المملكة العربية السعودية دلوقتي عندها مشكلتين كبار أوي بس بسطا جداً .. عشان مدخلكش في حوارات إقتصادية كتير فخليني أخش في الموضوع علي طول .. دلوقتي فيه إختراع إسمه رؤية 2030 أو Vision 2030 ودي فكرتها إن (محمد بن سلمان) ولي العهد السعودي و اللي يعتبر الحاكم الفعلي للمملكة و اللي ربنا إبتلي به السعودية عايز يخلي الإقتصاد السعودي ميبقاش معتمد أوي كده علي تصدير البترول و عايزه يبقي إقتصاد متنوع شغال في كذا حاجة علي أساس إن حيجي يوم و الناس تبطل تشتري بترول .. لحد دلوقتي كلام الرجل زي الفل .. عشان رؤية 2030 دي تتعمل لازم السعودية تلاقي طريقة تقول للمستثمرين الأجانب تعالوا حطوا فلوسكوا عندنا في مشاريع ملهاش علاقة بالبترول بس لحد دلوقتي هم مش عارفين يعملوا ده لإن لحد دلوقتي هم مش لاقيين رد يردوا به علي السؤال اللي بيسأله أي مستثمر أجنبي اللي هو لو انا معايا فلوس وعايز أحطها في الخليج إيه اللي يخليني أروح أحطها في السعودية و محطهاش في دبي؟ .. دي المشكلة الأولانية .. المشكلة الثانية إن البنوك السعودية بتصوت إن الودائع اللي فيها بتقل جامد .. الناس بتسحب فلوسها من البنوك في السعودية و بتطلعها بره البلد لسبب ما محدش فاهمه بس ده عامل حالة هلع في قطاع البنوك هناك .. اللي حنحاول نفهمه النهارده هو إيه الاجابة علي السؤال الأولاني و تفسير المشكلة الثانية.
الحقيقة هي المشكلة أكبر من كده .. بناء علي تقرير مؤتمر الأمم المتحدة للتجارة و التنمية اللي إتنشر يوم 7 يونيو 2018 فالإستثمارات الخارجية اللي بتدخل السعودية اللي بتتسمي Foreign Direct Investment أو FDI إختصاراً قلت ل1.4 مليار دولار خلال سنة 2017 بعد ما كانت 7.5 مليار دولار سنة 2016 .. يعني مش بس المستثمرين الأجانب مش عايزين يروحوا السعودية ده المستثمرين اللي كانوا حاطين فلوسهم فعلاً جوه المملكة سحبوا فلوسهم و مشيوا .. بناء علي تقرير عملته شركة إستشارات مالية إسمها Capital Economics مقرها لندن إتنشر يوم 20 سبتمبر 2018 فان حجم الفلوس اللي خرجت بره السعودية خلال سنة 2017 وصل 5% من إجمالي الناتج الوطني السعودي GDP في حين إن سنة 2016 حجم الفلوس اللي خرجت بره السعودية كانت 2% بس من الGDP الإجمالي للمملكة .. بدأت تفهم البنوك السعودية بتصوت ليه؟
لو رحت سألت المسئولين السعوديين هو إيه اللي بيحصل؟ حتلاقيهم بيقولولك متقلقش كل حاجة تحت السيطرة وفيه تفسير بسيط خالص وهو إن الفلوس اللي بتطلع بره المملكة دي مش فلوس مستثمرين أجانب لغوا المشاريع اللي كانوا شغالين فيها و مشيو بره البلد .. لا خالص .. دي فلوس بتاعة الحكومة السعودية وهي سحبتها من البنوك عشان تستثمرها بره البلد او علي الأقل ده اللي بيقوله (أيمن بن محمد السياري) نائب محافظ البنك المركزي السعودي خلال كلامه في مؤتمر صحفي إتعمل يوم 16 سبتمبر 2018 .. لو انت صدقت الكلام ده فالمفروض إن اللي بيسحب الفلوس دي حاجة إسمها صندوق الإستثمارات العامة Public Investment Fund أو PIF ودي مؤسسة مملوكة للدولة و تعتبر تحت إيد (محمد بن سلمان) وهي اللي المفروض إنها بتنفذ رؤية 2030 اللي إتكلمت عنها في البداية خالص .. فاكر الإشاعة اللي طلعت إن (محمد بن سلمان) كان عايز يشتري نادي مانشستر يونايتد الإنجليزي ب4 مليار جنيه إسترليني؟ أهو العقد اللي كان حيتكتب إن صندوق الإستثمارات العامة ده قدام الناس هو اللي حيبقي مالك النادي مش (محمد بن سلمان) بشخصه .. صندوق الإستثمارات العامة ده مكنة فلوس بس مش بتنتج أي حاجة .. تخيل إن الصندوق ده عبارة عن بني ادم غني أوي ومعاه فلوس إشتري بيها أسهم في شركات كبيرة في البورصة و بيعيش علي أرباح الأسهم دي .. ليهم أسهم في شركات كتير أوي من أول شركة زي ArcelorMittal الهندية العملاقة لإنتاج الحديد و الصلب لحد شركة أوبر Uber .. أخر إستثمار بره السعودية عملوه انهم حطوا مليار دولار في شركة عربيات أميريكية إسمها Lucid Air عشان يخلوا الشركة باذن الله يعني تنزل أول عربية ليهم في السوق سنة 2020.
فيه ناس تانية مش مقتنعيين بالتفسير ده زي الناس بتوع شركة Capital Economics اللي بيقولوا إن السعودية عندها مشكلة براسين:
- أولاً الفلوس اللي بتخش السعودية كإستثمارات خارجية قلت من حوالي 1% من إجمالي الGDP السعودي والكلام ده كان خلال الفترة من 2014 لحد 2016 و دلوقتي النسبة بقت 0.3% بس من إجمالي GDP.
- ثانياً إن الفلوس اللي جوه البنوك السعودية بتطلع بره و هنا الكلام مش علي الفلوس اللي الدولة حاطاها في البنك المركزي .. الكلام علي إن مواطنين سعوديين عاديين بقوا بيسحبوا فلوسهم من البنوك السعودية يحطوها بره .. عشان بس تفهم ليه البنوك السعودية بتصوت .. خلال سنة 2016 بس البنوك السعودية قالت إن إجمالي الفلوس اللي كانت جوه السعودية و خرجت بره كانت 5% من إجمالي الGDP السعودي في حين إن الفلوس اللي دخلت السعوديه خلال السنة دي كانت 1% بس من إجمالي GDP.
طب انت تعبت انا عارف من الأرقام الكتير و محتاج تفهم الزتونة .. لو الوضع كمل كده و سعر البترول محصلش فيه جديد وفضل رخيص كده وده إحتمال كبير بالمناسبة فغالبا اللي حيحصل إن (محمد بن سلمان) حيخلي PIF أو صندوق الإستثمارات العامة يوقف شوية من بعزقة الفلوس بره السعودية عشان الإحتياطي النقدي الأجنبي السعودي ميقلش أوي لدرجة إن سعر الريال السعودي قدام الدولار يتهز .. فيه ناس تانية رأيها إن سياسة (محمد بن سلمان) إنه يرخم علي العمال الأجانب اللي عايشين في السعودية عشان يطردهم بره البلد بالذوق فرقعت في وشه لإن أولاً الشباب السعودي متعودتش و رافض فكرة إنه يهين نفسه عشان خاطر الفلوس عكس أي حد بيقرر يروح يتغرب يشتغل في الخليج .. ثانياً إن العمال الأجانب دول كانوا فعليا شايلين الإقتصاد السعودي علي كتفاهم .. الناس دول كانوا قوة شرائية بتاكل و بتشرب و بتبيع و بتشتري .. لما الناس دول خدوا فلوسهم و مشيوا الإقتصاد السعودي حس بفراغ كبير زي اللي كان بيتكلم عنه (عمرو دياب) كده .. جزء من الحل زي ما قلت إن (محمد بن سلمان) يخف شوية من بعزقة الفلوس تحت مسمي الإستثمار السعودي في الخارج بس يمكن الأهم إنه يفتح الباب للعمال الأجانب إنهم يرجعوا تاني بس إذا كانت النقطة الأولانية تنفع تتعمل فانا شخصياً مستبعد إن النقطة التانية تتنفذ .. مش لسبب غير إن عشان محدش يقول (محمد بن سلمان) رجع في كلامه.
المصدر:
مقالة بعنوان Is Saudi Arabia unable or just unwilling to stem the flow of money leaving the country? .. هل السعودية مش عارفه ولا مش عايزه توقف نزيف الفلوس اللي بيخرج بره المملكة؟ .. نشرت في مجلة Forbes وده لينك المقالة الأصلية:
https://www.forbes.com/sites/dominicdudley/2018/09/21/is-saudi-arabia-unable-or-just-unwilling-to-stem-the-flow-of-money-leaving-the-country/#237f03316abb
