في واحد من المشاهد التاريخية الحقيقة في السينما المصرية في فيلم عوكل لما الفنان (محمد سعد) كان ماشي في شوارع اسطنبول وهو مش عارف إنها اسطنبول ولقي قلعة شبه قلعة (صلاح الدين الأيوبي) اللي عندنا في القاهرة بتطل علي مضيق البوسفور فسأل السؤال المشهور والمنطقي .. ايه اللي جاب القلعة جنب البحر؟ .. إحساس الاستغراب اللي شخصية (عوكل) عاشته هو نفسه اللي ماليني وأنا بكتب كلامي ده دلوقتي لما بنيجي نفتح مع بعض موضوع التجربة النرويجية في دخول العربيات اللي بتشتغل بالكهرباء اللي بيسموها Electric Vehicle أو EV اختصارا لسوق العربيات بتاع البلد واستغرابي تقدر تلخصه في سؤال منطقي جداً .. إيه اللي خلي بلد بتتصنف علي إنها من أكتر الدول المنتجة للنفط والغاز الطبيعي في العالم واللي تقدر تقول عليها المملكة العربية السعودية بتاعة أوروبا .. بلد قطاع البترول بتاعها بيمثل 24% من الناتج الوطني الإجمالي أو GDP بتاعها وبلد 52% من صادراتها جاية من قطاع البترول اللي مخليها ثالث أكبر منتج للغاز الطبيعي في العالم إنها تبقي نفس البلد اللي خلال سنة 2025 متوقع إن ميتبعش فيها ولا عربية ماشية بمحرك إحتراق داخلي سواء بالبنزين أو بالسولار وتبقي كل العربيات اللي بتتباع في التوكيلات تكون بلا استثناء EV؟ .. بمعني أخر .. إيه اللي جاب القلعة جنب البحر؟
النرويج هي حالة خاصة تستحق إنك تتعدل في كرسيك وإنت بتحاول تفهم هي إزاي بلد عايش فيها 5.5 مليون بني أدم في ظل إقتصاد بيوفرلهم أعلي مستوي معيشة ممكن تتخيله حضنت العربيات اللي بالكهرباء واعتبرتها حد من العيلة زي ما إحنا في مصر عملنا مع سبيروسباتس لما المقاطعة بدأت .. سنة 2024 كانت أول مرة تحصل في تاريخ النرويج إن عدد العربيات اللي بالكهرباء اللي ماشية في الشوارع تبقي أكتر من عدد العربيات اللي بتمشي بالبنزين .. لو دخلت العربيات اللي بتمشي بالسولار في حسبتك حتلاقي إن نصيب العربيات اللي بالكهرباء حوالي تلت العربيات اللي ماشية في شوارع البلد كلها .. سنة 2024 حتلاقي إن 88.9% من العربيات الجديدة اللي بتتباع في السوق هي عربيات بالكهرباء قصاد إن سنة 2023 النسبة كانت 82.4% ودي أرقام جاية من وزارة النقل النرويجية .. ليه النرويج حالة خاصة؟ .. عشان لو حطيت النرويج في مقارنة مع بريطانيا مثلاً حتلاقي إن خلال سنة 2024 بس 20% من العربيات الجديدة اللي بتتباع في السوق هي EV واللي كانت نسبة الإنجليز عملوا بيها فرح .. في أميركا اللي هي اخترعت العربيات اللي بالكهرباء خلال برده 2024 يدوبك 7% من العربيات الجديدة اللي اتباعت في السوق كانت EV .. السؤال اللي بياكل دماغي هو عملتوها إزاي دي؟
الفكرة بمنتهي البساطة إن النفس البشرية فيها نفس الخصلة اللي ربنا حطها في المخلوقات كلها وهي إننا مش بنقدر نحس بالتغيير البطيء .. أصدمنا نتفاجيء .. خدنا واحدة واحدة حناخد علي قفانا .. كانت فيه تجربة علمية مشهورة أوي إن علماء جابوا ضفدع ورموه في حلة مياة سخنة فالضفدع علي طول أول ما حس بحرارة المياة نط منها .. خد نفس الضفدع حطه في حلة مياه بس سخنها براحة علي نار هادية حتلاقي الضفدع مات في الحلة من غير ما غريزة حب البقاء تخليه ينط من الحلة عشان ينقذ حياته .. اللي عملته الحكومة النرويجية إنها واحدة واحدة وببطء شديد مشوا علي خطة قعدت فوق ال30 سنة شغالة علي إنها تقنع المواطن النرويجي البسيط إن الأحسن ليك هو إن يبقي معاك عربية بالكهرباء .. شوية يفرضوا ضرائب جديدة علي العربيات اللي شغالة بالبنزين والسولار بس العربيات اللي بالكهرباء فضلت معفية من الضرايب دي .. شوية يقولك لو ناوي تشتري عربية فانت عشان ترخصها حيسألوك هي عربية كهرباء ولا عربية بالبنزين .. لو عربية بالكهرباء مش حتدفع عليها فلوس بس لو عربية بنزين حيدفعوك دم قلبك .. تيجي إنت قلبك حامي وعايز تسمع صوت عننننن عننننن في كل مرة تدوس بنزين تقول وماله حدفع عشان أرخص .. تيجي العربية تعطل .. توديها للميكانيكي يقولك عايزين عايزين طقم بوجيهات .. تروح تشتريهم تلاقي عليهم ضريبة VAT قد ثمن البوجيهات .. برده إنت دمك حامي ومش بتحب حد يمشيك علي مزاجه وبتدفع .. تيجي تسافر بعربيتك تعدي علي كارتة .. تلاقي العربية اللي قدامك كهرباء متدفعش فلوس علي الكارتة إنما إنت يدفعوك ثمن فاتورة الكهرباء بتاعة الكارتة للشهر كله .. واحدة واحدة وتحت شعار بتبعديني عن حياتك بالفلوس المواطن النرويجي بدأ غصب عنه يروح للعربيات اللي بالكهرباء.
ده مشي مع شوية حركات أعلامية أكنر منها اي حاجة تانية .. سنة 1994 النرويج بقي فيها اوتوبيسات عامة شغالة بالكهرباء .. سنة 1998 كانت النرويج من أوائل الدول الأوروبية اللي ترحب بالعربيات اللي بالكهرباء في شوارعها .. سنة 2009 كانت أول بلد اسكندافية اللي هي الدول اللي عايشة فوق خالص عند القطب الشمالي وحتلاقي أعلامها كلها في صليب حاود ناحية الشمال زي الدانمرك والسويد وفنلندا اللي يتعمل فيها المؤتمر الدولي للعربيات اللي بالكهرباء
اللي عملته النرويج ده علي فكرة مش هو اللي بتعمله دول تانية في أوروبا رغم إنهم هم الاتنين عايزين يوصلوا لنفس الهدف .. يعني سواء الإتحاد الأوروبي أو بريطانيا والنرويج عايزين يخلوا العربيات اللي ماشية في الشارع عربيات بالكهرباء بس إذا كانت النرويج وصلت لده بالتصوير البطيء وبالصبر رافعين شعار كفاح سحلية وعزيمة تنين فالإتحاد الأوروبي وبريطانيا مشوا بمبدأ اقطع عرق وسيح دمه .. مفيش ولا بلد في الإتحاد الأوروبي حيبقي مسموح يتباع فيها عربية شغالة بمحرك إحتراق داخلي بداية من سنة 2035 .. بريطانيا طبقت نفس القرار بس بدري 5 سنين في 2030.
الموضوع بدأ مع النرويجيين سنة 2017 لما فيه حد صحي الصبح قرر إن ليه لا البلد كلها تحقق التارجيت بتاع إنها تبقي زي ما بيتقال توصل لمستوي Zero Emissions يعني بلد مش بتطلع أي انبعاثات ضارة بالبيئة .. الفكرة بمنتهي البساطة إن في المجمل 20% من انبعاثات غازات أول وثاني أكسيد الكربون اللي بتطلع للجو جاية من عوادم العربيات .. متفهمش إزاي الفكرة دي إنتشرت في دماغ النرويجيين ولا أجدعها مرض فطري زي بتاع لعبة The Last of Us بحيث حطوا لنفسهم سنة 2025 هي السنة اللي التارجت ده يتحقق .. قصاد إن النرويج صرفت دم قلبها عشان حرفياً تعمل محطة شحن بالكهرباء لكل مواطن بحيث وصلوا إن دلوقتي البلد فيها 27,000 محطة شحن بمعدل إن فعلياً كل إتنين مواطنين في البلد كلها بيشيروا في محطة شحن خصوصا في بلد في الشتاء ومع إنفخفاض درجات الحرارة قدرة شحن البطاريات بتقل لوحدها 20% .. فإنت مش بس عايز تبني محطة شحن كهرباء في كل حتة ده إنت محتاج تخلي المواطن البسيط يغير من طريقة تفكيره فيما يتعلق بشحن عربيته .. بمعني .. إنت لازم تتعامل مع شحن عربيتك بنفس طريقة تعاملك مع شحن موبايلك مش تفويل عربيتك .. حضرتك بتسوق فعينك بتبقي علي عداد البنزين لما بيوصل إن فاضله شرطتين بتفول .. فونك مش كده .. إنت في أي حتة سواء فونك شحنه 80% أو 50% أو 10% لو جاتلك فرصة تشحن فونك بتشحنه لإن محدش عارف إيه اللي ممكن يحصل وتتسحل في مشوار ومتعرفش تشحن فونك ويفصل شحن.
الحقيقة إن التجربة النرويجية توريك حاجتين مهمين أوي:
- الموضوع ملوش علاقة بالشعارات قد ما له علاقة بطبيعة النفس البشرية .. لو بكره الصبح الحكومة المصرية قالت لنفسها أنا شايفة إن المصريين بياكلوا Fast Food كتير والمواطن البسيط مش بياكل يومياً الكمية الكافية من الخضار والفاكهة ولازم ده يتغير فإنت لو عملت حملة إعلانات من هنا للسنة الجاية عن أهمية الأكل الصحي فكل ده حيترمي في الزبالة قصاد ريحة تتبيلة الفراخ البروستد وهي نازلة سخنة ومعاها شوية بطاطس محمرة وكنزاية سبيرو سباتس .. بس لو قررت إنها تفرض ضريبة مضافة علي كل وجبة Fast Food بحيث الضريبة دي مرتبطة بكمية الخضار اللي المطاعم بتقدمه مع الوجبات فإنت ربطت الموضوع بالفلوس .. ساعتها بشوية وقت وشوية توجيه صح لإزاي الضرايب دي بتتفرض حتلاقي نفسك وصلت للي إنت عايزه من غير ما تتعب نفسك .. النرويجيين عشان يخلوا العربيات اللي ماشية في الشارع كلها بالكهرباء مفضلوش يزنوا في ودان الناس عن إزاي ده حينقذ البيئة .. هم ربطوا الموضوع بالفلوس وسابوا النفس البشرية تتصرف.
- ده قصاد إنك برده لازم تبقي فاهم إنك إذا أردت أن تطاع فأمر بما هو مستطاع .. مينفعش تفرض ضرايب علي العربيات اللي بالبنزين وعايزني أشتري عربيات بالكهرباء وإنت مش موفرلي محطات شحن .. النرويج صرفت دم قلبها وسحبت فلوس كتير من صندوق الثروة السيادية Sovereign Wealth Fund بتاعها اللي فيه أكتر من 1.7 ترليون دولار عشان تبني شبكة بنية تحتية جبارة لشحن العربيات اللي بالكهرباء .. ده نفص صندوق الثروة السيادية اللي خلي النرويج تدوس جامد في سكة محطات إنتاج الكهرباء بالرياح بحيث دلوقتي 88% من كهرباء البلد جاية من الطاقة المتجددة فإنت لقيت نفسك صرفت فلوس عشان تنتج كهرباء من غير ما تلوث البيئة وخليت الناس تركب عربيات ببتتشحن بنفس الشبكة.
معاك إن التجربة النرويجية خاصة شوية لإنك بتتكلم عن بلد صغيرة زي ما قلتلك في الأول دي بلد عايش فيها 5.5 مليون بني أدم .. حي شبرا لوحده عايش فيه ناس أكتر من كده .. ده بيخليك قصاد بلد سهل جداً علي عضو في البرلمان إنه حرفياً يبقي عارف كل الناس اللي عايشين في الدايرة الإنتخابية بتاعته لإنها بتقي أوضة وصالة .. الوضع السياسي في البلد نفسه مختلف .. النرويج بلد ملكية دستورية زيها زي بريطانيا الملك بيكون دوره شرفي أكتر من أي حاجة الإنتخابات البرلمانية هي اللي بتحددد مين يمسك منصب رئيس الوزراء وده بيخلي شركات البترول ملهاش النفوذ اللي إنت متخيله أو بتشوفه في دول تانية زي أميركا مثلاً .. زود علي كده إن النرويج مش بلد بتصنع عربيات .. النرويج مش زي بريطانيا ولا حتي زي السويد اللي عندها فولفو لإن صناعة العربيات الكبيرة في بريطانيا كانت السبب ورا إن سنة 2022 الحكومة البريطانية قررت إنها تلغي الإعفاءات الضريبية اللي كانت بتعطي للعربيات اللي بالكهرباء علي أساس إن ده بيخلي سوق العربيات في البلد عادل اكتر بس طبعاً كلنا عارفين إن ضغط شركات العربيات البريطانية كان السبب ورا القرار .. مش بس كده .. فاكر لما قلتلك من شوية إن بريطانيا حطت لنفسها سنة 2030 هي السنة اللي تتلغي فيها مبيعات العربيات اللي بتشتغل بالبنزين؟ القرار ده اتعدل عشان بريطانيا تمشي مع الإتحاد الأوروبي بإن الإلغاء يتفعل سنة 2035 .. في إنتخابات 2024 اللي جابت حزب العمل تاني القرار اتعدل تالت عشان ترجع سنة 2030 هي سنة الإلغاء وشركات العربيات البريطانية قالبة الدنيا .. الشاهد من اللي بقوله إن النرويج معندهاش الصداع ده .. كل العوامل دي خلتك قصاد بلد عندها نسبة عربيات بالكهرباء مقارنة بعدد السكان أكتر من أي بلد تانية .. بلد اشترت عربيات تيسلا Tesla بأرقام خلت رئيس الشركة (إيون ماسك) يزور النرويج عشان يشكر شعبها بنفسه علي دعمه لشركته ولفكرة العربيات اللي بالكهرباء.
المصادر:
- مقالة بعنوان Norway on track to be first to go all electric نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/news/articles/cg52543v6rmo - مقالة بعنوان How did Norway become the electric car superpower? Oil money, civil disobedience and Morten from a-ha نشرت في جريدة The Guardian وده لينك المقالة الأصلية:
https://www.theguardian.com/lifeandstyle/2024/mar/12/how-did-norway-become-the-electric-car-superpower-oil-money-civil-disobedience-and-morten-from-a-ha - مقالة بعنوان How Norway became the trailblazer for electric vehicles نشرت في موقع DW وده لينك المقالة الأصلية:
https://www.dw.com/en/how-norway-became-the-trailblazer-for-electric-vehicles/a-71208744#:~:text=Favorable%20state%20policies%20have%2C%20undoubtedly,road%20charges%20and%20parking%20fees. - مقالة بعنوان Learning from Norway’s electric vehicle success story نشرت في مجلة Forbes وده لينك المقالة الأصلية:
https://www.forbes.com/sites/sverrealvik/2024/12/09/learning-from-norways-electric-vehicle-success-story/
