الإقتصاد الصيني عنده دور برد جامد حبتين ولإن الإقتصاد زيه زي البني أدمين لما بيتعب بيبقي له أعراض ولما تبص علي الأعراض دي تبدأ تفهم هي المشكلة فين وتشتغل علي حلها .. أعراض مرض الإقتصاد الصيني كذا حاجة الحقيقة .. معدل النمو بتاع الإقتصاد الصيني خلال الربع الثالث من سنة 2018 يعني بتتكلم عن شهور يوليو وأغسطس وسبتمبر قل بقي 6.5% وده أقل معدل نمو يحققه الإقتصاد الصيني من ساعة الأزمة المالية العالمية سنة 2009 .. حيطلعلك حد يقولك عادي يا جدعان طبيعي إن كل فترة إقتصاد الدول يريحله شوية خصوصاً بعد ما قعد يعلي لسنين وسنين .. طب إيه رأيك إن مبيعات العربيات في الصين السنة اللي فاتت قلت ودي أول مرة تحصل من 20 سنة .. حيطلع حد تاني يقولك ما ده سببه السياسات البيئية الجاحدة اللي الحكومة الصينية بتطبقها بقالها فترة .. طب ولما شركة Apple طلعت قالت إن مبيعات منتجاتها وخصوصاً الiPhone قلت في الصين وإن ده معناه علي حسب كلام الشركة إن الطبقة المتوسطة الصينية مبقاش معاها فلوس زي زمان وإن يالهوي يا خرابي ده معناه إن الإقتصاد الصيني داخل علي مرحلة كساد .. اللي إنت محتاج تفهمه إن الغرب حالياً عايش في حالة هلع من إحتمالية إن الإقتصاد الصيني لا قدر الله يعني يتعب بس الصينيين نفسهم عارفين إنهم في مصيبة سودا بقالهم فترة والحقيقة إني معجب جداً بكم الهدوء اللي الصينيين فيه رغم المشكلة الكبيرة اللي هو عايشين فيها.
الصينيين شايفين بعنيهم إن قيمة بورصة شنغهاي إنهارت 25% خلال أول شهرين بس من 2019 بعد ما حققت أعلي معدل نمو ليها خلال سنة 2018 .. هم شايفين بعنيهم إن حرب التعريفات الجمركية بينهم وبين أميركا بدأت توجعهم أوي وشايفين إن لأول مرة من سنين كم الصادرات الصينية بدأ يقل .. الصينيين شايفين إن إقتصادهم زي ما يكون بيفرمل وعشان كده هم عصروا علي نفسهم شوال لمون وقالوا إنهم مستعدين يتفاوضوا مع الأمريكان لإنهاء الحرب التجارية بين البلدين .. معاك إن لو بكره الصبح الأمريكان والصينيين طلعوا يحضنوا بعض ويقولوا إنهم بقوا زي السمن علي العسل فده حيخلي المستثمرين والناس اللي ليها فلوس في البورصة في منتهي السعادة بس الصينيين عارفين كويس أوي إن ده مش حيحل حاجة من المشكلة اللي هم فيها .. مشكلة الصين عامله بالضبط زي لما حد يجيله سكر لا قدر الله .. هو مرض مزمن سببه سنين وسنين من الإهمال في الصحة والعك في الأكل بس في نفس الوقت مرض السكر مرض مش قاتل زي السرطان مثلاً لا قدر الله .. المشكلة الإقتصادية في الصين دلوقتي مش حاجة تستدعي إنك تترعب زي ما كلنا إترعبنا لما الأزمة المالية العالمية حصلت سنة 2008 أو لما إقتصاد النمور الأسيوية وقع سنة 1997 .. بس في نفس الوقت المشكلة اللي بتعيشها الصين دلوقتي لو إتسابت حتلاقيها إنتهت ببنوك قفلت وشركات فلست وحكومة بقت مضطرة تسحب فلوس من الإحتياطي النقدي بتاعها عشان تنقذ المؤسسات المالية بتاعتها وحاجة أخر نكد الصراحة .. هنا جه الوقت إنك تفهم هي المشكلة فين بالضبط؟
مشكلة الإقتصاد الصيني في التحكم اللي عاملاه الحكومة في كل حاجة .. الإقتصاد الصيني بقاله سنين عنده نفس الأعراض بتاعة الأزمة المالية العالمية اللي ضربت أميركا في 2008 .. تضخم مش طبيعي في سوق العقارات أو زي ما بيتسمي Housing Bubble بحيث إن سعر العقار عمال ينط من غير أي مبرر .. إنتاج كتير من غير ما حد يشتريه بحيث إن المصانع الصيني بقت بتنتج كل حاجة بكميات رهيبة من أول الحديد والصلب لحد الخلايا الشمسية .. بس يمكن أهم وأخطر عرض كان الزيادة الجاحدة في الديون .. لو جيت تقسم إجمالي الديون اللي علي الصين علي الناتج الوطني الإجمالي الصيني .. يعني بالضبط زي ما إنت تجيب كل الفلوس اللي إنت مديون بيها تقسمها علي الفلوس بتاعة مصروف البيت من مرتبك بقي لمعاش لحد من عيلتك بتاخده يعني تجيب كل الفلوس اللي بتخش البيت .. الصينيين لما عملوا كده إكتشفوا إن النسبة كانت 253% والكلام ده كان في نص 2018 في حين إن النسبة سنة 2008 كانت 140% بس .. عشان أقربهالك تخيل إن إنت شغلتك مدير بنك مرتبك في الشهر 20,000 في الشهر بس إنت مديون ب20 مليون جنيه ساعتها مرتبك الخيالي ده ولا حيبقي له لازمة .. في إقتصاد الدول من التسعينات مجتش مرة إن دولة أيا كانت هي مين النسبة بين الديون اللي عليها علي إجمالي إنتاجها تعدي 150% وميحصلهاش مصيبة سودا .. الصين وصلت 253% وده خلي الناس بتوع الإقتصاد قاعدين مستنيين الباكابورت يفرقع في وشنا كلنا .. من 2008 وإحنا مستنيين بس محصلش حاجة .. لا البنوك الصينية إنهارت ولا البورصة بتاعتهم وقعت .. طب ليه؟
فيه نظرية بتقول إن الصين دي زي ما بنقول كده Too Big to Fail إن مفيش حد متخيل الصين ممكن تقع لدرجة إنها مبتقعش .. وفيه نظرية تانية بتقول إن السبب هو التحكم الأوفر اللي بتعمله الحكومة الصينية لدرجة إن مفيش حد بيعمل أي حاجة إلا بأمر الحكومة .. فكر فيها كده .. البنوك والشركات الكبيرة وحتي حركة رأس المال بيمشوا بأوامر من الحكومة .. ده معناه إن الحكومة الصينية بيبقي في إيدها إنها تاخد قرارات معينة تلحق بيها السوق قبل ما المصيبة تحصل ودي حاجة الحكومات الغربية مبتقدرش تعملها بسبب طبيعة الحكم .. مش مصدقني صح؟ طب خليني أحكيلك اللي حصل في 2015.
في السنة دي حصل Drop فجائي في البورصة والصين بقت بتنزف فلوس وأي حد حاطط فلوسه في البنوك الصيني سحبها وطلعها بره البلد .. ساعتها الناس بتوع الإقتصاد قالوا بااااااااااس المصيبة اللي كنا مستنيينها حتحصل .. متفهمش إمتي وإزاي الحكومة الصينية قامت ساحبه فلوس من الإحتياطي النقدي بتاعها اللي هو إنت تقدر تشبهه بإن كل دولة حاطه لنفسها تحويشة العمر ودي فلوس هي حاطاها علي جنب تستخدمها في حالة الطواريء والفلوس دي بتتسمي الإحتياطي النقدي الأجنبي لإن الفلوس كلها بتتحط في البنك بالدولار .. المهم إن الحكومة الصينية خدت حبة حلوة من الفلوس دي ضختها في البورصة عشان تعوض الخساير وأمرت البنوك إنها تجمد أرصدة الناس عشان محدش يطلع فلوسه بره البلد .. قرارات زي دي بيبقي صعب أوي علي حكومة مٌنتخبة إنها تعملها بس الصين حاجة مختلفة .. دي فلسفة تعامل الصين مع مشكلة الديون.
لو تفتكر فيلم Thor: Ragnarok لما (هيلا Hila) أخت (ثور Thor) دخلت البهو الملكي وإتصدمت لما لقت الجدارية اللي متعلقة في السقف بترسم أبو (ثور) الملك (أودين Odin) علي إنه ملك الرحمة والعدالة .. لما (هيلا) وقعت الجدارية ظهرت تحتها الجدارية الحقيقية وهي إن (أودين) ده رجل إبن كلب ولا (صدام حسين) الله يرحمه وإنه كان مفتري وهنا (هيلا) قالت إن طريقة تعامل (أودين) مع أي مشكلة مستعصية مش عارف يحلها إنه يخفيها ويخبيها وينساها أصلاً .. الحكومة الصينية ماشية بنفس المبدأ .. هم عايزين الصين تبقي مثال للعدالة الإجتماعية وأكبر تهديد لفكرة العدالة الإجتماعية هي الديون .. مفيش بلد عندها طبقة متوسطة عايشة كويس تقدر تشتري اللي هي عايزاه وتلاقي البلد دي مديونة .. الصين عارفه ده كويس وعشان كده الحكومة ممكن تعمل أي حاجة عشان مصيبة الديون دي متفرقعش في وشهم حتي لو كان ده معناه إنهم يكدبوا ويزوروا في أوراقهم الرسمية.
إديني عقلك .. بلد ديونها الداخلية والخارجية علي بعض معدية 250% الGDP بتاع البلد .. كلمة GDP هي Gross Domestic Product اللي هو الناتج الوطني الإجمالي اللي إتكلمنا عنه من شوية .. يعني تقريباً مفيش مواطن صيني مش مديون وواخد قرض من البنك وطبيعي بلد عايش فيها مليار بني أدم إن مش كل الناس اللي واخده قروض من البنك عارفه تسدد .. لما بنك يدي قرض لحد والحد ده تحصله مشكلة ومبيبقاش عارف يسدد فبيتقال علي القرض ده Bad Loan أو Non-Performing Loan اللي هو بمعني أخر قرض مش جايب همه .. طبيعي إني لما أروح أسأل الحكومة الصينية يا تري نسبة الBad Loans دول إيه من إجمالي القروض اللي البنوك الصينية عاطياها للناس إني ألاقيها نسبة عالية .. رد الحكومة الصينية إن النسبة مش بتعدي 2% وطبعاً محدش مصدق الرقم ده .. في رأي واحدة زي (تشارلين تشو Charlene Chu) بتشتغل في مؤسسة Autonomous Research وواحدة من أكتر الناس اللي بتفهم في الإقتصاد الصيني إن بالميت خالص نسبة الBad Loans دي تعدي 24% يعني بتتكلم عن 8.5 ترليون دولار .. ال8.5 ترليون دولار دول دي فلوس طلعت من البنوك الصينية ومش عارفه تستردهم تاني.
إبلع ريقك وفكر في الرقم .. الفلوس دي كلها طلعت ومحدش عارف يرجعها .. حيرد عليا حد ويقولي طب ما عادي ما إنت عندك في الإنهيار المالي اللي حصل لدول النمور الأسيوية سنة 1997 إن نسبة الBad Loans في بنوك أندونيسيا وكوريا الجنوبية وتايلاند وصلوا 30% .. حرد عليك وأقولك أمين بس المشكلة إن محدش عارف الحقيقة فين؟ .. في شهر أكتوبر 208 إتنشر تقرير من مؤسسة S&P Global Rating ودي شركة بتقيم قدرة الدول علي إنها تسدد الديون اللي عليها قالت إن المصيبة إن محدش عارف بالضبط هو الدين الداخلي الصيني كام لإن المعلومات دي الحكومة الصينية بتعتبرها سرية .. ده معناه إن لما الحكومة تقولك إن الدين الداخلي 6 ترليون دولار فأنا من حقي إني أفترض الأسوأ وإن الرقم الحقيقي أضعاف ده.
طب دي الديون .. الإقتصاد الصيني بيعاني من مشكلة كبيرة أوي بيتقال عليها Capital Flight إن الناس بتطلع فلوسها بره الصين .. رغم الإجراءات المشددة اللي الحكومة عاملاها عشان تضمن إن محدش يخرج فلوسه بره البلد إلا إن الصينيين متفهمش إزاي بيهربوا فلوسهم برده .. بناء علي كلام الإتحاد القومي للسماسرة الأمريكان فلمدة 6 سنين ورا بعض أكتر ناس بتشتري عقار في أميركا هم الصينيين .. خلال الفترة من مارس 2017 لحد مارس 2018 الصينيين إشتروا عقار في أميركا بقيمة 30 مليار دولار … عشان بس أحطك في الصورة .. خلال نفس الفترة الكنديين اللي هم أصحاب المركز الثاني إشتروا عقار جوه أميركا بقيمة 9 مليار دولار بس.
نظرياً طريقة تعامل الحكومة الصينية مع الأزمة الإقتصادية اللي هم عايشين فيها هي طريقة يارب محدش ينخور ورانا وإحنا عارفين مصلحتك أكتر منك .. الطريقة دي حلوة علي المدي البعيد .. هم مكملين في سكتهم في النمو الإقتصادي ومقللين معدل البطالة وفي نفس الوقت بيكسبوا وقت إنهم براحة وواحدة واحدة يحلوا المشكلة اللي عندهم .. المشكلة كلها في فكرة واحدة واحدة دي .. الإصلاحات الإقتصادية اللي بتعملها الحكومة بطيئة بطء السلحفاة ده غير إنهم بالضبط عاملين زي حد بينفخ في قربة مخرومة .. إنت عشان تحقق معدل نمو عالي لازم تنتج كتير وتبيع زي مثلاً الدول الأوروبية أو اليابان .. عشان تحقق معدل نمو جامد زحليقة زي اللي بتحققه الصين فإنت لازم تنتج وتبيع وتستلف فلوس كمان عشان تصرفها كإستثمارات .. الصين تحولت لدولة مدمنة ديون وزي أي مدمن هم مبيقدروش يعيشوا من غير ما ياخدوا الجرعة انهم يستلفوا فلوس .. كل ما الفلوس اللي إستلفوها تخلص تلاقي إقتصادهم بدأ يفرمل يقوموا مستلفين تاني عشان يمشوه بسرعة وهكذا.
كل ما تسمع في الأخبار إن الإقتصاد الصيني تعبان عايزك تعرف إن غالباً السبب إنهم إستلفوا فلوس وخلصت ومستلفوش تاني يقوم إقتصادهم مفرمل يترعبوا يستلفوا تاني .. ده الفكر اللي البنك المركزي الصيني بيشتغل عليه زي ما بيقول (ديني ماكماهون Dinny McMahon) اللي كتب كتاب China’s Great Wall of Debt يعني سور الديون الصيني العظيم واللي بيقول إن لما يطلع البنك المركزي الصيني يؤمر البنوك الصينية إنها تقلل كمية الفلوس اللي هي بتحتفظ بيها كإحتياطي نقدي فده معناه إن كل بنك صيني بقي كل همه يدي قروض عشان في الأخر ميلاقيش إن الخزنة فيها فلوس كتير .. طبيعي إنك طول ما إنت عمال تدي في قروض إن فيه ناس مش حتعرف تسدد لإن كل همك إنك تدي قروض ومش بتهتم هو الفلوس دي بتروح لمين؟ وهل حيعرف يسدد ولا لا؟ وبالتالي نسبة الBad Loans حتلاقيها بتزيد وتزيد.
الصين مرعوبة من اليوم اللي يحصلها زي ما حصل لأميركا سنة 2008 بس هم مش قادرين يفهموا إن الأزمات الإقتصادية زيها زي ترويق الشقة كده بعد ما تخلص الترويق بتلاقي جسمك متكسر وعايز تنام أسبوع بس الشقة بتنظف وكل الوساخة اللي فيها بتتشال .. لما الأزمة المالية حصلت الأمريكان بدأوا يحطوا شوية قوانين زيادة تحكم عملية الإقراض البنكي وسعر العقارات .. طول ما الصين مش عايزه تروق الشقة فالتراب والوساخة حيفضلوا يتراكموا لحد ما يجي اليوم إن الشقة تبقي مقلب زبالة وساعتها تكلفة التنظيف حتبقي عالية أوي .. عشان بس أحطك في الصورة .. سنة 1997 لما إقتصاد النمور الأسيوية وقع إضطرت الحكومة الكورية الجنوبية إنها فعلياً تبيع اللي وراها واللي قدامها عشان تضخ 31% من إجمالي الGDP بتاعها عشان تسند البنوك .. أندونيسيا دفعت 57% .. لو طبقت نفس المعايير علي الصين فالصينيين حيلاقوا نفسهم مضطرين يدفعوا 3.8 ترليون دولار.
لو قعدت تجيب ورقة وقلم وتحاول تستوعب حجم المشكلة الإقتصادية اللي فيها الصين فإنت مخك فعلياً حيسيح لإن الأرقام الخزعبلية اللي هم بيتكلموا بيها دي أرقام بره المنهج .. مفيش حد درس إقتصاد وعلوم سياسية عدي عليه حاجة في المنهج شبه اللي فيها الصين دلوقتي عشان كده الحل لازم يبقي من بره الصندوق وحتي دي الحكومة الصينية مش راضية تعملها .. لو عايز تعرف رأيي فالإنهيار الصيني قرب وحيحصل عاجلاً أم أجلاً لإن دولة الظلم مش بتكمل كتير واللي بتعمله الصين في الأقلية المسلمة وحتي الأقلية المسيحية مش قليل .. لكن هل العالم بقي مستعد لليوم اللي الإقتصاد الصيني يقع فيه؟ الإجابة قطعاً لا.
المصدر:
- مقالة بعنوان Forget the Trade War, China is Already in Crises .. إنسي الحرب التجارية الصين في أزمة فعلياً .. نشرت في مجلة Bloomberg وده لينك المقالة الأصلية: |
tps://www.bloomberg.com/news/articles/2019-01-17/forget-the-trade-war-china-is-already-in-crisis
