البتكوين .. لما البرمجة و البورصة يتضربوا في الخلاط مع بعض.

موضوعنا النهارده اللي حنتكلم عنه هو البيتكوين Bitcoin اللي هو الميكس بين كل حاجة انت مش مبتقدرش تفهمها عن المعاملات البنكية مضروبة في الخلاط مع كل حاجه انت مبتقدرش تفهمها عن البرمجة .. الحقيقة إن البيتكوين دي هي حاجة أو جزء من كيان كبير أوي إسمه العملات الأليكترونية أو Cryptocurrencies و إختصاراً بيسموها كريبتو Crypto .. انت أكيد سمعت و شفت في الإعلام و علي الSocial Media ناس كتير بتتكلم عن البيتكوين بالذات و يمكن حتي مصطلح Cryptocurrencies ده جديد عليك بس يمكن السبب في إن الإعلام إتكلم كتير أوي عن البيتكوين هو إن سنة 2017 البيتكوين نطت نطة جامدة أوي من 1000 دولار للبيتكوين الواحدة في بداية السنة ل9000 دولار في نوفمبر وعلي أخر السنة كان سعر البيتكوين وصل 20,000 دولار .. الفكرة بمنتهي البساطة إن البيتكوين أو Cryptocurrencies بشكل عام قبل السنة اللي فاتت كان عدد محدود أوي من البشر اللي يسمعوا عنها و يعرفوا هي إيه أصلاً .. خلال سنة واحدة بس الكلام عن البيتكوين بقي عامل زي الكلام عن أغنية ديسباسيتو اللي هي الناس كلها عارفاها بس مش فاهمه هي بتقول إيه؟

جزء من هوس العالم بالبيتكوين هو الأخبار اللي بنسمعها و بنشوفها خصوصاً علي Social Media عن الناس اللي بتاجر فيها و بتستثمر فلوسها و بقوا مليونيرات وهم مبيعملوش حاجة فعلياً في حياتهم .. المشكلة إنك لما بتشوف قيمة البيتكوين وهي عمالة تطلع و تنزل زي دقات قلبك لما بتشوف الكراش بتاعتك ماشية في الشارع فالطبيعي إن مخك يقولك إن الناس تبقي حذرة شوية في التعامل معاها .. الإخوة بتوع علم النفس و علم الإجتماع بيفسروا هوس الناس بإنها تحط فلوسها في البيتكوين بحاجة إسمها FOMO ودي إختصار جملة Fear Of Missing Out يعني الخوف من فرصة إنك تبقي مليونير من غير ما تتعب تروح منك .. وسط كل الهري و الفتي اللي انت بتسمعه عن البيتكوين فإحنا حنحاول نشرحلك بمنتهي البساطة 3 حاجات في المقالة دي:

إيه هي البيتكوين Bitcoin؟
إيه هي الBlockchain أو البلوك-تشين و دي التكنولوجيا اللي إتبنت عليها فكرة البيتكوين؟
هي إزاي الناس بتحط فلوس و بتكسب فلوس من البيتكوين و الCryptocurrencies بشكل عام؟

خلينا نبدأ بالسؤال الأول .. إيه هي البيتكوين؟

بص يا سيدي فيه 3 كلمات تحطهم حلقة في ودنك أول ما تسمع سيرة البيتكوين .. ال3 كلمات دول هم عملة أو Currency و رقمي أو Digital و لامركزي أو Decentralized .. لما تحط ال3 كلمات دول مع بعض يطلعلك شرح البيتكوين وهي إنها عملة رقمية لا مركزية .. يعني انت بتتكلم عن عملة زيها زي الجنيه و زيها زي الدولار بس العملة دي مش ورقية يعني مش ورقه بتتمسك في الإيد تروح بيها للبقال تشتري جبنة و حلاوة .. البيتكوين هي عبارة عن كود Computer Code و معني إنها كود إن مفيش أي بنك أو حكومة ليها القدرة علي السيطرة علي البيتكوين .. انا عارف ان الكلام ده لحد دلوقتي هو أساساً صعب إنه يتفهم فخلينا نعيد تاني بشكل مبسط أكثر.

البيتكوين هي عملة Virtual أو إفتراضية يعني متقدرش تمسكها بإيدك و بتقدر تستخدمها في أي حتة في العالم ومعليهاش أي ضرائب أو دمغات أو جمارك .. الأهم إنها Open Source Application زيها زي Android Operating System يعني انت لو فتحت الGoogle Play Store حتلاقي فيه Apps كتير فيه ناس عادية عاملينها و يقدروا ينزلوها للناس تعملها Download وتشغلها علي Smartphones بتاعتهم ودي نفس الخاصية الموجودة في Cryptocurrencies عموماً إن اي حد يقدر يعمل واحدة و ينزلها السوق .. معني إنها Open Source Application إن مفيش رقابة علي مين بيعمل إيه؟ .. مفيش حكومة بتقولك إدفع ضرائب أو انا عايز شوية الفكة دول .. أظن السؤال اللي قدامك دلوقتي و لازم تكون بتسأله لنفسك طب هو انا بكسب فلوس إزاي من البيتكوين؟ هنا بقي الموضوع بيخش في شوية فلسفة فمعلش حاول تستحملني.

دي بس شوية من الCryptocurrencies اللي موجودة في السوق وزي ما انت شايف باسم الله ما شاء الله هم كتير شوية و الغريب إننا منعرفش منهم غير البيتكوين بس.

البيتكوين زيها زي الجنيه .. حضرتك بتروح تشتري علبة شيكولاتة تودو فبتسأل البياع بكام دي فبيقولك ب4 جنيه .. السؤال دلوقتي هو انا لو معايا بيتكوين إزايأاحول ال4 جنيه دول ليها؟ .. السؤال من ناحية تانية .. إحنا عارفين إن الجنيه المصري قيمته إتداس علي وشها بعد قرار التعويم فلو حبيت أعرف قيمة البيتكوين بعرفها إزاي؟ و الإجابة علي السؤال ده هو سؤال ثاني: هو انت عرفت إزاي إن قيمة الجنيه المصري إتداس علي وشها في السوق؟

قيمة العملة وهنا انا بتكلم عن أي عملة اللي بيحددها ان فيه شويه بشر إتفقوا مع بعض علي قيمتها .. يعني قيمة العملة هي مجرد إتفاق بين شوية بني أدمين .. خليني أديلك مثال تاني .. تخيل إنك دخلت علي OLX تدور علي عربية مستعملة فلقيت واحد منزل إعلان لعربية لادا 2107 موديل 2000 مثلاً و طالب فيها مليون جنيه لمجرد إنه داهنها لون بينك أو إنه حاططلها إكسسوار جديد مش موجود في السوق .. ساعتها انت حتسأل نفسك هو المجنون إبن المجنونة ده إزاي طالب مليون جنيه في عربية لادا مستعملة؟ و ساعتها الإجابة علي السؤال ده هو إن البني أدم ده مقتنع أو عارف إن فيه ناس هبل ممكن يدفعوا المبلغ ده لمجرد إن تبقي معاهم حاجة مميزة .. طالما فيه إتنين متفقين علي إن العربية اللادا المستعملة ممكن سعرها يبقي مليون جنيه يبقي خلاص هو ده بقي سعرها و بقت قيمتها في السوق.

الحقيقة إنك لو إتكلمت مع حد فاهم شوية في الCryptocurrencies حتلاقيه مش متحمس أوي للبيتكوين قد ما هو متحمس للتكنولوجيا الأم بتاعتها وهي تكنولوجيا البلوك تشاين Blockchain .. التكنولوجيا دي حتي الناس اللي مش مقتنعة أوي بالCryptocurrencies شايفين إن الBlockchain دي يعتبر أحسن إختراع إتعمل في البرمجة من أيام الQBasic .. عشان أفهمك يعني إيه Blockchain خليك معايا في المثال ده .. تخيل إنك عايش في مصر و معاك مثلاً 100,000 جنيه و إبنك بيدرس في ألمانيا مثلاً و عايز تحوله الفلوس دي لليورو هناك .. اللي بيحصل إنك بتروح مثلاً لبنك HSBC أو أي بنك تاني و تديلهم ال100,000 جنيه وهم بيحولوها ليورو و بتتبعت لفرع البنك اللي في المدينه الألمانية اللي إبنك عايش فيها باليورو بس الأول بيحتاجوا يتأكدوا من شوية حاجات زي إن الفلوس بتاعتك دي مش مسروقة و جايه منين؟ .. الإجراءات دي كلها بتاخد وقت ممكن يوصل لأيام .. الBlockchain بتعمل الإجراءات دي كلها بسرعة ممكن توصل لساعة بالكتير أوي .. إزاي ده بيحصل؟

الفلوس العادية اللي هي الجنيه و اليورو و الدولار و غيرها عشان تنقلها من مكان لمكان بتحتاج تتنقل عن طريق وسيط اللي هو البنك و البنك لازم يسجل كل عملية إنتقال مالي أو Transaction في سجل بيسموه Record أو Ledger فالعملية دي بتاخد وقت .. لما حضرتك يبقي معاك 100,000 جنيه تقوم محولهم للبيتكوين و تبعتهم لإبنك في ألمانيا بالبيتكوين يقوم هو محولها ليورو فالعملية دي كلها مش بتحتاج بنك يعملهالك لإن كل الTransactions أو الإنتقالات المالية اللي بتتعمل بالبيتكوين مش بتتسجل في Record أو Ledger جوه سجل في بنك .. اللي بيحصل ان الBlockchain بتسجل الTransaction ده جوه الMemory بتاعة ملايين الكومبيوترات العشوائية المتوزعة علي الكرة الأرضية وهو ده اللي الناس بتقصده لما بتتكلم عن إن البيتكوين عملة لا مركزية أو Decentralized.

فكرة الBlockchain هي إنها بتديك أمان و سرعة في التعاملات سواء المالية أو أي حاجة تانية .. انت مبقتش محتاج Server ثابت في مكان محدد إنما انت بتوزع المعلومات علي ملايين الكومبيوترات علي مستوي العالم فانت مبقاش ينفع إن البيتكوين يتعملها Hack .. لما بتتكلم عن بنك زي HSBC أو QNB أو حتي بنك مصر هو مخزن كل معلومات العملاء بتوعه في كومبيوتر مركزي Server قاعد في مكان محدد فأي Hacker يقدر يخترقه و يسرق اللي هو عايزه .. الBlockchain مش كده .. انا عارف إن الموضوع لسه برده متفهمش أوي عند ناس كتير فخليني أديلك مثال غبي شوية .. تخيل إن الBlockchain دي عملية معقدة شوية زي مثلاً نفس طريقة تحويل الفراخ الحية لقطع الناجتس اللي عندك كنتاكي .. معني إنك تحاول تعمل Hack علي Blockchain زي ما بالضبط انت تمسك قطعة ناجتس متحمرة إشتريتها من كنتاكي و تقول لنفسك بص بقي انا بقدرة قادر حرجع قطعة الناجتس دي لفرخة حية بريش تقول باك باك تاني .. ده مستحيل .. وعشان كده فيه ناس كتير منها مؤسسات سلسلة محلات وولمارت Walmart ودي سلسلة محلات شبه كارفور كده بس في أميركا و شركة كبيرة زي IBM و بنك عملاق زي J.P. Morgan كلهم بيفكروا إزاي يطوروا من فكرة Blockchain عشان يستفيدو بيها وكمان عندك جيش الدفاع الإسرائيلي شغال دلوقتي علي تطوير الBlockchain بحيث ينفع تبقي الPlatform أو الأساس اللي شبكة المخابرات و الإتصالات العسكرية الإسرائيلية مبنيه عليه.

الطريقة اللي بتشتغل بيها الBlockchain هي إن حضرتك مثلاً بتحول فلوس لحد فالطلب بتاعك ده أول حاجة إنه بيتحط في Block أو علبة .. بعد كده الطلب بتاعك ده بيترمي في الإنترنت و كل الشبكات الموجودة علي الإنترنت بتاخد طلبك تعمل منه نسخ كتير أوووووي .. النسخ دي وظيفتها إنها أولاً تتأكد من طلبك ده شرعي و ثانياً إنها تحمي طلبك إن حد يعمله Hack .. بمجرد ما النسخ دي إتعملت و إتأكدوا إنك في السليم فالBlock بتاعتك بيتقال عليها إنضمت للسلسلة و العملية بتاعتك بتتم.

خلاصة الكلام اللي عايزينك تفهمه بخصوص موضوع الBlockchain ده إن لو انت لسه مش فاهم هي إزاي شغالة أوي متقلقش فيه ملايين غيرك مش فاهمين أوي لإنها لسه تكنولوجيا مولودة بتتطور و بتكبر يوم عن يوم بس ده حيودينا للسؤال الثالث و الأخير: هي إزاي الناس بتحط فلوس و بتكسب فلوس من Cryptocurrencies؟

زي ما قلتلك إن البرنامج أو Software اللي الCryptocurruncies مبنية عليه هو Open Source زيها زي Android OS وده معناه إن زي ما أي حد يقدر يعمل Mobile Application و ينزله علي Google Store فأي حد يقدر يعمل Cryptocurrency و ينزلها السوق وده فعلاً اللي حصل .. انت عندك أكثر من 1500 عملة منها أسامي صعب إنك تتخيل إنها فعلاً أسامي عملات زي Titcoin و Trumpcoin و Jesuscoin و Insanecoin و Electroneum و Wax و DeepOnion .. يعني تخيل إن فيه حد قعد يفكر في إسم غبي لعملة أليتكرونية و هداه تفكيره لإسم Deep Onion يعني البصلة العميقة .. هنا انت محتاج تفهم حاجتين:

الCryptocurrencies زيها زي العملات العادية فيه منها عملات تقيلة ليها وزن في السوق .. فزي ما الدولار هو أقوي عملة ورقية في العالم الBitcoin برده هو أقوي عملة أليكترونية.
مش كل الCryptocurrencies اللي انا قلت أساميها دي تعتبر عملات إتعملت للإتجار .. انت عشان تعمل شركة صغيرة Startup و تبدأ تجيبلها راس مال فانت بتعرض إسهمها للبيع .. فيه Startups كتير بقت بتفضل إنها بدل ما تمشي في الإجراءات القانونية المعقدة دي إنها الأسهل إنها تعمل Cryptocurrency بحيث إن مثلاً لو الStartup بتاعتي هي عبارة عن محل فول وفلافل فانا حعمل Cryptocurrency إسمها مثلاً فلافلكوين Falafelcoin بحيث إن حضرتك لما تشتريها بفلوسك اللي انا حاخدها أحطها في جيبي فانت كإنك بتاخد مني كوبون مثلاً إن الرجل ده إشتري الفلافلكوين بتاعتي فانا حفضل أديله سندويتشات مجانية طول حياته .. صدقني لو قلتلك إن الموضوع سهل أوي إنك يبقي عندك فكرة Startup فتقرر تعمل Cryptocurrency و تبيعها عشان تجيب فلوس وده بيتسمي Initial Coin Offering أو ICO ودي إختصار طرح العملة للإكتتاب العام .. سنة 2017 الشركات اللي عملت كده علي مستوي العالم قدرت تدخل لنفسها فلوس 6.5 مليار دولار وفيه منهم شركه قدرت تدخل لنفسها 35 مليون دولار في أقل من 30 ثانية.

اللي عايزك تفهمه إن الناس دخلت في مجال إنها تحط فلوسها في البيتكوين لمجرد إنها شافت ناس كتير بتعمل كده .. الموضوع بقي فيه نسبة هوس مش طبيعية لدرجة إن فيه شوية ناس عملت Cryptocurrency اسمها Dogecoin وسموها علي إسم كوميكس إتشهر علي الفيسبوك عشان يتريقوا علي الناس المهووسة دي فاللي حصل إن الناس صدقت إن العملة دي حقيقية فعلاً ودلوقتي قيمة العملة دي وصل 2 مليار دولار .. المجال ده مليان شركات بتضحك عليك عشان تديها فلوس و تحطها في جيبها .. انا مش بقول ان السوق ده كله حرامية .. اللي انا بقوله إن في سوق زي Cryptocurrencies مفيهوش أي رقابة فانت محتاج تحط عينك في وسط راسك وانت بتحط فلوسك فيه .. وعشان مبقاش بتكلم من العدم خليني أديلك مثال واضح علي إزاي السوق ده فيه شركات حرامية و المثال ده هو شركة إسمها Block One ودي شركة بانية كيانه كلها علي Software بيسموه EOS وده حاجة زي Blockchain كده بس هم بيقولوا إنه أحسن .. الشركة دي لما جت تعمل ICO قدرت تجيب فلوس 1.5 مليار دولار في أقل من 9 شهور .. عشان بس أحطك في الصورة .. لما شركة Facebook طرحت أسهمها في البورصة للإكتتاب العام إحتاجت 7 سنين عشان تجيب مليار دولار و شركة زي UBER إحتاجت 5 سنين .. ده رغم فيه تقرير إتنشر في جريدة The Wall Street Journal وصف فيه Block One إنها شركة مش ناوية تعمل Software ولا ناوية تبيع حاجه وكل اللي بتفكر فيه انها تحط في جيبها فلوس و خلاص.

المصدر:

الحلقة الثالثة من الموسم الخامس من برنامج Last Week Tonight with John Oliver وده برنامج بيتذاع علي قناه HBO وده لينك الحلقة علي YouTube لو حبيت تشوفها بنفسك:
https://www.youtube.com/watch?v=g6iDZspbRMg