فيه تخضع لسلطان العرب قوله إنت مبتفهمش .. (محمد بن سلمان) مبيفكرش غير في حاجة واحدة بس وهو عارف كويس إن هي دي اللي حيتحاسب عليها وهي إنه يلاقي طريقة ينقذ بيها إقتصاد بلده .. السعودية بلد عايش فيها 32 مليون بني أدم معرضين إن بلدهم تفلس إلا إذا البلد إتفتحت للإستثمارات الأجنبية بس مش دي المشكلة .. المشكلة إن (محمد بن سلمان) مقتنع ومعرفش الإقتناع ده جاله منين إن قدامه علي الأقل 20 سنة عشان يحقق الهدف ده مع إن أغلب المحللين الإقتصاديين المتفائلين أوي شايفين إن السعودية مقدمهاش إلا أقل من 10 سنين وتقلب علي بلد في كارثة إقتصادية حاجة كده زي تشاد أو زيمبابوي.
اللي حنحاول نكلمك عنه النهاردة هو الإجابة عن سؤالين ملهمش تالت .. هو الوضع وصل لكده إزاي؟ وإيه هو الحل؟ .. وخلينا نبدأ معاك بالسؤال الأول .. هي السعودية وصلت لحالتها دي إزاي؟ وأبقي شخصياً بفتي لو قلتلك إن ده سببه حاجة واحدة .. فيه أسباب كتير ورا المشكلة اللي فيها السعودية دلوقتي.
سبب رقم واحد .. الخلفة الكتير:
الرئيس (محمد حسني مبارك) الله يرحمه ومن وراه كل اللي حكمونا لحد دلوقتي ما بيصدقوا يلاقوا فرصة يشتكوا فيها إن المصريين بيخلفوا كتير بس الحق يتقال اللي كان لازم يطلع يشتكي بحق ربنا هو (محمد بن سلمان) .. فيه في الرياضيات متسلسة رياضية بيسموها متسلسلة فيبوناتشي Fibonacci Sequence إتعملت عشان توصف معدلات الخلفة في الأرانب .. اللي منكوا ميعرفش المعلومة دي فالأرانب بتخلف كتير وبمعدل متسارع .. في الفترة ما قبل سنة 1985 السعوديين كانوا بيخلفوا زي الأرانب بالضبط .. وقتها كان المعدل في المتوسط إن المرأة السعودية بتخلف 7 أطفال .. هو طبعاً ربنا يزيد ويبارك وكل عيل بيجي برزقه مختلفناش .. جري الشريط من 1985 لحد 2018 تكتشف إن التركيبة السكانية للسعودية فيها حاجة غلط .. أكتر من 50% من السكان تحت سن 25 سنة .. حوالي 30% من السكان أعمارهم تحت 15 سنة و 4% بس أعمارهم فوق 65 سنة .. ده معناه إيه؟ .. ده معناه إن لما تيجي سنة 2030 بإذن الله حيبقي عندك أكتر من 6 مليون شاب سعودي محتاجين يلاقوا شغل ومحتاجين بيوت يتجوزوا فيها ومحتاجين مدارس لعيالهم ولو وفرتلهم بقدرة قادر 6 مليون وظيفة فإنت محتاج طرق تكفي إنهم يروحوا عليها لأشغالهم ومستشفيات يتعالجوا فيها ومدارس يعلموا فيها عيالهم ومحتاج محطات كهربا توفرلهم طاقة.
طيب تعالي نبدأ خطوة خطوة .. هل الإقتصاد السعودي قادر إنه يوفر 6 مليون فرصة عمل في أقل من 10 سنين؟ الإجابة قطعاً لا .. القطاع العام في السعودية أقرب تشبيه ليه هو البطة البلدي أو القط الشيرازي اللي هو بإختصار حاجة بتعشق الأنتخة والتفخيد ومش بس بيعشقوها دول بيبدعوا فيها .. حالياً أكتر من 90% من المواطنين السعوديين شغالين في وظايف حكومية بياخدوا مرتبات خيالية وبميزات مش موجودة في أي حتة تانية ومبيعملوش حاجة .. رمضان اللي فات الحكومة السعودية إدت الموظفين 23 يوم أجازة عشان يرمضنوا ويعيدوا براحتهم .. مش بقر ولا بحسد لا سمح الله بس كل اللي بقوله إن ده مش إسلوب دولة عندها مشكلة إقتصادية.
سبب رقم إتنين .. البترول كتير و مش لاقيين حد يشتريه:
سعر بيع برميل البترول خلاص مبقاش زي زمان .. علي رأي الفنان (عبدالمنعم مدبولي) الله يرحمه قول للزمان إرجع يا زمان .. زمان مكنش فيه في سوق البترول إلا السعودية .. دلوقتي الأمريكان بقي عندهم شركات بترول بتنتج بتكنولوجيا معقدة شوية اسمها Shale Oil ممكن نبقي نتكلم عنها بعدين بس بينتجوا وبيبيعوا وبيجيبوا فلوس زي الفل .. الإيرانيين بيبيعوا بترول خصوصاً بعد ما العقوبات الإقتصادية بدأت تخف من فوق دماغهم .. كندا بتبيع بترول .. روسيا بتبيع بترول .. فنزويلا والكويت والبرازيل بيبيعوا بترول .. كل ده في الوقت اللي العالم دلوقتي رايح في سكة الRenewable Energy .. عشان مطولش عليك .. عشان السعودية تفضل عايشة في البذخ اللي هم عايشين فيه ويفضلوا يعينوا المواطنين بتوعهم في وظايف حكومية بياخدوا فيها مرتبات عالية ومن غير شغل وإن تفضل كل حاجة تقريباً ببلاش سواء صحة أو تعليم أو كهرباء أو مياه فإنت لو مكانهم محتاج سعر بيع برميل البترول يوصل 84 دولار وده رقم محدش شافه بقالنا أكتر من 4 سنين وأحب أقلبلك بطنك وأقولك إن الرقم ده مش حنوصله قريب .. حط كل ده جنب معلومة إن السعوديه بلد مش بتنتج حاجة وتقريباً بتستورد كل حاجة تلاقي في الأخر إن الصينية اللي طلعالك من الفرن هي إن السعودية بلد بتنزف فلوس وده السبب اللي مخليهم لحد دلوقتي يسحبوا أكتر من 200 مليار دولار من الإحتياطي النقدي الأجنبي بتاعهم.
سبب رقم ثلاثة .. الواسطة اللي قاسمة ظهر الإقتصاد السعودي:
لو إنت معاك فلوس في السعودية وعايز تفتح Business بتاعك ربنا معاك تعرف تشتغل من غير ما يبقي ليها واسطة تقيلة أو تدفعلك مبلغ حلو رشاوي .. الوضع بقي مزري لدرجة إن منظمة دولية محترمة زي GAN ودي منظمة شغلتها محاربة الفساد بقي رأيها إن لو إنت مستثمر أجنبي ناوي تحط فلوسك في السعودية فإنت لازم تعمل حسابك إنك حتكع فلوس كتير رشاوي .. مش عارف إنت سمعت الاسم ده ولا لا بس فيه واحد سعودي اسمه (عمرو الدباغ) ده كان ماسك هيئة الإستثمارات السعودية SAGIA وده كانت وظيفته إنه يفرمل الفساد عشان يخلي المناخ بتاع الBusiness في السعودية مناسب للمستثمرين الأجانب يجوا يحطوا فلوسهم .. جري الشريط أول السنة و(عمرو الدباغ) كان من ضمن شلة الأمراء والمسئولين اللي (محمد بن سلمان) حبسهم في فندق ريتز كارلتون الرياض بتهم فساد .. يعني لو حتصدق التهم اللي ضده فإنت الرجل اللي كنت جايبه يحارب الفساد طلع هو شخصياً فاسد .. حالياً السعودية في المركز ال92 علي مستوي العالم من حيث سهولة إنك تفتح فيها Business من غير ما تلاقي نفسك مضطر تدفع رشاوي وده وفق تقييم البنك الدولي.
نيجي بقي للسؤال اللي وراه .. طب والحل؟ .. الحل موجود وطول عمره قاعد جنب السعودية بس هم مش واخدين بالهم منه اللي هو دبي .. في التسعينات دبي كانت بتواجه نفس كوكتيل المصايب اللي فيها السعودية دلوقتي يمكن بإستثناء إن تعداد سكان دبي أقل بكتير من السعودية .. الأخوة اللي بيحكموا دبي كانوا عارفين إن الفلوس اللي بتيجي من بيع البترول عمرها ما حتكفي إن دبي تفضل عايشة كويس فقرروا يعملوا حاجة والحاجة دي إنهم فتحوا المدينة للإستثمارات الأجنبية وبقت دبي بدل ما بتبيع بترول بقت بتبيع خدمات .. خلال أقل من 20 سنة اللي (محمد بن سلمان) متخيل إنهم في إيده .. دبي حققت معجزة إقتصادية بس ده كان له ثمنه .. الثمن اللي دفعته دبي كان ثمن ثقافي أكتر منه أي حاجة تانية .. مثال بسيط علي ده إن لسه السنة دي المرأة السعودية بقي من حقها تسوق عربيتها في حين إن في دبي المرأة الإماراتية مش بس بتسوق عربيتها دي ممكن تنزل المول تتفسح وهي لابسه ميني جيب وبتنزل البحر بالبكيني … الأجانب في دبي بيسكروا براحتهم وبيع وشرا الخمور عادي زيه زي السجاير .. اللي أنا عايز أوصله ليك إن دلوقتي عشان دبي تقف قدام العالم تقول إن أقل من 5% من إجمالي الناتج الوطني بتاعها GDP جاي من عائدات البترول مجاش بالساهل .. الناس دي لو إنت شخص متدين وملتزم دينياً فإنت شايف إنهم باعوا ضميرهم للشيطان .. أو لو إنت منفتح شوية وبتقول علي نفسك ليبرالي مثلاً فإنت شايف إن اللي عملته دبي هو مجرد إنها فتحت نفسها علي العالم.
أيا كان رأيك في تجربة دبي مش دي القضية إنت حر في رأيك بس اللي إنت محتاج تفهمه إن (محمد بن سلمان) وفريق المستشارين بتوعه شايفين إن الحل الوحيد لإنقاذ الإقتصاد السعودي هو إنه يتحول لحاجة زي دبي .. علي الورق هم مسميينها رؤية 2030 .. علي الورق هدفهم إنهم يجيبوا إستثمارات أجنبية في القطاع الخاص السعودي بتوصل ل4 ترليون دولار بحيث إن إن شاء الله علي 2030 القطاع الخاص السعودي بره مجال البترول يكون بيشارك بأكتر من 70% من إجمالي الناتج الوطني السعودي مع العلم إن دلوقتي النسبة بمبتعديش 10% .. من الأخر (محمد بن سلمان) عايز لما تيجي سنة 2030 إن شاء الله الإقتصاد السعودي يكون بينتج في السنة ما يعادل 800 مليار دولار اللي هو تقريباً نفس الرقم اللي بينتجه الإقتصاد التركي .. ده السبب اللي (محمد بن سلمان) عايز السعودية تقلب علي دبي عشانه.
حاول تبص للموضوع من وجهة نظره .. إيه اللي حيخلي المستثمرين الأجانب يجوا السعودية؟ .. أكيد لما يقولهم Please Come in مش ده الحل .. الحل إنك توصل المستثمر الأجنبي لمرحلة إنه ميبقاش فارق معاه يحط فلوسه في دبي ولا السعودية لإن في الحالتين حيعيش براحته .. في الحالتين حيقدر يجيب عياله ومراته يزوروه من غير ما يخاف أو يقلق إنها تنزل الشارع بهوت شورت وتي شيرت .. أنا عارف إن فيه كتير منكوا شايفيني ببسط الأمور لمرحلة التفاهة بس دي الحقيقة .. الموضوع من وجهة نظر (محمد بن سلمان) تافه كده .. من وجهة نظره إن عشان يقنع المستثمرين الأجانب يجوا يحطوا فلوسهم في السعودية محتاج يؤكدلهم إنهم لما يجوا حيشربوا خمرة براحتهم ويشغلوا أغاني في الشارع براحتهم وستاتهم تمشي في الشارع قالعه براحتها .. ودي الحاجة اللي ترفع الضغط خصوصاً لما تعرف إن ربنا مسهل الأمور شوية قدام السعودية بس تحس إن المسئولين عن الأمور متفهين الدنيا زيادة عن اللزوم.
دلوقتي معدلات الإنجاب في السعودية قلت بقت إن في المتوسط المرأة السعودية بتخلف 3 أطفال بس ودي مرحلة الأمم المتحدة بتسميها Demographic Window of Opportunity ودي عشان تفهمها هي فترة بتقعد ما بين 25 ل40 سنة خلالها لو جيت تجيب عدد سكان السعودية اللي بيشتغلوا وبياخدوا مرتبات وفاتحين بيوت قسمتها علي عدد السكان اللي عايشين علي قفا الناس اللي بتاخد مرتبات حتلاقيها نسبة مناسبة جداً إنك تعمل إصلاحات إقتصادية ليها معني وحتؤثر علي مستقبل البلد .. لو الفرصة دي عدت فكده خلاص حضر نفسك بقي لعصر الإضمحلال اللي وقع الدولة الفرعونية .. (محمد بن سلمان) وفق إحصائيات مؤسسة مالية زي McKinsey قدامه ما بين 25 ل40 سنة عشان يخلق 3 أضعاف فرص العمل اللي كان الإقتصاد السعودي بيخلقها أيام ما كان سعر بيع برميل البترول معدي حاجز ال100 دولار .. ده بالضبط زي ما تقول لطالب كان ثانوي عام أدبي يحول علمي علوم قبل الإمتحان بشهرين وتقوله عايزك تجيب مجموع يدخلك طب.
اللي عايز يحل لازم يشوف هو إيه اللي بيتصرف ملوش لازمة ونبطل نرمي فلوسنا علي الأرض .. بعد كده نبدأ نشوف إزاي نقضي علي الفساد وإزاي نجيب المستثمرين الأجانب عندنا نوريهم إن إحنا جادين في إننا نوفرلهم كل اللي هم محتاجينه .. اللي أنا شايفه إن اللي حولين (محمد بن سلمان) جايين في التافهة ويتصدروا .. اه إنك تسمح للمرأة السعودية إنها تسوق خطوة كويسة بس ده مش نصر يستحق التمجيد .. إنت لحد دلوقتي في حرب ملهاش أي ستين لازمة في اليمن وعماله تسحب فلوس علي الفاضي .. أنا بقول تجيب المستثمرين الأجانب عندك مش إنك تاخد حاشيتك تروح تزور (تيم كوك Tim Cook) الCEO بتاع شركة Apple في مكتبه أو إنك تزور (بيل جايتس Bill Gates) مؤسس Microsoft في بيته .. وتروح تقابل (جيف بيزوس Jeff Bezos) رئيس مجلس إدارة شركة أمازون Amazon وتزورلي جامعة هارفارد Harvard و MIT .. لا وأقصي إنجازاتك لحد دلوقتي إنك أقنعت شركات Snapchat و Apple و Amazon يجوا يفتحوا مكاتب في السعودية .. حتي مشروع بناء محطة الطاقة الشمسية العملاقة اللي كان محططوله ميزانية 200 مليار دولار وكان متخخطله إنه يخلق أكتر من 100,000 فرصة عمل ويزود الناتج الوطني السعودي ب12 مليار دولار إتأجل لأجل غير مسمي ومحدش فاهم ليه .. ليه المملكة بتاخد خطوة لقدام وتجري ترجع مية متر لورا؟ .. وده حيودينا للكلام عن (جمال خاشقجي) الله يرحمه .. اللي إنت محتاج تفهم هو مين؟ وإزاي رأيه إتحول من إن (محمد بن سلمان) هو أحسن إختراع بعد الفيروز أناناس لحد ما بقي في رأيه شبه العرق سوس؟
يوم 7 نوفمبر اللي فات (توماس فريدمان Thomas Friedman) واحد من أشهر الصحفيين الأمريكان كتب في مقالته في جرنان The New York Times الأميريكية إنه قعد مع (جمال خاشقجي) لما كان في السعودية بيحاول يفهم هو مين (محمد بن سلمان) .. الكلام ده كان أول ما إتعين ولي عهد علي فكرة .. المهم إن (توماس فريدمان) قال في مقالته إن (جمال خاشقجي) رأيه في (محمد بن سلمان) إنه فعلاً جه في الوقت المناسب عشان ينقذ المملكة من الموت البطيء بس في نفس الوقت هو محتاج يوسع دماغه شوية .. صحيح إنه عمل حاجة كويسة إنه بدأ يحرر العيلة المالكة من نفوذ المؤسسة الدينية بس اللي هو فعلاً محتاجه إنه يبدأ يكبر شوية من دايرة مستشاريه بحيث إنه يبدأ يسمع لناس بتفهم في الإقتصاد بس رأيها مختلف عن رأيه ومبيبقاش محاوط نفسه بشلة مبتعملش حاجة غير إنها تطبله وتمجد فيه وفي دماغه ويفضلوا ينفخوا فيه لحد ما حيفرقع من كتر الغرور .. (جمال خاشقجي) مش صحفي أي كلام .. ده رجل إتهرس سياسة وعارف كويس أوي إيه اللي بيحصل في المطبخ ولإنه من البني أدمين القليلين اللي فاهمين هو بيقول إيه فهو كان عارف إن (محمد بن سلمان) مش جاي عشان يخلي السعودية تقلب علي الدانمرك إنما هو محتاج يشتغل في حدود المتاح وزي ما بنقول يعمل من الفسيخ شربات بس عشان يعمل ده هو كان محتاج يسمع كتير قبل ما يفتح بقه وده مكنش بيحصل .. مع الوقت بدأ الكرسي يلعب في دماغه وبدأ يتحول من (هاري بوتر Harry Potter) ل(فولدمورت Voldemort) .. خلال سنة بناء علي كلام (توماس فريدمان) ف(جمال خاشقجي) وصل لإقتناع إن خلاص (محمد بن سلمان) إتلعب في دماغه وخلاص بقي مصدق نفسه .. (جمال خاشقجي) وصل لمرحلة إنه مبقاش شايف إنه ينفع يرجع السعودية تاني وقرر إنه يفضل في تركيا ويتجوز من واحدة تركية اللي هو راح القنصلية بتاعة بلده عشان يخلص ورق جوازه منها ومطلعش منها تاني.
المشكلة بمنتهي البساطة إن الشلة اللي ماسكه ودان (محمد بن سلمان) أقنعوه إن عشان يبقي رجل فشخ لازم يمشي علي نموذج الإجابة بتاع الصين .. لما الصين حاولت ترسم نفسها علي جيرانها اللي بيطلوا علي بحر الصين الجنوبي عن طريق إنها بقت بتاخد جزر مش بتاعتها في البحر وضع يد العالم بدأ يعترض ويقول للصين هو حضرتك بتهببي ايه .. رد الصين إنها قالت للعالم وأنتوا مال أمكوا وهنا العالم بشكل غريب أوي تراجع وساب الصين تعمل اللي هي عايزاه .. ده اللي الشلة اللي حول (محمد بن سلمان) عايزنيه يبقي الAttitude بتاع المملكة إن أي حد يقولها تلت التلاتة كام يردوا عليه بجملة إنت مال أمك .. ده اللي حصل مع كندا لما بشكل عابر ويمكن حتي مش مقصود وزيرة الخارجية الكندية إنتقدت أوضاع حقوق الإنسان في المملكة فإذا كان رد (محمد بن سلمان) إنه قال لكندا وإنتي مال أمك يا كندا وقام تقريباً قاطع العلاقات الدبلوماسية بينه وبينها .. اللي البيه محتاج يفهمه إن السعودية مش الصين .. الصين خلاص بقت قوة إقتصادية عظمي لكن السعودية محتاجه يبقي ليها صحاب .. وده حيودينا لأهم نقطة عايز أوصلها وهي إني أحيانا بحس إن (محمد بن سلمان) زي ما يكون من الناس بتوع برج الجوزاء ومجنون وعايز يجننا معاه .. إنت منين يا إبني عملت نفسك حامي حمي المرأة السعودية لما سبتها تسوق وبعد كده قمت إعتقلت ناشطات حقوقيات ستات في السعودية عشان بيحموا حق المرأة السعودية إنها تسوق براحتها .. يعني هو خلاص حرب اليمن خلصت ومشاكلك مع الإمارات خلصت ومبقاش فاضل غير إنك ترخم علي الناشطات الحقوقيات اللي عايزين يخلوا المرأة السعودية تسوق .. ده إنت تقريباً محكمة العدل الدولية حتتهم القوات المسلحة السعودية والإماراتية بإرتكاب جرائم حرب في اليمن .. فوق يا إبني إنت عندك مصايب متلتلة .. إنت منين عايز تحول إقتصاد المملكة لحاجة شبه إقتصاد دبي اللي هو إقتصاد مفتوح للإستثمارات الأجنبية وعايز الأجانب يجوا يحطوا فلوسهم عندك تقوم بمنتهي الغباء تقتل (جمال خاشقجي) لا وفين جوه القنصلية؟
قد أكون غلطان .. قد أكون ظالم (محمد بن سلمان) مع إني عارف إن عندي حق بس مش مشكلة أي حد معرض إنه يبقي غلطان .. بس اللي أنا شايفه إنه لو قعد يشتغل بالشكل ده من هنا لحد مية سنة جايين مش حيوصل لحاجة .. فيه ناس تانية ممكن تطلع تقولي إنت حمار مبتفهمش .. ده رجل ماضي مع Google صفقات عشان تيجي السعودية تفتح Data Centers وراح إتكلم مع شركة Raytheon عشان تيجي تفتح Business في مجال الأمن الأليكتروني Cybersecurity في المملكة .. ده غير إنه بدأ يبني في مدينة نيوم Neom اللي حتبقي مدينة كاملة شغالة بالروبوتات .. عموماً خليني أختم بإني أقول إن غداً لناظره قريب .. هو صحيح دلوقتي مدعوم بقوة من الشباب السعودي بس لو الوقت جري والرجل ده موفرش فرص العمل اللي هم محتاجينها واللي حيحتاجوها قريب فبسهولة أوي حيقلبوا عليه.
المصادر:
- مقالة بعنوان Saudi Arabia must become a new Dubai يعني المملكة العربية السعودية لازم تتحول لدبي الجديدة .. نشرت في مجلة The Spectator و ده لينك المقالة الأصلية:
https://blogs.spectator.co.uk/2018/04/saudi-arabia-must-become-a-new-dubai/ - مقالة بعنوان Saudi Arabia’s Prince bids for global tech leadership, but there are major hurdles on the way يعني الأمير السعودي عايز يخلي بلده قائدة في التكنولوجيا بس قدامه سكة مليانة مشاكل .. نشرت في مجلة Forbes و ده لينك المقالة الأصلية:
https://www.forbes.com/sites/suparnadutt/2018/05/21/saudi-arabias-prince-bids-for-global-tech-leadership-but-there-are-major-hurdles-on-the-way/ - مقالة بعنوان Praying for Jamal Khashoggi يعني بدعي ل(جمال خاشقجي) .. نشرت في مجلة The New York Times الأميريكية و ده لينك المقالة الأصلية:
https://www.nytimes.com/2018/10/08/opinion/jamal-khashoggi-missing-saudi-journalist.html
